Hekima ya “Kuona Kimbele Yatakayotukia”

“HAO ni watu ambao wamepoteza busara yao, wasio na uelewevu. Ikiwa wangekuwa wenye hekima, wangeelewa haya na kuona kimbele yatakayotukia kwao.”—Kumbukumbu la Torati 32:28, 29, Beck.

Musa aliwaambia Waisraeli maneno hayo walipokuwa wamesimama kwenye mpaka wa Bara Lililoahidiwa. Musa alikuwa akitabiri juu ya wakati ambapo wangemwacha Yehova na kupuuza matokeo ya matendo yao. Katika karne zilizofuata, watu wa Israeli—pamoja na wafalme wengi—walipuuza maonyo ya Mungu.

Kwa mfano, Solomoni alijua amri ya Mungu dhidi ya kuoa waabudu wa miungu mingine isipokuwa Yehova. (Kumbukumbu la Torati 7:1-4) Hata hivyo, akaja kuwa na “wanawake wengi wageni.” Tokeo likawa nini? Rekodi ya Biblia yasema hivi: “Maana ikawa, Sulemani alipokuwa mzee, wake zake wakamgeuza moyo wake, afuate miungu mingine, wala moyo wake haukuwa mkamilifu kwa BWANA, Mungu wake, kama moyo wa Daudi baba yake.” (1 Wafalme 11:1, 4) Ingawa Solomoni alikuwa mtu mwenye hekima, alikosa busara ya ‘kuona kimbele yale ambayo yangetukia’ ikiwa angekosa kutii amri ya Mungu.

Namna gani sisi? Twaweza kuepuka maumivu mengi tukitafakari kimbele vya kutosha juu ya maamuzi maishani. Kwa mfano, Wakristo wanaonywa “[wa]jisafishe wenyewe kila unajisi wa mwili na wa roho.” (2 Wakorintho 7:1) Hilo ni jambo la hekima, lakini wengi hawana busara ya kuona kimbele linaloweza kutukia wakipuuza shauri la Paulo. Kwa mfano, vijana wengi huchafua miili yao kwa kuvuta tumbaku, wakifikiri kwamba hilo huwafanya waonekane kuwa waliostaarabika na kukomaa. Yahuzunisha kama nini wakati ambapo, baadaye maishani, baadhi yao hupatwa na matatizo ya moyo, kansa ya mapafu, au ugonjwa wa kusakama hewa mapafuni!

Ni muhimu kutafakari kwa uzito matokeo ya maamuzi na matendo yetu. Basi Paulo alikuwa na sababu nzuri alipoandika hivi: “Lolote lile mtu analopanda, hilo atavuna pia; kwa sababu yeye anayepanda katika mwili wake atavuna ufisadi kutokana na mwili wake, lakini yeye anayepanda katika roho atavuna uhai udumuo milele kutokana na roho.”—Wagalatia 6:7, 8.