Sura ya 16
Serikali ltakayoleta Amani Duniani Pote
JE! KUNA serikali yo yote inayoweza kuleta amani yenye kudumu duniani? inayoweza kuwapa watu usalama na kuwaondolea uhalifu? inayoweza kuwaletea watu wote chakula tele kilicho kizuri? inayoweza kuyasafisha mazingira na kumaliza magonjwa?
2 Yafikirie matendo ya wanadamu katika mambo ya kiserikali—serikali za mtawala mmoja mwenye mamlaka peke yake, serikali za kidemokrasi na serikali za ujamaa au tawala za Kikomunisti. Hakuna hata moja kati ya hizo, wala hata zote pamoja, iliyoweza kuyafanya mema yaliyotajwa sasa hivi; hata kwa kadiri ndogo, licha ya kuyafanya duniani pote. Hata hivyo, kuna sababu ya kukufanya uwe na tumaini.
MUNGU ANAKUSUDIA KUWE NA SERIKALI—ULE UFALME
3 Yehova Mungu mwenyewe anaahidi kutuletea kile tunachohitaji. Tunawezaje kuwa na uhakika? Kumbuka kwamba hapo kwanza alikusudia kuwe na paradiso ya dunia nzima ambamo watu wangeweza kufurahia amani na furaha. (Mwanzo 1:28; 2:8, 9) Ndipo ulipotokea uasi katika bustani ya Edeni. Lakini wewe unafikiri kwamba Mungu angeruhusu viumbe wasiothamini mambo wazuie kutimizwa kwa kusudi lake? Hata! Kwa kweli, muda mfupi baada ya Adamu na Hawa kuasi, Yehova alimtabiri mkombozi ambaye angekuja, “uzao” ambao ungeponda wachafua-amani mbinguni na duniani. (Mwanzo 3:15) ‘Lakini,’ huenda ukauliza kwa kushangaa, ‘neno “serikali” linatoka wapi?’ “Uzao” huo ulipasa uwe ndio Masihi, yule Mwana-Mfalme wa Amani, aliyeandikwa habari zake na nabii Isaya kwa uongozi wa Mungu: “Kwa habari ya ongezeko la serikali yake na amani hakutakuwa na mwisho.”—Isaya 9:6, 7, AV; 11:1-5.
4 Ndiyo, ahadi ya Yehova ni kuleta utawala utakaotenda haki na kuleta amani. Biblia inauita utawala huo ufalme wa Mungu. Mamilioni ya watu wamesali hivi: “Baba yetu . . . ufalme wako uje.” (Mathayo 6:9, 10) Ikiwa wewe umepata kuitoa sala hiyo, umekuwa ukiomba serikali halisi—ule ufalme wa kimungu—ambao utaleta amani duniani. (Zaburi 72:1-8) Lakini ni wakati gani Mungu angeanzisha serikali hiyo? Angechaguaje watawala, na angewastahilishaje?
5 Muda wa karne zote kusudi la Mungu liliendelea kuonekana wazi. Kwa mfano, alionyesha kwamba Masihi angekuja kupitia ukoo wa Abrahamu na Yakobo, kisha angekuwa wa kabila la Yuda. (Mwanzo 22:18; 49:10) Ndipo Yehova aliposimamisha juu ya Israeli ufalme uliokuwa kielelezo cha kiunabii cha mambo ambayo yangekuja. Israeli ilikuwa theokrasi (utawala wenye kuongozwa na Mungu). Mfalme wao alisemwa kuwa alikalia “kiti cha enzi cha [Yehova].” (1 Mambo ya Nyakati 29:23) Yehova ndiye aliyekuwa mamlaka ya mwisho ya kukata maneno; sheria na viwango vyake ndivyo vilivyoliongoza taifa. Baadaye, Mungu akamwambia Mfalme Daudi kwamba mfalme fulani wa daima angekuja kupitia jamaa yake.—Zaburi 89:20, 21, 29.
6 Maelezo mengi hayo na habari nyingine za Biblia zinazohusu historia ya Waisraeli ni za maana kwa sababu zinatuonyesha Mungu alikuwa akiweka msingi imara wa kisheria kwa ajili ya ufalme ambao ungekuja. Kupatana na jambo hilo, baadaye Mungu alituma malaika amfikie msichana bikira wa nyumba ya Daudi akamwambie:
“Utamzaa mtoto wa kiume na utampa jina Yesu. Yeye atakuwa mkuu na ataitwa mwana wa Yule Aliye Juu. Bwana Mungu atampa kiti cha Mfalme Daudi, babu yake. Kwa hiyo atautawala ukoo wa Yakobo milele, na utawala wake hautakuwa na mwisho.”—Luka 1:28-33, HNWW.
7 Huyu ndiye Masihi aliyetabiriwa, yule ambaye Mungu aliahidi angempa utawala wa kudumu juu ya wanadamu. Tunaweza kutazamia mambo gani kutoka kwa Yesu akiwa mtawala? Acha tuchunguze sehemu fulani ya habari zake.
8 Nyakati zote Yesu amekuwa mwenye kujitoa kabisa kwa Mungu, hata kufanya mapenzi Yake. (Waebrania 10:9; Isaya 11:3) Njia moja ambayo alionyesha ushikamanifu wake kwa Mungu ni kwa kukataa mahongo ya kupewa utajiri au ukubwa, na hivyo akawa tofauti sana na watawala wengi wa kibinadamu. (Luka 4:5-8) Yeye hakuogopa kuitetea ile kweli, kwa hiyo hakusita-sita kuonyesha wazi unafiki wa wanadini.—Yohana 2:13-17; Marko 7:1-13.
9 Pia Kristo anapenda sana wanadamu kwa njia isiyo na kifani, na jambo hilo lilionekana kwa kutoa uhai wake kwa ajili yetu. (Yohana 13:34; 15:12, 13) Yesu alivutwa na huruma akaponya wagonjwa, akafufua wafu na kuwapa wenye njaa chakula. (Luka 7:11-15, 22; 9:11-17) Vilevile ana uwezo wa kuongoza kani (nguvu) za asili, naye alizitumia kufaidi watu. (Mathayo 8:23-27) Na bado yeye ni rahisi kufikiwa na watu; hata watoto walistarehe walipokuwa karibu na mtu huyo mwenye upole.—Mathayo 11:28-30; 19:13-15.
10 Ebu waza ni baraka kama nini akiwa ndiye Mtawala, akiwa na sifa na uwezo wake mwingi! Hilo ndilo taraja kuu la waabudu wa Yehova.
UTAWALA KUTOKA MBINGUNI
11 Wakati gavana (liwali) Mrumi alipomwuliza Yesu habari za yeye kuwa mfalme, Yesu alijibu: “Ufalme wangu si sehemu ya ulimwengu huu.” (Yohana 18:36, NW) Yesu aliendelea kutokuwamo kabisa katika siasa za mataifa, akiwekea wafuasi wake mfano waufuate. (Yohana 6:15; 2 Wakorintho 5:20) Zaidi ya hilo, halikuwa kusudi la Mungu Mwana wake atawale akiwa mahali fulani pa kidunia. Alipaswa kutawala akiwa mbinguni, ambako angeweza kutumia mamlaka inayozidi ya kibinadamu, mamlaka ya ulimwengu mzima.
12 Kwa sababu ya taraja hilo, baada ya Yesu kufa akiwa mwaminifu kwa Mungu, Baba yake alimfufua akamleta kwenye uzima wa kuwa kiumbe cha kiroho kisichoweza kufa. (Matendo 10:39-43; 1 Wakorintho 15:45) Kristo aliwatokea wafuasi wake akawahakikishia yuko hai na ni mwenye utendaji. Ndipo Yesu alipopaa mbinguni. Kwa habari hiyo, mtume Petro aliandika hivi: “Naye yupo mkono wa kuume wa Mungu, amekwenda zake mbinguni, malaika na enzi na nguvu zikiisha kutiishwa chini yake.”—1 Petro 3:22; Mathayo 28:18.
13 Tangu wakati huo, mwaka wa 33 W.K., Kristo alianza kulitawala kundi la Kikristo, na wafuasi wake waliukubali ubwana wake na cheo chake cha kimbingu kwa furaha. (Wakolosai 1:13, 14) Hata hivyo halikuwa kusudi la Yesu aanze kutawala wanadamu na ulimwengu mzima wakati huo.
14 Mungu alikuwa akiruhusu wanadamu wakati wa kujionea wenyewe matunda ya utawala wa kibinadamu. Kwa hiyo, ilimpasa Kristo angoje mpaka ufike wakati uliowekwa wa Ufalme kuutawala ulimwengu. Mtume Paulo aliandika hivi: “Huyu, alipokwisha kutoa kwa ajili ya dhambi dhabihu moja idumuyo hata milele, aliketi mkono wa kuume wa Mungu; tangu hapo akingojea hata adui zake wawekwe kuwa chini ya miguu yake.”—Waebrania 10:12, 13.
15 Lakini ikiwa Yesu yuko mbinguni katika hali ya kutokuonekana, tunaweza kujuaje wakati wake ufikapo wa kuanza kutawala? Kama ilivyozungumzwa katika sura iliyotangulia, Yesu alitoa “ishara” inayoonekana ili wafuasi wake duniani waweze kujua wakati huo ufikapo. (Mathayo 24:3-31) Vile vita, njaa kubwa, matetemeko ya ardhi, kuteswa kwa Wakristo na kazi ya kuhubiri katika dunia nzima habari njema za ule Ufalme ambavyo tumeona tangu Vita ya Ulimwengu ya Kwanza (1914-1918), vinahakikisha tunaishi katika ule umalizio wa taratibu (mfumo) ya mambo. Pia matukio hayo yanathibitisha kwamba sasa Kristo anatawala mbinguni, kwa manna, baada ya Biblia kusimulia habari za vita fulani ya kumpiga Shetani mbinguni, inasema hivi: “Sasa kumekuwa wokovu, na nguvu, na ufalme wa Mungu wetu, na mamlaka ya Kristo wake; . . . Kwa sababu hii, furahini mbingu, nanyi munaokaa ndani. Ole wao wanaokaa kwa dunia na bahari! Kwani yule Diabolo ameshuka kwenu mwenye gazabu nyingi kwa sababu anajua ana wakati mufupi tu.”—Ufunuo 12:7-12, Zaire Swahili Bible.
16 Kwa hiyo, sasa Yesu Kristo anatawala. Ndiyo kusema umebaki ‘wakati mfupi tu’ atumie mamlaka yake kumaliza kabisa upinzani wote unaofanywa juu ya ule Ufalme, pamoja na Ibilisi na serikali zote zilizofanyizwa na wanadamu. (Danieli 2:44) Hapo ndipo tutakapoweza kufurahia ufalme wa kitheokrasi utakaoleta amani yenye kudumu.
WATAWALA WENZAKE KATIKA UFALME
17 Upande mwingine wa kusisimua wa ule Ufalme umeonyeshwa wazi katika Biblia. Danieli 7:13, 14 inatupa maelezo juu ya kupokea kwa Mwana wa Mungu “utawala na adhama na ufalme.” Kisha njozi hiyo inasema:
“Ufalme huo na utawala huo na ile fahari ya kifalme ya zile falme zilizo chini ya mbingu zote vilipewa watu walio watakatifu wa yule Mkuu. Ufalme wao ni ufalme wenye kudumu muda usiojulikana, na tawala zote zitatumikia na kutii ao hao.”—Danieli 7:27, NW.
Kwa hiyo Mungu anakusudia Yesu Kristo awe na watawala wenzake. Ndiyo kusema wanadamu fulani wataenda mbinguni. Yesu alipokuwa duniani alianza kuchagua wanaume na wanawake wakawe watawala wenzake. Alisema alikuwa anaenda mbinguni akawatayarishie mahali.—Yohana 14:1-3.
18 Hiyo inasaidia kuonyesha wazi jambo fulani wasilolifahamu watu wengi ambao wameenda makanisani maisha yao yote, kwamba: Kwa upande mmoja, Biblia inaonyesha Mungu alikusudia wanadamu waishi duniani; lakini, kwa upande mwingine, Biblia inaeleza wanadamu wataenda mbinguni. Sasa hapo mambo yanaendaje? Basi, Mungu ameahidi kupeleka wanadamu fulani mbinguni wakawe pamoja na Mwana wake katika serikali ya Ufalme ule. Lakini dunia itakuwa paradiso yenye kujawa na wanadamu wenye furaha na amani.—Angalia Zaburi 37:29; Isaya 65:17, 20-25.
19 Ni wangapi watakaoenda mbinguni wakawe sehemu ya serikali ya ule Ufalme? Yesu alionyesha ni wangapi kwa kusema: “Msiogope, enyi kundi dogo; kwa kuwa Baba yenu ameona vema kuwapa ule ufalme.” (Luka 12:32) Ndiyo, hesabu ni ndogo. Ufunuo unaonyesha kwamba wale ambao “wamenunuliwa katika wanadamu” wakatawale na “Mwana-Kondoo” (Yesu Kristo) ni 144,000 hesabu yao. (Ufunuo 14:1-5) Hilo si jambo gumu kuelewa. Hata serikali fulani za kibinadamu zina baraza fulani ya wanaume na wanawake waliochaguliwa wanaoenda kwenye mji mkuu wa nchi wakiwa sehemu ya serikali yao.
20 Lakini Mungu hakuwaachia wanadamu kazi ya kuamua ni nani watakaoenda mbinguni. Yeye ndiye anayewachagua. (1 Petro 2:4, 5, 9; Warumi 8:28-30; 9:16) Wakati Mungu alipomchagua mtume Paulo, alimmiminia roho yake, kwa njia hiyo akamsadikisha Paulo kwamba angekuwa sehemu ya ule ‘ufalme wa mbinguni.’ (2 Timotheo 4:18) Paulo aliandika hivi: “Ile roho yenyewe hushuhudia pamoja na roho yetu kwamba sisi tu watoto wa Mungu. Basi, ikiwa sisi tu watoto, sisi tu warithi pia: warithi kweli kweli wa Mungu, lakini warithi washirika pamoja na Kristo.”—Warumi 8:16, 17, NW; 1 Wakorintho 1:22; 5:5.
21 Ni waabudu wachache wa Mungu ambao wamechaguliwa wakaishi mbinguni, kwa kuwa kusudi la Mungu lilikuwa kwamba wanadamu waishi kwa furaha duniani. Yesu ndiye aliyekuwa wa kwanza kupelekwa mbinguni. (Waebrania 6:19, 20; Mathayo 11:11) Baada ya hapo Mungu aliendelea kuchagua wengine 144,000. Ni jambo gani lingetukia hesabu hiyo ikikamilika?
22 Alipokwisha kupewa njozi ya hiyo hesabu ndogo (144,000) wakiwa mbinguni pamoja na Kristo, mtume Yohana alionyeshwa “umati mkubwa wa watu wasiohesabika.” (Ufunuo 7:4, 9, 10, HNWW) Hawa watalindwa na Mungu waupite mwisho wenye uharibifu wa taratibu (mfumo) ya mambo ya sasa. Wana taraja zuri ajabu la kupata uzima wa milele duniani, taraja lile lile linalowahusu watu wenye imani kama Noa, Abrahamu na Daudi, waliokufa kabla Mungu hajafungua njia ya wale 144,000 kuishi mbinguni.—Matendo 2:34.
SABABU ZA KUWA NA HAKIKA NA WATAWALA HAO
23 Leo watu wengi sana hawana hakika sana na watawala wao. Walakini, wale watakaotawala katika ufalme wa Mungu wako tofauti sana na watawala wa kilimwengu. Muda wa karne nyingi Mungu amechagua watu ambao wamethibitisha ni wenye imani. Wao wameshikamana sana na yaliyo mema na ya haki chini ya namna zote za majaribu na vishawishi. Wanapata kutumainiwa na Mungu, basi je! sisi tusiwatumaini wao?
24 Vilevile, kwa kuwa watakuwa wametangulia kuwa wanadamu, jambo hilo litawawezesha kuelewa shida zetu na kutuhurumia. (Linganisha Waebrania 4:15, 16.) Wao wanajua mtu akichoka anajisikia namna gani, wanajua wasiwasi una maana gani, wanajua mtu anavyojisikia akivunjika moyo. Wanajua ni jitihada ya kadiri gani inayohitajiwa ili mtu awe mwenye subira zaidi, mwenye fadhili na rehema zaidi. Na wengine wao walikuwa wanawake; wanafahamu namna wanawake wanavyojisikia na kuyajua mahitaji ya pekee waliyo nayo duniani.—Wagalatia 3:28.
25 Mamilioni ya Mashahidi wa Yehova leo wanathibitisha kwamba wana hakika na Kristo na watawala wenzake, tena wanaonyesha namna wanavyouona Ufalme kuwa halisi kwao. Wanafanya hivyo kwa kuwa raia washikamanifu wa ufalme wa Mungu. (Mithali 14:28) Wanazikubali na kuzipendekeza sheria za ufalme huo zilizoandikwa katika Biblia, wakiamini kikweli kwamba Ukristo ndiyo njia bora zaidi ya maisha. Wao wanaushiriki mpango wa kuelimisha watu wa serikali hiyo. Biblia ndicho kitabu kikuu cha mafundisho, kinachotumiwa pamoja na vitabu au vijitabu vingine vya Kikristo vya kujifunza. Kwenye mikutano ya kundi wanajifunza habari zaidi zinazohusu ule Ufalme na maisha ya Kikristo. Tena wanapelekea wengine mpango wa kuwaelimisha kwa kuwafundisha waziwazi na katika nyumba zao.—Matendo 20:20.
26 Yesu alisema sehemu moja ya ile ishara ya “siku za mwisho” ingekuwa: “Habari njema hizi za ufalme zitahubiriwa katika dunia yote inayokaliwa na watu kwa ushuhuda kwa mataifa yote; na ndipo ule mwisho utakapokuja.” (Mathayo 24:14, NW) Kabla Yesu hajapaa mbinguni aliukazia uhitaji wa wanafunzi wake kuishiriki kwa bidii kazi ya kueneza evanjeli (injili).—Mathayo 28:19, 20; Matendo 1:8.
27 Leo Wakristo wanajua kwamba kuishiriki kazi hii ya kuhubiri na kufundisha ni njia ya maana wanayoweza kutumia waonyeshe wanapenda Mungu na jirani zao. (Marko 12:28-31) Maisha za watu zinahusika, kwa hiyo hilo ni daraka zito. (Matendo 20:26, 27; 1 Wakorintho 9:16) Vilevile ni kazi inayoleta furaha na uradhi mwingi sana. (Matendo 20:35) Mashahidi wa Yehova watafurahi kukusaidia wewe ufundishe wengine habari za ufalme wa Mungu unaotawala.
[Mambo ya Kuzungumziwa]
Ni mambo gani ya kutamanika ambayo serikali za kibinadamu zimeshindwa kuyatimiza? (1, 2)
Tunajuaje Mungu anakusudia kuwe na serikali itakayoleta amani? (3, 4)
Mungu alichukua hatua gani ili kuutokeza ule Ufalme? (5, 6)
Sababu gani tunaweza kuwa na uhakika kwamba Yesu atakuwa mtawala mashuhuri? (7-10)
Kuna sababu gani za kujua kwamba Yesu hatatawala akiwa duniani? (11, 12)
Kuna ushuhuda gani wa kuonyesha ni wakati gani Kristo alipoanza kutawala wanadamu? (13-16)
Ni nani watakaotawala pamoja na Yesu katika ule Ufalme (17, 18)
Ni wangapi watakaoenda mbinguni, na sababu gani si wanadamu wote? (19-22)
Tuna sababu gani za kuwa na hakika na watawala hao wenzi wa Kristo? (23, 24)
Tunaweza kuonyeshaje kwamba tunauunga mkono ule Ufalme? (25-27)
[Sanduku katika ukurasa wa 151]
“Kushindwa kutokeza msingi wa kweli wa amani ya ulimwengu . . . kunaweza kusemwa moja kwa moja kwamba kumetokea kwa sababu mataifa, hasa yale makubwa zaidi, yanakataa mamlaka inayoweza kuyaambia jambo la kufanya katika shughuli za kimataifa.
“Basi, hili ndilo tatizo kubwa zaidi linalojitokeza leo—namna ya kutokeza mamlaka ya ulimwengu ya kutunza amani, mamlaka itakayotumainiwa kwa uhakika na mataifa ya ulimwengu.”—Mhariri Norman Cousins, “Saturday Review.”
[Sanduku katika ukurasa wa 159]
MAONI YA KWELI JUU YA SERIKALI
“Silaha zetu zilikuwa virungu vifupi, marungu yaliyofunikwa kwa madini ya risasi, minyororo na bunduki,” anasimulia Stelvio, ambaye katika miaka ya 1970 alikuwa mwanaha-rakati wa kisiasa katika Ulaya ya kusini. Alijifunza namna ya kuita watu waunde makundi yenye kufanya ghasia na fujo na kuleta vita katika jiji, akiwa katika kambi za siri zinazofanana na zile za kijeshi.
Lakini baada ya miaka kadha badiliko likatokea. Mmoja wa Mashahidi wa Yehova alitembelea makao ya Stelvio, akamfundisha Biblia. Matokeo yakawa nini? “Ilinifungua macho nikaona kwamba utukuzo wa taifa na vikundi vya watu wa kisiasa wenye fujo vinatenganisha watu. Nikajifunza kutokana na Biblia kwamba Mungu alifanya kutoka kwa mtu mmoja kila taifa la wanadamu, wakae juu ya dunia. (Matendo 17:26) Kujua hivyo ni nguvu yenye kuunganisha watu. Kuliniachisha kuchukia wengine kwa sababu tu mawazo yao ya kisiasa yalikuwa tofauti na yangu.”
Mtu huyo anaongezea hivi: “Mimi ninazidi kujiuliza hivi: Mwanadamu anawezaje kweli kutatua matatizo yake kwa kutumia siasa, kwa kuwa siasa zenyewe zimetenganisha wanadamu? Ili wanadamu waungane, lazima kusiweko sababu zinazowatenganisha. Mimi nimeona kati ya Mashahidi wa Yehova watu weusi na weupe wakibatizwa katika maji yale yale, waliokuwa Waprotestanti na Wakatoliki katika nchi ya Ireland wakiacha kuchukiana, Waarabu na Wayahudi wakikutana mahali pamoja wakati wa ile Vita ya Siku Sita. Mimi nimejifunza kuwapenda wale niliokuwa nimewachukia.
“Hakuna mtu anayeweza kusema kwamba ufalme wa Mungu, ambao Mashahidi wa Yehova wanautaka sana, ni ndoto. . . . Kufuata kanuni za Biblia kumetokeza mambo yasiyopata kutimizwa na kikundi kinginecho chote cha kidini, cha kisiasa wala cha kijamii.
“Nawaambia hivi wale ambao wanang’ang’ana wakijaribu kuleta usawa, amani na utaratibu mzuri kati ya watu, kama mimi nilivyokuwa nikifanya: ‘Yaoneni mambo yalivyo na mkubali wazi kwamba mwanadamu ameshindwa kuleta mambo hayo. Hata hivyo, watazameni Mashahidi wa Yehova.... Watu wanawatumaini wanadamu, nao wanapata matatizo. Mashahidi wa Yehova wanajiweka chini ya ufalme wa Mungu, nao wameweza kuyatatua yale matatizo makubwa-makubwa ya maisha.’”