Kuchagua Kwetu Kufanya Kazi Pamoja na Yehova Mungu

“Chagueni hivi leo mtakayemtumikia . . . Lakini mimi na nyumba yangu tutamtumikia [Yehova].”​—⁠Yos. 24:15.

 1, 2. Eliya alifanya watu wa Israeli wafanye uchaguzi gani, na kwa njia gani?

SIKU KUTWA manabii na makuhani wa Baali wakawa wakichechema kuzunguka madhabahu ilipokuwa dhabihu. Ili wamwombe sana mungu wao Baali ajijulishe kwa kuiteketeza dhabihu kwa moto, walianza hata kujikatakata kwa visu. Lakini yote ni bure tu’.

² Ndipo ilipokuwa zamu ya Eliya nabii, mneni wa Yehova Mungu. Alipokwisha kujenga madhabahu, akaweka kuni na mnyama aliyechinjwa juu yake, aliagiza iloweshwe maji, kisha akamwomba Yehova Mungu wake. Matokeo? Moto ukashuka kutoka mbinguni ukateketeza, si kuni na dhabihu peke yake, bali hata mawe yenyewe ya madhabahu hiyo. Apo hapo Waisraeli waliokuwa wakitazama walipaza sauti zao, wakisema: “[Yehova] ndiye Mungu, [Yehova] ndiye Mungu.” Miaka mingi wamekuwa ‘wakisita-sita katikati ya mawazo mawili,’ lakini sasa walichagua kumkubali Yehova Mungu wa kweli awe Mungu wao.​—⁠1 Fal. 18:​21-40.

 3. Kwa sababu gani mwanadamu anaweza kuitwa kiumbe mwenye uhuru wa kuchagua, na kwa nini kwa njia ya pekee hivyo?

³ Uwezo wa mwanadamu kuchagua kati ya mema na mabaya, kati ya kumtumikia Mungu wa kweli Yehova au kujitumikia na kutumikia miungu ya uongo, unaonyesha kwamba yeye ni kiumbe kilicho na uhuru wa kuchagua, kilichoumbwa katika mfano na sura ya Yehova Mungu. (Mwa. 1:27) Wanyama hawana uwezo huo. Unaweza kumfundisha mbwa asichukue kitu, lakini huwezi kumpa sababu kwa nini ni vibaya kuiba. Kwa kusikitisha, muda wa miaka kama elfu sita, wanadamu wametumia vibaya uhuru wao wa kuchagua mema na mabaya, ndiyo sababu ulimwengu umechafuka sana hivi.​—⁠Linganisha Kumbu-kumbu la Torati 32:5.

 4. (a) Ni nani aliyekuwa wa kwanza kutumia vibaya uhuru huo, na kwa sababu gani alifanya hivyo? (b) Ni nani kati ya hao waliofuata mfano wake?

⁴ Aliyekuwa. wa kwanza kutumia vibaya uwezo huu na uhuru wa kuchagua alikuwa yeye aliyegeuka akawa Shetani Ibilisi. Yeye alichagua kufuata tamaa ya kichoyo; na hilo likaitokeza dhambi ya uasi, ambayo mwishowe itamwongoza kwenye kuharibiwa na kuangamizwa kabisa. (Yo-hana 8:44; Yak. 1:​14, 15) Adamu na Hawa, watu wa siku za Nuhu kabla ya gharika, malaika ambao hawakushika cheo chao Cha kwanza, Nimrodi na kundi kubwa baada ya Gharika, wakaaji wa Sodoma na Gomora na wingi wa wengine katika karne zote mpaka wakati wetu huu​—⁠hao wote wamechagua kufuata mfano wa Shetani Ibilisi kwa kufanya uchaguzi wa kichoyo, wenye makosa na ulio mbaya.

WALE WALIOCHAGUA VIZURI

 5. Ni nani kati ya wale waliochagua vizuri?

⁵ Kwa upande mwingine, alikuwako Habili aliyechagua kumtumikia Yehova Mungu, na aliyefanya hivyo kwa hasara ya uhai wake. Baada yake akaja Henoko, Nuhu na wazee wa ukoo, yaani, Ibrahimu, Isaka na Yakobo. Kutokana na maneno ya mtume Paulo katika Waebrania 11:13-16, tunaweza kuona kwamba wazee hao wa ukoo walifanya uchaguzi mzuri. Kisha akafuata Musa. Akiwa amelelewa katika nyumba ya kifalme ya Farao, akipewa elimu katika hekima yote na akili ya Misri, akiwa mwanamume mwenye sifa, uwezo na utajiri, alipatwa na uhitaji wa kuchagua akiwa na umri wa miaka 40. Alifanya uchaguzi wa namna gani? Yeye alichagua “kupata mateso pamoja na watu wa Mungu kuliko kujifurahisha katika dhambi kwa kitambo; akihesabu ya kuwa kushutumiwa kwake Kristo ni utajiri mkuu kuliko hazina za Misri.” (Ebr. 11:​25, 26; Matendo 7:​20-29) Je! kama ni wewe, ungalifanya vivyo hivyo?

 6. Ni uchaguzi gani ambao (a) Musa, (b) Yoshua, aliwatolea watu?

⁶ Karibu na mwisho wa kazi yake ya miaka mingi akiwa nabii wa Yehova na kiongozi wa watu Wake, Musa aliweka shauri hilo la kuchagua mbele ya watu wa Yehova hivi: “Nazishuhudia mbingu na nchi juu yenu hivi leo, kuwa nimekuwekea mbele yako uzima na mauti, baraka na laana; basi chagua uzima, ili uwe hai, wewe na uzao wako; kumpenda [Yehova], Mungu wako, kuitii sauti yake, na kushikamana naye.” (Kum. 30:​19, 20) Yoshua aliyemfuata Musa, aliweka uchaguzi kama huo mbele ya watu wa Israeli wakati alipokuwa akikaribia kumaliza kazi yake ya miaka mingi. Yeye mwenyewe alifanya uchaguzi mzuri, kama alivyochagua nabii Eliya muda wa karne zilizofuata.​—⁠Yos. 24:15; 1 Fal. 19:10.

 7. (a) Yesu alifanya uchaguzi gani aliposhawishwa na Ibilisi? (b) Ni uchaguzi gani waliofanya wanafunzi wake?

⁷ Ilimpasa mwanadamu Yesu Kristo achague wakati Shetani Ibilisi alipomtolea falme zote za ulimwengu kama malipo ya tendo moja la ibada. Yesu alichagua vizuri. (Mt. 4:10) Vivyo hivyo, wanafunzi wa kwanza wa Yesu walifanya uchaguzi mzuri; walimkubali kuwa Masihi, Mwana wa Mungu, wakamkubali kuwa Kiongozi na Mfalme wao. (Yohana 1:49) Sauli wa Tarso alifanya vivyo hivyo. Alipokuwa akielekea Dameski akawatese Wakristo, kwa mwujiza Yesu Kristo alimtokea. Sauli aliuliza hivi, “Nifanye nini, Bwana?” Alipopata jibu, alichagua kukubali na kufuata agizo alilopewa, akawa Mkristo aliyebatizwa.​—⁠Matendo 22:10.

 8. (a) Kazi ya kuhubiri “habari njema” za ufalme wa Mungu yawataka watu wafanye uchaguzi gani? (b) Sababu gani kuna haraka ya kufanya hivyo?

⁸ Leo, kama matokeo ya kuhubiriwa kwa hii “habari njema ya ufalme,” ni lazima wote wanaosikia wachague. Ni kuchagua gani? Ni kuchagua kama unataka kufuata mwendo wa haki na kumtumikia Yehova Mungu, Muumba wa ulimwengu wote, vilevile Mwendelezaji wa huo na Mwenye Enzi Kuu, au kama unataka kuendelea na mwendo wa choyo chini ya utawala wa Shetani Ibilisi, “mungu wa ulimwengu huu.” Nafasi hii ya kuchagua haitaendelea milele, maana twaishi katika ‘mwisho wa taratibu hii ya mambo,’ katika ‘nyakati za hatari za siku za mwisho,’ kama utimizo wa unabii wa Biblia unavyoonyesha waziwazi. Ndiyo, sisi sote tumo. Upo uchaguzi wa kufanya, nasi hatuwezi kuuepuka.​—⁠Mt. 24:14; 2 Kor. 4:​4, Habari Njema kwa Watu Wote; Mt. 13:​39, NW; 2 Tim. 3:1.

SABABU GANI KUCHAGUA KUFANYA KAZI PAMOJA NA YEHOVA MUNGU?

 9, 10. Kutii kuhubiriwa kwa “habari njema” kunamfanya mtu achukue hatua gani?

⁹ Kwa kuzitii “habari njema” za ufalme wa Mungu zinazohubiriwa, mtu anapata maarifa sahihi ya Neno la Mungu na msaada wa kulitumia maishani mwake. Halafu, hilo laweza kutokeza toba ya mwendo mbaya wo wote ambao mtu anachukua, ikifuatana na kugeuka ili kufuata mwendo unaompendeza Yehova Mungu. Kama mtume Petro alivyowaambia Wayahudi wa siku zake: “Kwa hiyo, tubuni, na kugeuka ili mfutishe dhambi zenu.”​—⁠Matendo 3:19, NW.

¹⁰ Kuchukua hatua hizo mbili bila shaka kunaweza kumwongoza mtu achague kufanya mapenzi ya Mungu, kufanya kazi pamoja na Yeye na kuzifuata nyayo za Yesu Kristo. Uchaguzi huo unapaswa uwe hatua ya wazi na iliyo rasmi, hatua ambayo Yesu mwenyewe alichukua akiwa mwenye umri wa miaka 30, wakati ambapo alifananishwa katika unabii kuwa akisema: “Tazama, nimekuja (katika gombo la chuo nimeandikiwa) niyafanye mapenzi yako, Mungu.” (Ebr. 10:7; Zab. 40:​7, 8) Kufuata mfano wa Yesu katika jambo hilo kunamaanisha kujiweka wakf ili kufanya mapenzi ya Mungu na kuonyesha kujiweka wakf hivyo kwa kubatizwa katika maji. Kuchukua hatua hiyo ndilo jambo la hekima, jambo linalofaa na la upendo kufanya kweli kweli.

 11-13. Sababu gani kuchukua hatua za kujiweka wakf na kubatizwa (a) ni jambo la hekima kweli kweli? (b) ni jambo linalofaa na la haki kweli kweli? (c) ni jambo la upendo na ushuhuda wa kuonyesha shukrani kweli kweli?

¹¹ Ndilo jambo la hekima kufanya kweli kweli? Ndiyo, Yehova Mungu anajua jambo la kutufaa sisi. Neno lake laonyesha sana upumbavu wa kufuatia mwendo wa choyo, usio wa haki. Ndiyo sababu tunasoma kwamba “mazoezi ya mwili yana faida yake, lakini mazoezi ya kiroho yana faida za kila namna, maana yanatuahidia uzima katika maisha ya sasa, na pia hayo yanayokuja.” (1 Tim. 4:​8, Habari Njema kwa Watu Wote) Kama alivyosema Yehova kupitia kwa nabii wake wa kale: “Mimi ni [Yehova], Mungu wako, nikufundishaye ili upate faida.” (Isa. 48:17) Ili tusaidiwe tupate faida, tunayo “maandiko matakatifu,” Maandiko yaliyoongozwa kwa roho ya Mungu. (2 Tim. 3:​15-17) Yanatukumbusha kwamba “cho chote apandacho mtu ndicho atakachovuna.” (Gal. 6:7) Ndiyo, “baraka ya [Yehova] hutajirisha, wala hachanganyi huzuni nayo.” (Mit. 10:22) Basi, kuchagua kufanya kazi pamoja na Yehova Mungu ni mwendo wa hekima kweli kweli.

¹² Vilevile, kuchagua kwetu tujiweke wakf ili tufanye mapenzi ya Yehova ni jambo la haki na linalofaa kufanya. Kwa kweli, sisi tuna deni kwa Mungu ya kufanya mapenzi yake. Kwa sababu gani? Kwa sababu Yehova Mungu ndiye mwenye dunia hii na vitu vyote na viumbe vilivyo ndani yake, kwa vile ndiye aliyeviumba vyote. Yeye hakutuumba sisi tufurahie tu anasa zetu wenyewe, bali vilevile tutimize kusudi lake, tufanye mapenzi yake. Kwanza, yeye hakuumba vitu vyote tu, bali anaendeleza vilevile vitu vyote, akitoa mwangaza wa jua na mvua. Ndiyo sababu tunasoma hivi: “Umestahili wewe, [Yehova] wetu na Mungu wetu, kuupokea utukufu na heshima na uweza; kwa kuwa wewe ndiwe uliyeviumba vitu vyote, na kwa sababu ya mapenzi yako vilikuwako, navyo vikaumbwa.”​—⁠Ufu. 4:11.

¹³ Tena, kujiweka wakf wenyewe ili tufanye mapenzi ya Yehova na kubatizwa ili tuonyeshe kujiweka kwetu wakf, ni jambo la upendo na la kuonyesha shukrani kulifanya. Tunapoufikiria upendo wote ambao Yehova Mungu ameonyesha wanadamu ili uwepo uhai na kuufurahia (Matendo 14:17), tunapoufikiria uvumilivu wake katika kutenda kwake na wanadamu kwa muda wa miaka 6,000 (2 Pet. 3:​8, 9), na tunapofikiria jinsi anavyotupenda sana hata kutupa Mwana wake mzaliwa pekee awe Mwokozi wetu na Mkombozi wetu (Yoha-na 3:16)​—⁠inatupasa tukate shauri gani? Jambo dogo sana tunaloweza kufanya ili kujiheshimu kwetu kuendelee ni kujiweka wakf kwa Baba yetu wa mbinguni mwenye upendo, tufanye mapenzi yake, kisha tuonyeshe kwamba tumejiweka wakf hivyo kwa kubatizwa katika maji.

WAKF NA UBATIZO Nl MAMBO YA LAZIMA

14, 15. (a) Huenda wengine wakatokeza maulizo gani juu ya uhitaji wa kujiweka wakf na kubatizwa? (b) Ni mfano gani wa Maandiko unaoonyesha uhitaji wa kujiweka wenyewe wakf kwa njia rasmi ili tufanye mapenzi ya Mungu?

¹⁴ Lakini, hatuwezi kumpendeza Yehova Mungu na kupata zawadi ya uzima wa milele kwa kuishi kwa usafi tu? Tukimwamini Mungu na Yesu Kristo tu? kushirikiana na watu wa Mungu tu? kuwaambia wengine “habari njema” tu? pasipo kujiweka wakf kwa njia rasmi ili tufanye mapenzi ya Mungu na kubatizwa? Inaonekana kwamba kuna watu fulani wanaodhani hivyo, kwa sababu, wajapoyafanya mambo mengine hayo, wanakosa kujiweka wakf na kubatizwa. Lakini hao wanakosea katika jambo hilo.

¹⁵ Ili Yehova Mungu atupe zawadi, inatupasa tumwamini na kumpenda kwa kadiri ya kujiweka wakf tufanye mapenzi yake na kuzifuata nyayo za Yesu Kristo. Kwa mfano: Katika Mlima Sinai, Yehova Mungu aliweka mbele ya taifa la Israeli sheria zake na zawadi ambazo wangepata kutokana na kuzitii amri zake. Waisraeli hao walikubali kwa njia rasmi kufanya mapenzi ya Mungu ili wapate kupokea uongozi, ulinzi na baraka za Mungu. Vivyo hivyo, watumishi wake leo wanapaswa wajitwike wajibu ulio kama huo. (Kut. 19:​3-8) Inawapasa watii amri ya Yesu kwamba wale ambao wangetii amri zake wanapaswa waanze kwa kubalizwa.​—⁠Mt. 28:​19, 20.

16, 17. (a) Onyesha mfano wa jinsi wale wanaotaka kumtumikia Mungu pasipo kubatizwa wanavyojipinga wenyewe. (b) Maneno ya Warumi 10:​9, 10 yanaweza kuhusuje jambo hilo? (c) Kukosa unyofu wa wengine wanaokawia kubatizwa kunaweza kuonyeshwaje?

¹⁶ Labda tuonyeshe jambo hilo kwa mfa-no huu: Mwanamume mmoja anayetembea njiani huko mashambani anaona watu wengi wakisaidia kuvuna mazao. Anaona lazima ya kujiunga nao, na hivyo anaanza kuwasaidia mpaka mazao yote yanapovunwa. Walakini, wakati ufikapo wa wafanya kazi kupokea mshahara wao, je! anastahili kutazamia kulipwa mshahara wo wote? Hapana, kwa sababu yeye hakuandikwa kazi. Yeye hakufanya mkataba (hakupatana) na bwana wa mavuno ili alipwe mshahara. Yeye hakuwa katika mpango wa kawaida wa kumlipa mfanya kazi mshahara. Hali hiyo inafanana na ile ya wale wanaokuwa watumishi wa Mungu. Ndiyo sababu Warumi 10:​9, 10 halihusu kukiri ko kote tu, bali kunahusu sana sana tangazo rasmi la waziwazi linalotolewa wakati mtu ambaye amejiweka wakf afanye mapenzi ya Mungu, anapobatizwa. “Kwa sababu, ukimkiri Yesu kwa kinywa chako ya kuwa ni Bwana, na kuamini moyoni mwako ya kuwa Mungu alimfufua katika wafu, utaokoka. Kwa maana kwa moyo mtu huamini hata kupata haki, na kwa kinywa hukiri hata kupata wokovu.” Kukiri huko kunapasha wote habari kwamba mtu amechagua kufanya kazi pamoja na Yehova Mungu. Ndiyo, hatuwezi kumtazamia Mungu kutupa zawadi ya uzima wa milele ikiwa hatukufanya mapatano ya kumfanyia kazi.

¹⁷ Au, tutumie mfano mwingine: Mvulana anazidi kumtembelea msichana. Anaonyesha kwamba anampenda sana sana. Sikuzote anampeleka msichana huyo kwenye hoteli wakale chakula huko, anampeleka kwenye sinema na michezo, anamnunulia zawadi nyingi. Wengine wanaanza kufikiri kwamba anafanya mapenzi ya uchumba, kumbe yeye hataki hata kuzungumza habari ya ndoa. Je! mvulana huyo anaweza kusema anampenda msichana huyo? Yeye msichana anafikiria tu kuolewa. Lakini yeye mvulana hataki apoteze uhuru wake, hataki ajifunge kiapo na msichana huyo. Basi madai yake yote ya kwamba anampenda msichana ni ya bure tu, ni ya unafiki (udanganyifu). Hivyo ndivyo alivyo mtu ye yote anayejidai kwamba anampenda Yehova Mungu na ya kwamba anathamini yote ambayo Mungu amemfanyia. Muda fulani ukipita naye hajiweki wakf afanye mapenzi ya Mungu, afuate nyayo za Yesu, madai yake ni ya bure, yanaonyesha hana upendo, hamtumaini wala kumwamini Yehova Mungu, na huenda akawa mnafiki kweli.

18. Andiko la 1 Petro 3:21 laonyesha nini juu ya uhitaji wa mtu kubatizwa?

¹⁸ Zaidi ya hayo, ubatizo ni wa lazima ili tupate dhamiri njema kwa Mungu. Mtume Petro anaonyesha jambo hilo wazi-wazi katika 1 Petro 3:​21, NW: “Lile linalolingana na hili [yaani, ile gharika ya siku za Nuhu] pia linaokoa ninyi sasa, yaani, ubatizo, (si kuondolewa [tu] kwa uchafu wa mwili [ijapo hilo ni la maana], bali ombi linalofanywa kwa Mungu ili kupata dhamiri njema,) kupitia kwa ufufuo wa Yesu Kristo.”

19. (a) Mfano wa ubatizo unafaa namna gani? (b) Unatimiza mambo gani yanayofaa?

¹⁹ Ubatizo ni mfano unaofaa sana kuonyesha kwamba tumechagua kufanya kazi pamoja na Yehova Mungu kwa kujiweka wakf tufanye mapenzi yake tukiwa wafuasi wa nyayo za Yesu Kristo. Kwa kuingia ndani ya maji, tukifunikwa nayo, inakuwa kana kwamba tunazikwa. Tunakufa kwa habari ya mwendo wetu wa zamani; kunaonyesha kufa kwa mwendo wetu wenye choyo, yaani, kuchagua kwetu kufanya kama SISI tunavyotaka. Kuinuliwa katika maji kunafananisha kufufuliwa ili tufanye mapenzi ya Mungu, ili tupate kutembea ‘katika upya wa uzima.’ Vilevile ubatizo wa maji unaweza kusemwa kuwa una sehemu inayofaa sana, kwa vile huenda mtu akasahau vyepesi kwamba alikubali kufanya mapenzi ya Mungu, au hata kusahau kwamba siku moja alitia sahihi penye karatasi ili kuhakikisha hivyo. Maana ni mambo mengi sana tunayosahau kwamba tumeyasema au hata tumeyaandika! Lakini, je! mtu anaweza kusahau kwamba siku moja, akiisha kusikia hotuba ya ubatizo na kushiriki sala, alibadili mavazi yake akavaa mavazi ya kuogea, akabatizwa mbele ya mashahidi wengi? Hata kidogo! Mtu akiisha kuchukua hatua hiyo, ana wajibu wa kuitimiza kwa kuwa mfanya kazi pamoja na Yehova Mungu. Yanayohusika na hilo yatazungumzwa katika makala inayofuata.