Sura 44

Kunyamazisha Dhoruba Inayotisha

SIKU ya Yesu imekuwa inajawa na utendaji, kutia ndani kufundisha umati ufuoni na baadaye kueleza vile vielezi kwa wanafunzi wake faraghani. Jioni inapofika, anasema: “Acheni tuvuke kwenye ukingo ule mwingine.”

Ng’ambo ile nyingine ya ukingo wa mashariki wa Bahari ya Galilaya liko jimbo linaloitwa Dekapoli, kutokana na neno la Kigiriki deʹka, maana yalo “kumi,” na neno poʹlis, likimaanisha “jiji.” Majiji ya Dekapoli ni kitovu cha utamaduni wa Kigiriki, ingawa bila shaka miji hiyo pia ndiyo makao ya Wayahudi wengi. Hata hivyo, utendaji wa Yesu katika jimbo hilo ni mchache sana. Hata katika ziara hii, kama tutakavyoona baadaye, yeye anazuiwa asikae sana.

Wakati Yesu anapoomba kwamba waondoke kwenda ukingo ule mwingine, wanafunzi wanaenda naye kwenye mashua. Hata hivyo, kuondoka kwao hakupiti bila kujulikana. Upesi wengine wanapanda mashua zao ili waambatane nao. Si mwendo wa mbali sana kufika ng’ambo ile nyingine. Kwa kweli, Bahari ya Galilaya ni ziwa kubwa tu la urefu wa karibu kilometa 21 na upana usiozidi kilometa 12.

Inaeleweka kwamba Yesu amechoka. Kwa hiyo, upesi baada ya wao kuanza safari, yeye analala katika sehemu ya nyuma ya mashua, analaza kichwa chake juu ya mto, na kulala fofofo. Baadhi ya mitume ni mabaharia wenye ujuzi, kwa maana wamekwisha kuvua sana samaki katika Bahari ya Galilaya. Kwa hiyo wao wanalitwaa daraka la kuisafirisha mashua baharini.

Lakini hii haitakuwa safari rahisi. Kwa sababu joto ni jingi zaidi kwenye uso wa ziwa, ulio karibu meta 210 chini ya usawa wa bahari, na kwa sababu hewa ni baridi zaidi katika milima ya karibu-karibu, nyakati nyingine pepo zenye nguvu zinavuma kuteremka chini na kufanyiza dhoruba kali-kali za ghafula juu ya ziwa. Hilo ndilo jambo linalotukia sasa. Upesi mawimbi yanaanza kukumba-kumba mashua na kurusha maji ndani, hivi kwamba inakaribia kujawa kabisa na maji. Hata hivyo, Yesu anaendelea kulala!

Wanaume wale walio mabaharia wenye ujuzi wanafanya juu-chini kuiendesha mashua. Bila shaka wao wamewahi kutumia maarifa wakapita dhoruba za namna hiyo. Lakini wakati huu nguvu na akili zimewaishia. Wakihofia maisha zao, wanamwamsha Yesu. ‘Bwana, wewe hujali? Tunazama!’ wanapaaza sauti. ‘Tuokoe, tutakufa maji!’

Akijiinua, Yesu anaamuru upepo na bahari hivi: “Shi-i-i! Kaeni kimya!” Nao upepo ule wenye kuvuma kwa fujo unakoma nayo bahari inatulia. Akigeukia wanafunzi wake, anauliza: ‘Mbona nyinyi ni wenye kuhofu sana? Je! bado nyinyi hamna imani yoyote?’

Kwa hiyo, hofu isiyo ya kawaida inawashika wanafunzi. ‘Kwa kweli mwanamume huyu ni nani?’ wao wanaulizana, ‘kwa maana yeye anaamuru hata pepo na maji, nazo zinamtii.’

Lo! ni uwezo ulioje anaouonyesha Yesu! Inatupa uhakikisho kama nini kujua kwamba Mfalme wetu ana uwezo juu ya vitu vya kiasili na kwamba fikira zake kamili zitakapoelekezwa kwenye dunia yetu wakati wa utawala wake wa Ufalme, watu wote watakaa katika usalama wa kutokupatwa na maafa ya kiasili yanayoogopesha sana!

Muda fulani baada ya dhoruba ile kutulia, Yesu na wanafunzi wake wanafika salama kwenye ukingo wa mashariki. Labda mashua zile nyingine ziliepushwa zisipatwe na ukali ule mwingi wa dhoruba zikarudi salama kwao. Marko 4:35–5:1; Mathayo 8:18, 23-27; Luka 8:22-26, NW.

▪ Dekapoli ni nini, nayo iko wapi?

▪ Ni mambo gani ya kiasili yanayosababisha dhoruba kali-kali juu ya Bahari ya Galilaya?

▪ Wakati ustadi wao wa kusafiri baharini unakuwa hauwezi kuwaokoa, wanafunzi wanafanya nini?