Maoni ya Biblia

Je! Yehova ni Mungu wa Vita?

BAADHI ya wasomaji wa Biblia kwa muda mrefu wamelaumu Yehova kuwa mungu wa vita, na mwenye ukatili. Kwa kielelezo, George A. Dorsey, katika kitabu chake The Story of Civilization—Man’s Own Show, adai kwamba Mungu wa Biblia, Yehova, “ni Mungu wa wanyang’anyi, wa watesaji, wa watu wa kivita, wa wanyakuaji, wa kila ukatili wowote ule.” Mhakiki wa Biblia Roland H. Bainton asema hivi waziwazi: “Vita huwa afadhali zaidi Mungu asiposhiriki.”

Je! ni kweli kwamba Yehova ni mungu wa vita? Je! yeye kwa kweli hufurahia kuchinja watu wasio na hatia kama vile watu fulani wadokezavyo?

Hukumu Zilizopita

Ni kweli kwamba Biblia husimulia kwa unyoofu zile hukumu zilizopita zenye uharibifu za Yehova Mungu. Lakini, nyakati zote hizo zilikuwa dhidi ya watu wasiomcha Mungu. Kwa kielelezo, ilifikia kiwango cha dunia ya siku ya Noa ‘kujawa na dhuluma’ ndipo Yehova alisema hivi: “Nitaleta gharika ya maji juu ya nchi niharibu kila kitu chenye mwili na pumzi ya uhai.” (Mwanzo 6:11, 17) Kuhusu hukumu nyingine, hiyo ilitukia kwa sababu watu wa majiji ya Sodoma na Gomora walikuwa “wamejiachilia kwa ngono isiyo ya adili na kufuatia ugoni uliopotoka” hivi kwamba Mungu akasababisha ‘inyeshe kiberiti na moto.’—Yuda 1:7, The New Berkeley Version;[3] Mwanzo 19:24.

Je! Mungu alifurahia kuharibu wanadamu wote katika siku za Noa? Ama alipata raha fulani ya kikatili alipowaharibu wakazi wa Sodoma na Gomora? Ili tupate majibu, ebu tuchunguze matukio yaliyohusu Furiko la Siku za Noa. Baada ya kusema kwamba Mungu angeondolea mbali ainabinadamu waovu kutoka usoni pa dunia ili kuiondolea ujeuri, Biblia yasema hivi: “Bwana [Yehova, NW] . . . akahuzunika moyo.” Naam, Mungu alihuzunika kwamba “kila kusudi [mwanadamu] analowaza moyoni mwake ni baya tu sikuzote.” Kwa hiyo ili kuokoa wengi kadiri iwezekanavyo kutokana na Gharika iliyokuwa ikija, Mungu alimtuma Noa, “mjumbe wa haki,” atoe ujumbe wenye onyo na kujenga safina kwa ajili ya kuokolewa.—Mwanzo 6:5-18; 2 Petro 2:5.

Kwa njia iyo hiyo, kabla ya kupeleka malaika wayaharibu Sodoma na Gomora, Mungu alisema hivi: “Nitashuka nione kama mambo ambayo walitenda ni kiasi cha kilio dhidi yao . . . nimeazimia kujua.” (Mwanzo 18:20-32, The Jerusalem Bible)[4] Yehova alimhakikishia Abrahamu (ambaye mpwa wake Loti aliishi katika Sodoma) kwamba kama utafutaji Wake utapata watu kumi pekee wenye uadilifu, majiji hayo yangehifadhiwa. Je! Mungu afurahiaye kumwaga damu angekuwa na hangaiko lenye huruma hivyo? Kinyume cha hilo, je, hatuwezi kusema kwamba moja ya tabia kuu za utu wa Yehova ni huruma? (Kutoka 34:6) Yeye mwenyewe asema hivi: “Sikufurahii kufa kwa mtu mwovu; bali aghairi mtu mwovu, na kuiacha njia yake mbaya, akaishi.”—Ezekieli 33:11.

Hukumu zenye uharibifu kutoka kwa Mungu nyakati zote zimetokea kwa sababu watu waovu hukataa katakata kuacha mwenendo wao mbaya, bali si kwa sababu Yehova hufurahia kuua watu. Lakini waweza kujiuliza, ‘Je! Yehova hakuwatia moyo Waisraeli wapigane vita na Wakanaani na kuwaangamiza?’

Vita vya Mungu Vyahitajika kwa Ajili ya Amani

Historia yatoa picha mbaya sana ya maisha ya Wakanaani—walikuwa waovu sana. Uwasiliani-roho, dhabihu za watoto, ujeuri wenye ukatili, na aina kadhaa za ibada ya ngono iliyopotoka yalikuwa mambo ya kawaida. Akiwa Mungu mwenye haki anayetaka ujitoaji wa pekee, Yehova hangeweza kuruhusu mazoea hayo yenye kuchukiza yaharibu amani na usalama wa watu wasio na hatia, hasa Israeli. (Kumbukumbu la Torati 5:9) Kwa kielelezo, ebu wazia kama jumuiya unamoishi haingekuwa na polisi au kikosi fulani cha kutekeleza sheria za nchi—je, jambo hilo halingetokeza mvurugo na ujeuri wa aina mbaya zaidi? Kwa njia iyo hiyo, Yehova alilazimika kutenda dhidi ya Wakanaani kwa sababu ya upotovu wao mkubwa wa maadili na hatari kubwa waliyotolea ibada safi. Kwa hiyo, yeye aliamuru hivi: “Hiyo nchi imekuwa najisi; kwa ajili ya hayo naipatiliza uovu wake juu yake.”—Mambo ya Walawi 18:25.

Haki ya kimungu ilitekelezwa wakati majeshi yenye kufisha ya Mungu—majeshi ya Waisraeli—yalipoharibu Wakanaani. Hakika ya kwamba Mungu alichagua kutumia wanadamu ili kutekeleza hukumu hiyo, badala ya kutumia moto au furiko, haikupunguza adhabu hiyo. Hivyo, majeshi ya Waisraeli yalipokuwa yakipigana na mataifa saba ya Kanaani, hao waliagizwa hivi: ‘Msihifadhi kuwa hai kitu cho chote kipumzikacho.’—Kumbukumbu la Torati 20:16.

Hata hivyo, akiwa mstahi wa uhai Mungu hakuidhinisha mauaji ya ovyoovyo. Kwa kielelezo, wakazi wa jiji moja la Kikanaani, Gibeoni, walipoomba waonyeshwe huruma, Yehova alikubali. (Yoshua 9:3-27) Je! mungu mkali wa vita angalifanya hivyo? La, lakini Mungu apendaye amani na haki angalifanya hivyo.—Zaburi 33:5; 37:28.

Viwango vya Yehova Huendeleza Amani

Kwa kurudia-rudia, Biblia hushirikisha baraka za Mungu pamoja na amani. Hiyo ni kwa sababu Yehova ni mpenda amani, bali si vita. (Hesabu 6:24-26; Zaburi 29:11; 147:12-14) Kwa sababu hiyo, Mfalme Daudi alipotamani kumjengea Yehova hekalu la ibada, Mungu alimwambia hivi: “Wewe hutajenga nyumba kwa ajili ya jina langu, kwa sababu umemwaga damu nyingi juu ya nchi machoni pangu.”—1 Mambo ya Nyakati 22:8; Matendo 13:22.

Alipokuwa duniani, Daudi Mkubwa Zaidi, Yesu Kristo, alitaja juu ya wakati ambapo kupenda haki kwa Mungu hakungemruhusu tena avumilie maovu ya kisiku-hizi tunayoona. (Mathayo 24:3, 36-39) Kama alivyofanya katika Furiko la siku za Noa na katika uharibifu wa Sodoma na Gomora, hivi karibuni Mungu atachukua tendo la kihukumu la kuiondolea dunia watu waovu wenye ubinafsi, hilo likitokeza hali zenye amani zitakazokuwa chini ya utawala wa Ufalme wake wa kimbingu.—Zaburi 37:10, 11, 29; Danieli 2:44.

Kwa wazi, Yehova si mungu wa vita atamaniye damu. Kwa upande mwingine, yeye hasiti kutoa hukumu yenye adhabu inapohitajika. Kupenda wema kwa Mungu humfanya atende kwa niaba ya wale wanaompenda kwa kuharibu mfumo mwovu uwanyanyasao. Atakapofanya hivyo, amani ya kweli itajaa duniani pote wakati watu wapole kwelikweli wataunganika katika ibada ya Yehova, “Mungu wa amani.”—Wafilipi 4:9.

[Hisani ya Picha katika ukurasa wa 20]

Daudi na Goliathi/The Doré Bible Illustrations/Dover Publications, Inc.