Unaweza Kugeukia Wapi Ukiwa na Matumaini?

JE! WEWE unaona hutaki kutumaini watu? Hali hiyo ya kutotumaini wengine imeongezeka ulimwenguni pote kati ya viongozi.

Gazeti la Kikatoliki (la Kijesuit) lilieleza hivi karibuni: “Inaelekea kwamba kutotumainiana katika serikali ni . . . hali ambayo imeenea sana katika siasa za mataifa yote.” Naye mkuu wa Atlanta University Center alisema: “Watu wanaingia katika hali mbaya ya kutoaminiana.”

Pengine unajua kwamba watu wengi wameacha kutumaini viongozi wa serikali na wa biashara baada ya kuona ufisadi ukienea kati yao. Wengi hata hawatumaini viongozi wa dini!

Wakati ripota alipouliza kivulana wa miaka mitano katika Illinois maoni yake juu ya Mungu, kivulana alijibu: “Mungu huishi katika sanduku juma yote na kutoka nje Jumapili akiwa amevaa mavazi ya kuchekesha ili aongee juu ya pesa.” (Kivulana huyo alikuwa akimtaja kiongozi wa dini.) Unadhani alikuwa na maoni hayo kwa sababu gani? Ingawa watu wengine wanamchukua mchungaji wao vizuri, maoni ya watu wengi ni nini? Kwa mfano, je! wadhani kivulana huyo akiishi miaka 20 mingine atawatumaini sana viongozi wa dini? Ni wazi kwamba mambo ambayo watu wengi wanaona, kusikia na kusoma juu ya viongozi wengi wa dini yamefanya hali ya kutoamini viongozi wa dini iongezeke.

Walakini, hali hiyo haipaswi kukufanya usijue njia ya kufuata upatwapo na matatizo ya kiroho au ya adili. Au unapohitaji mashauri mazuri ya Neno la Mungu. Unaweza kugeukia mahali fulani kwa matumaini na kupata usaidizi wenye upendo na kiasi.

KATIKA KUNDI IA KIKRISTO

Katika wakati ambao taifa lake lilikuwa limepotoka, nabii Yeremia alisema hivi: “Jihadharini, kila mtu na jirani yake, wala msimtumaini ndugu awaye yote; maana. . . kila jirani atakwenda huko na huko na kusingizia.”​—Yer. 9:4, 5.

Lakini Mashahidi wa Yehova wako tofauti sana leo. Katika kitabu Religious Movements in Contemporary America (1974), L. R. Cooper alieleza hivi: “Katika maisha yao wenyewe kundini Mashahidi hutumainiana na kukubaliana.” Makundi yao ulimwenguni pote yanatumainiana.

Lakini wao hawatumainiani tu. Katika kila kundi mna baraza ya wazee, wanaume wazee wa kiroho wanaotumainiwa na kundi na kuchunga na kusaidia wote kundini. Ikiwa wewe tayari unashirikiana na mashahidi wa Yehova, inaelekea unafahamiana na Wakristo waliokomaa katika baraza ya wazee wa kwenu. Lakini je! unajua kwa sababu gani unaweza kuwaendea ukiwa na matumaini? Wao wanawezaje kukusaidia wewe na wapendwa wako?

Angalia maelezo ya unabii yaliyotolewa juu ya wazee hao wenye kujitoa na Isaya: “Na [kila mmoja] atakuwa kama mahali pa kujificha na upepo, na mahali pa kujisitiri na dhoruba; kama mito ya maji mahali pakavu, kama kivuli cha mwamba mkubwa katika nchi yenye uchovu.” (Isa. 32:2) Kwa hiyo unaweza kupata faraja na ulinzi ukiwachukua wazee hao Wakristo waliokomaa kama wanaume wanaostahili kutumainiwa nawe. Ni kama vile Isaya alivyoendelea kusema: “Watu wangu watakaa katika kao la amani; na katika maskani zilizo salama, na katika mahali pa kupumzikia penye utulivu.”​—Isa. 32:18.

Kutumaini kwako wanaume hao kwapaswa kutegemee kufikiria sifa za Maandiko walizopaswa kutimiza ili ‘wawekwe na roho takatifu’ wawe wazee. Ingawa wana umri mbalimbali, utu mbalimbali na ujuzi mbalimbali, lazima kila mmoja wao awe “mwenye kiasi katika mazoea, timamu katika akili, mwenye utaratibu, mwenye kustahili kufundisha, si mpiga kelele ya ulevi, si mpigaji, bali mwenye kusikiliza shauri, si mtaka vita, si mpenda fedha, . . . si mwanamume aliyegeuka hivi karibuni.”​—1 Tim. 3:2-7, NW; Tito 1:5-9; Matendo 20:28.

Kwa kuwa wazee si wanaume ‘waliogeuka karibuni,’ utakuwa ukishughulika na watu ambao wamefanya maendeleo wakakomaa kiroho na wakawa na ujuzi kama Wakristo. Hata hivyo wao hawako juu yako katika cheo. Je! kutokuwa kwao na vyeo vikubwa-vikubwa vya kidini, hata kutoitwa “Kiongozi,” hakukufanyi ujisikie unavutwa nao? (Mt. 23:8-12) Hata hivyo, Biblia yasema kwamba wao ni “wenye kuwaongoza.” Kwa njia gani? “Wanakesha kwa ajili ya [nafsi] zenu, kama watu watakaotoa hesabu.” Tena wao ni Wakristo ‘wanaotia bidii katika kusema na kufundisha.’ (Ebr. 13:17; 1 Tim. 5:17, NW) Basi, unaweza kuona kwa nini ni jambo jepesi kwako kuzidi kuwatumaini.

Ni kweli kwamba wao si wakamilifu; huenda kila mmoja akawa na upungufu na sehemu anazofanyia maendeleo. Lakini sivyo mitume walivyokuwa pia? Je! watu wenye kulaumu kupita kiasi hawakuwalaumu-laumu wao pia? (2 Kor. 10:10) Kwa upande mwingine, Wakristo wenye kiasi katika karne ya kwanza waliwatumaini mitume. Walijua kwamba, ingawa mitume walikuwa wanadamu wasiokamilika, walikuwa na sifa za kiroho za wazi na walikuwa wamewekwa na roho takatifu. (Gal. 4:13, 14) Je haikupasi nawe pia uwatumaini wazee sasa?

Linalopendeza ni kwamba, Biblia yaonyesha si mitume peke yao waliotumainiwa na ndugu, bali wazee wengine pia walitumainiwa. Kwa mfano, Paulo hakumtuma Tito peke yake. Ili kusiwe na shaka kama jambo lilishughulikiwa sawasawa, Paulo alimtuma pamoja na ndugu mwingine ambaye alitumainiwa na Wakorintho. (2 Kor. 8:20) Hivyo wazee wawili wakizungumza jambo pamoja nawe, utakuwa katika hali ya kuweza kufaidika na maarifa ya Maandiko na ujuzi wa Kikristo wa ndugu hao wawili. Katika habari hii, Mithali 15:22 yatuambia hivi: “Pasipo mashauri makusudi hubatilika; bali kwa wingi wa washauri huthibitika.”

Tafadhali angalia kwamba hayo yatakuwa mazungumzo ya siri. Wengine hawatatangaziwa mambo utakayozungumza na wazee hao. Wazee wanajiangalia wasiende hapa na pale ‘wakifichua mazungumzo ya siri.’ (Mit. 20:19) Kwa kweli, ziko nyakati ambazo watu wenye kuanza kushirikiana na Mashahidi wa Yehova wametafuta mashauri kwa wazee juu ya mwenendo haramu waliokuwa nao zamani, kama kuiba. Waliweza kufanya hivyo wakiwa na uhakikisho kwamba wazee wasingeambia watu wengine mambo waliyowaeleza kwa siri. Wazee waliwapa mashauri katika Biblia juu ya vile mtu anavyoweza kupatanisha maisha yake na njia za Yehova.​—Mit. 18:24.

Pengine msaada unaotafuta unahusiana na ulizo la Biblia. Hata ikiwa mzee hajafika umri wa miaka 60 au 70, yeye si mwanafunzi wa vivi hivi tu wa mambo ya Biblia. Amekuwa akijifunza Biblia na vitabu vya Kikristo kwa miaka kadha. Hivyo huenda akakumbuka alisoma habari fulani zinazohusu ulizo lile lile ulilo nalo. Au huenda akaweza kutumia wakati fulani akikuonyesha namna maulizo au mambo ya namna hii yanavyoweza kutafutwa kwa kutumia misaada kama Watch, Tower Publications Index. Msaada huo utakuwa na faida mbili kwako. Kwanza, huenda wakati uo huo mkawa na mazungumzo ya Kibiblia juu ya jambo unaloweza kuchunguza kwa uangalifu. Pili, huenda wakati huo ukajifunza namna utakavyokuwa ukitafuta habari wakati ujao. Je! hatuwezi kuwa na shukrani kwamba tuna vyanzo hivyo vya msaada tunavyoweza kugeukia tukiwa na matumaini?

Unaweza kuendea mzee Mkristo ukiwa na matumaini pia ikiwa umeshindwa na kishawishi ukatenda dhambi. Kumbuka kwamba wazee ni wanadamu pia. Kwa hiyo unaweza kuwa na hakika watajitahidi kufahamu hali na kukuhurumia. Wanakumbuka shauri la kimungu: “Ndugu, hata ingawa mtu achukua hatua fulani ya uongo kabla ya yeye kuijua, ninyi mlio na sifa za kiroho jaribuni kumtengeneza upya mtu huyo katika roho ya upole.” (Gal. 6:1, NW) Watataka kukusaidia ili wakurudishe katika hali inayofaa, ili uweze kuendelea kumtumikia Yehova na kupata baraka zake. Na watajaribu kufanya hivyo kwa upole.

Unajua kwamba wanaume hao si wafanya kazi wa mshahara wasiopendezwa na watu. Wao hawalipwi ndiyo watumikie kundi, bali wao ni wanaume wa kiroho wanaoongozwa na kumpenda Yehova na wale wanaojitahidi kufanya mapenzi yake. Ukionyesha unawatumaini, na hivyo upate faida ya sala zao na mashauri ya Biblia, unaweza kuendelea kuwa na urafiki mkubwa na Yehova. Ni kama vile Mithali 3:32 ituambiavyo: “Mtu mkaidi ni chukizo kwa [Yehova], bali siri yake ni pamoja na wanyofu.”