Biblia Inabadili Maisha

NINI kilichomsaidia mwanamke fulani huko Ufilipino aache zoea lake la kunywa pombe kupita kiasi na hivyo kuboresha maisha ya familia yake? Kwa nini mpiganaji wa karate huko Australia alibadilika na kuwa mhubiri wa habari njema mwenye amani? Soma mambo ambayo watu hao wanasema.

“Mabadiliko hayo yalichukua muda.”​—CARMEN ALEGRE

MWAKA WA KUZALIWA: 1949

NCHI: UFILIPINO

HISTORIA: MLEVI KUPINDUKIA

MAISHA YANGU YA ZAMANI: Nilizaliwa huko San Fernando, mji ulio katika jimbo la Camarines Sur. Hata hivyo, kwa miaka mingi nikiwa mtu mzima nimeishi Antipolo, katika Jimbo la Rizal. Mji wa Antipolo ulikuwa kwenye eneo lenye milima na nyasi na vilevile miti mingi, na ulikuwa mtulivu nilipohamia huko. Sikuona yeyote akitembea nje usiku. Hata hivyo, sasa Antipolo ni jiji kubwa lenye wakaaji wengi.

Muda fulani baada ya kuhamia Antipolo, nilikutana na mwanamume anayeitwa Benjamin, na baada ya muda tukafunga ndoa. Maisha ya ndoa yalikuwa magumu kuliko nilivyotarajia. Ili kuepuka matatizo yangu, nilianza kunywa pombe kupita kiasi. Nilisitawisha utu mgumu, na ulionekana kupitia jinsi nilivyomtendea mume wangu na watoto wetu. Sikuonyesha sifa ya kujidhibiti wala subira niliposhughulika nao. Sikumheshimu mume wangu hata kidogo. Kwa kweli, maisha ya familia yetu hayakupendeza.

JINSI BIBLIA ILIVYOBADILI MAISHA YANGU: Editha, dada ya Mume wangu, ambaye ni mmoja wa Mashahidi wa Yehova, alipendekeza kwamba Benjamin na mimi tujifunze Biblia pamoja na Mashahidi. Tulikubali, tukitumaini kwamba jambo hilo lingeboresha maisha yetu ya familia.

Kadiri tulivyojifunza Biblia, ndivyo tulivyopata kweli nyingi zenye kupendeza. Maneno ya Ufunuo 21:4 yalinigusa moyo sana. Kuhusu wale watakaoishi katika paradiso hiyo itakayokuwa duniani wakati ujao chini ya Ufalme wa Mungu, andiko hilo linasema kwamba Mungu “atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena.” Nilitaka kuwa miongoni mwa watu ambao watafurahia baraka hizo.

Nilitambua kwamba nilihitaji kubadili kabisa mtazamo na tabia zangu. Mabadiliko hayo yalichukua muda, lakini mwishowe nilifaulu kuacha kunywa pombe kupita kiasi. Pia, nilijifunza kuwatendea watu wa familia yangu kwa fadhili na subira. Zaidi ya hayo, nilijifunza kumheshimu mume wangu alipoongoza familia yetu.

Mimi na Benjamin tulipoanza kuhudhuria mikutano ya Mashahidi wa Yehova, tulivutiwa sana na mambo tuliyoona. Mashahidi hawachezi kamari, hawanywi pombe kupindukia, wala hawana ubaguzi. Wanamtendea kila mtu kwa heshima. Tulikuwa na hakika kwamba tumepata dini ya kweli.​—Yohana 13:34, 35.

JINSI AMBAVYO NIMEFAIDIKA: Uhusiano wetu katika familia umekuwa bora sana. Mimi na Benjamin tuna furaha katika ndoa yetu na tunafurahia kuwafundisha wengine Biblia. Wana wetu na wake zao walianza pia kujifunza Biblia. Tunatumaini kwamba baada ya muda watajiunga nasi katika kumtumikia Yehova. Kwa kweli hii ndiyo njia bora zaidi ya maisha.

“Nilijiona Kuwa Mtu Asiyeweza Kushindwa”​—MICHAEL BLUNSDEN

MWAKA WA KUZALIWA: 1967

NCHI: AUSTRALIA

HISTORIA: MPIGANAJI WA KARATE

MAISHA YANGU YA ZAMANI: Nililelewa huko Albury, jiji maridadi lenye ufanisi lililo New South Wales. Kama majiji mengine, jiji hilo pia lina uhalifu. Hata hivyo, kwa ujumla jiji la Albury linajulikana kuwa salama.

Nililelewa katika familia ya kitajiri. Ingawa wazazi wangu walitalikiana nilipokuwa na umri wa miaka saba, walihakikisha kwamba mimi, ndugu yangu, na dada zangu wawili hatukukosa chochote. Nilipata elimu nzuri katika shule ya kibinafsi iliyokuwa bora zaidi katika eneo letu. Baba yangu alitaka niwe mfanyabiashara baada ya kumaliza shule. Hata hivyo, nilipendezwa hasa na michezo, na nilikuwa mwendeshaji baiskeli bora na mpiganaji karate. Mwishowe nilipata kazi katika kampuni ya kurekebisha magari na kazi hiyo ilinipa wakati mwingi wa kutumia nguvu zangu katika michezo.

Nilifanya mazoezi ya kimwili kwa bidii. Wakati fulani nilijiona kuwa mtu asiyeweza kushindwa. Ningeweza kutumia nguvu zangu kuwaumiza wengine. Kwa sababu mkufunzi wangu wa karate aliona kwamba nilikuwa nikijitahidi ili nisitumie nguvu zangu vibaya, alinifundisha niwe na nidhamu na maadili mazuri. Kila mara, alikazia umuhimu wa utii na ushikamanifu.

JINSI BIBLIA ILIVYOBADILI MAISHA YANGU: Nilipoanza kujifunza Biblia, nilitambua kuwa Yehova anachukia jeuri. (Zaburi 11:5) Mwanzoni, nilijiambia kwamba karate si jeuri bali ni mchezo usiosababisha madhara. Nilihisi kwamba sifa na viwango vya juu ambavyo mchezo huo ulikazia vilipatana na mambo ambayo Biblia inafundisha. Wenzi wa ndoa ambao walinifundisha Biblia walikuwa wenye subira sana. Hawakunilazimisha kuacha mchezo wa kupigana, lakini waliendelea kunifundisha kweli za Biblia.

Kadiri nilivyoendelea kupata ujuzi wa Biblia na kuimarisha urafiki wangu pamoja na Yehova, ndivyo nilivyozidi kubadili mtazamo wangu. Nilivutiwa sana na mfano wa Yesu, Mwana wa Yehova. Ingawa Yesu alikuwa na nguvu nyingi, hakutenda kijeuri. Maneno yake katika andiko la Mathayo 26:52, yalinigusa moyo sana: “Wale wote wanaouchukua upanga wataangamia kwa upanga.”

Kadiri nilivyoendelea kujifunza kumhusu Yehova, ndivyo nilivyozidi kuwa na upendo na kumheshimu zaidi. Nilivutiwa sana na wazo la kwamba Muumba wetu, mwenye busara na nguvu nyingi, anaweza kunijali kibinafsi. Niliguswa moyo kujifunza kwamba ikiwa singeweza kutimiza mambo ambayo Yehova anataka au nihisi hali ni ngumu sana hivi kwamba siwezi kuendelea, hangekata tamaa kunielekea mradi tu ningeendelea kujitahidi. Nilifarijiwa sana na ahadi hii: “Mimi, Yehova Mungu wako, ninaushika mkono wako wa kuume, Mwenye kukuambia, ‘Usiogope. Mimi mwenyewe nitakusaidia.’ ” (Isaya 41:13) Nilipotambua kwamba nimeonyeshwa upendo kwa kiasi hicho, niliazimia sitakata tamaa.

Nilijua kwamba kuacha kupigana karate ndilo jambo gumu zaidi ambalo ningewahi kufanya. Lakini nilijua pia hatua hiyo ingempendeza Yehova na nilikuwa na hakika kwamba hakuna jambo lolote linaloweza kulinganishwa na kumtumikia. Nafikiri jambo moja lililonisukuma kabisa ni wakati niliposoma maneno ya Yesu kwenye andiko la Mathayo 6:24: “Hakuna anayeweza kuwatumikia mabwana wawili.” Nilitambua kwamba haingewezekana kumtumikia Yehova kikamili huku nikipigana karate, kwa kuwa ningekengeushwa fikira na kurudia karate. Wakati ulikuwa umefika wa kumchagua Yehova au karate.

Haikuwa rahisi kuacha karate. Nilipambana na hisia zilizopingana. Nilipata shangwe kwa kadiri fulani kwa kujua nilikuwa nikimfurahisha Yehova. Lakini pia nilihisi ni kana kwamba nilikuwa nikimsaliti mkufunzi wangu wa karate. Watu wanaofanya mazoezi ya kupigana mara nyingi wanaona kwamba kumsaliti mtu ni dhambi isiyosamehewa. Hata wengine wao wanaweza kuwa tayari kujiua badala ya kukabili aibu hiyo.

Niliaibika sana hivi kwamba sikumweleza mkufunzi wangu ninaondoka. Badala yake, niliondoka na nikakatisha mawasiliano yote pamoja naye na wapiganaji karate wenzangu. Hata hivyo, nilijihisi nikiwa na hatia kwa sababu ya kushindwa kuwaeleza kuhusu imani yangu mpya, na hivyo kukosa nafasi ya kuwahubiria wengine. Nilihisi kana kwamba nimemvunja moyo Yehova hata kabla sijaanza kumtumikia. Yote hayo yaliniumiza sana. Pindi nyingi nilipojaribu kusali kwa Yehova ningeanza kulia kwa uchungu.

Lazima Yehova aliona sifa fulani nzuri ndani yangu, kwa kuwa aliwachochea ndugu na dada kutanikoni washirikiane nami. Walinionyesha upendo, faraja, na urafiki usio wa kawaida. Pia, nilifarijika niliposoma simulizi la Biblia kuhusu Daudi na Bath-sheba. Hata ingawa Daudi alifanya dhambi nzito, Yehova alimsamehe alipotubu kikweli. Nilipotafakari kuhusu simulizi hilo, lilinisaidia kuwa na mtazamo unaofaa kuhusu makosa yangu.

JINSI AMBAVYO NIMEFAIDIKA: Kabla ya kujifunza Biblia, sikuwajali sana watu wengine​—nilijifikiria tu mimi mwenyewe. Lakini kwa msaada wa Yehova na mke wangu mrembo ambaye tulifunga ndoa miaka saba iliyopita, nimesitawisha hisia mwenzi. Tumebarikiwa kwa kuwa na pendeleo la kujifunza Biblia na watu kadhaa, kutia ndani wengine ambao wanakabili hali ngumu. Kuona jinsi ambavyo upendo wa Yehova umeboresha maisha ya watu kumeniletea shangwe zaidi kuliko kuwa bingwa wa mchezo wa karate.

[Blabu katika wa 14]

“Nilivutiwa sana na wazo la kwamba Muumba wetu, mwenye busara na nguvu nyingi, anaweza kunijali kibinafsi”

[Sanduku/​Picha katika ukurasa wa 15]

“Asanteni kwa Mfululizo Huu Wenye Kupendeza! ”

Je, umefurahia kusoma masimulizi yaliyo katika makala iliyotangulia? Hayo ni masimulizi mawili tu kati ya masimulizi zaidi ya 50 yaliyochapishwa katika Mnara wa Mlinzi tangu Agosti 2008. Mfululizo wa makala wenye kichwa “Biblia Inabadili Maisha” umependwa sana na wasomaji wetu. Kwa nini wengi wamependezwa nao?

Watu wanaozungumziwa katika makala hizo wametoka katika malezi mbalimbali. Kabla ya kujifunza kumhusu Yehova Mungu, baadhi yao walifurahia mafanikio kwa kadiri fulani lakini hawakuwa na kusudi halisi maishani. Wengine walipambana na hali mbalimbali ngumu, kama vile kuwa na hasira kali, kutumia dawa za kulevya, au kunywa pombe kupita kiasi. Wachache kati yao walilelewa wakimjua Yehova lakini wakaacha kumwabudu kwa muda fulani. Masimulizi hayo yote yanaonyesha kwamba inawezekana kufanya mabadiliko ili kumpendeza Mungu. Na kuna faida kufanya hivyo sikuzote. Masimulizi hayo yamewasaidiaje baadhi ya wasomaji wetu?

Msomaji mmoja anaeleza jinsi makala iliyokuwa katika toleo la Februari 1, 2009, ilivyowasaidia wafungwa fulani katika gereza la wanawake.

◼ “Wafungwa wengi wanaelewa hisia za watu waliotajwa katika makala hiyo,” anasema. “Picha zinazoonyesha jinsi walivyokuwa ‘kabla’ na ‘baada’ ya kufanya mabadiliko pamoja na maelezo kuwahusu, yaliwachochea sana. Wafungwa wengi walikabiliana na hali kama hizo. Baada ya kusoma masimulizi hayo, wafungwa wawili walianza kujifunza Biblia.”​—C. W.

Masimulizi yanayotajwa katika mfululizo huu yamewagusa moyo hasa wasomaji fulani. Kwa mfano, toleo la Aprili 1, 2011 lilikuwa na simulizi la Guadalupe Villarreal, ambaye aliacha kulala na wanaume wenzake ili amtumikie Yehova. Ona barua mbili tu kati ya nyingi tulizopokea kutoka kwa wasomaji wetu kuhusiana na simulizi hilo.

◼ “Simulizi la Guadalupe lilinigusa moyo sana. Ni jambo lenye kusisimua kuona jinsi kumpenda Yehova na Neno lake kunavyoweza kumbadili mtu kabisa!”​—L. F.

◼ “Zamani nilikuwa nikiwahubiria watu wote, kutia ndani wale wanaolala na watu wa jinsi yao. Hata hivyo, hivi karibuni nimegundua kwamba nimekuwa nikiwapuuza watu kama hao au hata kuwaepuka. Nilihitaji hasa makala hii. Ilinisaidia kuwaona watu kama hao jinsi Yehova anavyowaona, yaani, kama watu wanaoweza kuwa waabudu wake.”​—M. K.

Simulizi lingine ambalo liliwagusa moyo wasomaji wengi ni lile la Victoria Tong, ambalo lilikuwa katika toleo la Agosti 1, 2011. Victoria alieleza jinsi alivyolelewa chini ya hali ngumu. Anakubali kuwa amepambana ili ahisi kwamba anapendwa na Yehova hata baada ya kumtumikia kwa miaka mingi. Na alisimulia ni nini ambacho kimemsaidia hatua kwa hatua akubali kwamba Yehova anampenda. Ona mambo ambayo wasomaji fulani wamesema kuhusu simulizi lake.

◼ “Simulizi la Victoria lilipenya ndani kabisa ya moyo wangu. Nimekabili misiba mingi katika maisha yangu. Hata ingawa mimi ni Shahidi aliyebatizwa miaka mingi iliyopita, mara nyingi ninapambana na hisia zisizofaa. Lakini simulizi la Victoria linanifanya nijitahidi hata zaidi ili nijione jinsi Yehova anavyoniona.”​—M. M.

◼ “Nilipokuwa kijana nilipambana na uraibu wa kutazama ponografia. Hivi karibuni nilirudia zoea hilo. Nimetafuta msaada kutoka kwa wazee Wakristo na ninaendelea kupambana ili kushinda zoea hilo. Wazee wamenihakikishia kwamba Mungu ananipenda na ni mwenye rehema. Hata hivyo, nyakati nyingine ninahisi sifai, ni kana kwamba Yehova hawezi kunipenda. Nilifaidika sana kwa kusoma simulizi la Victoria. Sasa ninatambua kuwa ninapofikiri Mungu hawezi kunisamehe, ni kana kwamba ninasema dhabihu ya Mwana wake haitoshi kufunika dhambi zangu. Nimehifadhi makala hii ili niisome na kuitafakari ninapojihisi kwamba sifai. Asanteni kwa mfululizo huu wenye kupendeza!”​—L. K.