Je! Mungu Hujali Juu ya Unayeoa au Unayeolewa Naye?

INAELEKEA umeona kwamba ndoa nzuri inaweza kuleta furaha. Hivyo, huenda ukataka kuoa au kuolewa ndiyo upate furaha na uradhi katika maisha.

Lakini pengine unajua watu wengi waliooana walio na huzuni nyingi. Wala hatuwezi kusahau hesabu yenye kuongezeka sana ya wale ambao wamekwisha tengana au kutalikana.

Ni vyepesi kuona kwamba sababu kubwa ni kwamba watu wengi hawachagui mwenzi anayefaa. Hivi majuzi gazeti moja lilisema hivi: “Washauri wa mambo ya ndoa wanasisitiza kwamba talaka hufanywa wakati wa uchumba. . . . [Mara nyingi watu] hawafikiri sana wanapochagua mwenzi kama wanavyofikiri wanapochagua farasi.” Hivyo magumu yanatokea.

Bila shaka wewe umeamua mambo yasiwe hivyo maishani mwako. Ni sawa. Ni jambo la akili kufikiria kufanya uchaguzi unaofaa. Lakini wewe utachagua kwa msingi gani?

Unaweza kupata mashauri mahali pengi​—⁠kutoka kwa watu wa ukoo, kutoka kwa marafiki waliooa au kuolewa, na hata katika vitabu vilivyoandikwa na washauri wa mambo ya ndoa. Hata hivyo, ni watu wangapi wangefikiria kuichunguza Biblia kabla ya kuchagua mwenzi wa ndoa?

Mara nyingi mno, watu ambao pengine wanataka kweli kuwa na ndoa yenye mafanikio wanapuza uhakika wa kwamba tuna Muumba. Lakini kwa kuwa tunaye, na kwa kuwa yeye ndiye Mwanzilishi wa ndoa pia na amechunguza mamilioni ya ndoa, je! si jambo la akili kuwaza kwamba yeye anastahili sana kutushauri? Je! siye aliye katika hali bora ya kutoa mashauri ya jinsi ya kuchagua mwenzi na kupata furaha?

Kwa mfano, katika Neno lake amepanga sifa za kupendeza za kutumia kuchagua mwenzi. Angalia baadhi ya sifa hizo. Waume wanasihiwa “kuwapenda wake zao kama miili yao wenyewe,” si ‘kuwa na uchungu nao’ na ‘kuwapa heshima.’ (Efe. 5:28; Kol. 3:19; 1 Pet. 3:7) Wake wanaagizwa ‘kuwapenda waume zao, na kuwapenda watoto wao; na kuwa wenye kiasi, kuwa safi, kufanya kazi nyumbani mwao.’ (Tito 2:4, 5) Na wenzi wote wawili wanatiwa moyo waonyeshe “upendo, furaha, amani, ustahimilivu, fadhili, wema, imani, upole, kujiweza.” (Gal. 5:22, 23, NW) Je! hayo si mashauri mema? Je! hizo sizo sifa ambazo ungependa kuona mwenzi wako wa ndoa akionyesha?

Kwa hiyo unaweza kuona kwamba Mungu hujali katika maana hii juu ya unayeoa au unayeolewa naye; kwa kuwa ametoa mashauri hayo katika Biblia unaweza kujua mambo ya kutafuta katika wanaoweza kuwa wenzi. Je! si kweli kwamba ukichagua mwenzi mwenye kuonyesha sifa hizo utaelekea zaidi kuwa na ndoa yenye furaha na mafanikio?

Fikiria pia mambo ambayo Muumba anasema juu ya kudumu kwa ndoa. Biblia hupinga sana talaka. (Mal. 2:15, 16) Hukazia kwamba wakati mwanamume na mwanamke wanapooana “wamekuwa si wawili tena, bali mwili mmoja.” (Mt. 19:4-8) Hivyo, kwa kuchagua mwenzi anayeheshimu mashauri ya Mungu, utakuwa na mume au mke ambaye hatavunja ndoa yenu kwa sababu zisizo na maana. Kwa kweli, usemi wa Muumba unaopinga talaka unahusu anayeweza kuwa mwenzi wa kukufaa. Yesu alisema: “Kila mtu amtalikiye mke wake, isipokuwa kwa sababu ya uasherati, amfanyiza uzinzi, na ye yote aoaye mwanamke aliyetalikiwa afanya uzinzi.” (Mt. 5:32, NW) Hiyo inaonyesha nini?

Inaonyesha kwamba Maandiko yanaruhusu mtu ataliki mwenzi na kuoa au kuolewa tena, lakini ikiwa tu mwenzi huyo ana hatia ya kufanya uasherati. Hivyo, shauri lenye hekima la Muumba ni kwamba haikupasi kumwona mtu aliyetalikiwa bila msingi wa Maandiko kuwa anafaa kama mwenzi, ikiwa mwenzi yule mwingine hakufanya uasherati. Kwa sababu gani? Kwa sababu mtu huyo, awe mwanamume au mwanamke, kulingana na Maandiko hana uhuru wa kuoa au kuolewa tena. Simama ufikiri kwa nini jambo hili ni la hekima na la kukufaidi. Je! halionyeshi kwamba Muumba anataka uoe au uolewe na mtu aliye safi kwa adili na mwenye kuheshimu kudumu kwa ndoa? Hivyo unafunguliwa macho kwamba imekupasa uamue kama mtu anastahili umwoe au uolewe naye kabla hujamfikiria awe mwenzi wako.

Bila shaka, ndoa inahusu wenzi wawili. Kwa hiyo maoni yako mwenyewe yahusika, sivyo? Kwa kuwa Muumba hukazia kudumu kwa ndoa, hiyo inapendekeza wewe na mwenzi wako mwe na maoni hayo yenye kufaa. Inamaanisha wote wawili mwoane mkiwa na uamuzi wa kubaki katika ndoa. Wote wawili mkiwa na maoni hayo, itasaidia ndoa yenu iwe imara na ya kudumu, badala ya kuwa ya muda tu.

Je! Biblia inatoa uongozi zaidi wenye kufaa unaoonyesha kwamba Mungu hujali juu ya unayeoa au unayeolewa naye? Naam, inatoa. Katika 1 Wakorintho 7:39 inashauri hivi: “Mwanamke hufungwa maadamu mumewe yu hai, lakini ikiwa mumewe amefariki, yu huru kuolewa na mtu ye yote amtakaye; katika Bwana tu.” Huo pia ni wonyesho wa kwamba Mungu hujali kwa sababu ya upendo.

Kwanza, maneno hayo yanaonyesha kwamba mtu ambaye mwenzi wake amekufa yu huru kuoa au kuolewa tena, ingawa Mungu anasema ndoa ionwe kama ya kudumu. Unaweza kuona kwamba mtu kama huyo ni tofauti na yule aliyepata talaka kwa sababu tu ya kigeugeu cha moyo.

Halafu, mstari huo unasema kwamba Mungu ashauri mtu aoe au aolewe “katika Bwana tu.” Hiyo ina maana gani, na je! inakufaidi wewe?

Tafsiri nyingine hutafsiri fungu hilo la maneno kwa kusema “lakini, lazima awe Mkristo.” (Moffatt) Dkt. Albert Barnes alieleza hivi maneno hayo: ‘Yaani, [aolewe na] mtu ambaye ni Mkristo tu; akiwa na maoni yanayofaa juu ya wajibu wake kwa Kristo. Mtume aliwaza kwamba asingeweza kuwa na maoni yanayofaa akiolewa na mtu wa dini nyingine.’

Ni kweli kwamba watu wengi leo hudhani hakuna ubaya wa kuoa au kuolewa na mtu wa dini nyingine mradi wote ni wenye akili. Lakini ndivyo Biblia inavyosema hapa? Je! hayo ndiyo maoni ya Muumba wako, ambaye anapendezwa uwe na furaha ya kudumu?

Yeye anajua kwamba umoja wa imani na kanuni za msingi unahitajiwa sana ndiyo ndoa iwe ya furaha. Hata alitia katika Biblia mifano kadha ya watu waliodharau mashauri hayo wakajiharibia adili na hali ya kiroho, licha ya kuletea wazao wao huzuni. (Ezra 9:13-15; 10:44; Neh. 13:26, 27) Naam, Mungu anajua kwamba hili ni jambo zito. Kwa hiyo, ni jambo zito pia kwa watu wote wanaojua kwamba kusudi la kujali kwa Mungu juu ya tunayeoa au tunayeolewa naye ni kutufaidi sisi.

Kadiri utakavyozidi kuchunguza Biblia, ndivyo utakavyozidi kuona kwamba Mungu hujali juu ya unayeoa au unayeolewa naye kwa sababu akupenda. Kwa hiyo ikiwa wewe unafikiria kuoa au kuolewa, jifunze Biblia. Kaza katika akili yako sifa inazokupasa kukuza na sifa za kutafuta katika mwenzi. Ukifuata mashauri ya Biblia utakuwa na furaha na amani.