Wanapoisoma na Wanavyonufaika

Mapema Asubuhi:

Wenzi fulani wa ndoa, ambao wote hufanya kazi nje, waliamua kuamka dakika kumi tu mapema zaidi kila asubuhi na kutumia wakati kusoma Biblia pamoja kabla ya kuharakisha kuondoka nyumbani. Mambo wasomayo huwapa msingi wa mazungumzo mazuri baada ya kutoka nyumbani.

Mzee mmoja katika Nigeria hutumia programu iliyotayarishwa kwa ajili ya Shule ya Huduma ya Kitheokrasi kuwa msingi wa usomaji wa Biblia wa familia katika nyumba yake. Wao husoma sehemu yayo kila siku baada ya kuzungumzia andiko la siku, mara nyingi asubuhi. Watoto huombwa kusoma kwa zamu sehemu ya Biblia waliyogawiwa. Kisha wao huombwa kuuliza maswali juu ya mistari iliyosomwa.

Mke fulani wa nyumbani katika Japani amesoma Biblia nzima mara moja kila mwaka tangu 1985. Programu yake ni kusoma kwa dakika 20 hadi 30 akianzia saa 11:00 alfajiri kila siku. Kuhusu manufaa anazopata, yeye asema: “Imani yangu imeimarishwa. Inanisaidia kusahau ugonjwa wangu na kukazia akilini tumaini la Paradiso.”

Dada ambaye amekuwa painia kwa miaka 30 lakini ambaye mume wake si Shahidi huamka saa 11:00 kila alfajiri kufanya usomaji wake wa Biblia. Programu yake huhitaji kusoma karibu kurasa nne kutoka kwa Maandiko ya Kiebrania, sura moja kutoka Maandiko ya Kigiriki ya Kikristo, na mstari mmoja kutoka Mithali. Yeye amesoma Biblia nzima kila mwaka tangu 1959. Yeye asema: “Matokeo ya usomaji wangu ni kwamba nahisi napendwa na Yehova . . . napata kitia-moyo, faraja, na sahihisho.” Aongezea hivi: “Kusoma Biblia ni kama kuwa na Yehova akinitia nguvu kila siku.”

Dada mmoja aliyejifunza kweli katika nchi ambako utendaji wa Mashahidi wa Yehova ulikuwa umepigwa marufuku pia ana mume anayepinga itikadi zake. Yeye ameweza kufanya usomaji wake wa Biblia tokea Jumatatu hadi Ijumaa, kati ya saa 12:00 na saa 1:00 za asubuhi. Kufanya hivyo kumempa nguvu ya ndani. Akifikiria jinsi usomaji wake umekuwa na uvutano juu yake, yeye asema: “Twajifunza kumpenda Yehova na Yesu na kuishi kwa furaha, hata tukiwa na matatizo na magumu, tukijua kwamba ahadi za Yehova hazitashindwa.”

Dada mmoja aliyekuwa amehudhuria Shule ya Utumishi wa Painia aliazimia kufuata shauri lililotolewa huko la kufanya usomaji wa Biblia kuwa zoea la kila siku. Kwanza, aliweza kufanya hivyo kati ya saa 11:00 na 12:00 asubuhi. Badiliko la kazi lilipovuruga hilo, yeye alianza kusoma kati ya saa 3:00 na 4:00 usiku. Hali zenye kuleta magumu zilipotokea, yeye asema, “Niliendelea kubadili ratiba yangu kulingana na hali.”

Baadaye Mchana:

Dada wawili wa kimwili ambao ni washiriki wa familia ya Betheli ya Brazili wana desturi ya kusoma Biblia pamoja kwa karibu dakika 20 kila siku baada ya chakula cha mchana. Wao wamesoma Biblia nzima karibu mara 25; na bado wao waandika: “Sikuzote sisi hupata jambo jipya, kwa hiyo usomaji wa Biblia hauchoshi.”

Dada mmoja mseja katika Japani alitambua kwamba ingawa alilelewa akiwa Shahidi, hakujua Maandiko vizuri; alipokuja kuwa painia, aliazimia kusoma Biblia kwa ukawaida. Sasa yeye hufanya usomaji wake kwa ajili ya Shule ya Huduma ya Kitheokrasi asafiripo kwenda hospitali kwa ajili ya matibabu siku moja kila juma. Baadaye, nyumbani, yeye hufuatia kwa utafiti. Kuelekea mwisho wa kila juma, yeye hufanya usomaji wa ziada wa Biblia, akichagua vitabu kulingana na utaratibu ambao viliandikwa.

Kijana mmoja mwenye umri wa miaka 13 ambaye tayari amesoma Biblia nzima mara tatu kwa wakati huu anasoma sura moja kila siku anaporudi nyumbani kutoka shuleni. Yeye asema kwamba kufanya hivyo kulimsaidia “kuhisi upendo zaidi kwa Yehova.”

Shahidi mmoja mwenye shughuli nyingi mno akiwa mfanyakazi, mzee, mume, na baba husikiliza kaseti za Biblia anaposafiri kwenda kazini katika gari-moshi. Kisha yeye husoma binafsi habari ileile akiwa nyumbani.

Kwa kuongezea usomaji wake wa binafsi, painia mmoja katika Ufaransa husikiliza kaseti za Biblia anapotayarisha milo, anapoendesha gari, anapovumilia magumu, au kwa furaha tu.

Painia mmoja mwenye umri wa miaka 21 katika Japani akumbuka kwamba mama yake alisisitiza atwae kitu cha kiroho kila siku, naye amekuwa akisoma Biblia kila siku, ingawa si wakati uleule, tangu alipokuwa na umri wa miaka mitatu. Baada ya kusoma sehemu aliyochagua kwa siku hiyo, yeye huhakikisha kurudia mistari muhimu, kisha yeye hutumia dakika chache kupitia akilini yale aliyosoma.

Shahidi mwingine, painia, amesoma Biblia nzima karibu mara kumi katika miaka 12 iliyopita. Mume wake si mwamini, kwa hiyo yeye huratibu usomaji wake wakati wa alasiri.

Jioni:

Mzee mmoja aliye pia painia wa kawaida katika Japani ambaye husoma Biblia yake kila usiku kabla ya kulala amefanya hivyo kwa miaka minane iliyopita. Asema hivi: “Napenda hasa maandiko yaonyeshayo jinsi Yehova hufikiri, ahisivyo juu ya mambo, na ashughulikiavyo hali. Kwa kutafakari juu ya maandiko hayo, nimesaidiwa kufikiri kama Yehova na kusaidia ndugu na dada zangu Wakristo na washiriki wa familia yangu.”

Mzee mmoja katika Ufaransa amekuwa akisoma Biblia kwa muda wa saa moja kila jioni tangu 1979. Yeye huwa na tafsiri tano hadi sita kwenye meza yake kwa ajili ya milinganisho. Asema kwamba usomaji wake wa uangalifu umemsaidia kung’amua “jinsi ya kutumia ujuzi wa Biblia katika hali za kila siku.” Kufanya hivyo kumemsaidia pia kuweza kutoa shauri lenye matokeo zaidi kutoka kwa Maandiko.

Kwa miaka 28 ambayo imepita, ndugu mmoja katika Nigeria amefanya zoea la kusoma jioni Andiko linaloandaliwa katika Kuyachunguza Maandiko Kila Siku la mazungumzo ya asubuhi ifuatayo. Pamoja na hayo, yeye husoma sura nzima katika Biblia ambayo andiko hilo limetolewa. Baada ya yeye kufunga ndoa, aliendelea na zoea hilo, akisoma na kuzungumza habari hiyo pamoja na mke wake.

Tineja mmoja ambaye wazazi wake si Mashahidi amefanya zoea la kusoma kwa dakika tano hadi kumi kila usiku kabla ya kulala. Hizo ni dakika zenye thamani kubwa kwake, naye husali kabla na baada ya kusoma. Mradi wake ni kujua ujumbe ambao Yehova alielekezea kila mwandikaji wa Biblia aandike.

Ndugu mmoja aliyefunga ndoa, aliye katika utumishi wa Betheli, asema kwamba amesoma Biblia mara moja kila mwaka kwa muda wa miaka minane iliyopita. Yeye huisoma kwa dakika 20 hadi 30 kabla ya kulala usiku. Hata kama amechoka kabisa, yeye huona kwamba akilala kabla ya kusoma, hawezi kupata usingizi. Ni lazima aamke kutunza uhitaji huo wa kiroho.