Wapiga-mbiu wa Ufalme Waripoti

Kumjua Mungu Mwenye Upendo

AKIWA na umri wa miaka 16, Mbrazili mmoja aitwaye Antônio alikuwa amechoka na maisha. Hisia ya kwamba maisha ni ubatili ilimfanya aanze kutumia dawa za kulevya na kileo. Mara nyingi alifikiria kujiua. Nyakati kama hizo alikuwa akikumbuka jambo ambalo mama yake alimwambia: “Mungu ni upendo.” (1 Yohana 4:8) Lakini Mungu huyo mwenye upendo angepatikana wapi?

Katika jitihada ya kuacha dawa za kulevya na kileo, Antônio alitafuta msaada kutoka kwa kasisi wa parokia ya kwao. Ingawa Antônio alikuwa mwenye bidii sana katika Kanisa Katoliki, bado alikuwa na maswali mengi. Kwa mfano, maneno ya Yesu, “Mtajua kweli, na kweli itawaweka nyinyi huru” yalimtatanisha. (Yohana 8:32) Ni uhuru wa aina gani ambao Yesu aliahidi? Kanisa halikuweza kutoa majibu yoyote yenye kuridhisha kwa maswali yake. Hatimaye, Antônio akaachana na kanisa na kurudia tabia zake za zamani. Hata uraibu wake ukawa mbaya zaidi.

Yapata wakati huohuo, Maria, mke wa Antônio, alianza kujifunza Biblia pamoja na Mashahidi wa Yehova. Japo hakupinga funzo la mke wake, Antônio aliwapuuza Mashahidi akiwaita “dini ya Marekani inayotimiza masilahi ya ubeberu wa Marekani.”

Bila kuvunjika moyo, Maria alikuwa anaweka magazeti ya Mnara wa Mlinzi na Amkeni!, ambayo alifikiri yangempendeza Antônio, mahali mbalimbali katika nyumba. Kwa kuwa Antônio alipenda sana kusoma, mara kwa mara aliyapitia magazeti hayo wakati mke wake hakuwa nyumbani. Kwa mara ya kwanza maishani mwake, akapata majibu kwa maswali yake ya Biblia. “Pia nikaanza kuona upendo na fadhili ambazo mke wangu na Mashahidi walinionyesha,” anakumbuka.

Kufikia katikati ya mwaka wa 1992, Antônio aliamua kwamba hata yeye angependa kujifunza Biblia pamoja na Mashahidi wa Yehova. Hata hivyo, aliendelea kutumia dawa za kulevya na kulewa kupindukia. Wakati mmoja usiku sana, polisi walimsimamisha alipokuwa akirudi nyumbani pamoja na rafiki yake kutoka mtaa mmoja wa mabanda. Polisi hao walianza kumpiga Antônio walipompata na kokeini. Polisi mmoja alimwangusha chini matopeni na kumwelekezea bunduki usoni. “Mwue!” wale polisi wengine wakasema kwa sauti kubwa.

Alipokuwa amelala matopeni, Antônio alikumbuka maisha yake. Mambo mazuri pekee aliyoweza kukumbuka ni familia yake na Yehova. Alitoa sala fupi, akimwomba Yehova amsaidie. Polisi hao walimwacha pasipo sababu dhahiri. Alienda nyumbani, akiwa amesadiki kwamba Yehova alimlinda.

Antônio alianza kujifunza Biblia kwa bidii tena. Hatua kwa hatua, akafanya mabadiliko ili kumpendeza Yehova. (Waefeso 4:22-24) Kwa kusitawisha hali ya kujidhibiti, alianza kukabiliana na matatizo yake ya dawa za kulevya. Hata hivyo, alihitaji msaada wa kitiba. Muda wa miezi miwili aliokaa katika kliniki ya kurekebisha tabia Antônio aliweza kusoma vichapo kadhaa vya Biblia, kutia ndani kitabu Ujuzi Uongozao Kwenye Uhai Udumuo Milele. Kisha Antônio aliwaeleza wagonjwa wengine yale aliyojifunza.

Baada ya kuondoka kwenye kliniki hiyo, Antônio aliendelea kujifunza Biblia na Mashahidi wa Yehova. Leo Antônio, Maria, na binti zao wawili na mama ya Antônio wanamtumikia Yehova pamoja wakiwa familia yenye furaha na iliyoungana. Antônio asema: “Sasa ninaelewa maana ya kweli ya maneno ‘Mungu ni upendo.’”

[Picha katika ukurasa wa 8]

Akihubiri huko Rio de Janeiro