Sura ya 5

“Huyu ni Mwanangu”

KILA mtu ana baba. Wewe una baba. Mimi nina baba. Wakati kijana mwanamke anapofanya mambo mazuri, baba yake anafurahi kuwaambia wengine hivi: “Huyu ni binti yangu.” Na wakati kijana mwanamume anapofanya vizuri, baba yake anafurahia kusema: “Huyu ni mwanangu wa kiume.”

Sikuzote Yesu anafanya yanayompendeza Baba yake. Hivyo Baba yake anapendezwa naye. Na wajua Baba ya Yesu alifanya nini?— Alisema toka mbinguni akawaambia watu: “Huyu ni Mwanangu.”

Yesu anampenda Baba yake kweli kweli. Alionyesha hili hata mbele ya kuja duniani. Alikuwa na mahali pazuri sana mbinguni pamoja na Baba yoke, Yehova Mungu. Lakini Mungu alikuwa na kazi ya pekee kwa Yesu kufanya. Ili kufanya kazi hiyo, ilikuwa lazima Yesu aondoke mbinguni. Ilikuwa lazima azaliwe kama kitoto duniani. Yesu alikuwa na nia ya kufanya hivi kwa sababu Yehova alitaka afanye hivyo.

Ili azaliwe kama kitoto duniani, ilikuwa lazima Yesu awe na mama. Unajua alikuwa nani?— Jina lake alikuwa Mariamu.

Yehova alimtuma malaika wake Gabrieli kutoka mbinguni aseme na Mariamu. Gabrieli alimwambia Mariamu kwamba angezaa kitoto cha kiume. Kitoto kingeitwa Yesu. Na baba ya kitoto angekuwa nani?— Malaika alisema baba ya kitoto angekuwa Yehova Mungu. Ndiyo maana Yesu angeitwa Mwana wa Mungu.

Unadhani Mariamu alionaje hili?— Je! alisema, ‘Mimi sitaki kufanya hivyo’? Je! alisema ‘Mimi sitaki kuwa mama ya Yesu’?—

Sivyo, Mariamu alikuwa tayari kufanya alilotaka Mungu. Yeye alikuwa na nia sana ya kumsikiliza malaika wa Mungu. Ilikuwa kama kumsikiliza Mungu. Na Mariamu alitaka amsikilize Mungu. Yeye alimpenda Mungu naye alifurahia kufanya alilomtaka Yehova Mungu afanye.

Lakini Yehova angeweza namna gani kumzalisha Mwana wake mbinguni kama kitoto duniani?— Yehova ni mwenye nguvu zaidi kuliko wote. Yeye aweza kufanya vitu ambavyo mwingine hawezi kufanya. Basi Yehova akachukua uhai wa Mwana wake kutoka mbinguni akautia ndani ya Mariamu. Yesu alianza kukua ndani ya Mariamu kama vikuavyo vitoto vingine ndani ya mama zao. Kisha Mariamu aliolewa na Yusufu.

Ndipo ukaja wakati kwa Yesu azaliwe. Alizaliwa katika mji wa Bethlehemu. Mariamu na mumewe Yusufu walikuwa wakitembelea mji huo. Lakini Bethlehemu ulijaa watu. Hapakuwa hata nafasi ambapo Mariamu na Yusufu waliweza kukaa usiku ambao Yesu alizaliwa. Ilikuwa lazima waweke kitoto katika hori. Hori ni mahali pa kulia ng’ombe na wanyama wengine.

Kukatokea maajabu usiku ambao Yesu alizaliwa. Karibu na Bethlehemu malaika akasema na wachungaji fulani. Akawaambia wachungaji Yesu alivyokuwa mtu mkuu. Akawaambia: ‘Tazama! Mimi nawaletea habari njema itakayofurahisha watu. Leo fulani amezaliwa ambaye ataokoa watu.’ Yesu angefanya mambo mengi mazuri kwa watu wanaompenda Mungu.— Luka 2:10, 11.

Hii ilikuwa habari njema! Malaika wengine mbinguni walijiunga katika kumsifu Mungu. Walifurahi! Wachungaji waliweza kusikia waliyosema.

Sasa wachungaji walitaka kumwona Yesu. Malaika akawaambia wangeweza kumwona Yesu Bethlehemu. Basi wakaenda huko. Wakati wachungaji walipofika huko kumwona Yesu, walimwambia Yusufu na Mariamu mambo yote mazuri waliyokuwa wamesikia. Hii ilifanya Yusufu na Mariamu wamshukuru Mungu sana. Unaweza kudhani Mariamu alifurahi namna gani kwa vile alikuwa amekuwa na nia ya kuwa mama ya Yesu?

Kisha, Yusufu na Mariamu wakampeleka Yesu kwenye mji wa Nazareti. Huko ndiko Yesu alikulia. Alipokua, alianza kazi yake kuu ya kufundisha. Hii ilikuwa sehemu ya kazi ambayo Yehova Mungu alitaka Mwana wake afanye duniani.

Karibu miaka mitatu iliyofuata, Yesu na wengine wa wafuasi wake walipanda mlima mrefu. Kulitukia nini huko? Wengine walipokuwa wakitazama, mavazi ya Yesu yalianza kumeta-meta sana. Ndipo sauti ya Mungu mwenyewe ikasikiwa. Yehova alisema hivi juu ya Yesu: “Huyu ni Mwanangu, mpendwa wangu.” Mungu alipendezwa na Mwana wake.—Marko 9:2-8.

Sikuzote Yesu alifanya mema. Yeye hakujionyesha kuwa hivi na hali kweli hakuwa hivyo. Hakuwaambia watu kwamba yeye alikuwa Mungu. Malaika Gabrieli alikuwa amemwambia Mariamu kwamba Yesu angeitwa Mwana wa Mungu. Yesu mwenyewe alisema alikuwa Mwana wa Mungu. Naye hakuwaambia watu kwamba alijua zaidi kuliko Baba yake. Alisema hivi: “Baba ni mkuu kuliko mimi.”—Yohana 14:28.

Wakati Baba ya Yesu alipompa kazi kufanya, Yesu aliifanya. Yeye hakusema, ‘Ndiyo, nitafanya’ kisha akafanya jambo jingine. Yeye alimpenda Baba yake. Basi alisikiliza alichosema Baba yake.

Tunataka sisi vile vile tumpendeze Yehova, sivyo?— Basi inatupasa tuonyeshe kwamba kweli tunamsikiliza Mungu, kama Yesu. Mungu anasema na sisi kupitia kwa Biblia. lsingekuwa vizuri kujionyesha kumsikiliza Mungu, kisha kuamini na kufanya mambo yaliyo tofauti na Biblia, sivyo? Na kumbuka, hatutaona vigumu kumpendeza Yehova ikiwa kweli twampenda.

(Maandiko mengine yaonyeshayo sababu lazima tujue na kuamini ambayo Biblia kweli inasema juu ya Yesu: Mathayo 7:21-23, 1 Timotheo 2:5, 6 na Yohana 4:25, 26.)