Sura ya 6

Mwalimu Mkuu Alitumikia Watu Wengine

UNAPENDA wakati mtu fulani anakufanyia kitu fulani?— Basi, watu wengine wanapenda wakati mtu fulani anawafanyia kitu fulani. Sote tunapenda. Mwalimu Mkuu alijua hilo, naye sikuzote alikuwa akiwafanyia watu vitu. Alisema: ‘Nilikuja, si kutumikiwa, bali kutumikia.’—Mathayo 20:28.

Basi, tukitaka kuwa kama Mwalimu Mkuu, yatupasa tufanye nini? Yatupasa tutumikie wengine. Yatupasa tuwafanyie mambo mazuri.

Ni kweli, watu wengi hawafanyi hivi. Zaidi, karibu watu wote wanataka wengine wawatumikie sikuzote. Wakati mmoja hata wafuasi wa Yesu waliona hivyo. Kila mtu alitaka awe mkubwa.

Yesu alijua haikuwa vizuri kwao kufikiri namna hii. Basi, siku moja aliwapa somo ambalo wasingesahau hata kidogo.

Wakati walipokuwa wakila pamoja, Yesu alitoka mezani. Akachukua bakuli ya kuogea akatia maji ndani yake. Walipokuwa wakitazama, Yesu akamwendea kila mmoja wao, akainama akasafisha miguu yao. Halafu akapangusa miguu yao kwa kitambaa. Ebu fikiria hilo! Namna gani kama wewe ungalikuwako na Yesu akasafisha miguu yako? Ungalionaje?—

Wafuasi wake hawakuona ilifaa Mwalimu Mkuu awatumikie katika njia hii. Walisumbuka. Zaidi, mmoja wao hakutaka Yesu amfanyie utumishi huu wa unyenyekevu. Lakini Yesu akasema ilikuwa na maana sana kwake afanye.

Si kawaida yetu kusafishana miguu leo. Lakini ilikuwa kawaida wakati Yesu alipokuwa duniani. Unajua kwa sababu gani?

Basi, nchi walimoishi, watu walivaa makubazi (sandales). Basi walipotembea katika barabara chafu, miguu yao ilipata vumbi. Ulikuwa wema kusafisha miguu yenye vumbi ya mtu aliyeingia katika nyumba kuamkia.

Lakini wakati huu hapana mmoja wa wafuasi wa Yesu aliyejitolea kusafisha miguu ya wengine. Basi Yesu mwenyewe alifanya hivyo. Kwa kufanya hivi, Yesu alifundisha wafuasi wake somo la maana. Iliwapasa wajifunze somo hili. Nalo ni somo ambalo sisi leo yatupasa tujifunze.

Unajua ni somo gani hilo?— Yesu alipokwisha kuketi tena mezani, alieleza hivi: ‘Je! mwafahamu hayo niliyowatendea? Mnaniita “Mwalimu” na “Bwana,” na mwasema kweli. Ikiwa mimi, Mwalimu na Bwana wenu, niliwasafisha miguu yenu, basi imewapasa ninyi msafishane miguu.’—Yohana 13:2-14.

Hapa Mwalimu Mkuu alionyesha kwamba yeye alitaka wafuasi wake watumikiane. Hakutaka wajifikirie wenyewe tu. Hakutaka wafikiri walikuwa wakuu na wengine wawatumikie sikuzote. Alitaka wawe na nia ya kutumikia wengine.

Je! hilo halikuwa somo zuri?— Wewe utakuwa kama Mwalimu Mkuu na kutumikia watu wengine? Sisi sote twaweza kuwatumikia wengine.

Si vigumu kutumikia watu wengine. Ikiwa unatazama, utaona vitu vingi ambavyo unaweza kufanyia watu wengine.

Fikiri sasa: Kuna lo lote ambalo unaweza kufanya umsaidie mama yako? Unajua yeye anakufanyia wewe na wengine katika jamaa vitu vingi. Unaweza kumsaidia?— Sababu gani usimwulize?—

Labda unaweza kutandika meza mbele ya jamaa kula. Au labda unaweza kuondoa sahani chafu jamaa ikimaliza kula. Watoto wengine wanaondoa uchafu kila siku. Lo lote ufanyalo, ita-kuwa kuwatumikia wengine, hata kama alivyofanya Yesu.

Je! unao wadogo wako, ndugu na dada ambao unaweza kutumikia? Kumbuka, Yesu, Mwalimu Mkuu, alitumikia hata wafuasi wake. Kwa kutumikia wadogo wako, ndugu na dada, utakuwa kama Yesu.

Unaweza kuwafanyia nini? Unaweza kufikiria lo lote? Labda unaweza kuwasaidia wajifunze kuweka vizuri vitu vyao vya kuchezea wakimaliza kuchezea. Au labda unaweza kuwatayarisha kwenda kulala. Watakupenda kwa kufanya mambo haya, kama wafuasi wa Yesu walivyompenda.

Tena katika masomo, unaweza kutumikia watu wengine. Ikiwa mtu fulani anaangusha vitabu vyake, ingekuwa wema kumwokotea. Pengine ungejitolea kumfutia mwalimu wako ubao wa kuandikia, au kumfanyia kitu kingine. Hata kumfungulia mtu mlango ni utumishi mwema.

Mara nyingine tutaona watu hawatasema asante kwa kuwatumikia. Unafikiri hii ituzuie kufanya mema?— Hapana! Watu wengi hawakusema asante kwa Yesu kwa kazi zake nzuri. Lakini hiyo haikumzuia kufanya mema.

Basi tusiache kabisa kutumikia watu. Sikuzote na tufuate mfano wa Yesu.

(Kwa maandiko zaidi juu ya kusaidia watu wengine, soma Warumi 15:1, 2, Mithali 3:27, 28 na Wagalatia 6:2.)