Wapiga-Mbiu wa Ufalme Waripoti
Alipata ‘Lulu ya Thamani ya Juu’
“UFALME wa mbingu ni kama mfanya-biashara msafiri anayetafuta sana lulu zilizo bora. Akiisha kupata lulu moja ya thamani ya juu, alienda zake na mara hiyo akauza vitu vyote alivyokuwa navyo na kuinunua.” Kwa maneno hayo, Yesu alitoa kielezi juu ya thamani yenye kuzidi ya Ufalme wa Mungu. (Mathayo 13:45, 46) Wale ambao hutambua thamani ya Ufalme mara nyingi hutoa dhabihu kubwa za kibinafsi ili kuupata. Jambo hili linatolewa kielezi na jambo lifuatalo lililoonwa kutoka Pingtung County, Taiwan.
Katika mwaka wa 1991, Bw. na Bi. Lin walianza kujifunza Biblia pamoja na Mashahidi wa Yehova. Kasisi wa huko kwao alipojua, alijaribu kuwashawishi wajiunge na kanisa lake. Kwa kuwa akina Lin walikuwa na biashara ya kuuza damu ya nguruwe na bata kwenye soko la mahali hapo, waliamua waulize huyo kasisi maoni yake juu ya hilo jambo. “Kila kitu ambacho Mungu amekiumba chaweza kufaa kuwa chakula cha mwanadamu,” akajibu. Kwa upande ule mwingine, Mashahidi waliwatia moyo wafikirie yale yasemwayo na Neno la Mungu. Walijifunza kwamba Yehova Mungu huiona damu kuwa takatifu, kwa maana “uhai wa kiumbe umo katika damu.” (Mambo ya Walawi 17:10, 11, Biblia Habari Njema) Kwa hiyo lazima Wakristo wa kweli “wajiepushe na . . . damu.” (Matendo 15:20) Likiwa tokeo la kuyachunguza Maandiko kuhusu habari hiyo, akina Lin waliamua kuacha kuuza damu, hata ingawa hiyo ndiyo ilikuwa chanzo kikubwa cha mapato yao. Hata hivyo, baada ya muda mfupi, walikabili mtihani mkubwa hata zaidi.
Kabla ya kujifunza kweli, akina Lin walikuwa wamepanda michikichi ya tambuu 1,300 katika shamba lao. Ijapokuwa miti hiyo ingechukua muda wa miaka mitano kuleta faida, wakati ambapo ingetokeza mazao kikamili, akina Lin wangetarajia kujipatia dola 77,000 kwa mwaka. Wakati wa kuvuna mara ya kwanza ulipokaribia, akina Lin walilazimika kufanya uamuzi wa maana. Walikuwa wamejifunza kupitia funzo lao la Biblia kwamba lazima Wakristo wajisafishe “wenyewe kila unajisi wa mwili na wa roho” kwa kuepuka kutumia, au kuendeleza mazoea yasiyo safi kama vile kuvuta tumbaku, matumizi mabaya ya madawa, na kutafuna tambuu. (2 Wakorintho 7:1) Wangefanya nini?
Chini ya msongo wa dhamiri yenye kusumbua, Bw. Lin aliamua kuacha kujifunza. Wakati uleule, Bi. Lin aliuza tambuu kutoka michikichi yao iliyokuwa ya zamani zaidi na kupata faida ya zaidi ya dola 3,000. Hizo zilikuwa mwonjo tu wa kimbele wa faida ambayo wangepata ikiwa wangehifadhi miti yao. Hata hivyo, dhamiri ya Bw. Lin iliendelea kumchoma.
Alipambana na hilo suala hadi siku moja akawauliza Mashahidi wa huko kwao wakate hiyo michikichi ya tambuu kwa niaba yake. Hao Mashahidi walimweleza kwamba huo ulikuwa uamuzi wake kufanya; kwa hiyo, angelazimika ‘kuchukua mzigo wake mwenyewe’ na akate hiyo miti mwenyewe. (Wagalatia 6:4, 5) Walimtia moyo akumbuke ahadi iliyo kwenye 1 Wakorintho 10:13, isemayo hivi: “Hakuna kishawishi ambacho kimewapata nyinyi ila kilicho kawaida kwa watu. Lakini Mungu ni mwaminifu, naye hatawaacha nyinyi mshawishwe kupita vile mwezavyo kuhimili, bali pamoja na hicho kishawishi ataifanya pia njia ya kutokea kusudi mweze kuvumilia hilo.” Mashahidi pia walisababu naye, wakisema: “Ikiwa tutakata miti yako kwa niaba yako, huenda ukajuta na kutulaumu kwa sababu ya hiyo hasara.” Muda mfupi baadaye, Bi. Lin aliamshwa asubuhi moja na sauti ya msumeno wa mnyororo. Mumewe na watoto walikuwa wakikata hiyo michikichi ya tambuu!
Bw. Lin alitambua kwamba Yehova hutimiza ahadi Yake. Alipata kazi ambayo ilimwacha akiwa na dhamiri safi, ikimwezesha kuwa msifaji wa Yehova. Alibatizwa kwenye kusanyiko la mzunguko la Mashahidi wa Yehova katika Aprili 1996.
Ndiyo, Bw. Lin kwa hakika ‘aliuza vitu vyote alivyokuwa navyo’ na kununua ‘lulu ya thamani ya juu.’ Sasa ana pendeleo lisilo na kifani la kuwa na uhusiano wa kibinafsi pamoja na Yehova Mungu na la kutumikia masilahi ya Ufalme Wake.