Kwa Sababu Gani Wataka Uzima Kwa Ajili Yako Mwenyewe na Kwa Ajili ya Wengine?

“Umestahili wewe, [Yehova] wetu na Mungu wetu, kuupokea utukufu na heshima na uweza; kwa kuwa wewe ndiwe uliyeviumba vitu vyote, na kwa sababu ya mapenzi yako vilikuwako, navyo vikaumbwa.”​—Ufu. 4:11.

1.Mmoja wa mashahidi wa Yehova aliwezaje kumsaidia mwanamke apate maoni mapya juu ya uzima?

UPESI kufuata Vita ya Ulimwengu ya Pili, katika Berlin, Ujeremani, mwanamke mwenye huzuni sana alikuwa karibu kujiua kwa kutumia dawa kuzidi kipimo, wakati kengele ya mlangoni ilipolia. Aliitikia ile kengele, akiazimia kumwondoa upesi yule mgeni, lakini alishindwa wakati mgeni huyo, mhudumu wa mashahidi wa Yehova, alipomwona akiwa katika hali yenye kuhuzunika sana akaanza kumfariji kwa ujumbe wa Biblia. Alipokwisha kusikiliza kwa makini mambo ambayo Biblia inasema juu ya uzima, alikwenda ndani akaziweka dawa zake. Kwa muda mfupi sana, Neno la Mungu lilimpa maoni mapya juu ya uzima, sababu ya kuishi.

2. (a) Ni nani aliye Chanzo cha uzima? (b) Ni daraka gani linalofuatana na uzima?

² Uzima ni nini? Kulingana na William Blackstone, mwanasheria Mwingereza, uzima ni “zawadi ya mara hiyo ya Mungu.” Biblia inasema waziwazi juu ya Chanzo cha uzima, ikisema: “Kwako Wewe [Mungu] iko chemchemi ya uzima.” (Zab. 36:9) Ijapokuwa tulipata zawadi hii takatifu kwa kuzaliwa bila kuomba, tuna daraka juu yake. Tunatakiwa tuishi katika njia inayostahili zawadi hiyo takatifu, daraka ambalo wingi wa wanadamu wameshindwa kulitimiza.

3. (a) Wanadamu wanatamani sana uzima wa namna gani? (b) Kuishi kunafanywaje kuwe kwenye kufaa?

³ Tamaa ya kuishi ni ya msingi, yenye kujitokea yenyewe. Kwa hakika sisi tunataka zaidi ya kuwako tu. Wanadamu wanatamani sana njia ya maisha yenye maana na yenye kusudi. Kuishi si kupumua tu, bali ni kutenda, kufanya kazi na kucheza, kuvitumia viungo vyetu na akili na uwezo. Basi, tunaishi wakati tunapokuwa waaminifu kwa sisi wenyewe na kuwa wenye kuitikia kusadikishwa kwetu. Tunaishi wakati tunapojitia katika maisha za wengine, wakati tunapokuwa na wajibu na kupaswa. Tunaishi wakati tunapojenga, tunapotumaini, tunapofanya mpango na kufurahi. Uzima unafanywa kuwa wenye kufaa kwa mambo yanayotimizwa, kwa mambo yanayotupata. Kwa hiyo, mtu ambaye ameishi sana kwa lazima siye mtu ambaye ni mzee kuliko wote, bali yeye ambaye ameutumia uzima kwa faida nzuri na ameufurahia sana.

4. Ni uzima gani ulio wa kweli? Toa mfano.

⁴ Biblia inaeleza uzima wa kweli kuwa ni ule ulio bora kuliko ule wa miaka mingi. Wingi wa miaka sio ndio uzima kulingana na maana yake kamili. Wanaanga wamerudi duniani kutoka mwezini wakiwa na mawe ambayo miaka yao ya kuwako imehesabiwa kufika mabilioni, lakini mawe hayo hayakuishi. Namna gani ikiwa mwanadamu ameishi kufika miaka 100, au 200? Ikiwa yeye hakufanya jambo lenye manufaa, au, labda, ikiwa yeye ameutumia uzima wake vibaya kwa kuwadhuru wengine, je! si afadhali ikiwa asingalizaliwa? (Marko 14:21) Kuna mamilioni ya watu leo wanaotamani sana kutokufa, lakini hawajui jambo la kujifanyia wenyewe siku ya mvua. Kwa upande mwingine, wako wengine wanaoupenda uzima na wanautumia sana kwa hekima. Yesu Kristo alikuwa mfano mkamilifu wa hili. Yeye aliishi miaka mitatu na nusu tu, lakini kama ingetolewa ripoti kamili ya kazi zote alizofanya, mtume Yohana anasema: “Nadhani hata ulimwengu usingetosha kwa vile vitabu vitakavyoandikwa.” (Yohana 21:25) Kwa wazi uzima wa Yesu ulikuwa wenye matokeo mengi. Basi, kusema juu ya uzima kama wa muda mrefu au mfupi kunadanganya. Bila shaka ingekuwa bora kuusema kama wenye kupendeza au usiopendeza, wenye ubatili au wenye matokeo mengi.

UZIMA WAPASWA UWE NA MAANA

5, 6. (a) Ili uzima uwe na maana unapaswa uwe na nini ndani yake? (b) Mageuzi yenye kuendelea yanapunguzaje ubora wa uzima; kwa matokeo gani?

⁵ Kwa hiyo, kuwako tu si ndio uzima kulingana na maana kamili. “Mtu anaishi,” anasema Sidney Jourard, daktari wa akili, “ikiwa anaona uzima wake una maana na ubora, na akiwa na jambo la kuishilia.” Lakini ulimwengu huu unatia maana gani kwa uzima, wakati wingi wa waalimu wake hawasadiki uzima kuwa zawadi ya Mungu bali ni matokeo ya ajali tu ya asili? Kwa wazi makisio yao hayaheshimu uzima. Mawazo kama yale ya mageuzi yenye kuendelea yanapunguza heshima ya uzima wa kibinadamu kwa kufundisha kwamba mwanadamu ni mnyama, mazao ya mageuzi yenye kuendelea. Yanamvunjia mwanadamu heshima kwa kumwondolea fahari yake kama kuumba kwa Mungu. Mawazo haya yamewaongoza wengi wauone uzima kama kitu ovyo. Yanayoonyesha kwamba wanadamu hawaheshimu utakatifu wa uzima ni matendo ya uvunjaji wa sheria, jeuri, vita na ufisadi ambao umeenea katika ulimwengu.

⁶ Mapayo haya juu ya asili ya mwanadamu mwenyewe ni suto lenye kumkufuru Muumba Mwenye Nguvu Zote. Kama mtunga Zaburi alivyotangaza: “Ee [Yehova], uyakumbuke hayo, adui amelaumu, na watu wapumbavu wamelidharau jina lako.” (Zab. 74:18, 22) Maoni hayo yamekuwa na matokeo yenye kuharibu wanadamu.

7. Tunaweza kupata wapi mahali ambapo tunaelezewa maana ya kweli ya uzima, kwa matumaini gani ya wakati ujao?

⁷ Walakini, Biblia inatupa maana ya kweli ya uzima. Haimvunjii mwanadamu heshima hata kidogo, bali inamheshimu kwa kutujulisha kweli yenye kusisimua juu ya mwanadamu, yaani, kwamba yeye ni kuumba kwa pekee na tofauti, kulikoumbwa kwa ‘mfano na sura’ ya Mungu. (Mwa. 1:26-28) Uhakika huu umepaswa umwongoze mwanadamu aone uzima kuwa wa maana sana, uzima wake mwenyewe na vile vile uzima wa wengine. Tumaini la mwanadamu halizuiwi kwa kutazamia kufa tu kama waalimu wa mageuzi yenye kuendelea wanavyofundisha, bali, kulingana na Biblia, yeye ana tumaini la uzima wa milele. (Yohana 3:16) Kulingana na maoni ya Biblia wakati ujao wa mwanadamu ni wenye matumaini​—matumaini ya kuwa mwana au binti mkamilifu wa Mungu katika dunia ya paradiso! Ndiyo sababu mwanamke Mjeremani mwenye huzuni sana alifarijiwa na ambayo Biblia ilisema juu ya uzima. Ujuzi huo unatia heshima ya uzima na tamaa ya kuendelea kuishi, kwa utukufu wa Mpaji wa uzima.

UZIMA WAPASWA UWE NA KUSUDI

8. Ili uzima uwe wenye maana, unapaswa uwe na jambo gani jingine, lakini ni watu wangapi ambao wamelitafuta?

⁸ Lakini ili uzima uwe wenye maana, wapaswa uwe na kusudi. Mwanafunzi aliyepotezwa na filosofia nyingi juu ya uzima alikubali uhitaji huu. “Shida yangu,” akasema, “ni kwamba mimi sina sababu ya kuishi. . . . ni lazima mtu awe na sababu, nami sina.” Shida yake ni ya kawaida. Basi, ni nini lililo kusudi la kweli la uzima? Wengi wamedai kwamba kusudi kubwa sana katika maisha ni kupata furaha. Lakini furaha ni nini? Itapatikanaje na wapi? Watu wengine wanadhani ya kwamba furaha ni ile raha tu ya kimwili na wanaitafuta ili wapate kutosheleza maoni yao. Wengine wanatafuta kusudi la uzima kwa kujitoa kufanya namna fulani ya sanaa, au katika tendo, au hata kwa kumpenda binadamu mwingine. Lakini hakuna mojawapo ya shughuli hizi ambayo imemridhisha mwanadamu kwa muda mrefu.

9. Ni nini ulio udanganyifu mkubwa leo, na kwa sababu gani?

⁹ Udanganyifu mkubwa wa leo ni wa kwamba mwanadamu aweza kuishi kwa chakula tu, kwamba filosofia ya mambo ya kimwili itatosheleza mahitaji yote ya uzima. “Unipe tu nyumba, gari, televisheni na kazi ili nilipe deni zangu, nami nitafurahi,” ndiyo madanganyo ya kijinga, yenye tumaini. Lakini uhakika wenye kuelimisha ambao haukubaliwi mara nyingi na maskini, ni kwamba matajiri wanaona raha kidogo katika mali zao. Kwa sababu gani? Kwa sababu, wajapokuwa na fedha wanakubali kwamba furaha na uradhi vimewatoka. Wajapokuwa na chakula tele, bado wanatafuta kusudi la uzima.

10. Ni wapi tunakoweza kupata sababu ya kuishi, na sababu hiyo ni nini?

¹⁰ Biblia, Neno la Mungu lililoongozwa na roho yake, inatupa sisi sababu ambayo imetupasa tuwe nayo katika kuishi ikiwa twatumaini kupata uradhi. Mtunga zaburi alitangaza hivi: “Kuyafanya mapenzi yako, Ee Mungu wangu, ndiyo furaha yangu.” (Zab. 40:8) Yesu Kristo alisema vivyo hivyo: “Tazama, nimekuja niyafanye mapenzi yako,” Ee Mungu wangu. “Chakula changu ndicho hiki, niyatende mapenzi yake aliyenipeleka, nikaimalize kazi yake.” (Ebr. 10:9; Yohana 4:34) Vile vile Paulo mtume wa Kikristo alikazia sababu hii ya kuishi, akisema kwamba imewapasa Wakristo wajihakikishie wenyewe “mapenzi ya Mungu yaliyo mema, ya kumpendeza, na ukamilifu.” (Rum. 12:2) Na kitabu cha mwisho cha Biblia vile vile kinakazia jambo hili: “Umestahili wewe, [Yehova] wetu na Mungu wetu, kuupokea utukufu na heshima na uweza; kwa kuwa wewe ndiwe uliyeviumba vitu vyote, na kwa sababu ya mapenzi yako vilikuwako, navyo vikaumbwa.” (Ufu. 4:11) Ndivyo Biblia inavyokazia waziwazi sababu ya kuwako kwa wanadamu. Kuutumia uzima kwa kusudi jingine lo lote ni kukosa kusudi lake. Basi ingefaa kujiuliza wenyewe, Tunafanya nini na uzima wetu? Je! tunafanya mapenzi ya Mungu?

VILE VILE UZIMA WAPASWA UWE NA JAMBO LINALOTIMIZWA

11. Uzima unapaswa uwe na nini ndani yake ili kuufanya wenye maana, na hii inaungwaje mkono katika Maandiko?

¹¹ Uzima ukitumiwa kuishi kwa utukufu wa Mungu ni wenye maendeleo, si wa kivivu, kama ambavyo wengine wanaweza kuwaza. Ni wenye kuthawabisha vile vile. Mungu alipomwumba mwanamume wa kwanza Adamu na mke wake, alisema hivi: “Zaeni, mkaongezeke, mkaijaze nchi, na kuitiisha; mkatawale samaki wa baharini, na ndege wa angani, na kila kiumbe chenye uhai kiendacho juu ya nchi.” “[Yehova] Mungu akamtwaa huyo mtu, akamweka katika bustani ya Edeni, ailime na kuitunza.” (Mwa. 1:28; 2:15) Yote haya yalimaanisha kazi, kazi yenye maana, kuitiisha dunia na kuifanya kuwa paradiso. Wakati mwanadamu alipojishughulisha mwenyewe katika kufanya mapenzi ya Mungu, ndipo uzima wake ulipokuwa wenye kuthawabisha. Ulikuwa wakati alipotafuta shughuli za kichoyo kwa kupingana na mapenzi ya Mungu ndipo alipogeuka akawa asiyeufurahia uzima.​—Mwa. 3:8-24.

12. Je! uzima unaweza kuwa wenye maana na wenye kujaa mambo yanayotimizwa chini ya hali zisizokamilika? Toa mifano.

¹² Ikiwa kwa unyofu wanadamu wanafanya mapenzi ya Mungu, uzima nje ya Edeni na chini ya hali zisizo kamilifu unaweza vile vile kuwa wenye maana na kujaa mambo yanayotimizwa. Hivi ndivyo historia imeonyesha. Kwa amri ya Mungu, Nuhu alijenga safina ambayo kwa hiyo jamii ya wanadamu wote iliokolewa na angamizo. (2 Pet. 2:5; 3:5, 6) Lo! hilo lilikuwa tendo bora! Na namna gani Ibrahimu, ambaye kwa umri wa miaka 100 akamzaa mwana kwa sababu ya imani yake. Au kwa kifupi yafikirie maisha ya Musa, ambaye alipopita umri wa miaka 80, alifanya zaidi kuliko ambavyo watu wengi wangetimiza kwa kawaida katika muda wa maisha. Alitumiwa na Mungu kwenda kumdai Farao wa Misri na kwa sababu hiyo Waisraeli watumwa walifunguliwa. Musa aliona kuanzishwa kwa taifa la Mungu la Israeli wa asili na akaliongoza kwa miaka 40. Lo! namna uzima wake ulivyokuwa wenye maana, kwa sababu alichagua kufanya mapenzi ya Mungu! Historia ya wengine wengi imeandikwa kwa ajili yetu katika Biblia​—watu walioona kwamba “baraka ya [Yehova] hutajirisha, wala hachanganyi huzuni nayo.”​—Mit. 10:22.

13. Huduma ya Kikristo imekuwaje na mambo yanayotimizwa? Toa mfano.

¹³ Huduma ya Kikristo ina mambo mbalimbali yanayotimizwa, kama ulivyokuwa utumishi wa watu waaminifu wa nyakati za mwanzoni. Maisha ya Yesu ndio mfano mkamilifu unaoonyesha hili. Uzima wake ulikuwa na maana. Vile vile ulikuwa na kusudi, kwa maana yeye alikuja “kutumika, na kutoa nafsi yake iwe fidia ya wengi.” (Mt. 20:28) Ulikuwa na mambo yaliyotimizwa kwa sababu aliwakomboa wanadamu, akafungua njia ya kukombolewa na dhambi na mshahara wake mauti. Yale ambayo alifanya yalikuwa yenye kuthawabisha, kwa maana yalimpatia kutokufa katika mbingu. (Ebr. 12:1-3; Flp. 2:5-11) Na wale ambao wamechagua kuzifuata nyayo za Yesu vile vile wameona kufanya mapenzi ya Mungu kuwa kwenye kuthawabisha. Paulo akawa mtume kwa Mataifa, akafanya makundi ya Kikristo katika eneo lote la Bahari ya Kati. Barua zake ndiyo sehemu kubwa ya Maandiko ya Kigiriki ya Kikristo. Lo! haya yalikuwa matendo bora! Ndiyo sababu anapendekeza maisha ya Kikristo, akisema: “Mniige mimi, hata kama mimi ninavyomwiga Kristo.”​—1 Kor. 11:1, NW.

MAMBO YENYE KUTHAWABISHA YA HUDUMA YA KIKRISTO LEO

14. (a) Je! huduma ya Kikristo ni shughuli yenye kuthawabisha katika maisha leo? (b) Toa mifano.

¹⁴ Lakini nyakati zi tofauti leo, wengine wanasema. Huenda wakadhani kwamba maisha ya kidini hayapendezi, yana mambo machache ya kupendeza, au uradhi unaotokana na mambo yanayotimizwa. Walakini, hivi sivyo mashahidi wa Yehova wanavyoona. Wao wameona huduma ya Kikristo kuwa shughuli yenye kuthawabisha sana katika maisha. Wao hawakai na kusikitikia tu nyakati za hatari ambazo katika hizo sisi tunaishi. Wanatimiza mambo mengi, wanafanya kazi kama wahubiri wa injili, wanautangaza ufalme wa Yehova, wanafanya wanafunzi kutoka kwa mataifa yote. (Mt. 24:14; 28:19, 20) Kwa mfano, katika nchi ya Denmark, wahudumu wa mashahidi wa Yehova walimkuta mwanamume na mke wake aliyetaka kujifunza Biblia, lakini alizuiwa na jambo moja. Yule mwanamume alikubali kwamba alikuwa mlevi, na akasema kwamba hakuna mtu ambaye angeweza kumsaidia atoke katika hali yake. Madaktari walijaribu wakashindwa. Kuongeza ubaya, mke wake alikuwa mzoevu wa dawa zenye kulevya. Lo! hali isiyo na tumaini! Lakini waliposoma katika Biblia kwamba wengine waliokuwa katika hali kama hizo walisaidiwa watoke katika shida zao, walijipa moyo. (1 Kor. 6:9-11) Funzo la Biblia lilianzishwa pamoja nao. Miaka miwili ilipopita walibatizwa kama mashahidi wa Yehova wa Kikristo, wakawa wamekwisha acha ulevi, kuzoea dawa zenye kulevya na kuvuta sigara! Ukizidisha jambo hili mara elfu utaanza kuona kwamba watu wa namna zote leo wanatengeneza maisha zao. (Kol. 3:8-10) Ni furaha kama nini kutumika kama mfanya kazi mwenzi wa Mungu katika kuwasaidia watu kama hawa wapatanishwe na Mungu! Lo! furaha ambayo Mashahidi hawa wanajifurahisha kwa sababu ya nia yao ya kutumia na kutumika kwa ajili ya wengine!​—Matendo 20:35; Zab. 110:3.

15, 16. (a) Ni mambo gani mengine ya huduma yanayoifanya iwe shughuli yenye kuthawabisha? (b) 2 Petro 1:5-8 anasemaje katika habari hii?

¹⁵ Ziko faida nyingine zinazotokana na huduma ya Kikristo vile vile. Vijana wengi wanadhani kwamba kujiuzulu kazi ndiyo kuanza maisha yaliyo kweli kweli. Kukaa tu bila kufanya lo lote​—‘Ah, haya ndiyo maisha kweli kweli!’ ndivyo wanavyosema. Lakini ‘maisha’ ya muda gani? Upesi kutofanya lo lote kunaleta kutoridhika. Kunachosha. Zaidi ya hilo, kuwa katika hali yenye huzuni ni kuishi katika hali ya uchovu na afya mbaya. Mtu anatembea nusu amekufa. Kwa upande mwingine, vijana hao wanapowaona baba na mama zao wakifanya huduma ya Kikristo, wakiwarudia watu wanaopendezwa, wakiongoza mafunzo ya Biblia au wakifanya haraka kwenda kwenye mikutano ya Kikristo, ijapokuwa uzee wao, wanafahamu kidogo kufaa kwa kutumia mikono, miguu yao katika njia hii. Inawapa kujisikia hali njema. Kwa wazi, faida zinakuja kwa wale wanaoitikia shauri la mtume Paulo: “Msitangetange katika kazi yenu. Mpashwe moto kwa roho. Mtumikieni Yehova.”​—Rum. 12:11, NW.

¹⁶ Watu wanaojiuzulu kazi, kazi yenye maana, vile vile wanajiuzulu maisha. Kutofanya lo lote ni kujiua kwa polepole lakini kwa hakika. Miili ya watu hawa ni kama kamba za kitanda zilizokatika ambazo hazifai kitu; akili zao ni kama vyumba visivyo na vyombo vya nyumbani, hazina mawazo au mambo yenye kupendeza. Shauri bora juu ya jambo la kufanya na hali hii ni kujifunza kamili Neno la Mungu Biblia na kushiriki katika kazi ya Mungu. Huduma ya Kikristo inatoa vyote viwili. Kufanya mapenzi ya Mungu kunamjaza mtu mawazo na utendaji wenye kujenga. Kunamzuia asiwe mvivu, asiye na matunda, kujiona kutofaa. Lo! namna hilo lilivyo tendo bora na baraka!​—Flp. 4:6-9; 2 Pet. 1:5-8.

WALAKINI, UZIMA WAPASWA UWE WA MILELE, WENYE KURIDHISHA

17. (a) Jambo gani jingine linalopaswa liongezwe ili kuufanya uzima uwe wenye kuridhisha kabisa? (b) Huu unapatikanaje kulingana na Yohana 17:3?

¹⁷ Ijapokuwa uzima unakuwa kitu kizuri na chenye bei sana kwa mtu na kwa wengine ikiwa unatumiwa katika utumishi wa Mungu​—na hiyo inaweza kuonekana kuwa thawabu​—hata hivyo usingekuwa wenye kuridhisha sana ikiwa mtu anaishi sana akiwa na tumaini la kufa tu. Mauti ni adui, si rafiki. (1 Kor. 15:26) Yesu alikazia uhitaji wa mwanadamu wa uzima wa milele, aliposema hivi: “Kwani atafaidiwa nini mtu akiupata ulimwengu wote, na kupata hasara ya nafsi yake?” (Mt. 16:26) Kutimiza mambo ya kimwili ukiwa na tumaini la kufa si jambo lililotimizwa hata kidogo. Ili mtu apate kuwa mwenye manufaa kwa Mungu, yampasa aishi; wafu hawamheshimu Mungu. (Zab. 115:17) Shughuli yote ya huduma ya Kikristo ni hii: kuwapatanisha wanadamu na Mungu ili wapate kuishi milele kwa utukufu wa Mungu. Lakini je! hili lawezekana? Ndiyo, na hizi ndizo habari njema ambazo Kristo alitangaza. (Yohana 17:3) Kwa hiyo, kusudi katika maisha ya mtu limepaswa liwe kumjua Mungu na Kristo ili aishi milele. Kwa maana “zawadi ambayo Mungu anatoa” si uzima wenye miaka michache tu, bali “ni uzima wa milele kupitia kwa Kristo Yesu Bwana wetu.” (Rum. 6:23, NW) Ni kuifikia zawadi hii ndiko kunakoyafanya maisha ya Kikristo kama mmoja wa mashahidi wa Yehova kuwa yenye kusisimua sana, yenye maana sana, yenye kuridhisha hata sasa.

18. Eleza sababu gani uzima wa milele ungetamanika zaidi.

¹⁸ Lakini je! uzima wa milele ungetamanika? Ndiyo, chini ya hali kamilifu. Yesu aliuita wakati huu ujao ulioahidiwa, uzima ulio “tele.” (Yohana 10:10) Paulo aliutaja kama “uzima ulio kweli kweli.” (1 Tim. 6:19) Na si vigumu kufahamu sababu yake. Wakati wa milele unatoa nafasi tele kufikiri kwa ubuni na kufanya kazi kwa ujenzi. Kazi ya Mungu isiyomalizwa, ile ya kuigeuza dunia hii iwe paradiso litakuwa ndilo agizo la kwanza kufikiriwa wakati huo na wanadamu chini ya taratibu mpya ya mambo ya Mungu bila shaka. (Isa. 65:17-25; 2 Pet. 3:13; Ufu. 21:1-5) Akili za watu hazitaacha kujifunza hata kidogo juu ya Yehova na kujipatia mambo ya hakika, hesabu na maoni juu ya uzima wote. Nafasi ya ubongo ni kubwa sana, na kwa kadiri unavyoweka akiba, ndivyo unavyokuwa wenye manufaa zaidi. Mbuni na mwanasayansi Thomas Edison siku moja alisikitikia kutoweza kwa akili katika hali yake ya kisasa kufahamu mambo yote katika ulimwengu. Alisema kwamba sisi hatujui nusu ya cho chote. Lakini ebu fikiria furaha itakayotokana na kuitumia akili kwa ukamilifu! Uzima kama ulivyo leo, ni vigumu sana kufanya kazi mpaka imalizike. Karibu watu wote wanafanya kazi nusu-nusu na kutumaini kwamba matokeo ya mwisho yatakuwa kama wanavyotamani yawe. Lakini katika taratibu mpya ya Yehova kutakuwako wakati na uwezekano wa kulifikiria wazo kwa uhakika na kwa ukamili. Hii itatokeza furaha ya kibinadamu katika umilele wote kwa utukufu wa Mungu, kwa maana hili ndilo kusudi Lake lililosemwa.​—Isa. 55:10, 11.

19. Ni nini tunaloweza kufanya ili tujihakikishie wenyewe na wengine zawadi ya uzima wa milele?

¹⁹ Kwa hiyo, uone uzima kama zawadi kutoka kwa Mungu kuwa kitu chenye ubora sana kwa kufanya mapenzi ya Mungu sasa. Tia heshima hii ya uzima katika wengine kwa kuwaonyesha Chanzo peke yake cha uzima, maana yake ya kweli na kusudi lenye kuthawabisha. Wasaidie watu wawe wanafunzi wa Yehova Mungu na Kristo Yesu kwa kuwafundisha yote ambayo Mungu amewaamuru kufanya. Kwa kuwaonyesha wengine sababu peke yake ya uzima, tutakuwa tukilifanya kusudi la uzima likumbukwe na sisi. Kwa maana kama upendo, uzima hauwezi kusitawi peke yake bali unafanywa upya wakati unapojitolea kusaidia wengine. Na utumishi wake ulio mkubwa sana na wenye kuthawabisha sana ni kumtukuza Mungu. Kwa hiyo kutaka kwake peke yake kunaonyeshwa na mtunga zaburi, aliyesema hivi: “Kila kitu kinachopumua​—na kimsifu Yah. Msifuni Yah, enyi watu!”​—Zab. 150:6, NW.