‘Habari Njema Zenye Utukufu Kutoka kwa Mungu Aliye na Furaha’

“Sharti Injili ihubiriwe kwanza katika mataifa yote.”​—Marko 13:10.

 1. Biblia yatabiri nini juu ya siku hizi kuhusu: (a) habari mbaya, (b) habari njema?

SISI sote hufurahia kuelezwa habari njema, sivyo? Lakini habari njema zaweza kupatikana wapi leo? Si katika radio, televisheni wala magazeti ya ulimwengu! Wanadamu wamekaliwa na huzuni nyingi sana, na watu wengi hawana matumaini mazuri. Kumekuwa na wasiwasi wa kupoteza kazi. Chakula kinapanda bei. Adili zimeharibika zaidi. Silaha za ulimwengu “zinaongezeka kiasi cha kutoweza kuzuiwa.”a Ni sawa na ilivyotabiri Biblia juu ya siku hizi: “Dhiki ya mataifa . . . watu wakivunjika mioyo kwa hofu, na kwa kutazamia mambo yatakayoupata ulimwengu.” Walakini, je! habari mbaya tu ndizo zinazopatikana leo? Sivyo, kwa sababu andiko ilo hilo laendelea kuambia Wakristo hivi: “Changamkeni, mkaviinue vichwa vyenu.” Kwa sababu gani? “Kwa kuwa ukombozi wenu umekaribia.”​—Luka 21:25-28.

 2. Kwa sababu gani hizi ni habari njema kupita zote? (Luka 2:10)

² Basi, habari njema ndizo hizi. Tuzichunguzapo sana, ndizo zinazokuwa habari njema kupita zote. Ni habari njema za kukufurahisha.

 3. “Habari njema” zinaelezwaje katika Maandiko ya Kigiriki kwa njia mbalimbali?

³ Maneno “habari njema” yapatikana zaidi ya mara 120 katika Maandiko ya Kigiriki ya Kikristo. Waandikaji wa Injili, Mathayo na Luka, wanataja ‘habari njema za ufalme.’ Injili ya Marko yatangaza “injili ya Yesu Kristo.” Mtume Paulo ataja “habari njema zenye utukufu za Mungu aliye na furaha.” Naye mtume Petro aeleza kwamba ‘habari njema’ ni “Neno la Bwana” ambalo “hudumu hata milele.”​—Mt. 4:23: Luka 8:1: Marko 1:1:1 Tim. 1:11, NW; 1 Pet. 1:25.

 4. Maandiko yanakaziaje kudumu kwa “habari njema”?

⁴ Kudumu kwa “habari njema” kunatiliwa mkazo pia katika Ufunuo alionewa mtume Yohana, ambapo twasoma juu ya “Injili ya milele” ambayo malaika atangazia “hao wakaao juu ya nchi, na kila taifa na kabila na lugha na jamaa.” Malaika huyo aagiza watu wote ‘wamche Mungu, na kumtukuza,’ naam, ‘wamsujudie yeye aliyezifanya mbingu na nchi na bahari na chemchemi za maji.’ Hiyo ni kwa sababu “saa ya hukumu yake imekuja,” kama Yohana alivyoandika.​—Ufu. 14:6, 7.

 5. Kwa sababu gani wanadamu kwa ujumla wamekosa kuzikubali “habari njema,” na matokeo yamekuwa nini?

⁵ Katika wakati huu wa maana zaidi katika vizazi vyote, “habari njema zenye utukufu” zinang’aa kweli kweli. Lakini je! wanadamu wote wanaziona kuwa habari njema? Paulo atuambia katika 2 Wakorintho 4:3, 4 hivi: “Injili . . . imesitirika kwa hao wanaopotea; ambao ndani yao mungu wa dunia hii amepofusha fikira zao wasioamini, isiwazukie nuru ya injili ya utukufu wake Kristo aliye sura yake Mungu.” Habari njema (au Injili) hizo zinahukumu taratibu ya mambo ya Shetani. Wale wanaounga taratibu ya Shetani mkono watatoweka kwa sababu hawatii Injili ya Bwana wetu Yesu.’​—2 The. 1:8.

 6. Kuna baraka gani wakati ujao kwa wale wanaozitii “habari njema”? (Zab. 37:11, 29)

⁶ Walakini, wale wanaotii habari njema watapokea baraka ambazo mwanadamu mwenye kufa hawezi kuzithamini sasa, haraka za ajabu kweli kweli! Paulo alipozithamini habari njema alipaza sauti akisema: “Jinsi zilivyo kuu utajiri na hekima na maarifa ya Mungu! hukumu zake hazichunguziki, wala njia zake hazitafutikani!”​—Rum. 11:28, 33.

KITABU CHA “HABARI NJEMA” NA MTUNGAJI WAKE

 7. Kwa sababu gani Biblia yaweza kuelezwa kuwa kitabu kilicho kizuri zaidi cha nyakati zote?

⁷ Habari njema zaweza kupatikana wapi leo? Ni katika Neno la Mungu peke yake, yaani, Biblia, ambayo ni kitabu kisicho na kifani chenye hekima nyingi mno. Jinsi Biblia inavyotuonyesha mambo yenye kupendeza sana, kuanza na mwanzo wa uumbaji, mpaka historia yote ya wanadamu katika nyakati hizi zenye hatari, na kuendelea mpaka ile mileani nzuri ajabu ya utawala mtukufu wa Kristo! Na hali kitabu hicho chenye habari njema kiliandikwa na watu wa kawaida walio kama sisi tu​—watu waliojitoa wakachaguliwa na Yehova na kupewa uwezo wa roho yake wauandike ujumbe wake. Yehova alihakikisha pia kwamba ujumbe huo umehifadhiwa kwa ajili yetu, akazuia majaribio yote ya kutaka kuuchafua au kuuharibu. “Habari njema” zimeendelea kuwako karne zote katika “vitabu vidogo” 66, vyenye urefu na mambo mbalimbali, lakini kila kimoja kimekuwa cha lazima kabisa ili kufanyiza kitabu kizuri ajabu kisichopata kuonekana tena usoni pa dunia hii​—Biblia Takatifu.​—Zab. 19:7-11.

 8. (a) Kitabu cha “habari njema” kinatukuza nini zaidi ya mambo yote mengineyo? (b) Jina la Mungu lamtofautishaje na miungu mingine yote?

⁸ Zaidi ya yote, kitabu hicho chenye “habari njema” kinatukuza jina na enzi kuu ya Mungu yule wa kweli aliye hai, Yehova. (Ufu. 4:11) Jinsi kinavyomwonyesha vizuri sana kuwa Mungu wa milele na mwenye furaha​—“[Yehova, Yehova], Mungu mwingi wa huruma, mwenye fadhili, si mwepesi wa hasira, mwingi wa rehema na kweli; mwenye kuwaonea huruma watu elfu elfu, mwenye kusamehe uovu na makosa na dhambi”! (Kut. 34:6, 7) Twaweza kumtumaini Bwana huyo Mwenye Enzi Kuu wa ulimwengu wote. Yehova ni Mungu mwenye huruma, mwenye hali ya upendo kama baba, tofauti sana na Utatu usioelezeka wa Jumuiya ya Wakristo na mamilioni ya miungu ya wazee waliokufa na sanamu zisizo na uhai zinazoabudiwa katika dini zisizo za Kikristo. Yeye ndiye Mungu Mwenye Nguvu Zote, Aliye Juu Zaidi ya dunia yote, nalo jina lake Yehova lililo maarufu linasimamia kusudi lake la kukomboa wale wanaompenda kutoka ulimwengu huu wa Kishetani.​—Zab. 83:17, 18; Eze. 38:23.

MAAJABU YA UUMBAJI WA MUNGU

 9. Yehova alionyesha sifa gani zilizo nzuri sana alipokuwa akiumba dunia? (Yer. 10:10-12)

⁹ Inasisimua sana kufikiria namna Yehova anavyotumia hekima, busara na upendo wake. (Zab. 40:5) Alipoiumba Dunia yetu inayoning’inia angani, aliitayarisha iwe makao ya milele ya wanadamu, naye hakukosa kuumba hata vitu vilivyo vidogo sana. Mafundi wa kubuni ujenzi wa karne hii ya 20 wanaweza kujifunza mengi kutokana na busara aliyoonyesha Yehova alipojenga dunia hii na kutia vitu vilivyohitajiwa ndani yake. Aliweka msingi wa dunia yetu ambao hautaondolewa wakati wo wote, tena akaipa paa lenye nyota linalotangaza utukufu wake vizazi vyote vitakavyokuja. Ni kama vile Mithali 3:19 inavyosema: “Kwa hekima [Yehova] aliiweka misingi ya nchi; kwa akili zake akazifanya mbingu imara.”

10, 11. (a) Yehova alifanyia mwanadamu mipango gani muda mrefu kabla hajamwumba? (b) Dunia imepataje kujazwa habari mbaya? (Kum. 32:5)

¹⁰ Yehova alipamba dunia hii kwa rangi zenye kupendeza sana ili mwanadamu aliyeumbwa baadaye awe mwenye furaha. Akaipamba kwa mashamba mazuri sana ya kijani kibichi na misitu yenye uzuri wa kustarehesha na yenye kuvuta nguvu za jua na kuziweka akibani. Hivyo dunia yetu ina nguvu zake yenyewe ilizojiwekea. Yehova alipanga vitu vyote vilivyo hai viweze kutumia nguvu hizo. Alihakikisha kwamba dunia imepata vifaa vya kutosha kwa kuipa nafaka za namna mbalimbali, matunda, mboga na vyakula vingine muda mrefu hata kabla hajaumba mwanadamu. Akiba hiyo itadumu imejaa sikuzote, kwa maana Yehova alisema baadaye hivi: “Muda nchi idumupo, majira ya kupanda, na mavuno . . . havitakoma.”​—Mwa. 8:22; Zab. 104:14, 15, 24.

¹¹ Yehova aliipa dunia madini yenye thamani na vito vyenye thamani pia, madini yanayoweza kufanyiza umeme, pamoja na makaa ya mawe na mafuta. Miaka ya karibuni tu ndipo mwanadamu amejua jinsi makao yake ya dunia yalivyopewa vifaa vingi. Kama mwanadamu angalitumia vifaa vyote hivyo kufaidi wanadamu wenzake na kumtukuza Mungu, kila uvumbuzi mpya ungalikuwa habari njema. (Linganisha Kumbukumbu la Torati 8:6-9.) Badala ya kufanya hivyo, watu wenye pupa wamekosa kumshukuru Mbuni na Mfanya dunia. Wametenda kama waharabu wenye kutumia vibaya uumbaji mtukufu wa Yehova. Wameichafua dunia, wakaharibu mali zake na kufanya silaha nyingi za atomiki zinazofanya wanadamu wakaribie sana kujiharibu. Wameijaza dunia habari mbaya. Lakini haitakuwa hivyo sikuzote.

12. Kwa sababu gani yaweza kusemwa kwamba mwanadamu amefanywa ‘kwa jinsi ya kutisha’?

¹² Kati ya vitu vyote vilivyoumbwa na Yehova duniani, mwanadamu ndiye kiumbe bora zaidi. Ebu angalia alivyoumbwa! Jama! mwanadamu wa kwanza mkamilifu alikuwa kiumbe mzuri ajabu, aliyefanywa kwa “mfano” wa kiroho wa Mungu akiwa na mwili wa nyama uliofanywa kwa ufundi kuliko mashine yo yote iliyopata kufikiriwa au kutengenezwa na mwanadamu. (Mwa. 1:27) Kwa kweli, yatupasa kumwambia Yehova hivi: “Ee [Yehova], . . . nitakushukuru kwa kuwa nimeumbwa kwa jinsi ya ajabu ya kutisha. Matendo yako ni ya ajabu, na nafsi yangu yajua sana.” (Zab. 139:1, 14) Tena fikiri, wewe binadamu, ulitoka katika yai moja dogo sana kama ncha ya kisumari. Nafasi hiyo iliyo ndogo sana ndiyo Mbuni Mkuu, Yehova Mungu, aliyohitaji ili kuandika namna sehemu za mwili wako wote zingekuwa. Hiyo yakufanya ujione u mdogo sana, sivyo?​—Mhu. 11:5.

YANAYOHUSIKA KATIKA “HABARI NJEMA”

13. (a) Kwa sababu gani miili yetu haifanyi kazi tena ifaavyo? (b) Kwa habari ya dunia yetu, twaweza kuwa na matumaini gani yenye nguvu ? (Zab. 145:17-20)

¹³ Ulikuwa msiba kweli kweli kwa mwanamume na mwanamke wa kwanza kuchagua kuasi enzi kuu ya Yehova na kuanguka katika dhambi. Kwa sababu ya dhambi tuliyorithi, miili yetu iliyotungwa vizuri ajabu haifanyi kazi tena inavyofaa, na baadaye sote tunakufa. (Rum. 5:12) Wanadamu wengi wameongeza kutokamilika kwao kwa kutumia vibaya miili yao na kuchafua akili zao. Wamepungukiwa sana kuonyesha ‘mfano wa Mungu.’ Jamii ya wanadamu imekuwa yenye uchoyo na upotovu. Lakini sisi tumpendao Mungu leo twaweza kujitahidi kuonyesha utu wake. Nasi twaweza kuwa na uhakika mwingi kwamba atanyosha mambo katika dunia yetu, awatupilie mbali waharabu ambao wameiharibu, kisha airudishie uzuri wake hata mwishowe ing’ae ikiwa paradiso nzuri, ifurahishe wanadamu wote na kumletea Yeye utukufu. Hayo ndiyo yanayohusika katika “habari njema.”​—Ufu. 11:18; Zab. 37:37, 38.

14. Ni “habari njema” gani ambazo zimekwisha tangazwa juu ya “uzao”?

¹⁴ “Habari njema” hizo za pekee sana zilianza kutangazwa tangu dhambi ilipoingia ulimwenguni. Wakati huo, katika Edeni, ndipo Yehova alipotangaza kusudi lake la kutokeza “uzao,” Masihi na Mkombozi, amponde yule “nyoka wa zamani,” Shetani, na kuondoa matendo yake yote ya uovu. (Mwa. 3:15; Ufu. 12:9-12) Habili, Henoko na Nuhu waliziamini habari njema hizo, na ingawa Mungu aliuharibu ulimwengu usiomcha Yeye wakati wa Gharika, ilikuwa lazima “uzao” ulioahidiwa uje. Ibrahimu na uzao wake ndiye aliyefuata kupewa ahadi hizo.​—Mwa. 22:15-18.

15. “Uzao” huo ulijulikanaje? (Luka 24:25-27)

¹⁵ “Uzao” huo ungekuwa nani? Kupitia kwa mamia ya unabii mbalimbali, waandikaji walioongozwa na Mungu walitabiri kidogo jinsi Masihi angekuja, jinsi angefanya huduma yake, jinsi angetaabika na kuuawa na kufufuliwa akakae mkono wa kuume wa Mungu. Hivyo, Mungu yule yule aliyeonyesha busara ya ajabu kwa kutayarisha dunia yetu na kuitia vitu vilivyohitajiwa, alimtabiri mapema pia yule ambaye angemtumia kuikamilisha dunia kwa uzuri wa paradiso.

16. “Uzao” huo ulitokea wakati gani na kwa njia gani?

¹⁶ Baada ya karibu miaka elfu nne ya kungojea, mkuu wa ule “uzao” ulioahidiwa, yaani, Yesu Kristo, alitokea. (Gal. 3:16) Alipokuwa akitangaza kuzaliwa kwa Yesu kama mwanadamu, malaika wa Yehova aliwaambia wachungaji wanyenyekevu hivi: “Mimi ninawaletea habari njema ya furaha kuu itakayokuwa kwa watu wote; maana leo . . . amezaliwa, kwa ajili yenu, Mwokozi, ndiye Kristo Bwana.” (Luka 2:10, 11) Yesu alibatizwa na kutiwa mafuta kwa roho ya Mungu alipokuwa wa miaka 30, naye alitangaza katika sinagogi la mji wa kwao Nazareti kusudi la kuja kwake duniani, kwa kusoma maneno ya nabii Isaya: “Roho [ya Yehova i] juu yangu, kwa maana amenitia mafuta kuwahubiri maskini habari njema. Amenituma kuwatangazia wafungwa kufunguliwa kwao, na vipofu kupata kuona tena, kuwaacha huru waliosetwa, na kutangaza mwaka wa Bwana uliokubaliwa.” Kisha, baada ya kuketi, Yesu aliwaambia watu wa mji wao hivi: “Leo maandiko haya yametimia masikioni mwenu.” (Luka 4:18-21) Lakini je! walizifurahia habari njema hizo? Sivyo. Bali, walijaribu kumwua Yesu.

17. Kama Yesu alivyojulisha, “habari njema” zinatoa tumaini gani jangavu?

¹⁷ Baadaye, “Yesu alikuwa akizunguka katika miji yote na vijiji, akifundisha katika masinagogi yao, na kuihubiri habari njema ya ufalme, na kuponya magonjwa yote na udhaifu wa kila aina.” (Mt. 9:35) Kwa hiyo, Yesu alieleza habari za utawala wa Ufalme ambao ungeletea wanadamu baraka za ajabu, tena alipoponya watu magonjwa na udhaifu wao alionyesha kwamba baraka hizo zingekuwa za namna mbalimbali wakati ujao. (Luka 7:22) Naam, “habari njema” zilitokeza tumaini zuri la kukombolewa na dhambi na mauti, na utawala mwovu wa Shetani na wa wanadamu, na utumwa wa dini ya uongo.

SABABU YATUPASA KUSHUKURU MUNGU NA KRISTO

18. Ni nini kinachohakikisha kwamba Mungu na Kristo wanajali wanadamu kweli kweli?

¹⁸ “Habari njema” hizi zaeleza jinsi Mungu anavyojali sana wanadamu aliowaumba duniani: “Kwa maana jinsi hii Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele.” (Yohana 3:16) Jinsi imetupasa tumshukuru Yehova kwa mpango huo wa upendo! Jinsi imetupasa pia tumshukuru Mwana, Yesu Kristo aliyejieleza hivi: “Hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake”! (Yohana 15:13) Upendo huo wa kujitoa ndio ukawa msingi hasa wa “habari njema.”

19. (a) Kifo cha Yesu kilitimiza nini? (b) Kwa sababu gani Yesu hakupendezwa na kujizalia jamaa ya kibinadamu?

¹⁹ Yesu alikubali kufa kifo chenye ukatili kuliko vifo vyote kwa ajili ya “habari njema.” Nacho kifo chake kilitimiza nini? Kwa kuendelea kushikamana na enzi kuu ya Baba yake bila kuyumbayumba mpaka kufa, Yesu alijionyesha kwamba alistahili kabisa kutukuzwa awe Mtawala katika ufalme wa mbinguni. Na kwa kuendelea bila kuwa na dhambi mpaka kufa, Yesu alihifadhi haki yake ya kuwa na uzima mkamilifu wa kibinadamu, ambao sasa angeweza kuutumia kama “pesa taslimu” akomboe vitu vyote ambavyo Adamu alipotezea wanadamu. (Ebr. 5:8, 9; Rum. 5:19) Yesu angaliweza kuoa na kujizalia jamaa kamilifu ya kibinadamu. Lakini hilo halikumpendeza. Alipendezwa na sisi, sisi tulio jamaa ya Adamu tusioweza kujikomboa, tena alipendezwa na kufanya mapenzi ya Baba yake kwa kutukomboa sisi na dhambi na mauti. Jinsi ilivyofaa kwa vile “Mungu alimwadhimisha mno, akamkirimia Jina lile lipitalo kila jina.”​—Flp. 2:9-11.

20. (a) Yesu aweza kutimiza nini akiwa katika cheo chake cha sasa cha utumishi? (b) “Habari njema” zinatolea ‘viumbe vinavyougua’ tumaini gani?

²⁰ Sasa Yesu atumikia mbinguni kama “kuhani milele,” kulingana na uwezo wa ‘uzima wake mwenyewe usio na ukomo,’ hata aweza kuondoa milele matokeo ya dhambi tuliyorithi. Amekwisha kufanya hivyo kwa ajili ya “kundi dogo” lake la wafuasi waliotiwa mafuta, waliochaguliwa kwanza kati ya Wayahudi kisha kati ya mataifa yasiyo ya Kiyahudi, hata wakaingizwa katika “agano jipya,” wakiwa na tumaini la kutawala pamoja naye katika ufalme wake wa mbinguni kwa kufufuliwa wakiwa viumbe vya kiroho. Hizo ndizo habari njema ambazo Paulo na wanafunzi wengine walitangaza kwa bidii nyingi sana katika karne ya kwanza. (Rum. 1:15, 16; Ebr. 7:16, 21; 8:7-13) Lakini “habari njema” zinaeleza pia habari za tumaini la uzima wa milele utakaofurahiwa na “mkutano mkubwa” wa waokokaji wa Har–​Magedoni na hata mkutano mkubwa zaidi wa wanadamu wafu watakaofufuliwa katika paradiso itakayorudishwa. Hizo ni “habari njema” kweli kweli kwa ‘viumbe vinavyougua.’​—Rum. 8:20-22.

21. (a) Ni nani hasa wametaabishwa na Shetani? (Ufu. 6:9) (b) Kwa sababu gani huu ni wakati ufaao wa utawala wa Ufalme wa Mungu kurudishwa usimamie dunia yote? (Ufu. 11:17, 18)

²¹ Naam, wanadamu wametaabika karne nyingi zilizopita, na hasa watumishi wa kweli wenye kushikamana na Mungu wameteswa na hata wakauawa na Shetani na mawakili wake wa kidini. Lakini watathawabishwa kwa sababu ya ukamilifu wao. (Ufu. 2:10) Wameshiriki pamoja na Yesu kujibu dai la ukaidi la Shetani kwamba Mungu asingeweza kuweka duniani wanadamu ambao wangeendelea kushikamana na Mungu wakiwa katika majaribu ya kila namna. Katika miaka yote elfu sita ya kuwako kwa wanadamu, wamehakikisha kwamba hakuna kinachoweza kuzuia watumishi wa kweli wa Mungu wasimpende na kumtumikia kwa upendo na uaminifu. Waabudu hao waaminifu wa Yehova wanafahamu kwamba utawala wa wanadamu hauwezi kuletea wanadamu umoja wala furaha. Enzi kuu ya Mungu yenye haki peke yake ndiyo inayoweza kuleta. Na kwa kuwa sasa utawala wa wanadamu umeshindwa kabisa, wakati Wa Yehova umekaribia wa kukomboa watumishi wake wanaoshikamana naye, atetee enzi kuu yake na kufanya utawala wa Ufalme wake usimamie tena dunia yote.

[Maelezo ya Chini]