Wapiga Mbiu ya Ufalme Waripoti
‘Wenye Furaha Ni Wale Wenye Njaa ya Kiroho’
YESU alisema hivi: “Wenye furaha ni wale wanaoona uhitaji wao wa kiroho.” (Mathayo 5:3, NW) Watu kama hao watatafuta habari yenye kutoa uhai katika Neno la Mungu, Biblia, na kutwaa maarifa hayo kutawaongoza kwenye uhai wa milele.—Mathayo 4:4; Yohana 17:3.
◻ Mtu mwenye njaa ya kiroho katika nchi ya Kiafrika alitembea kwa muda wa saa nne katika baridi na giza ili kupata nakala ya Kitabu Changu cha Hadithi za Biblia. Alipofika kijiji ambako Mashahidi wa Yehova walikuwa wakihubiri, alitamauka sana kuona kwamba kitabu cha mwisho kilikuwa kimeangushwa. Alikaa katika kijiji hicho kwa siku tatu mpaka vitabu vingine viweze kupatikana, na kisha akawa na furaha kuwa na habari hiyo nzuri ya kiroho hatimaye.
Muda wa mwezi wa kukaa kwao katika eneo hilo la pekee, Mashahidi waligawanya vitabu 55, broshua 365, na magazeti 145, wakapata maandikisho 5. Walichomwa moyo sana walipokuwa wakiondoka, watu wazima na watoto pia waliwapazia sauti katika lugha ya Kpelle: “Yehova na awabariki!” Jitihada zinafanywa sasa kufuatia kupendezwa huko.
Mtu mwingine katika nchi hiyo hiyo alikuwa mwenye njaa ya kiroho pia. Alikuwa mtunza hazina wa kanisa lake na ofisa wa tafrija katika wilaya yake. Mashahidi walipomtembelea, alikubali kwa machozi kwamba kanisa lilikosa kufikia matakwa ya Biblia ya Ukristo. Mashahidi walimwonyesha katika Biblia yake mwenyewe jinsi ya kutambua dini ya kweli. Kisha akahudhuria mikutano miwili kwenye Jumba la Ufalme na baadaye akataarifu hivi: “Yale niliyoona na kusikia yalinisadikisha kweli kweli kwamba hii ni kweli.” Alivutiwa na mikutano na mwenendo wa wale waliokuwamo. Alisema kwamba yale ambayo Mashahidi waliomtembelea walikuwa wamesema hayakuwa mambo ambayo walikuwa wamebuni bali yalikuwa mambo halisi. Tangu wakati huo amechukua hatua za kukomesha uhusiano wake pamoja na kanisa, na tokeo limekuwa kwamba ushahidi mzuri umetolewa katika jumuiya hiyo.
◻ Mkatekisti Mmelanesia mchanga katika New Caledonia alikuwa na njaa ya kiroho. Alipata nakala ya kitabu Kweli Iongozayo Kwenye Uzima wa Milele kwenye meza nyumbani mwa mama yake, akasoma sura 2 na 3. Maandiko ya Biblia Kutoka 20:4, 5 na Yohana 4:23, 24 yanayozungumziwa humo yalichochea moyo wake. Kwa sababu ya yale yanayosemwa na maandiko hayo, aliuliza padri wake kwa nini Kanisa la Kikatoliki linakubali matumizi ya sanamu katika ibada. Padri aliepa swali hilo. Mwishowe akaamua kuhudhuria mikutano ya Mashahidi wa Yehova pamoja na mama yake, aliyekuwa tayari ameonyesha upendezi katika kweli. Upendo alioona miongoni mwa Mashahidi na mafundisho yao yenye msingi wa Biblia yalimvutia sana.
Ijapokuwa safari ndefu, kwa kawaida aliomba kusafiri kwa gari za wengine kwenda mikutanoni, upesi akachukua msimamo wake kwa ajili ya kweli, akabatizwa. Sasa yeye ni mtumishi wa huduma. Mama yake na dada zake wawili wa kimwili wakawa Mashahidi wa Yehova pia. Kijana huyo alihubiria watu wa kabila lake akaanza mafunzo mengi ya Biblia. Sasa wengi wao huhudhuria mikutano katika eneo hilo kwa sababu kijana aliona kitabu kinachoeleza Biblia mezani, akajifunza, na kuchukua kwa uzito yale aliyojifunza.
Yehova ana programu kubwa ya kulisha kiroho inayofanya kazi leo, na wengi wananufaishwa kutokana nayo. Isaya alitoa unabii vizuri juu ya hayo aliposema hivi: “Tazama, watumishi wangu watafurahi, bali ninyi [washiriki wa dini bandia] mtatahayarika.” (Isaya 65:13) Sisi ni wenye furaha tukinufaishwa na uandalizi wa Yehova wa kutosheleza njaa yetu ya kiroho.y