Siri Ambayo Wafilipi Walijifunza
NI NANI asiyefurahi kujifunza siri? Hakika wewe umesisimuliwa ulipopelekwa kando na mtu fulani akakwambia siri faraghani, labda tukio fulani lenye kufurahisha ambalo mtu huyo anaamini hutalitoa nje kabla yeye hajatangazia watu wale wengine.
Namna nyingine ya siri ni kuwa na maarifa ya kujua jambo, au ufahamu, ambao wengine hawana. Namna hiyo ya siri ilikuwa ya maana kwa kikundi fulani cha Wakristo katika karne ya kwanza, yaani, lile kundi la mji wa Filipi uliokuwa katika Makedonia. Ili tufahamu siri hiyo ya pekee ilikuwa nini, na kuona namna tunavyoweza kufaidika kutokana nayo, acheni tupate habari fulani za msingi juu ya barua waliyoandikiwa Wafilipi, ambayo sasa ni sehemu ya Biblia.
Paulo—Kwa Wafilipi
Misionari Paulo alikuwa gerezani katika Roma karibu na miaka ya 59-61 W.K. Wakati huo aliweza kuyafikiria mambo mengi aliyokuwa amefurahia katika safari zake. Angeweza kuwakumbuka ndugu wengi waaminifu aliokuwa amekutana nao na makundi aliyokuwa amekuwa na pendeleo la kuyaanzisha katika njia ya ile kweli na kuyaona yakikua. Hangeweza kamwe kulisahau kundi la Filipi. Yeye alilipenda sana moyoni kwa sababu ya mambo yalo yasiyoonekana kwa ukawaida.
Karibu na mwaka wa 50 W.K., wakati wa safari ya pili ya Paulo ya umisionari ndipo roho ya Mungu ilipomzuia yeye (na Sila) wasihubiri katika wilaya ya Asia, Misia na Bithinia. Kwa hiyo Paulo akaenda Troa, ambako alipata njozi usiku mmoja. “Alimwona mtu wa Makedonia amesimama, akimsihi, na kumwambia, Vuka, uje Makedonia utusaidie.” (Matendo 16:9) Bila kukawia Paulo na wenzake wakaondoka wakiwa katika mashua kuelekea Samothrake wakasonga mbele mpaka kwenye bandari ya Neapoli. Halafu wakasafiri katika nchi kavu mpaka Filipi.
Labda walishangaa kwa kukuta Wayahudi wachache tu katika mji huo na inaelekea hawakukuta sinagogi hata moja. Badala ya Paulo na Sila kwenda kwenye sinagogi siku ya Sabato kama ilivyokuwa desturi yao, walikwenda nje ya lango kando ya mto wakaanza kusema na wanawake waliokusanyika huko. (Matendo 16:13) Unaweza kupata habari zaidi juu ya ziara hiyo ya kuzuru Filipi iliyokuwa na matukio mengi kwa kusoma Matendo 16:11-40. Kwa sababu ya Paulo kutoa ushahidi, kundi lilianzwa katika Ulaya, na baadaye angelitembelea tena kundi hilo katika Filipi, labda hata mara mbili.—Matendo 20:1, 2, 6; Wafilipi 2:24.
Alipokuwa amefungwa katika Roma, Paulo angeweza kuwafikiria wale Wakristo wazuri aliokuwa ameshirikiana nao katika Filipi. Lidia alikuwa ameonyesha ukaribishaji usio wa kawaida. Euodia na Sintike walikuwa wamefanya kazi na Paulo bega kwa bega katika kuzieneza “habari njema.” Wala Paulo hangeweza kumsahau yule mlinzi wa gereza na watu wa nyumba yake, na vilevile mwujiza uliohusika katika kukubali kwao Ukristo.
Wakati Paulo alipofikiria upendo, fadhili na hangaikio aliloonyeshwa na Wafilipi, bila shaka alistahili kuwaandikia barua. (Wafilipi 1:3, 12, NW) Hiyo inafunua wazi upendo aliokuwa nao kwao na yale “matunda ya haki” waliyoonyesha.—Wafilipi 1:11.
Siri Hiyo Ni Nini?
Katika barua yake Paulo alisema habari za siri ambayo yeye binafsi alikuwa amejifunza, na ushuhuda unaonyesha kwamba Wafilipi walikuwa wamejifunza siri hiyo kwake. Ni siri iliyokuwa imemsaidia Paulo aweze kushinda majaribu mbalimbali muda wa miaka mingi. Aliandika hivi: “Katika hali yo yote, na katika mambo yo yote, nimefundishwa [siri ya, NW] kushiba na kuona njaa, kuwa na vingi na kupungukiwa. Nayaweza mambo yote katika yeye anitiaye nguvu.” (Wafilipi 4:12, 13) Kwa hiyo ilikuwa siri ya kuishi maisha ya Kikristo, hata kama hali za mtu zilikuwa za namna gani, muda wote huo akimtegemea Yehova.
Wafilipi walikuwa wamejifunza siri hiyo, nayo iliwaletea matokeo ya namna nyingi. Kwanza, kundi lenyewe lilikuwa na juhudi nyingi sana katika kuhubiri. Paulo aliandika hivi: “Ninyi mnang’aa kama vimulikaji katika ulimwengu.” (Wafilipi 2:15, NW) Wao walizikubali habari njema kwa furaha kuu kisha wakaendelea kuzisogeza mbele habari njema hizo. Paulo aliweza kuwataja kuwa “washiriki pamoja na mimi . . . katika kuzitetea na kuzithibitisha kisheria zile habari njema.”—Wafilipi 1:7, NW.
Paulo alipoiandika barua hii alijua kwamba wao wangependa kujua mambo yaliyokuwa yakimpata huko gerezani. Yeye alieleza kwamba, ingawa alikuwa gerezani, mambo yake ‘yaligeuka kuwa ya kuziendeleza habari njema badala ya kuwa vingine hivi kwamba vifungo vyangu vimekuwa jambo la kujulikana hadharani katika ushirika pamoja na Kristo kati ya Walinzi wa Praetoria wote.’ (Wafilipi 1:12, NW) Alieleza pia kwamba Wakristo Waroma walio wengi walikuwa wakionyesha ushujaa mwingi zaidi kunena neno la Mungu bila woga kwa sababu ya vifungo vyake gerezani. Bila shaka Wafilipi walitiwa moyo kujua kwamba ingawa Paulo alikuwa gerezani, yeye alikuwa akiendelea kufanya juhudi kwa ajili ya kazi ya kuhubiri Ufalme sawasawa na wao.—Wafilipi 1:14.
Jambo jingine ambalo labda lilihusiana na siri inayotajwa katika Wafilipi 4:12 13 (NW) ni kuwa kwao na nia ya akilini inayofaa. Nia yao haikuwa kujipendeza wenyewe, bali kusaidia wengine. Kwa kweli, wao walikuwa wamemsaidia sana Paulo. Alipokuwa katika Thesalonike, wao walimpelekea mara mbili usaidizi wa kimwili. Hilo ndilo kundi la pekee lililofanya hivyo. (Wafilipi 4:15, 16) Baadaye, wakati mateso yalipofanya kundi la Yerusalemu liwe na magumu na kuhitaji usaidizi, ingawa Wafilipi walikuwa ni maskini wao wenyewe, walitoa michango kwa moyo wa kupenda. Paulo aliandika kwamba utoaji huo ulikuwa “zaidi ya uwezo wao.” (2 Wakorintho 8:3) Halafu tena baadaye, wakati Paulo alipofungwa gerezani Roma, wao walimtumia Epafrodito kumpelekea vitu vya kimwili.
Ndiyo, Wafilipi walikuwa na hangaikio lenye upendo kwa Wakristo wenzao. Walitenda kama walivyohimizwa na Paulo kuangalia si “mambo [yao wenyewe], bali kila mtu aangalie mambo ya wengine.” Huo ulikuwa wonyesho wa roho yenye kuburudisha kama nini! Ulionyesha kwamba Wafilipi walikuwa na nia ya akili ya unyenyekevu, sawa na vile Yesu alivyokuwa nayo, nao hawakuwa watu wa kulaumu-laumu wengine.—Wafilipi 2:1-5, 14.
Sisi Tunaweza Kujifunza Siri Yao na Kuifuata
Kwa kuwa sisi tunaishi siku nyingi sana baada ya wakati huo uliopita, hatuko katika hali ya kuweza kushirikiana na mtume Paulo kwa njia ya moja kwa moja. Basi, inatupasa tushukuru sana kwamba Yehova Mungu alihifadhi katika Neno lake ile barua waliyoandikiwa Wafilipi kwa uongozi Wake! Hivyo sisi tunaweza kujitahidi kujifunza na kufuata mashauri mazuri sana yaliyomo, kutia na ile siri ambayo Paulo alijifunza na akawaeleza waishiriki pamoja naye.
Kwa Wafilipi siri hiyo ilihusu maarifa, nia na mwenendo. Paulo aliwatia moyo ‘mwenendo wao uwe kama inavyoipasa Injili ya Kristo.’ (Wafilipi 1:27) Kwa kuendelea kufuata onyo la upole la Paulo, ‘wangepata kuwa wana wa Mungu wasio na lawama, wala udanganyifu, wasio na ila kati ya kizazi chenye ukaidi, kilichopotoka.’ (Wafilipi 2:15) Bila shaka, ili wadumishe huo mwenendo safi wangetakwa wawe na uangalifu hata katika njia yao ya kufikiri. Kwa uhakika hapo pana somo kwetu pia. Ingefaa tufanye vile wengine wengi wamefanya, wale wanaotafuta kuifuata “siri” hiyo, yaani, tuyashike kwa moyo na kuyafikiria kwa ukawaida mambo ambayo Paulo aliandika katika Wafilipi 4:8 juu ya njia yetu ya kufikiri. Je! wewe unaweza kukitaja kifungu hicho kwa moyo, bila kukitazama?
Siri ya kumtegemea Mungu na kumtumikia kwa furaha hata kama una vitu vingi au vichache vya kimwili inaweza kuleta maisha yenye kuridhisha sana. Katika habari ya Paulo, fikiria uradhi ambao aliweza kuwa nao kwa kufikiria matunda ya kazi zake ngumu zilizodhihirika katika kundi la Filipi. Yeye alikuwa ameliona kundi likikua katika kuipenda ile kweli ya Kikristo na katika juhudi ya kuzieneza habari njema. Pia aliuona upendo wao ukiwa katika matendo kuelekea Wakristo wenzao. Aliweza kupata uradhi mwingi kwa kuona kwamba hata wao walikuwa wamejifunza ile siri ya kumtegemea Mungu kabisa katika yote waliyofanya na kumtumikia kwa vitu vyote walivyokuwa navyo.
Leo kila Mkristo angefaa kujiuliza kama yeye binafsi amejifunza ile siri ya maana ambayo Paulo aliitaja katika Wafilipi 4:12, 13 (NW). Ushuhuda mmoja wa kuonyesha tumejifunza ni kuwa kwetu na baraka ya Yehova, kuwa ‘tumejazwa matunda ya haki.’ (Wafilipi 1:9-11; 4:17) Pia, ikiwa sisi tumejifunza siri hiyo iliyo ya maana kabisa na tunaendelea kuidhihirisha, watu wanaotuzunguka watasaidiwa wajifunze siri hiyo hata wao. Tutakuwa tukiwekea wengine mfano mwema, sawa na alivyofanya Paulo, hivi kwamba angeweza kuwatolea Wafilipi mauidha haya: “Ndugu zangu, mnifuate mimi, mkawatazame wao waendao kwa kuufuata mfano tuliowapa ninyi.” (Wafilipi 3:17; linganisha mistari 13, 14.) Basi, siri hiyo ina ubora mkubwa zaidi sana kwetu sisi na kwa wengine; nayo itatusaidia kuupata uzima wa milele.