Ziada Yao Ilijazia Upungufu

ULIKUWA mwaka 49 W.K. Petro, Yakobo, na Yohana, “walioonekana kuwa nguzo,” walimpa maagizo mtume Paulo na mfanyakazi mwenzake, Barnaba. Walipaswa kuendelea kuwakumbuka Wakristo walio maskini, walipoendelea kuwahubiria watu wa mataifa. (Gal. 2:9, 10) Walitimizaje daraka hilo?

Barua za Paulo zinaonyesha jinsi alivyoshughulikia jambo hilo. Kwa mfano, aliwaandikia hivi Wakristo katika Korintho: “Kuhusu mchango ulio kwa ajili ya watakatifu, kama vile nilivyoyapa maagizo makutaniko ya Galatia, ninyi wenyewe pia fanyeni vivyo hivyo. Kila siku ya kwanza ya juma acheni kila mmoja wenu kwenye nyumba yake mwenyewe aweke kando kitu fulani katika akiba kulingana na anavyofanikiwa, ili nitakapofika michango isifanywe wakati huo. Lakini nitakapofika hapo, watu wowote mtakaokubali kwa barua, nitawatuma hao kuipeleka zawadi yenu ya fadhili mpaka Yerusalemu.”​—1 Kor. 16:1-3.

Katika barua yake ya pili kwa Wakorintho iliyoongozwa na roho ya Mungu, Paulo alitaja tena lengo la kukusanya michango hiyo. Alisema lengo ni, “kupitia usawazisho wa ziada yenu sasa hivi ijazie upungufu wao.”​—2 Kor. 8:12-15.

Paulo alipowaandikia Wakristo huko Roma karibu mwaka wa 56 W.K., walikuwa wanakaribia kumaliza kukusanya michango hiyo. Alisema hivi: “Nakaribia kusafiri kwenda Yerusalemu ili kuwahudumia watakatifu. Kwa maana wale walio katika Makedonia na Akaya wamependezwa kushiriki vitu vyao kwa kuwatolea mchango fulani walio maskini kati ya watakatifu katika Yerusalemu.” (Rom. 15:25, 26) Paulo alitimiza mgawo wake punde tu baadaye, kwa kuwa aliporudi Yerusalemu na kisha kukamatwa huko, alimwambia hivi Gavana Mroma Feliksi: “Nilifika kuleta zawadi za rehema kwa taifa langu, na matoleo.”​—Mdo. 24:17.

Mtazamo wa Wakristo wa karne ya kwanza ulionyeshwa wazi na yale ambayo Paulo alisema kuhusu watu wa Makedonia. Alisema kwamba “waliendelea kutuomba kwa kusihi sana wapate pendeleo la kutoa.” Mtume huyo aliwahimiza Wakorintho waige mfano huo. Alisema hivi: “Kila mmoja na afanye kama alivyoazimia moyoni mwake, si kwa kutopenda wala kwa kulazimishwa, kwa maana Mungu humpenda mtoaji mchangamfu.” Ni nini kilichochochea makutaniko kuonyesha ukarimu wa namna hiyo? Tamaa yao ya kufanya hivyo haikuwa ili “kugawa tu kwa wingi mahitaji ya watakatifu bali pia kuwa matajiri kwa maonyesho mengi ya shukrani kwa Mungu.” (2 Kor. 8:4; 9:7, 12) Tunaweza pia kuonyesha ukarimu tukiwa na malengo kama hayo. Bila shaka, Yehova Mungu atabariki roho hiyo nzuri isiyo ya ubinafsi, na kwa kweli, baraka zake hutajirisha.​—Met. 10:22.

Kama ilivyokuwa katika siku za mtume Paulo, wengi leo ‘huweka kando kitu fulani,’ au kiasi fulani cha pesa ambacho wanatia ndani ya masanduku ya michango yaliyoandikwa “Kazi ya Ulimwenguni Pote.” (1 Kor. 16:2) Kila mwezi, makutaniko yanatuma pesa hizo kwenye ofisi ya Mashahidi wa Yehova inayosimamia kazi katika nchi yao. Unaweza pia kutuma michango moja kwa moja kwa shirika la kisheria linalotumiwa na Mashahidi wa Yehova katika nchi yenu. Ili kujua jina la shirika la kisheria linalotumiwa na Mashahidi wa Yehova katika nchi yenu, tafadhali wasiliana na ofisi ya tawi inayosimamia nchi yenu. Anwani ya ofisi ya tawi inaweza kupatikana katika tovuti ya www.jw.org. Unaweza kutuma michango ifuatayo moja kwa moja:

MICHANGO YA MOJA KWA MOJA

• Michango ya pesa taslimu, vito, au mali yoyote ya kibinafsi iliyo na thamani.

• Tia ndani barua inayoonyesha kwamba pesa taslimu au mali hizo ni michango ya moja kwa moja.

MPANGO WA MICHANGO YENYE MASHARTI

• Michango ya pesa taslimu ikiwa na masharti kwamba inaweza kurudishwa ikihitajiwa na aliyechangia.

• Tia ndani barua inayoonyesha kwamba mchango huo ni wenye masharti.

UTOAJI ULIOPANGWA

Mbali na zawadi za pesa na mali binafsi yenye thamani, kuna njia nyingine za kutoa kwa ajili ya kazi ya Ufalme ya ulimwenguni pote. Njia hizo zimeorodheshwa chini. Haidhuru ni njia gani ungependa kutumia, tafadhali wasiliana kwanza na ofisi ya tawi inayosimamia kazi nchini mwenu ili kuona ni njia zipi zinazopatikana katika nchi yenu. Kwa kuwa matakwa ya kisheria na sheria za kodi zinatofautiana, ni muhimu kuwaona washauri wanaostahili wa mambo ya kodi na sheria kabla ya kuchagua njia bora ya kutoa mchango.

Bima: Mchango unaotolewa kwa kulitaja kihususa jina la shirika linalotumiwa na Mashahidi wa Yehova kwamba ndilo litakalofaidika na bima ya maisha au mpango wa malipo ya uzeeni au ya kustaafu.

Akaunti za Benki: Akaunti za benki, hati za amana, au akiba za pesa za kustaafu za mtu mmoja-mmoja zinaweza kuwekwa zikiwa amana, au kulipwa wakati wa kifo kwa jina la shirika linalotumiwa na Mashahidi wa Yehova kulingana na matakwa ya benki za kwenu.

Hisa na Dhamana: Hisa na dhamana zinaweza kuchangwa kwa jina la shirika linalotumiwa na Mashahidi wa Yehova zikiwa zawadi ya moja kwa moja au kama shirika ambalo litafaidika na hisa au dhamana hiyo kifo kikitokea.

Ardhi na Nyumba: Ardhi au nyumba zinazotolewa kama mchango kwa jina la shirika linalotumiwa na Mashahidi wa Yehova, zinaweza kutolewa zikiwa zawadi ya moja kwa moja au zawadi yenye masharti, yaani, mtoaji anaweza kuendelea kuishi humo hadi kifo chake.

Malipo ya Mwaka: Pesa au amana zinazotolewa kama mchango kwa jina la shirika linalotumiwa na Mashahidi wa Yehova chini ya makubaliano kwamba anayetoa mchango huo, au mtu fulani aliyechaguliwa na mtoaji, anapata kiasi fulani cha pesa kila mwaka katika maisha yake yote. Mtoaji anapunguziwa kodi ya serikali katika mwaka ambao mpango huo unaanzishwa.

Wasia na Amana: Mali au pesa zinaweza kuachiwa jina la shirika linalotumiwa na Mashahidi wa Yehova kama urithi kwa njia ya wosia halali, au linaweza kutajwa kuwa shirika ambalo litafaidika na mkataba wa amana. Chini ya mpango huu, kodi fulani zinaweza kupunguzwa.

Kama usemi “utoaji uliopangwa” unavyoonyesha, ili mtu atoe michango ya aina hiyo anapaswa kufanya mipango hususa. Broshua ya Kiingereza na Kihispania yenye kichwa Charitable Planning to Benefit Kingdom Service Worldwide imetayarishwa ili kuwasaidia watu wanaotamani kuendeleza kazi inayofanywa na Mashahidi wa Yehova ulimwenguni pote kwa njia ya utoaji uliopangwa. Broshua hiyo iliandikwa ili kutoa habari kuhusu njia mbalimbali za kutoa zawadi sasa au baadaye kama urithi mtu anapokufa. Huenda habari zilizo katika broshua hiyo zisifae kabisa hali yako kwa sababu ya sheria za kodi au sheria nyingine nchini mwenu. Baada ya kusoma broshua hiyo, zungumza na washauri wako wa mambo ya kisheria au kodi. Kwa kutumia njia za utoaji uliopangwa, watu wengi wameweza kusaidia kutegemeza utendaji wetu wa kidini na wa kutoa misaada ulimwenguni pote, na kupunguziwa kodi wanapofanya hivyo. Kama inapatikana nchini mwenu, unaweza kupata broshua hiyo kwa kuomba nakala kutoka kwa mwandishi wa kutaniko lenu.

Kwa habari zaidi, unaweza kuwasiliana na Charitable Planning Office. Unaweza pia kutuma barua au kupiga simu kwa ofisi ya Mashahidi wa Yehova inayosimamia kazi katika nchi yenu.