Sura 11
Lazima Waokokaji Wawe “Si Sehemu ya Ulimwengu”
1, 2. (a) Yesu alisema nini juu ya uhusiano wa wanafunzi wake na ulimwengu? (b) Hilo halimaanishi nini, na kwa sababu gani?
YESU alimaanisha nini aliposema kwamba wafuasi wake wamo “katika ulimwengu,” na bado ni lazima wawe “si sehemu ya ulimwengu”? (Yohana 17:11, 14, NW) Ili tuwe miongoni mwa wale watakaookoka waishi katika Mfumo Mpya wa Mungu, tunahitaji kufahamu jambo hilo.
2 Kwanza fikiria lisilomaanishwa na kuwa “si sehemu ya ulimwengu.” Haimaanishi kwamba tujitenge kama watu wanaokaa peke yao katika mapango au tujitenge ili kukaa katika makao ya watawa au mahali pengine pa upweke. Tofauti kabisa na hivyo, usiku ule uliotangulia kufa kwake Yesu alimpelekea Baba yake sala kwa ajili ya wanafunzi wake, akisema: “Mimi nakuomba, usiwaondoe katika ulimwengu, bali uwalinde kwa sababu ya yule mwovu. Wao si sehemu ya ulimwengu, kama vile mimi si sehemu ya ulimwengu.”—Yohana 17:15, 16, NW.
3, 4. (a) Ni katika utendaji gani ambamo inahitajiwa kabisa Wakristo wawe na ushirika na watu wa ulimwengu? (b) Lakini lazima waepuke nini?
3 Badala ya kujificha na watu, wanafunzi wa Yesu ‘walitumwa ulimwenguni’ ili waujulishe ukweli. (Yohana 17:18) Katika kufanya hivyo walitumikia kama “nuru ya ulimwengu,” wakiiacha nuru ya ukweli iangaze ili wanadamu wapate kuona namna ukweli wa Mungu unavyogeuza maisha za watu ziwe njema.—Mathayo 5:14-16.
4 Wakristo wanashirikiana na watu wengi wanapofanya kazi ya kujipatia wenyewe na jamaa zao riziki na wanapozileta habari njema za Ufalme wa Mungu kwa wanadamu. Kwa hiyo, kama mtume Paulo anavyoonyesha, hawatazamiwi ‘watoke katika ulimwengu’ katika njia ya kimwili. Hawawezi ‘kuacha kabisa kuchangamana’ na watu wa ulimwengu. Lakini wanaweza kujiepusha na mazoea mabaya ya wingi wa wanadamu, na ni lazima wafanye hivyo.—1 Wakorintho 5:9-11, NW.
5. Kujitenga na ulimwengu kunakohitajiwa kunaonyeshwaje katika kisa cha Noa na jamaa yake?
5 Hali hii inafanana na ile ya siku za Noa wakati Yehova alipoona kwamba “wanadamu wote walikuwa wameishi maisha za ufisadi duniani.” (Mwanzo 6:12, The New English Bible) Lakini Noa na jamaa yake waliishi kwa njia tofauti. Kwa kukataa kujiunga na ufisadi uliowazunguka na kwa kuhubiri uadilifu, Noa “akauhukumu makosa ulimwengu.” Aliuonyesha kwamba haukuwa na udhuru wa kutopatana na mapenzi ya Mungu. (Waebrania 11:7; 2 Petro 2:5) Ndiyo sababu, Gharika ya duniani pote ilipowakomesha wanadamu wasiomtii Mungu, yeye na jamaa yake waliokoka. Wao walikuwa “katika ulimwengu” na bado wakati uo huo walikuwa “si sehemu ya ulimwengu.”—Mwanzo 6:9–13; 7:1; Mathayo 24:38, 39.
Ni Upendo Gani Unaowafaa Watu wa Ulimwengu?
6. Je! inafaa kuwaonyesha watu wa ulimwengu upendo wo wote?
6 Je! kuwa kwako “si sehemu ya ulimwengu” kungemaanisha pia uwe mchukia wanadamu? Kufanya hivyo kungeharibu hali ya mtu na Yehova Mungu, ambaye, Mwanaye Yesu alisema, “aliupenda ulimwengu [wa wanadamu], hata akamtoa Mwanawe pekee, ili kila mtu amwaminiye asipotee, bali awe na uzima wa milele.” Kwa hiyo, fadhili na huruma za Mungu kuelekea watu wa namna zote zinatuwekea sisi mfano wa kufuata.—Yohana 3:16; Mathayo 5:44-48.
7, 8. (a) Biblia inasema nini juu ya kuupenda ulimwengu? (b) Ni ulimwengu gani ambao lazima tujitenge nao? (c) Kwa sababu gani ni lazima tuuepuke ulimwengu na tamaa zake?
7 Lakini je! mtume Yohana hatuambii hivi, “Msiwe mkipenda wala ulimwengu wala vitu vilivyomo katika ulimwengu. Ikiwa mtu ye yote anapenda ulimwengu, upendo wa Baba haumo katika yeye”? Ikiwa Mungu mwenyewe aliupenda ulimwengu, kwa sababu gani mtume alisema hivyo?—1 Yohana 2:15, NW.
8 Biblia inaonyesha kwamba Mungu anaupenda ulimwengu wa wanadamu kama wanadamu tu walio katika hali ya kutokukamilika, ya kufa, na katika uhitaji mkubwa sana wa msaada. Kwa upande mwingine, Shetani amewapanga kitengenezo walio wengi kati ya wanadamu ili wampinge Mungu. Ni “ulimwengu” huo—jamii ya kibinadamu iliyotenganishwa na urafiki wa Mungu na iliyo chini ya uongozi wa Shetani—ambao lazima Wakristo wa kweli wajitenge nao. (Yakobo 1:27) Neno la Mungu linaonya dhidi ya kupenda tamaa mbaya na vitendo vya ulimwengu huo: “Kwa sababu kila kitu katika ulimwengu—tamaa ya mwili na tamaa ya macho na wonyesho mshaufu wa mali za maisha za mtu—hakitokani na Baba, bali hutokana na ulimwengu. Zaidi, ulimwengu unapitilia mbali na ndivyo na tamaa yao, lakini yeye ambaye hufanya mapenzi ya Mungu hubaki milele.”—1 Yohana 2:15-17, NW.
9, 10. (a) Inawezaje kusemwa kwamba tamaa hizo ‘zinatokana na ulimwengu’? (b) Tamaa hizo zimekuwa na matokeo gani juu ya wanadamu?
9 Ndiyo, tamaa hizo za mwili na za macho na tamaa ya kujikweza binafsi ‘zinatokana na ulimwengu.’ Ndizo zilizositawi katika wazazi wa kwanza wa wanadamu na zikawaongoza watafute kutomtegemea Mungu ili waweze kufuata mapendezi yao ya ubinafsi. Kufuata tamaa hizo za kilimwengu za ubinafsi kuliongoza kwenye kuvunja sheria za Mungu.—Mwanzo 3:1-6, 17.
10 Fikiria yale unayoyaona kukuzunguka. Je! si watu walio wengi wanafanya maisha zao zitegemee hasa tamaa za mwili na za macho na “wonyesho mshaufu wa mali za mtu”? Je! mambo hayo siyo yanayofanyiza matumaini na mapendezi yao, yakiongoza jinsi wanavyotenda mambo na wanavyotendeana wao kwa wao? Kwa sababu hiyo historia ya kibinadamu imekuwa kumbukumbu ndefu ya ukosefu wa umoja na yenye vita, yenye ukosefu wa adili na yenye uhalifu, yenye pupa ya kibiashara na uonevu, yenye tamaa ya makuu, na yenye kushindania sifa na uwezo.
11. Kwa hivyo, basi, ni kwa sababu gani upendo wa Mungu kwa ulimwengu haupingani na ule ambao Neno lake linalaumu vikali?
11 Basi, twaweza kuona kwamba kupenda ulimwengu kama Mungu anavyofanya ni tofauti sana na kupenda tamaa na mazoea yao mabaya, ambayo ni mambo anayolaumu vikali. Upendo wa Mungu kwa wanadamu umefungua njia ya kupata uhuru wa kutoka kwenye tamaa hizo zenye dhambi na matokeo yazo mabaya, kutia na kifo chenyewe. Yeye alionyesha upendo huo kwa kutoa Mwanaye mwenyewe akomboe wanadamu. Lakini mtu ye yote akiikataa dhabihu hiyo na kuendelea katika kutokutii, Biblia inasema kwamba “ghadhabu ya Mungu inamkalia.”—Yohana 3:16; 36; Warumi 5:6-8.
Kujitenga na Uongozi wa “Mtawala wa Ulimwengu Huu”
12. Tunawezaje kuchanganua kama upendo ambao twaweza kuwa nao kwa watu wa ulimwengu unampendeza au haupendezi Mungu?
12 Basi, namna gani sisi? Je! ‘tunawapenda’ watu walio katika ulimwengu katika maana ya kutaka kwa moyo mweupe kuwasaidia sana waipate njia ya uzima katika upendeleo wa Mungu? Au tunapenda mambo yale yale yanayowazuia wao wasiwe watumishi wa Mungu—roho yao ya kujitegemea, kujionyesha kwao kwa vitu vya kimwili walivyo navyo, na kujitumainia kwao katika umaana na utukufu wao wenyewe? Ikiwa sisi tunapenda kuwa pamoja na watu kwa sababu ya sifa hizo, basi ‘tunaupenda ulimwengu’ katika njia ambayo mtume alilaumu vikali.
13. Kupenda ulimwengu kunaweza kuzuiaje mtu asimtumikie Mungu?
13 Watu wengi katika siku za Yesu walizipenda njia za ulimwengu. Kwa hiyo waliepuka kuchukua msimamo wa ujasiri wawe wanafunzi wa Yesu. Hawakutaka waiache sifa yao ya kupendwa na watu wengi na cheo chao miongoni mwa watu wa vikundi vyao vya kijamii na vya kidini. Walipenda sifa ya kutoka kwa wanadamu kuliko kibali cha Mungu. (Yohana 12:42, 43) Ni kweli kwamba wengine walifanya kazi za kusaidia maskini na wakafanya matendo mengine ya kidini. Lakini walifanya hivyo kwa sababu hasa walitaka wawe wakipewa heshima na wengine. (Mathayo 6:1-6; 23:5-7; Marko 12:38-40) Je! wewe huoni watu wakionyesha upendo uo huo kwa mwendo mbaya wa ulimwengu leo? Hata hivyo Biblia inaonyesha kwamba “upendo” wa aina hiyo unaweza kuongoza kwenye uharibifu tu.
14. Ni nani aliyeweka Yesu chini ya kishawishi alipokuwa duniani, na matokeo yakawa nini?
14 Mwana wa Mungu mwenyewe aliwekwa chini ya kishawishi kuhusiana na ayo hayo. Jitihada ilifanywa ili kuchochea ndani yake tamaa ya ubinafsi ya kujionyesha ili avute watu—awe kama ulimwengu. Hata alipewa toleo la utawala juu ya mataifa yote ya ulimwengu pamoja na fahari yayo. Lakini yeye alivikataa katakata vivutio hivyo vya tamaa za ubinafsi. Vilitokana na yeye aliyekuwa wa kwanza kutoa mwito wa ushindani juu ya enzi kuu ya Yehova Mungu, Shetani Ibilisi.—Luka 4:5-12.
15. Onyesha kutokana na Biblia yako ni nani “mtawala wa ulimwengu huu.”
15 Ni jambo muhimu kujua juu ya toleo la utawala ambalo Shetani alimpa Yesu ili tuelewe kwa nini ni lazima tuwe “si sehemu ya ulimwengu.” Linaonyesha kwamba ulimwengu wa wanadamu kwa ujumla, kutia na tawala zao, unatawalwa na Hasimu ya Mungu asiyeonekana. Yesu mwenyewe alisema juu ya Shetani kuwa “mtawala wa ulimwengu huu.” (Yohana 12:31; 14:30; 2 Wakorintho 4:4, NW) Mtume Paulo pia aliwataja “majeshi ya roho waovu,” mashetani walio chini ya uongozi wa Shetani, kuwa ndio “watawala wa ulimwengu wa giza hili” wasioonekana. Paulo aliwaonya Wakristo juu ya uhitaji wa silaha za kiroho ili wajikinge dhidi ya “watawala” hao.—Waefeso 6:10-13. NW.
16. Ni kadiri gani ya ulimwengu imepotezwa na Shetani na imo katika uwezo wake?
16 Wachache peke yao ndio wamepata kukaa huru na uongozi wa mtawala huyo asiyeonekana pamoja na majeshi yake. Hivyo “ulimwengu,” yaani, halaiki ya wanadamu waliotenganishwa na urafiki wa Mungu, ‘umo katika uwezo wa yule mwovu.’ Kupitia uongozi wa kishetani, yeye ‘anapoteza dunia nzima inayokaliwa na watu,’ kutia na watawala wayo wa kidunia, akiwaelekeza dhidi ya Mungu na Ufalme wake.—1 Yohana 5:19; Ufunuo 12:9; 16:13, 14; 19:11-18, NW.
17. (a) Mwelekeo unaoonyeshwa wazi na ulimwengu unashuhudia nini kwa habari ya yule anayeongoza wanadamu? (b) Je! ingekuwa inampendeza Muumba ikiwa tungeonyesha roho hiyo?
17 Huenda jambo hilo likasikika kuwa gumu kuamini. Hata hivyo, je! watu walio wengi wa ulimwengu huu hawaonyeshi waziwazi mwelekeo na kazi za Hasimu ya Mungu? Ulimwenguni pote tunaona kusema uwongo, chuki, jeuri na uuaji ambavyo vinawatambulisha wale ‘wanaotokana na Ibilisi,’ ambaye ndiye “baba” yao wa kiroho. (1 Yohana 3:8-12; Yohana 8:44; Waefeso 2:2, 3) Kwa uhakika roho hiyo haitokani na Muumba Mwenye Upendo.
18. Mwelekeo wetu kuhusu utawala unaonyeshaje kama sisi tuko huru na uongozi wa “mtawala wa ulimwengu huu”?
18 Pia, je! watu walio wengi sana hawatumainii mipango ya kibinadamu ilete amani na usalama? Unawajua watu wangapi ambao kweli wanamtegemea Mungu na Ufalme wake kwa suluhisho la matatizo ya wanadamu? Hata hivyo uhakika wao katika mifumo ya kisiasa ya wanadamu umewekwa mahali pabaya, kama alivyosema Yesu: “Ufalme wangu si sehemu ya ulimwengu huu.” “Chanzo” cha Ufalme wake hakimo katika ulimwengu huu, kwa sababu wanadamu hawaupi mamlaka yao wala kuusimamisha wala kuuendeleza. Ni uandalizi wa Mungu mwenyewe. (Yohana 18:36; Isaya 9:6, 7, NW) Kwa hiyo, ili tuwe miongoni mwa wale wanaotumainia kuokoka wakati Ufalme huo utakapokuja dhidi ya wapinzani wao wote, tunahitaji kuukubali uhakika halisi kwamba Shetani ndiye mtawala wa ulimwengu huu na mifumo yao. Hiyo inatia ndani mipango yao ya kisiasa kama vile Umoja wa Mataifa. Tunahitaji kujitenga nayo yote kwa kuwa na msimamo imara upande wa serikali yenye uadilifu ya Yehova kupitia Kristo Yesu.—Mathayo 6:10, 24, 31-33.
19. Kama inavyoshuhudiwa na historia, ni katika njia zipi Wakristo wa kwanza walionyesha kwamba walikuwa “si sehemu ya ulimwengu”?
19 Historia inaonyesha kwamba Wakristo wa kwanza walikuwa raia wenye heshima na wenye kushika sheria. Lakini walikuwa wamepiga moyo kondo wawe “si sehemu ya ulimwengu,” hata ingawa jambo hilo lilileta mateso juu yao. Tunasoma taarifa kama hizi:
“Ukristo wa kwanza haukufahamiwa sana na haukupendelewa sana na wale walioutawala ulimwengu wa kipagani. . . . Wakristo walikataa kushiriki wajibu fulani wa raia za Kirumi . . . Hawakuwa na cheo cha kisiasa.”—On the Road to Civilization, A World History.57
“Walikataa kushiriki sehemu yo yote ya utendaji katika usimamizi wa raia au katika kuikinga milki kivita. . . . Haingewezekana Wakristo wajitwalie sifa ya kuwa askari, mahakimu, au wana-wafalme, na bado wawe hawakukana wajibu fulani mtakatifu zaidi.”—History of Christianity.58
“Origen [aliyeishi katika karne ya pili na ya tatu ya Wakati wa Kawaida] . . . anaeleza kwamba ‘Kanisa la Kikristo haliwezi kuingia katika vita dhidi ya taifa lo lote. Wamejifunza kutoka kwa Kiongozi wao kwamba wao ni watoto wa amani.’ Katika kipindi hicho Wakristo wengi waliuawa kwa kukataa utumishi wa kivita.”—Treasury of the Christian World.59
20. Ili wasiwe chini ya uongozi wa “mtawala wa ulimwengu huu,” watumishi wa Yehova wanaepuka utendaji gani wa ulimwengu wenye kuleta migawanyiko?
20 Kwa kuendelea kutohusika katika mambo ya ulimwengu, watumishi wa Yehova hawashiriki kuleta utukuzo wa taifa wenye kugawanya, ubaguzi wa rangi, au mapambano ya kijamii ya ulimwengu huo. Mwelekeo wao wenye kuelekezwa na Mungu unashiriki kuleta amani na usalama miongoni mwa watu wa namna zote. (Matendo 10:34, 35) Kwa kweli, waokokaji wa “dhiki kubwa” inayokuja ‘watatoka katika kila taifa, na kabila, na jamaa, na lugha.’—Ufunuo 7:9, 14.
Rafiki za Ulimwengu au Rafiki za Mungu?
21. Kwa sababu gani mtu anayefuata Biblia hawezi pia kutazamia kupendwa na ulimwengu?
21 Yesu aliambia wanafunzi wake hivi: “Kama mngalikuwa sehemu ya ulimwengu, ulimwengu ungalikipenda kilicho chao wenyewe. Sasa kwa sababu ninyi si sehemu ya ulimwengu, bali mimi nimewachagua kutoka katika ulimwengu, kwa sababu hiyo ulimwengu unawachukia ninyi . . . Ikiwa wamenitesa mimi, watawatesa ninyi pia.”(Yohanna 15:19, 20, NW) Ukweli ulio wazi ni kwamba njia pekee ya kuwa na urafiki wa ulimwengu ni kuwa kama huo—kushiriki tamaa zao, kutaka makuu yao, kupendelea au kuchukia bila sababu za kutosha, kuvutiwa na njia yao ya kufikiri na falsafa zake, kufuata mazoea na njia zao. Lakini waungaji mkono wa ulimwengu huu wanachukia kufunuliwa kwa makosa yao au kuonywa juu ya hatari unakoongoza mwendo wao. Ndiyo sababu, kama mtu anayafuata mafundisho ya Biblia katika mwenendo na namna ya maisha na kusema kwa njia ya kuupendelea, hawezi kabisa kuepuka kuchukiwa na ulimwengu.—Yohana 17:14; 2 Timotheo 3:12.
22. Ni uchaguzi gani kuhusu urafiki unaokabili kila mmoja wa sisi?
22 Kwa hiyo, Biblia inaonyesha kwamba tuna uchaguzi ulio wazi kabisa. Tunasoma hivi kwenye Yakobo 4:4, NW: “Hamjui kwamba urafiki na ulimwengu ni uadui na Mungu? Ye yote, basi, anayetaka kuwa rafiki ya ulimwengu anajifanya mwenyewe kuwa adui ya Mungu.” Pia Mungu ana viwango vyake vya urafiki, navyo havipatani na vile vya ulimwengu wa wanadamu wenye dhambi.—Zaburi 15:1-5.
23. (a) Ni jambo gani lingeonyesha kwamba mtu ni rafiki ya ulimwengu? (b) Tunaweza kuonyeshaje kwamba sisi ni rafiki za Mungu?
23 Kuwa kwetu rafiki za Mungu kunategemea mengi kuliko kuwa au kutokuwa kwetu washiriki wa baadhi ya matengenezo fulani ya ulimwengu huu. Tukiionyesha wazi roho ya ulimwengu, tukishiriki maoni yao juu ya maisha, hapo tunajitambulisha wenyewe kuwa rafiki za ulimwengu, si za Mungu. Roho ya ulimwengu inatokeza “kazi za mwili” kama “uasherati, uchafu, mwenendo mlegevu, ibada ya sanamu, zoea la kuwasiliana na ulimwengu wa roho, mauadui, ugomvi, wivu, hamaki-hamaki, mapingano, migawanyiko, mafarakano, vijicho, pindi za ulevi-ulevi, sherehe zenye makelele-makelele, na mambo kama hayo.” Biblia inasema waziwazi kwamba “wale wanaozoea mambo kama hayo hawataurithi ufalme wa Mungu.” Kwa upande ule mwingine, ikiwa sisi ni rafiki za Mungu, tutakuwa na roho yake pamoja na matunda yayo ya “upendo, furaha, amani, ustahilimivu, fadhili, wema, imani, upole, kujiweza.”—Wagalatia 5:19-23, NW.
24. (a) Kwa sababu gani si jambo la hekima kuwaiga watu ambao ulimwengu unawapa heshima? (b) Mwelekeo wetu juu ya mali za kimwili unaweza kuonyeshaje ni urafiki na nani tunaotafuta kweli kweli?
24 Basi, sisi tunaonyesha roho ya nani? Hilo litatusaidia tujue sisi ni rafiki za nani kweli kweli. Kwa vile tunaishi tukiwa chini ya uvutano wa ulimwengu huu mwovu, haitupasi tushangae kuona uhitaji wa kufanya mabadiliko katika maisha zetu ili tumpendeze Mungu. Kwa mfano, watu wa kilimwengu wanaheshimu na kutukuza mno watu ambao tamaa yao yenye kuwasukuma wajitafutie umashuhuri inawaongoza kwenye utajiri mkuu, uwezo au sifa. Watu wanajifananisha na mashujaa na sanamu hizo za kilimwengu, wakiwaiga katika usemi, mwenendo, sura, na mavazi. Je! wewe unataka kutambuliwa kuwa mwenye kuvutiwa na watu hao? Mambo wanayotimiza ni kinyume kabisa cha ambayo Neno la Mungu linatuhimiza tufanye yawe miradi yetu katika maisha. Biblia inatuelekeza kwenye utajiri na nguvu ya kiroho na heshima ya kutumikia kama wawakilishi na wanenaji wa Mungu duniani. (1 Timotheo 6:17-19; 2 Timotheo 1:7, 8; Yeremia 9:23, 24) Maenezi ya kibiashara ya ulimwengu yanageuza watu wafuatie vitu vya kimwili waamini kwamba furaha inategemea mali za kimwili. Kwa hiyo wanazipa umaana mkubwa zaidi kuliko vitu vyenye thamani ya kiroho. Ndiyo, kufuata mwendo wa ulimwengu kutakupatia urafiki wa ulimwengu. Lakini kutakuondosha kwenye urafiki wa Mungu. Ni urafiki upi ulio na maana zaidi kwako? Ni upi utakaoongoza kwenye furaha kubwa zaidi na ya kudumu zaidi?
25. (a) Imetupasa tutazamie nini kutokana na ulimwengu tunapoziacha njia zake nyuma? (b) Ni nini kitakachotuwezesha ‘tubadili akili zetu’ kweli kweli ili tuyaone mambo kama Mungu ayaonavyo?
25 Ni rahisi kufuata kielelezo cha ulimwengu. Na, kwa sababu ya roho yao mbaya, waungaji mkono wa ulimwengu huu watachukia sana ukifuata mwendo ulio tofauti. (1 Petro 4:3, 4) Mikazo italetwa juu yako ili ujipatanishe na uache jamii ya kibinadamu ya ulimwengu ikufanyize uwe kama ilivyo. Hekima ya ulimwengu, falsafa zake juu ya mambo yanayoleta mafanikio katika maisha, itatumiwa ili kujaribu kuongoza njia yako ya kufikiri. Kwa hiyo, inataka jitihada ya kweli na imani ili ‘ubadili akili yako’ uyaone mambo kutokana na maoni ya Mungu, ukifahamu ni kwa nini ‘hekima ya ulimwengu huu ni upumbavu machoni pake.’ (Warumi 12:2; 1 Wakorintho 1:18-20; 2:14-16; 3:18-20, NW) Kwa kujifunza Neno la Mungu kwa bidii macho yetu yanaweza kupenya ndani tuione jinsi hekima ya ulimwengu ilivyo ya uwongo. Tunaweza kuona madhara ambayo tayari yanatokana na “hekima” ya namna hiyo, na janga ambalo lazima ilete. Ndipo tunapoweza pia kuthamini kwa ukamili hekima ya njia ya Mungu na baraka za hakika ambazo inahakikisha.
Ni Bure Kuupa Uhai na Nishati Ulimwengu Unaopita
26. Je! lingekuwa jambo la hekima kujihusisha katika kazi ya matengenezo yenye kufadhili watu ya ulimwengu kwa kusudi la kufanya hali ziwe bora?
26 Huenda wengine wakapinga hivi: ‘Lakini mengi ya matengenezo ya ulimwengu yanafanya mema, yakijitahidi kutolea watu ulinzi, afya, elimu na uhuru.’ Kweli, matengenezo fulani yanatoa kitulizo cha muda kwa kuondoa baadhi ya taabu zinazowapata watu. Hata hivyo matengenezo hayo yote ni sehemu ya ulimwengu uliotenganishwa na urafiki wa Mungu. Na yanageuza fikira za watu zielekee kuendeleza mfumo huu wa mambo. Hakuna lo lote la matengenezo hayo linalotetea serikali ya Mungu kwa dunia, Ufalme wake kupitia Mwana wake. Ingawaje, huenda hata wahalifu fulani wakapata jamaa zao wenyewe, wakaziandalia riziki na kufanyia watu mtaani kazi zenye fadhili. Lakini je! mambo hayo yangeonyesha kwamba inafaa tuyaunge mkono kwa njia yo yote matengenezo ya uhalifu?—Linganisha 2 Wakorintho 6:14-16.
27. Ni katika njia gani peke yake tunaweza kusaidia watu waliomo katika ulimwengu huu wawe miongoni mwa wale watakaookoka waingie katika Mfumo Mpya wa Mungu?
27 Je! kweli tunaweza kuonyesha upendo wa kweli kwa wanadamu kwa kujishirikisha na wo wote wa mipango ya ulimwengu, tukitumia wakati na nishati kwayo? Ukitaka kusaidia mtu mgonjwa au mwenye maradhi, je! utafanya hivyo kwa kushirikiana naye karibu sana hata upate ugonjwa au maradhi yale yale? Au je! si utasaidia zaidi ikiwa wewe mwenyewe utaendelea kuwa mwenye afya na kujaribu kumsaidia aipate njia inayoongoza kwenye afya? Jamii ya sasa ya kibinadamu ni yenye ugonjwa na maradhi ya kiroho. Hakuna ye yote kati yetu awezaye kuiokoa, kwa maana Neno la Mungu linaonyesha kwamba ugonjwa wayo unaiongoza kwenye kifo. (Linganisha Isaya 1:4-9.) Lakini tunaweza kusaidia watu mmoja mmoja katika ulimwengu waipate njia inayoongoza kwenye afya ya kiroho na kuokoka waingie katika Mfumo Mpya wa Mungu—mradi sisi wenyewe tunaendelea kujitenga na ulimwengu. (2 Wakorintho 6:17) Kwa hekima, basi, epuka kujihusisha katika mipango ya ulimwengu. Jitahidi kuepuka kuambukiwa na roho ya ulimwengu na kuiga njia zao zisizo za uadilifu. Usisahau kamwe: “Ulimwengu unapitilia mbali na ndivyo na tamaa yao, lakini yeye ambaye hufanya mapenzi ya Mungu hubaki milele.”—1 Yohana 2:17, NW.