Sura 104

Sauti ya Mungu Yasikiwa Mara ya Tatu

AKIWA hekaluni, Yesu amekuwa akihisi maumivu makali kwa kufikiria kifo ambacho ni lazima akikabili karibuni. Hangaikio lake kubwa ni jinsi sifa ya Baba yake itaathiriwa, kwa hiyo yeye asali hivi: “Baba, ulitukuze jina lako.”

Hapo basi, sauti yenye nguvu yatoka kwenye mbingu, ikipiga mbiu hivi: “Nimelitukuza, nami nitalitukuza tena.”

Umati wenye kusimama kuzunguka mahali hapo wapumbazika akili. “Malaika amesema naye,” watu fulani waanza kusema. Wengine wadai kwamba kumekuwa na ngurumo. Lakini, kwa kweli, Yehova Mungu ndiye amenena! Hata hivyo, hii siyo mara ya kwanza sauti ya Mungu kusikiwa kuhusiana na Yesu.

Kwenye ubatizo wa Yesu, miaka mitatu na nusu mapema, Yohana Mbatizaji alisikia Mungu akisema hivi juu ya Yesu: “Huyu ni Mwanangu, mpendwa wangu, ninayependezwa naye.” Halafu, wakati fulani baada ya Sikukuu ya Kupitwa iliyotangulia, Yesu alipogeuka sura mbele yao, Yakobo, Yohana, na Petro, wao walisikia Mungu akijulisha wazi hivi: “Huyu ni Mwanangu, mpendwa wangu, ninayependezwa naye; msikieni yeye.” Na sasa, kwa mara ya tatu, siku ya Nisani 10, siku nne kabla ya kifo cha Yesu, sauti ya Mungu yasikiwa tena na wanadamu. Lakini wakati huu Yehova anena ili umati wa watu waweze kusikia!

Yesu aeleza hivi: “Sauti hiyo haikuwako kwa ajili yangu, bali kwa ajili yenu.” Yaandaa uthibitisho kwamba Yesu ni Mwana wa Mungu kweli kweli, Mesiya aliyeahidiwa. “Sasa hukumu ya ulimwengu huu ipo,” Yesu aendelea, “sasa mkuu wa ulimwengu huu atatupwa nje.” Kwa kweli mwendo wa maisha wenye imani wa Yesu wahakikisha kwamba Shetani Ibilisi, mtawala wa ulimwengu, astahili ‘kutupwa nje,’ kuuawa.

Akielekeza kwenye matokeo ya kifo chake kinachokaribia, Yesu asema: “Nami nikiinuliwa juu ya nchi, nitawavuta wote [watu wa namna zote, NW] kwangu.” Kifo chake si ushinde kwa njia yoyote, kwa maana kupitia hicho, yeye atavuta wengine kwake mwenyewe ili wapate kuona shangwe wakiwa na uhai wa milele.

Lakini umati ule wateta hivi: “Sisi tumesikia katika torati ya kwamba Kristo adumu hata milele; nawe wasemaje ya kwamba imempasa Mwana wa Adamu kuinuliwa? Huyu Mwana wa Adamu ni nani?”

Ujapokuwapo ushuhuda wote, kutia na kusikia sauti ya Mungu mwenyewe, walio wengi hawaamini kwamba Yesu ndiye Mwana wa binadamu aliye wa kweli, yule Mesiya aliyeahidiwa. Hata hivyo, kama vile alivyofanya miezi sita mapema kwenye Sikukuu ya Mahema, Yesu ajinena tena kuwa ndiye “nuru” na kuwatia moyo hivi wasikilizaji wake: “Maadamu mnayo nuru, iaminini nuru hiyo, ili mpate kuwa wana wa nuru.” Baada ya kusema mambo haya, Yesu aenda zake na kujificha, kwa wazi sababu ikiwa kwamba uhai wake umo hatarini.

Ukosefu wa imani wa Wayahudi katika Yesu unatimiza maneno ya Isaya kuhusu ‘kufumbwa kwa macho ya watu na kunoneshwa kwa mioyo yao wasije wakarejea na kuponywa.’ Isaya aliona katika njozi nyua za kimbingu za Yehova, kutia na Yesu akiwa katika utukufu wake akiwa pamoja na Yehova kabla hajawa binadamu. Hata hivyo, Wayahudi, kwa utimizo wa aliyoandika Isaya, wakataa kwa ushupavu ushuhuda wazi wa kwamba huyu ndiye Mkombozi wao aliyeahidiwa.

Kwa upande ule mwingine, wengi hata kati ya watawala (ambao kwa wazi ni washiriki wa mahakama kuu ya Kiyahudi, ile Sanhedrini) kwa kweli watia imani katika Yesu. Nikodemo na Yusufu wa Arimathea ni wawili wa watawala hao. Lakini watawala hao washindwa kujulisha wazi imani yao, angalau kwa wakati uliopo, kwa kuhofu kuondoshwa katika vyeo vyao katika sinagogi. Lo, watu hao wakosa manufaa nyingi kama nini!

Yesu aendelea kuarifu hivi: “Yeye aniaminiye mimi, haniamini mimi bali yeye aliyenipeleka. Naye anitazamaye mimi amtazama yeye aliyenipeleka. . . . Na mtu akiyasikia maneno yangu, asiyashike, mimi simhukumu; maana sikuja ili niuhukumu ulimwengu, ila niuokoe ulimwengu. . . . Neno hilo nililolinena ndilo litakalomhukumu siku ya mwisho.”

Upendo wa Yehova kwa ulimwengu wa ainabinadamu ulimsukuma atume Yesu ili wale ambao wanatia imani katika yeye waokolewe. Kama watu wataokolewa itaamuliwa na kama wao hutii mambo ambayo Mungu alimwagiza Yesu kunena. Hukumu hiyo itatukia “siku ya mwisho,” wakati wa Utawala wa Kristo wa Miaka Elfu.

Yesu amalizia kwa kusema: “Mimi sikunena kwa nafsi yangu tu; bali Baba aliyenipeleka, yeye mwenyewe ameniagiza nitakayonena na nitakayosema. Nami najua ya kuwa agizo lake ni uzima wa milele; basi hayo ninenayo mimi, kama Baba alivyoniambia, ndivyo ninenavyo.” Yohana 12:28-50; 19:38, 39; Mathayo 3:17; 17:5; Isaya 6:1, 8-10.

▪ Ni katika pindi gani tatu sauti ya Mungu ilisikiwa kuhusiana na Yesu?

▪ Nabii Isaya alionaje utukufu wa Yesu?

▪ Ni watawala gani ambao watia imani katika Yesu, lakini kwa nini hawamkiri peupe?

▪ Ni nini ile “siku ya mwisho,” nao watu watahukumiwa kwa msingi gani?