Nguvu za Kulinda—“Mungu Ni Kimbilio Letu”

1, 2. Waisraeli walikabili hatari gani walipofika eneo la Sinai mwaka wa 1513 K.W.K., na Yehova aliwatia moyo jinsi gani?

WAISRAELI walikuwa hatarini walipofika eneo la Sinai mwanzoni mwa mwaka wa 1513 K.W.K. Walikuwa na safari ndefu yenye kutisha sana katika “nyika kubwa na yenye kutisha, iliyo na nyoka wenye sumu na nge.” (Kumbukumbu la Torati 8:15) Pia, walikabili hatari ya kushambuliwa na mataifa adui. Yehova aliwaleta watu wake katika hali hiyo. Je, angeweza kuwalinda akiwa Mungu wao?

² Maneno ya Yehova yalikuwa yenye kutia moyo sana: “Mmejionea wenyewe mambo niliyowatendea Wamisri, ili niwabebe juu ya mabawa ya tai na kuwaleta kwangu.” (Kutoka 19:4) Yehova aliwakumbusha watu wake kuwa aliwakomboa kutoka kwa Wamisri, kana kwamba aliwachukua juu ya mabawa ya tai na kuwapeleka mahali salama. Lakini kuna sababu nyingine zinazofanya “mabawa ya tai” yawe mfano unaofaa wa ulinzi wa Mungu.

3. Kwa nini “mabawa ya tai” ni mfano unaofaa wa ulinzi wa Mungu?

³ Tai hutumia mabawa yake mapana na yenye nguvu sana kwa sababu nyingine zaidi tu ya kupaa hewani. Kunapokuwa na joto kali wakati wa mchana, tai mama hukunjua mabawa yake—ambayo yanaweza kuwa na upana wa zaidi ya mita mbili—ili kufunika na kulinda makinda yake dhaifu kutokana na joto kali sana la jua. Nyakati nyingine, yeye huyafunika makinda yake kwa mabawa yake na kuyalinda dhidi ya upepo wenye baridi. Yehova alililinda na kulitunza taifa changa la Israeli kama tai anavyolinda makinda yake. Sasa wakiwa jangwani, watu wake wangeendelea kukimbilia kivuli cha mabawa yake ya mfano yenye nguvu ikiwa tu wangebaki wakiwa waaminifu. (Kumbukumbu la Torati 32:9-11; Zaburi 36:7) Je, leo tunaweza kutarajia kupata ulinzi wa Mungu?

Ahadi ya Kupata Ulinzi wa Mungu

4, 5. Kwa nini tunaweza kutumaini kabisa ahadi ya Mungu ya kutulinda?

⁴ Bila shaka, Yehova anaweza kuwalinda watumishi wake. Yeye ni “Mungu Mweza-Yote”​—cheo hicho kinamaanisha kwamba ana nguvu zisizo na mipaka. (Mwanzo 17:1) Kama wimbi lenye nguvu sana, nguvu za Yehova haziwezi kuzuiwa. Kwa kuwa anaweza kufanya jambo lolote kulingana na mapenzi yake, huenda tukauliza hivi, ‘Je, ni mapenzi ya Yehova kutumia nguvu zake ili kuwalinda watu wake?

⁵ Kwa neno moja, jibu ni ndiyo! Yehova anatuhakikishia kwamba atawalinda watu wake. Zaburi 46:1 inasema hivi: “Mungu ni kimbilio letu na nguvu zetu, msaada unaopatikana kwa urahisi nyakati za taabu.” Kwa kuwa Mungu ‘hawezi kusema uwongo,’ tunaweza kutumaini kabisa ahadi yake ya kutulinda. (Tito 1:2) Hebu tuchunguze baadhi ya mifano inayoonyesha jinsi Yehova anavyotulinda.

6, 7. (a) Mchungaji katika nyakati za Biblia aliwalinda kondoo wake kutokana na nini? (b) Biblia inatoa mfano gani unaoonyesha kwamba Yehova anataka sana kuwalinda na kuwatunza kondoo wake?

⁶ Yehova ni Mchungaji wetu, na “sisi ni watu wake na kondoo wa malisho yake.” (Zaburi 23:1; 100:3) Kondoo ni mmoja kati ya wanyama wanaofugwa wanaohitaji sana matunzo. Mchungaji katika nyakati za Biblia alihitaji kuwa jasiri ili kuwalinda kondoo wake dhidi ya simba, mbwamwitu, dubu, na wezi. (1 Samweli 17:34, 35; Yohana 10:12, 13) Lakini nyakati nyingine kuwalinda kondoo kulihitaji wororo. Kondoo alipozaa mbali na zizi, mchungaji anayejali angemlinda mama huyo pindi hiyo anapohitaji sana ulinzi, kisha, angembeba mwana-kondoo wake dhaifu na kumpeleka zizini.

⁷ Kwa kujilinganisha na mchungaji, Yehova anatuhakikishia kwamba anataka sana kutulinda. (Ezekieli 34:11-16) Kumbuka jinsi Yehova anavyotajwa kwenye Isaya 40:11, kama Sura ya 2 ya kitabu hiki ilivyoonyesha: “Atalitunza kundi lake kama mchungaji. Atawakusanya pamoja wanakondoo kwa mkono wake, naye atawabeba kwenye kifua chake.” Mwanakondoo mchanga anawezaje kufika kwenye “kifua” cha mchungaji—katika pindo la vazi lake la juu? Huenda mwanakondoo huyo akamkaribia mchungaji, na hata kugusa mguu wake. Hata hivyo, ni lazima mchungaji ainame, ambebe mwanakondoo huyo, na amweke taratibu kifuani pake mahali ambapo ni salama. Huo ni mfano wenye kugusa moyo sana unaoonyesha jinsi Mchungaji wetu Mkuu alivyo tayari kutulinda na kututunza!

8. (a) Ni nani wanaoahidiwa kupata ulinzi wa Mungu, na hilo linaonyeshwaje kwenye Methali 18:10? (b) Kutafuta kimbilio katika jina la Mungu kunahusisha nini?

⁸ Ahadi ya Mungu ya kuandaa ulinzi ina masharti. Anawalinda tu wale wanaomkaribia. Methali 18:10 inasema hivi: “Jina la Yehova ni mnara wenye nguvu. Mwadilifu hukimbilia humo na kupata ulinzi.” Katika nyakati za Biblia, mara nyingi ngome zilijengwa jangwani kama mahali salama pa kukimbilia. Lakini yule aliyekuwa hatarini, ndiye aliyekuwa na wajibu wa kukimbilia kwenye ngome hizo ili kuwa salama. Ndivyo ilivyo na kutafuta kimbilio katika jina la Mungu. Hilo halimaanishi kulitaja tena na tena jina la Mungu. Jina la Mungu si hirizi. Badala yake, tunahitaji kumjua na kumtegemea Yule anayeitwa kwa jina hilo na kuishi kupatana na viwango vyake vya uadilifu. Ni jambo la fadhili kwa Yehova kutuhakikishia kwamba ikiwa tutamfikia kwa imani, atakuwa ngome ya kutulinda!

“Mungu Wetu . . . Anaweza Kutuokoa”

9. Ni mambo gani mengine ambayo Yehova amefanya zaidi tu ya kuahidi ulinzi?

⁹ Yehova amefanya mengi zaidi ya kutuahidi tu ulinzi. Katika nyakati za Biblia, alionyesha kupitia miujiza kwamba anaweza kuwalinda watu wake. Katika historia yote ya Waisraeli, mara nyingi “mkono” wa Yehova wenye nguvu uliwakomesha maadui wenye nguvu. (Kutoka 7:4) Hata hivyo, Yehova alitumia pia nguvu zake ili kumlinda mtu mmoja mmoja.

10, 11. Ni mifano gani katika Biblia inayoonyesha jinsi Yehova alivyotumia nguvu zake za kulinda kwa niaba ya watu fulani?

¹⁰ Vijana watatu Waebrania—wanaojulikana kama, Shadraki, Meshaki, na Abednego—walipokataa kuinamia sanamu ya dhahabu ya Mfalme Nebukadneza, mfalme huyo mwenye hasira alitishia kuwatupa katika tanuru lenye moto mkali sana. Nebukadneza, mtawala mwenye nguvu zaidi duniani alisema hivi kwa dhihaka: “Ni mungu gani anayeweza kuwaokoa kutoka mikononi mwangu?” (Danieli 3:15) Vijana hao watatu walikuwa na uhakika kwamba Mungu wao alikuwa na nguvu za kuwalinda, lakini hawakutarajia kwamba angewalinda. Kwa hiyo, walimjibu hivi: “Ikiwa ni lazima iwe hivyo, Mungu wetu tunayemtumikia anaweza kutuokoa.” (Danieli 3:17) Kwa kweli, hata ingawa tanuru hilo liliongezwa moto mara saba kuliko ilivyokuwa kawaida, hilo halikuweza kumzuia Mungu wao mwenye nguvu zote. Aliwalinda, na mfalme huyo alilazimika kukiri hivi: “Hakuna mungu mwingine yeyote anayeweza kuokoa kama huyu.”​—Danieli 3:29.

¹¹ Yehova alionyesha pia nguvu zake za kulinda alipohamisha uhai wa Mwana wake mzaliwa-pekee hadi kwenye tumbo la uzazi la bikira Myahudi Maria. Malaika alimwambia Maria kwamba ‘angepata mimba na kuzaa mwana.’ Malaika alimwambia hivi: “Roho takatifu itakuja juu yako, na nguvu za Aliye Juu Zaidi zitakufunika.” (Luka 1:31, 35) Wakati huo, Mwana wa Mungu alihitaji kulindwa sana. Je, dhambi na kutokamilika kwa Maria kungetia dosari kiinitete hicho? Je, Shetani angeweza kumjeruhi au kumuua Mwana huyo kabla hajazaliwa? Asingeweza! Kwa kweli, Yehova alimlinda sana Maria ili jambo lolote—iwe ni kutokamilika, hatari, mwanadamu muuaji, au roho mwovu yeyote, asimwangamize Mwana wake. Yehova aliendelea kumlinda Yesu alipokuwa kijana. (Mathayo 2:1-15) Yehova alimlinda kabisa Mwana wake mpendwa, mpaka wakati ulipofika wa Yesu kutoa uhai wake.

12. Kwa nini Yehova aliwalinda kimuujiza watu fulani katika nyakati za Biblia?

¹² Kwa nini Yehova aliwalinda watu fulani kimuujiza? Katika visa vingi, Yehova aliwalinda watu fulani akiwa na kusudi la kulinda jambo muhimu zaidi: kutimizwa kwa kusudi lake. Kwa mfano, kulindwa kwa mtoto mchanga Yesu, kulikuwa muhimu katika kutimizwa kwa kusudi la Mungu ambalo litawanufaisha wanadamu wote. Masimulizi hayo ya nguvu za Mungu za kulinda ni sehemu ya Maandiko yaliyoongozwa na roho ambayo, “yaliandikwa ili kutufundisha, ili kupitia uvumilivu wetu na kupitia faraja kutoka kwa Maandiko tuwe na tumaini.” (Waroma 15:4) Ndiyo, mifano hiyo inaimarisha imani yetu katika Mungu wetu mwenye nguvu nyingi. Hata hivyo, tunaweza kutarajia kupata ulinzi gani kutoka kwa Mungu leo?

Je, Mungu Anatulinda Dhidi ya Kila Jambo Baya?

13. Je, Yehova ana wajibu wa kutuokoa kimuujiza? Eleza.

¹³ Ahadi ya Mungu ya kutulinda, haimaanishi kwamba Yehova ana wajibu wa kutuokoa kimuujiza. Mungu hajaahidi kwamba tutaishi bila matatizo katika mfumo huu. Watumishi wengi waaminifu wa Yehova wanakabiliana na matatizo mbalimbali kama vile umaskini, vita, magonjwa, na kifo. Yesu aliwaambia wanafunzi wake waziwazi kwamba huenda baadhi yao wakauawa kwa sababu ya imani yao. Ndiyo sababu Yesu alikazia uhitaji wa kuvumilia hadi mwisho. (Mathayo 24:9, 13) Ikiwa Yehova angetumia nguvu zake kuokoa watu kimuujiza kila wakati, bila shaka Shetani angemdhihaki Yehova na kutilia shaka unyoofu wetu katika kumtumikia Mungu.​—Ayubu 1:9, 10.

14. Ni mifano gani inayoonyesha kwamba sikuzote Yehova hawalindi watumishi wake wote kwa njia ileile?

¹⁴ Hata katika nyakati za Biblia, Yehova hakutumia nguvu zake kumlinda kila mtumishi wake ili asiuawe. Kwa mfano, Herode alimuua mtume Yakobo kwa upanga mwaka wa 44 hivi W.K.; lakini, muda mfupi baadaye, Petro alikombolewa “kutoka mkononi mwa Herode.” (Matendo 12:1-11) Naye Yohana, ndugu ya Yakobo, aliishi kwa muda mrefu kuliko Petro na Yakobo. Ni wazi kwamba hatuwezi kutarajia Mungu wetu awalinde watumishi wake wote kwa njia ileile. Isitoshe, “wakati na matukio yasiyotarajiwa” hutupata sote. (Mhubiri 9:11) Hivyo, Yehova anatulindaje leo?

Yehova Anatulinda Kimwili

15, 16. (a) Kuna uthibitisho gani kwamba Yehova amewalinda kimwili waabudu wake wakiwa kikundi? (b) Kwa nini tunaweza kuwa na uhakika kwamba Yehova atawalinda watumishi wake sasa na wakati wa ile “dhiki kuu”?

¹⁵ Kwanza, fikiria kuhusu ulinzi wa kimwili. Tukiwa waabudu wa Yehova, tunaweza kutarajia ulinzi huo tukiwa kikundi. Isingekuwa hivyo tungeshambuliwa kwa urahisi na Shetani. Fikiria jambo hili: Shetani, “mtawala wa ulimwengu huu,” angependa sana kukomesha ibada ya kweli. (Yohana 12:31; Ufunuo 12:17) Baadhi ya serikali zenye nguvu sana duniani zimepiga marufuku kazi yetu ya kuhubiri na kujaribu kutuangamiza kabisa. Hata hivyo, watu wa Yehova wamebaki imara na wameendelea kuhubiri bila kuacha! Kwa nini mataifa yenye nguvu yameshindwa kukomesha utendaji wa kikundi hiki kidogo cha Wakristo kinachoonekana kuwa bila ulinzi? Kwa sababu Yehova ametufunika kwa mabawa yake yenye nguvu!—Zaburi 17:7, 8.

¹⁶ Je, atatulinda kimwili katika “dhiki kuu” inayokuja? Hatuhitaji kuogopa Mungu anapowaangamiza waovu. Biblia inasema hivi: “Yehova anajua jinsi ya kuwakomboa kutoka kwenye jaribu watu wenye ujitoaji-kimungu, lakini kuwaweka akiba watu wasio waadilifu ili waangamizwe katika siku ya hukumu.” (Ufunuo 7:14; 2 Petro 2:9) Kwa sasa, tunaweza kuwa na uhakika kabisa kuhusu mambo mawili. Kwanza, Yehova hataruhusu kamwe watumishi wake waaminifu waangamizwe kabisa duniani. Pili, atawathawabisha wale wanaoendelea kudumisha utimilifu kwa kuwapa uzima wa milele katika ulimwengu wake mpya wenye uadilifu—hata ikiwa atahitaji kuwafufua. Kwa wale wanaokufa, hakuna mahali pengine salama isipokuwa katika kumbukumbu ya Mungu.​—Yohana 5:28, 29.

17. Yehova anatulinda jinsi gani kupitia Neno lake?

¹⁷ Hata sasa, Yehova anatulinda kupitia “neno” lake lililo hai, lenye nguvu ya kugusa mioyo ya watu na kubadili maisha yao. (Waebrania 4:12) Kwa kuishi kulingana na kanuni zake, tunaweza kulindwa kimwili kwa kadiri fulani. Isaya 48:17 inasema hivi: “Mimi, Yehova, . . . ninayekufundisha ili ujifaidi mwenyewe.” Bila shaka, kuishi kulingana na Neno la Mungu kunaweza kuboresha afya na kurefusha maisha yetu. Kwa mfano, kwa kuwa tunatii shauri la Biblia kwa kujiepusha na uasherati na kujisafisha kila unajisi, tunaepuka mazoea machafu na yenye kuumiza ambayo yanaharibu kabisa maisha ya watu wengi wasiomtii Mungu. (Matendo 15:29; 2 Wakorintho 7:1) Tunashukuru sana kwamba tunalindwa na Mungu kupitia Neno lake!

Yehova Anatulinda Kiroho

18. Yehova anatulinda kiroho jinsi gani?

¹⁸ Jambo muhimu zaidi ni kwamba Yehova anatulinda kiroho. Mungu wetu mwenye upendo anatulinda kutokana na madhara ya kiroho kwa kutupatia chochote tunachohitaji ili kuvumilia majaribu na kulinda uhusiano wetu pamoja naye. Hivyo, Yehova huhifadhi uhai wetu, si kwa miaka michache tu bali milele. Fikiria baadhi ya maandalizi ya Mungu yanayoweza kutulinda kiroho.

19. Roho ya Yehova inaweza kutusaidiaje kukabiliana na jaribu lolote ambalo huenda likatupata?

¹⁹ Yehova ni “Msikiaji wa sala.” (Zaburi 65:2) Tunaweza kupata kitulizo tunapolemewa na matatizo maishani kwa kumwambia mambo yote yaliyo moyoni mwetu. (Wafilipi 4:6, 7) Huenda asiondoe majaribu yetu kimuujiza, lakini anaweza kujibu sala zetu za kutoka moyoni kwa kutupatia hekima ya kukabiliana nayo. (Yakobo 1:5, 6) Na zaidi ya hayo, Yehova huwapa roho takatifu wale wanaomwomba. (Luka 11:13) Roho hiyo yenye nguvu inaweza kutusaidia kukabiliana na jaribu au tatizo lolote tulilo nalo. Inaweza kututia “nguvu zinazopita zile za kawaida” ili tuvumilie hadi Yehova atakapoondoa matatizo yote yenye kuumiza katika ulimwengu mpya unaokaribia.​—2 Wakorintho 4:7.

20. Nguvu za Yehova za kulinda zinaweza kuonekanaje kupitia waamini wenzetu?

²⁰ Nyakati nyingine, nguvu za Yehova za kulinda zinaweza kuonekana kupitia waabudu wenzetu. Yehova amewakusanya watu wake katika ‘ushirika wa akina ndugu’ wa ulimwenguni pote. (1 Petro 2:17; Yohana 6:44) Kupitia ushirika huo wenye upendo, tunaona kihalisi jinsi roho takatifu ya Mungu ilivyo na nguvu za kuboresha maisha ya watu. Roho hiyo hutusaidia kuwa na sifa nzuri na zenye kuvutia sana kama vile upendo, fadhili, na wema. (Wagalatia 5:22, 23) Hivyo, tunapokabili matatizo na mwamini mwenzetu anachochewa kutupa shauri linalofaa au kututia moyo, tunaweza kumshukuru Yehova kwa sababu anatulinda na kututunza kupitia ndugu na dada zetu.

21. (a) Yehova anaandaa chakula gani cha kiroho kupitia “mtumwa mwaminifu na mwenye busara” kwa wakati unaofaa? (b) Wewe binafsi umefaidikaje na maandalizi ya Yehova ya kutulinda kiroho?

²¹ Yehova huandaa jambo lingine ili kutulinda: chakula cha kiroho kwa wakati unaofaa. Ili kutusaidia kuimarishwa na Neno lake, Yehova amemwagiza “mtumwa mwaminifu na mwenye busara” atupatie chakula cha kiroho. Mtumwa mwaminifu hutumia machapisho, kutia ndani magazeti ya Mnara wa Mlinzi na Amkeni! pamoja na tovuti ya jw.org, mikutano, na makusanyiko ili kutupatia ‘chakula kwa wakati unaofaa’​—kile tunachohitaji, wakati tunapokihitaji. (Mathayo 24:45) Je, umewahi kusikia jambo fulani kwenye mikutano ya Kikristo—katika maelezo, hotuba, au hata katika sala—ambalo lilikutia moyo na kukupa nguvu ulizohitaji? Je, makala fulani iliyochapishwa katika mojawapo ya magazeti yetu imewahi kukugusa moyo na hata kubadili maisha yako? Kumbuka kwamba Yehova hutayarisha maandalizi hayo yote ili kutulinda kiroho.

22. Sikuzote Yehova hutumia nguvu zake kwa njia gani, na kwa nini kufanya hivyo kuna faida kwetu?

²² Bila shaka, Yehova “ni ngao kwa wote wanaomkimbilia.” (Zaburi 18:30) Tunafahamu kwamba kwa sasa, yeye hatumii nguvu zake kutulinda dhidi ya misiba yote inayotupata. Hata hivyo, sikuzote yeye hutumia nguvu zake za kulinda kuhakikisha kwamba kusudi lake linatimizwa. Yeye hufanya hivyo ili watu wake wawe na maisha bora baadaye. Tukimkaribia Yehova na kukaa katika upendo wake, atatupatia uhai mkamilifu na tutaishi milele. Tukikumbuka tumaini hilo, kwa kweli tunaweza kuona mateso yoyote yanayotupata katika mfumo huu kuwa ‘ya muda mfupi na mepesi.’​—2 Wakorintho 4:17.