Neno la Mungu Li Hai

Mradi Wako Maishani Ni Nini?

WEWE unataka kupata nini maishani? Elimu ya kilimwengu? cheo kikubwa ulimwenguni? fedha? sifa? usalama? Hiyo ni miradi ya watu wengi. Lakini je! kuifikia kutakupa kweli yale unayotaka maishani?

Kusaidia kujibu maulizo hayo, fikiria maisha ya Musa, kama inavyoonyeshwa katika picha hizi. Yeye alilelewa kama “mwana wa binti Farao”​—mtawala wa ulimwengu. Kwa hiyo, akiwa sehemu ya jamaa ya kifalme ya Farao, Musa alikuwa na nafasi kamili ya kushiriki “kujifurahisha katika dhambi kwa kitambo.” Pia, alikuwa na uwezo wa kutumia “hazina za Misri” wakati wo wote alipotaka.​—Waebrania 11:24-26.

Zaidi ya hilo, Biblia inasema, “Musa akafundishwa hekima yote ya Wamisri.” (Matendo 7:22) Basi, kwa sababu ya cheo chake chenye upendeleo, Musa alikuwa na kila kitu ambacho watu walio wengi leo wanatafuta. Lakini je! vitu hivyo vilimletea uradhi na furaha ya kweli?

Sivyo hasa. Ingawa alikuwa na kila kitu cha kimwili, Musa alijua vitu hivyo havikuwa vya thamani ya kudumu. Wewe unatambua uhakika huo wa maana? Ni kama vile Yesu Kristo mwenyewe alivyosema: “Atafaidiwa nini mtu akiupata ulimwengu wote, na kupata hasara ya [uhai wake]?” (Mathayo 16:26) Kila kitu ambacho huenda tukawa nacho ni cha bure tukipoteza uhai wetu. Je! sivyo ilivyo?

Basi, Biblia inasema hivi juu ya Musa: “Aliyatazamia [sana] hayo malipo.” Ndiyo, Musa alitegemea toleo la Mungu. Alitambua kwamba zawadi ya Mungu ya uzima wa milele ni yenye thamani kuliko kitu kinginecho chote. Kwa hiyo Musa “alistahimili kama amwonaye yeye asiyeonekana.” (Waebrania 11:26, 27) Yehova alikuwa halisi kwa Musa, na ndivyo zilivyokuwa ahadi Zake za uzima wa milele.

Hivyo ndivyo ilivyo kwako? Unaposoma juu ya ahadi za Mungu za kutoa uzima wa milele katika Paradiso ya kidunia, je! wewe unaziona ahadi hizo kuwa halisi? Je! unajiwazia kuwa sehemu ya Paradiso hiyo na kuwa ukifurahia baraka ambazo Mungu amewekea watu wake akibani? (Zaburi 37:9-11, 29; 46:8, 9; 72:7, 8, 16; Isaya 9:6, 7; 11:6-9; 35:5, 6; Luka 23:43; Ufunuo 21:3, 4) Ikiwa unafanya hivyo, utakuwa kama Musa na utaweka mradi wako mkubwa maishani uwe kumtumikia Yehova Mungu na kupata kibali yake.

[Picha katika ukurasa wa 3]

Mradi wa Musa maishani ulikuwa nini?

[Picha katika ukurasa wa 4]

Je! ni mradi wako maishani kufurahia kile ambacho Mungu anatolea watumishi wake?