Kutotukuza Elimu Mno

MCHORAJI stadi ajua jinsi ya kuchora sehemu yenye kutokeza sana. Mambo madogo-madogo yaliyo mbele ya picha hufanywa yajitokeze zaidi kuliko mambo yaliyo katika mandhari ya katikati au ya nyuma. Ndivyo ilivyo na mambo tunayotanguliza maishani. Mengine yahitaji kutangulizwa kuliko mengine.

Yesu Kristo alisema: “Wenye furaha ni wale wenye kufahamu uhitaji wao wa kiroho, kwa kuwa ufalme wa mbingu ni wao.” (Mathayo 5:3, NW) Hivyo, mambo ya kiroho yapaswa kutangulizwa. Kwa kutofautisha, mali ya kimwili yasiwe ya maana sana.

Elimu ni muhimu kadiri gani ikilinganishwa na mambo mengine? Hakika hiyo si jambo dogo kwa Mkristo. Mara nyingi kiasi fulani cha elimu ya kilimwengu huhitajika ili mmoja atimize wajibu wake wa Kimaandiko unaotajwa na mtume Paulo: “Lakini mtu yeyote asiyewatunza walio wake, yaani, wale wa nyumbani mwake hasa, ameikana imani, tena ni mbaya kuliko mtu asiyeamini.” (1 Timotheo 5:8) Isitoshe, ule utume ambao Yesu aliwapa wafuasi wake, wakawafanye wanafunzi, ‘na kuwafundisha kuyashika yote aliyowaamuru hao,’ wamaanisha kwamba ‘watwae ujuzi’ na kisha wafundishe wengine ifaavyo.—Mathayo 28:19, 20; Yohana 17:3, NW; Matendo 17:11; 1 Timotheo 4:13.

Hata hivyo, ni lazima elimu isitukuzwe sana. Isifuatiliwe kwa sababu tu ya kutaka kuwa bora kielimu au kwa ajili ya kupata digrii zenye kuvutia. Kutukuza mno hali ya kufuatia elimu hutokeza mfadhaiko tu. Ni kweli kwamba inaweza kuandaa vitu vya kimwili kwa muda. Lakini kama Mfalme Sulemani mwenye hekima alivyosema: “Unafanya kitu fulani kwa hekima yako yote, ujuzi, na ustadi, na kisha unalazimika kumwachia mwingine ambaye hakufanyia kazi kitu hicho chote.”—Mhubiri 2:21, Today’s English Version.

Mashahidi wa Yehova wanapendezwa na elimu, si ili kupata elimu tu, bali ili waongeze ubora wao katika utumishi wa Mungu na kujitegemeza. Kwa kuwa huduma yao si kazi ya mshahara, ni lazima wengi wategemee kazi za kilimwengu ili wajiruzuku. Jambo hilo hasa laweza kuwa gumu kwa wahudumu wa wakati wote wa Mashahidi wa Yehova, waitwao mapainia. Ni lazima wadumishe ratiba yenye mambo mengi huku wakijiruzuku vya kutosha kifedha kwa ajili yao wenyewe na kwa ajili ya familia zao ikiwa wamefunga ndoa.a—Mithali 10:4.

Baada ya kukadiria mambo kadhaa yanayohusika, baadhi ya Mashahidi wa Yehova wameamua kuendelea na elimu ya ziada. Bila shaka walilazimika kuwa waangalifu wasitukuze elimu kupita kiasi. Ni nini imewasaidia wafanye hivyo? “Mambo kadhaa yalinisaidia,” asema kijana mmoja Mbrazili aitwaye John. Hata ilipokuwa lazima nijifunze wakati wa usiku, Sikukosa mikutano ya Kikristo. Pia niliwajulisha wazi wanadarasa wenzangu tangu mwanzo kwamba nilikuwa mmoja wa Mashahidi wa Yehova.”

Eric, pia kutoka Brazili, alichukua fursa za kusema na wengine juu ya itikadi zake alipokuwa akiendeleza elimu yake. “Niliona shule kuwa eneo langu la pekee,” yeye asema. “Niliweza kuongoza mafunzo ya Biblia pamoja na walimu na wanafunzi kadhaa, ambao kati yao watano wamebatizwa sasa, wawili kati yao wakitumika wakiwa wazee.”

Richard alirudi shuleni kwa nusu wakati ili apate digrii ya kuchora ramani. “Masomo yangu yalinisaidia kupata kazi na kujiruzuku pamoja na kuruzuku mke wangu,” yeye asema, “lakini pia ilifungua mlango wa fursa nyingi. Nilipoenda kwenye ujenzi mbalimbali wa Majumba ya Ufalme yenye kujengwa haraka na kusema na wale wanaosimamia ujenzi huo, niligundua kwamba kulikuwa na uhitaji wa wachoraji ramani.b Sasa elimu yangu inatumiwa vizuri katika miradi ya ujenzi. Kwa kuongezea, mke wangu nami twatumaini kwamba hatimaye tutatumika katika makao makuu ya ulimwengu au katika miradi ya ujenzi wa kimataifa ya Mashahidi wa Yehova.”

Kwa wakati uo huo, wengi wa Mashahidi wa Yehova wameshinda ugumu wa kujiandalia pamoja na familia zao riziki bila masomo ya ziada. “Najitegemeza kwa kufanya kazi za nyumbani kwa siku mbili kwa siku,” aeleza Mary. “Kwa kushangaza, nachuma fedha nyingi zaidi kwa muda wa saa moja kuliko watu ninaowafanyia kazi. Lakini naona kazi yangu ikiwa njia ya kupata mapato. Inaniendeleza katika kazi ya upainia, nami sina masikitiko.”

Steve ahisi vivyo hivyo. “Nilipoanza kupainia,” yeye asema, “wengine waliniambia: ‘Utafanyaje utakapofunga ndoa na kuwa na familia? Je! utapata riziki ya kutosha?’ Kumbe nilikuwa na ujuzi wa kazi nyingi ambazo nilikuwa nimefanya. Kwa kuwa sasa nina mke wa kutegemeza, napata kwamba ninachuma fedha kuliko baadhi ya wahitimu wa vyuo wanaofanya kazi katika shirika letu.”

Huenda baba wasioamini waliwataka watoto wao wadogo waendelee na elimu ya ziada, nao wana mamlaka ya Kimaandiko ya kufanya hivyo. Lakini, katika hali kama hizo, na kwa kupatana na Mathayo 6:33, vijana waweza kuchukua mitaala itakayowasaidia wawe bora zaidi katika utumishi wa Yehova au hata kuwaruhusu waingie katika huduma ya wakati wote wakati uleule wanaoenda shuleni.

Elimu Bora Zaidi

Mashahidi wa Yehova wote, hata wawe na kiwango gani cha elimu, wana jambo moja kati yao wote. Wao watambua kwamba elimu muhimu zaidi inayopatikana leo ina chanzo katika Neno la Mungu, Biblia. Yohana 17:3, NW, yasema: “Hii yamaanisha uhai udumuo milele, kutwaa kwao ujuzi juu yako wewe, Mungu pekee wa kweli, na juu ya yule uliyemtuma, Yesu Kristo.” Wakristo hata wapate elimu ya kilimwengu ya kiwango gani, ni lazima watangulize kutwaa ujuzi sahihi wa Yehova na Mwana wake, Yesu.

Kigezo hicho kiliwekwa na Wakristo wa karne ya kwanza. Manaeni ‘alielimishwa pamoja na Herode mtawala wa wilaya,’ naye alikuwapo na pia alikuwa mwenye utendaji miongoni mwa manabii na walimu wa kutaniko la Antiokia. (Matendo 13:1, NW) Vivyo hivyo, Paulo alipokea elimu inayoweza kulinganishwa leo na ya chuo kikuu. Hata hivyo, baada ya kuwa Mkristo, yeye hakutukuza mazoezi yake. Badala ya kuyatumia kuwashtua wengine, alitumia ujuzi wake wa sosholojia (elimu ya maendeleo ya kijamii), sheria, na historia kuwahubiri watu wa aina zote.—Matendo 16:37-40; 22:3; 25:11, 12; 1 Wakorintho 9:19-23; Wafilipi 1:7.

Wakristo wa karne ya kwanza hawakujulikana hasa kwa viwango vyao vya elimu. Wengi walikuwa “watu wasio na elimu, wasio na maarifa,” ambao hawakuzoezwa katika shule za marabi. Lakini jambo hilo halimaanishi kwamba hawakuwa na elimu. Tofauti na hilo, hao wanaume na wanawake walikuwa wamezoezwa kutetea imani yao—uwezo uliotoa uthibitisho wa kujifunza kuzuri.—Matendo 4:13.

Kwa hiyo, Wakristo wote wanapendezwa na elimu. Na wakati uo huo, wao hujitahidi “kuhakikisha mambo yaliyo ya maana zaidi,” ya kutoitukuza elimu—na jambo jingine lolote—mno.—Wafilipi 1:9, 10, NW.

[Maelezo ya Chini]

[Sanduku katika ukurasa wa 7]

Pongezi Iliyostahiliwa Sana

Mwaka uliotangulia kuhitimu kwake, Matthew alifikiria kwa uzito jinsi angeweza kujiruzuku huku akiendelea na kazi-maisha yake akiwa mhudumu wa wakati wote wa Mashahidi wa Yehova. Baada ya kulifikiria kwa sala jambo hilo, Matthew pamoja na wazazi wake walihisi kwamba elimu ya ziada ingemsaidia sana atimize mradi wake. Kwa hiyo, aliomba msaada wa kumsaidia aendelee na elimu. Mshauri wa shule ya Matthew aliongeza barua ya kumpendekeza, akisema:

“Katika miaka miwili na nusu iliyopita, imekuwa furaha yangu kuwa mshauri na rafiki wa Matt. Matt ni mtu mzuri sana . . . Ana imani yenye kina sana na itikadi zenye nguvu, mambo yanayoonekana sana katika mahusiano yake na matendo yake.

“Katika miaka iliyopita, Matthew amekuwa akijizoeza kwa ajili ya huduma. Mhudumu wa dini yake hapokei ridhaa yoyote ya kifedha. Kwa kweli huduma yake ni kazi ngumu ya upendo. Akiwa hana ubinafsi, Matt ni mwenye ufikirio na mwenye kujali. Msaada huu anaoomba wa masomo ya ziada waweza kumsaidia mtu huyu mwenye imani ajiruzuku na aendelee na mazoezi yake na kazi yake ya kujitolea.

“Tukizungumza juu ya kazi ya kujitolea na utumishi wa umma, Matt ametumia muda wa saa nyingi sana akihubiri nyumba kwa nyumba katika miisho-juma na baada ya shule na katika vipindi vya kiangazi. Anafanya kazi katika jumuiya yenye watu aina mbalimbali. Matt amethibitisha uwezo wake mbalimbali na stadi zake kwa kuongoza mafunzo ya Biblia pamoja na vijana kwa wazee. . . . Yeye ameweza kuchochea watu na kuwasaidia kufikia uwezo wao kamili. Darasani, walimu wamesema kwamba nyakati zote yeye alikuwa mwenye uvutano mzuri. Yeye huongoza mazungumzo ya darasani na anajua sana kujadiliana. . . .

“Matt ni mojapo vijana wazuri zaidi ambao nimepata kushauri. Yeye apendwa sana na kustahiwa na marika wake na walimu. Uaminifu-maadili wake ni wa hali ya juu sana.”

[Picha katika ukurasa wa 9]

Mashahidi wa Yehova wanapendezwa na elimu ili wawe hasa watumishi wa Mungu wenye matokeo zaidi