Jamii Zote Ziishipo Pamoja kwa Amani
MUNGU “alifanya kila taifa la wanadamu kutoka katika mmoja, wakae juu ya uso wa nchi yote.” (Matendo 17:26) Hiyo ni taarifa sahili ya Biblia kuhusu asili ya familia ya kibinadamu.
Inadokeza kwamba ainabinadamu yote, hata wawe wanaishi wapi au wawe na hali gani za kimwili, walikuwa na asili moja. Pia inamaanisha kwamba kujapokuwa na tofauti zote zenye kuonekana wazi, “kila taifa la wanadamu” lina uwezo kwa habari ya uweza mbalimbali na weledi. Naam, machoni pa Mungu, wanadamu wa kila jamii au taifa ni sawa.—Matendo 10:34, 35.
Ikiwa maoni ya Biblia ni sahihi, kuna tumaini kwamba chuki zote na ukosefu wote wa haki wenye kutegemea tofauti za kijamii waweza kuondolewa. Na zaidi, ikiwa Biblia ni sahihi kuhusu asili ya familia ya kibinadamu, basi kwa wazi kitabu icho hicho chaweza pia kutuandalia habari inayofunua jinsi jamii ya kibinadamu inavyoweza kuishi pamoja kwa amani.
Basi, mambo ya hakika yaonyesha nini? Je! simulizi la Biblia kuhusu asili ya binadamu lathibitishwa na sayansi?
Uthibitisho wa Kisayansi
Kichapo The Races of Mankind, cha mwanthropolojia R. Benedict na G. Weltfish, chaonelea hivi: “Hadithi ya Biblia juu ya Adamu na Hawa, baba na mama wa jamii nzima ya kibinadamu, ilisimulia karne nyingi zilizopita ukweli uleule ambao sayansi imeonyesha leo: kwamba vikundi vyote vya watu wote wa dunia ni familia moja na wana asili moja.” Waandikaji hao pia wasema kwamba “ule mfanyizo tata wa mwili wa kibinadamu . . . haungeweza kuwa ‘ulitukia tu’ uwe ni uleule katika wanadamu wote ikiwa hawakuwa na asili moja.”
Kijitabu Race and Biology, cha L. C. Dunn, profesa wa zuolojia katika Chuo Kikuu cha Kolumbia, chasema hivi: “Kwa wazi wanadamu wote watokana na aina moja, wakifanana katika hali zote za kimwili za msingi. Washiriki wa vikundi vyote waweza kuoana baina yao na kwa kweli wao hufanya hivyo.” Kisha chaendelea kueleza hivi: “Lakini kila mtu ni wa pekee na atofautiana na kila mtu mwingine kwa mambo madogo-madogo. Sababu moja inayotokeza hiyo yaweza kuwa mazingira tofauti ambayo watu huishi na sababu nyingine yaweza kuwa ni jeni ambazo wamerithi.”
Uthibitisho wa kisayansi ni wazi. Tukisema kibiolojia, hakuna kitu kama jamii bora au jamii duni, jamii bora halisi au jamii iliyochafuliwa. Hali kama rangi ya ngozi ya mtu, nywele, au macho—mambo ambayo huenda wengine wakafikiria kuwa ya maana kijamii—hayaonyeshi weledi au uweza mbalimbali. Badala ya hivyo, mambo hayo ni tokeo la urithi wa jeni.
Kwa kweli, tofauti za kijamii ni ndogo sana, kama anavyoandika Hampton L. Carson katika kitabu Heredity and Human Life: “Tatizo linalotukabili sisi ni kwamba kila kikundi cha wanadamu chaonekana kuwa tofauti kwa nje lakini chini ya tofauti hizo kuna ufanano wa msingi.”
Basi, ikiwa wanadamu wote kwa kweli wanafanyiza familia moja tu, ni kwa nini kuna matatizo makubwa sana ya ubaguzi wa kijamii.?
Sababu ya Tatizo
Sababu ya msingi ya kuwapo kwa ubaguzi wa kijamii ni ule mwanzo mbaya ambao wazazi wa kwanza wa kibinadamu waliwapa wazao wao. Adamu na Hawa walimwasi Mungu kimakusudi na hivyo wakawa watu wasiokamilika, wenye kasoro. Kama tokeo, kutokamilika kwa Adamu—ule mwelekeo wa kufanya ubaya—kukapitishwa kwa wazao wake. (Warumi 5:12) Hivyo, tangu kuzaliwa na kuendelea, wanadamu wote wana mwelekeo wa ubinafsi na kiburi, mambo ambayo yametokeza mizozano na michafuko ya ubaguzi wa kijamii.
Kuna sababu nyingine inayofanya ubaguzi wa kijamii uwepo. Adamu na Hawa walipojitenga na utawala wa Mungu, walikuja chini ya utawala wa kiumbe kiovu cha roho ambacho Biblia huita Shetani, au Ibilisi. Chini ya uvutano wa huyo, “audanganyaye ulimwengu wote,” mara nyingi jitihada za kimakusudi zimefanywa ili kudanganya watu juu ya suala la jamii. (Ufunuo 12:9; 2 Wakorintho 4:4) Ethnosentristi—wazo la kwamba kikundi cha mtu mwenywe ni bora zaidi—imechochewa sana, na kwa kujua au pasipo kujua, mamilioni ya watu wamefuata hilo, matokeo yakiwa yenye msiba.
Tukisema waziwazi, wanadamu wasiokamilika, wenye ubinafsi ambao wako chini ya udhibiti wa Shetani wameeneza mafundisho yote yasiyo ya kweli juu ya jamii ambayo yametokeza matatizo ya ubaguzi wa kijamii.
Kwa hiyo, ili jamii ya kibinadamu iungane, ni lazima wote wasadiki kwamba kwa kweli sisi ni familia moja ya kibinadamu na kwamba Mungu “alifanya kila taifa la wanadamu kutoka katika mmoja, wakae juu ya uso wa nchi yote.” (Matendo 17:26) Na zaidi, ili watu wa jamii zote waishi pamoja kwa amani, ni lazima uvutano wa Shetani uondolewe katika mambo ya wanadamu. Je! mambo hayo yatapata kutendeka kweli? Je! kuna msingi wowote wa kuamini kwamba yatatendeka?
Kumaliza Ubaguzi wa Kijamii
Yesu Kristo alifunua jinsi ubaguzi wa kijamii ungeweza kuondolewa alipowaamuru wafuasi wake ‘wapendane’ kama vile alivyowapenda. (Yohana 13:34, 35) Upendo huo haungeonyeshwa kwa watu wa jamii moja au jamii kadhaa tu. La, hasha! “Iweni na upendo kwa ushirika wote wa akina ndugu,” mmoja wa wafuasi wake akatia moyo.—1 Petro 2:17, New World Translation.
Upendo huo wa Kikristo waonyeshwaje? Biblia inaeleza ihimizapo hivi: ‘Kwa heshima mwatangulize wenzenu.’ (Warumi 12:10) Ebu fikiria linalomaanishwa jambo hilo lifanywapo! Kila mmoja atendea wengine kwa staha ya kweli na heshima, bila kuwashusha, lakini kwa kweli ‘akiwaona kuwa bora’ bila kujali wao ni watu wa jamii au taifa gani. (Wafilipi 2:3) Ikiwapo roho hiyo ya upendo wa kweli wa Kikristo, basi tatizo la ubaguzi wa kijamii latatuliwa.
Ni kweli kwamba kwa upande wa wale ambao wamefundishwa ubaguzi wa kijamii, inahitaji jitihada nyingi zaidi kuondoa mawazo hayo yanayochochewa na Shetani. Lakini jambo hilo laweza kutimizwa! Katika karne ya kwanza, wale wote waliongizwa katika kutaniko la Kikristo walikuja kufurahia umoja usio na kifani. Mtume Paulo aliandika juu ya hilo: “Hapana Myahudi wala Myunani. Hapana mtumwa wala huru. Hapana mtu mume wala mtu mke. Maana ninyi nyote mmekuwa mmoja katika Kristo Yesu.” (Wagalatia 3:28) Kwa kweli, wafuasi wa kweli wa Kristo walikuja kufurahia upendo halisi wa kidugu.
Lakini huenda watu fulani wakapinga: ‘Jambo hilo haliwezi likatendeka leo kamwe.’ Lakini, tayari limekwisha kutendeka miongoni mwa Mashahidi wa Yehova—tengenezo la watu zaidi ya milioni nne na nusu! Ni kweli kwamba si Mashahidi wote wameondoa kabisa ubaguzi mbalimbali waliojifunza katika mfumo huu usiomwogopa Mungu. Mwamerika mmoja mweusi alisema hivi kikweli kuhusu Mashahidi wenzake weupe: “Mimi hutambua miongoni mwa baadhi yao masalio ya mitazamo ya kujiona kuwa jamii bora, na nyakati nyingine nimeona baadhi yao wakiwa hawajihisi starehe wakishirikiana kwa ukaribu na watu wa jamii nyingine.”
Lakini, mwanamke huyo alikubali hivi: “Mashahidi wa Yehova wameondoa ubaguzi wa kijamii kwa kiwango kisichofikiwa na watu wengineo wote duniani. Wanajitahidi kupendana bila kujali jamii ya mtu . . . Pindi kwa pindi moyo wangu umechangamka kufikia kutoa machozi bila kuzuilika kwa kuona upendo halisi wa Mashahidi weupe.”
Je! umoja wa kijamii unaofurahiwa na wachache—hata kama wanafikia mamilioni—kweli unaleta tofauti kubwa wakati mamilioni ya wengine wako chini ya uvutano wa mawazo ya Kishetani juu ya ubora wa jamii fulani? La, tunakubali kwamba jambo hilo halitatui tatizo la jamii. Wanadamu hawawezi kutatua tatizo hilo. Ni Muumba wetu tu, Yehova Mungu, ndiye anayeweza kulitatua.
Kwa furaha, karibuni sasa, Yehova, kupitia Ufalme wake ulio mikononi mwa Mwana wake Yesu Kristo, ataondolea dunia ukosefu wote wa haki na wale wote wanaoendeleza kwa ubinafsi ubaguzi na chuki, ya kijamii au nyingineyo. (Danieli 2:44; Mathayo 6:9, 10) Kisha kukiwa na programu ya kielimu iliyokamilika chini ya usimamizi wa Kristo, jamii zote zitapata kuungana. Elimu hiyo iendeleapo, watu wataishi kwa upatano kabisa bila salio lolote la ubaguzi wa kijamii. Ahadi ya Mungu itatimizwa hatimaye: “Mambo ya kwanza yamekwisha kupita. . . . Tazama, nayafanya yote kuwa mapya.”—Ufunuo 21:4, 5.
Je! wewe ni aina ya mtu anayetamani wakati ambapo udugu wa kweli utakapoenea pote, jamii zote ziishipo pamoja kwa amani? Ikiwa ndivyo, twakualika uhudhurie Jumba la Ufalme lililoko karibu nawe, mahali ambapo Mashahidi wa Yehova hukutana kwa ukawaida ili kujifunza Biblia. Wewe mwenyewe jionee kama kweli hawaonyeshi upendo halisi wa Kikristo—kwa watu wa jamii zote.
[Picha katika ukurasa wa 10]
Karibuni jamii zote kila mahali zitaishi pamoja kwa amani