“Iweni Safi”!

“Nendeni zenu, nendeni zenu, tokeni huko, msiguse kitu kichafu; tokeni kati yake; iweni safi ninyi mnaochukua vyombo vya [Yehova]”​—ISAYA 52:11.

 1, 2. (a) Ni mambo gani ya uhakika yanayoonyesha kwamba usafi unathaminiwa na watu walio wengi? (b) Kwa sababu gani usafi wa kimwili unahitajiwa kabisa?

“KUSEMA kweli, usafi ni wa pili kwa uchaji wa Mungu.” Ndivyo inavyosema mithali ya Kiingereza ya ulimwengu huu wa kale. Ndiyo, watu walio wengi wanathamini usafi wa kimwili. Ndiyo sababu masoko ya bidhaa bora na maduka ya dawa yanaonyesha sabuni za kuogea, sabuni za kusugulia uchafu na vitu vya kumaliza harufu mbaya. Na hiyo ndiyo sababu tuna sehemu za kufulia mavazi, huduma za kusafisha vitu na idara za kutunza usafi. Ebu tuseme umekwenda kwenye mkahawa ambao kitambaa cha mezani kina madoa, vyombo vya kulia ni vichafu na mwenye kukuhudumia amevaa vazi chafu-chafu. Je! si kweli kwamba ungepoteza hamu ya kula? Pasipo shaka ungeipoteza kwa sababu uchafu unachukiza.

² Lakini kusudi la kuwa safi si kuonekana ukiwa na sura nzuri tu. Uchafu ni chanzo kikubwa cha magonjwa mengi. Kulingana na watu fulani wanaohusika na mambo ya udaktari, ongezeko la urefu wa maisha ya mwanadamu wa kisasa limesababishwa hasa na maendeleo ya usafi. Zaidi ya hilo, wachunguzi wenye maarifa zaidi kuhusu hali za mazingira wanasema kwamba uchafu unaoingizwa katika hewa, maji na vitu kama hivyo unaelekea kwenye hatua ya kuangamiza jamii ya kibinadamu ikome kuwa hai.

Yehova na Tengenezo Lake, Takatifu na Safi

 3, 4. (a) Yehova Mungu ana maoni gani juu ya uchafu wa kiroho? (b) Akiwa ndiye yule Mungu mtakatifu, Yehova anataka nini kwa watu wake?

³ Ingawa usafi wa kimwili ni wa maana kwa watu walio wengi, usafi wa kiroho ni wa maana hata zaidi. Kwanza kabisa, uchafu wa kiroho unamwudhi Yehova Mungu. Unaonyesha madharau kwa fahari yake ya kutisha na ni uasi juu ya viwango vyake vya uadilifu. Basi, ni sawa na kukosa kuonyesha ushikamanifu kwa Utu wake. Uchafu wa kiroho, uwe ni wa kimafundisho au kiadili, unaleta mgawanyiko na ufisadi. Unaleta mvurugo na kutokeza kifo. Si ajabu basi kwamba Yehova anaupinga sana! Hiyo ndiyo sababu aliwaamuru hivi Waisraeli, watu wake wa kale: “Ninyi lazima mjithibitishe wenyewe kuwa watakatifu, kwa sababu mimi ni mtakatifu.” (Mambo ya Walawi 11:44, 45, NW) Hiyo, pia, ndiyo sababu iliyofanya Mungu akadai usafi wa kiroho kwa watu wake waliokombolewa, waliokuwa safarini kutoka Babuloni kuelekea Yerusalemu, wakichukua vyombo vya kutumiwa katika ibada yake. Katika maneno yenye maana ya unabii hata kwa Mashahidi wa Yehova wa leo, Mungu alitangaza hivi: “Nendeni zenu, nendeni zenu, tokeni huko, msiguse kitu kichafu; tokeni kati yake; iweni safi ninyi mnaochukua vyombo vya [Yehova].”​—Isaya 52:11.

⁴ Yehova Mungu anaamuru kwamba sisi tulio mashahidi wake tujiweke safi, yaani, watakatifu na weupe pe, waadilifu na wenye tabia zinazotakata. Je! kwani hivyo sivyo Yehova mwenyewe alivyo? Mara nyingi yeye anatajwa kuwa “Mtakatifu wa Israeli”! (Isaya 12:6; 29:19; 41:14; Yeremia 51:5) Tena, kwa kufaa tunasoma hivi kwenye Ufunuo 4:8: “Mtakatifu, mtakatifu, mtakatifu ni Yehova Mungu, yule Mweza Yote.” (NW)

 5. (a) Kwa habari ya utakatifu, Yesu Kristo yukoje, hata malaika waadilifu, kani ya utendaji ya Mungu na Neno lake? (b) Kwa hiyo, Yehova Mungu anaweka amri gani juu ya watumishi wake walio hapa duniani?

⁵ Zaidi ya hilo, je! Mwana wa Mungu, Yesu Kristo, haitwi “Mtakatifu wa Mungu”? (Yohana 6:69) Je! wahudumu wa kimbingu wa Mungu hawaitwi “malaika watakatifu”? (Marko 8:38) Je! kani ya utendaji ya Mungu haiitwi roho takatifu? Na je! Neno la Mungu kwa kufaa halitajwi kuwa ndilo “maandiko matakatifu”? (2 Timotheo 3:15) Basi, ni wazi kwamba ni lazima hata sisi Mashahidi wa Yehova tuwe safi na watakatifu, kama tunavyoamriwa kwenye 1 Petro 1:15, 16, NW: “Kulingana na Yule Mtakatifu aliyewaita ninyi, ninyi pia mwe watakatifu wenyewe katika mwenendo wenu wote, kwa sababu imeandikwa: ‘Lazima ninyi mwe watakatifu, kwa sababu mimi ni mtakatifu.’”

 6. (a) Wakristo wanafanywaje wawe safi kwanza kabisa? (b) Kwa sababu gani ni lazima watu wa Yehova wabaki wakiwa watakatifu na safi?

⁶ Kwa sababu ya toba yetu, kuongoka na kuwa na imani katika damu iliyomwagwa ya Yesu Kristo, tumefanywa safi machoni pa Mungu. (1 Wakorintho 6:11; Ufunuo 7:14) Ni lazima tujitunze, tuendelee kuwa na hali hiyo ikiwa tunataka kubaki katika upendeleo wa Mungu. (Zaburi 15:1, 2) Zaidi ya hilo, ni lazima tuendelee kuwa safi ili tuweze kuwavuta wote wenye kupenda kweli na uadilifu wanaotaabishwa na hali mbovu za uchafu wanazoziona duniani. (Ezekieli 9:4) Tena, ni lazima kabisa kabisa tuendelee kuwa watakatifu na safi ili tusikwaze ye yote wa waamini wenzetu. Ni kama vile mtume Paulo alivyowakumbusha Wakristo Wafilipi: “Na hii ndiyo dua yangu, kwamba pendo lenu lizidi kuwa jingi sana, katika hekima na ufahamu wote; mpate kuyakubali yaliyo mema; ili mpate kuwa na mioyo safi, bila kosa, mpaka siku ya Kristo.”​—Wafilipi 1:9, 10; linganisha Mathayo 18:6.

Wengine Wamenaswa Mtegoni

 7, 8. (a) Ni nini kinachoonyesha kwamba wengine hawakuthamini uhitaji wa kujiweka kuwa safi wakiwa watumishi wa Mungu? (b) Jambo hilo linakazia umaana wa onyo gani?

⁷ Inasikitisha kusema kwamba wengine waliokuwa washirika wetu wameshindwa kujiweka wenyewe safi na watakatifu wakiwa wachukuaji wa vyombo vya Yehova. Kwa hiyo, wameondoshwa katika kundi la Kikristo kwa sababu mbalimbali za Kimaandiko. Wengine wamekaripiwa kwa kushindwa kuishi kupatana na kanuni za Biblia. Kati ya wote hao imekuwako hesabu kubwa ya watoto wa wahudumu (maminista) walioagizwa rasmi, na vilevile waangalizi fulani na watumishi wa huduma.

⁸ Ni wazi kwamba kwa kadiri fulani wote hao walitumbukia ndani ya mtego wa Shetani. Kwa kujaribu kuchukua vyombo vya Yehova bila ya wao wenyewe kuwa safi kiroho walikuwa wakiipuza amri iliyo kwenye Isaya 52:11, na hawangeweza kuendelea na hali hiyo bila kupewa adhabu. (Linganisha Ayubu 9:1-4.) Loo, jambo hilo linaukaziaje umaana wa onyo linalopatikana kwenye 1 Wakorintho 10:12: “Anayejidhania kuwa amesimama na aangalie asianguke”!

Kwa Sababu Gani Kuna Tatizo Hilo?

 9. (a) Kubaki tukiwa safi kiroho kunatokeza mwito wa ushindani kwa sababu ya maadui gani watatu? (b) Kwa sababu gani Shetani na mashetani wake wanakuwa tisho kubwa sana kwa Wakristo?

⁹ Kwa sababu gani kujiweka safi kiroho kunatokeza mwito wa ushindani? Ni kwa sababu maadui watatu hodari kwa nguvu wamejipanga wapambane nasi​—Shetani na mashetani wake, tengenezo lake linaloonekana na udhaifu wetu mbalimbali wa mwili wenye dhambi. Kwanza, kuna Shetani na mashetani wake. Je! wao si wachafu, wafisadi? Ndiyo, hakika. Mashetani wanatajwa kuwa “pepo wachafu.”​—Mathayo 10:1.

10, 11. Ni nini kinachohusiana na tengenezo linaloonekana la Shetani kinachofanya iwe vigumu Wakristo kumtumikia Mungu kwa njia takatifu na safi?

¹⁰ Pili, tengenezo linaloonekana la Shetani ni adui yetu. Pasipo shaka, milki yake ya kidini ya ulimwengu wote ni chafu kiroho. Ndivyo ilivyo ile sehemu nyingine yote ya ulimwengu unaokaa katika uwezo wake. (1 Yohana 5:19; Ufunuo 16:13; 17:4; 18:2) Basi, ili ibada yetu ikubalike kwa Mungu ni lazima “kujilinda na dunia pasipo mawaa.”​—Yakobo 1:27.

¹¹ Kuna mambo mengi pia machafu yanayoonyeshwa katika magazeti ya kilimwengu, vipindi vya televisheni na sinema. Kwa mfano, mambo yanayoonyeshwa katika vipindi vingi vya televisheni yanazidi kuwa machafu kadiri wakati unavyozidi kupita. Miaka mingi iliyopita, ilikuwa ajabu kuona sinema chafu zikionyeshwa; leo zimekuwa kawaida tu. Magazeti ya umalaya yanazidi kuvuvumka kwa wingi kama uyoga. Kwa kweli, katika hizi “siku za mwisho” tunaelekeana na “nyakati za hatari zilizo ngumu kushughulika nazo.”​—2 Timotheo 3:1-5, NW.

12. Ili Wakristo wajiweke wakiwa watakatifu na safi, ni lazima wao washindane na adui gani aliye ndani yao wenyewe?

¹² Jambo jingine linalofanya iwe vigumu zaidi kubaki tukiwa safi ni maelekeo yetu wenyewe ya mwili wenye dhambi. (Mwanzo 8:21; Warumi 5:12) Basi, ni lazima sisi sote tung’ang’anie kufanya yaliyo haki na kubaki safi tukiwa wachukuaji wa vyombo vya Yehova. (Warumi 7:13-25) Lakini ni nini kitakachotusaidia tubaki watakatifu na safi?

Chukia Mabaya Yote!

13. Ni nini moja ya mambo ya kwanza ambayo lazima tujifunze kuyafanya ikiwa kweli tutaweza kujiweka tukiwa safi?

¹³ Kati ya mambo ya kwanza ambayo ni lazima tufanye ili tubaki watakatifu na safi tukiwa “wapenda Yehova” ni ‘kuchukia yaliyo mabaya.’ Ndiyo, tunahitaji ‘kuchukizwa kabisa na yaliyo maovu.’ (Zaburi 97:10; Warumi 12:9, NW) Ni lazima tujisikie kwamba mabaya yanachafua moyo wetu kiasi cha kutaka kututapisha, tuchukie sana machafu, hata kama ni yenye kufurahika sana kwa mwili wetu wenye dhambi. Tunahitaji pia kujiambia wenyewe kwamba maumizo yatatupata tusipojiweka safi. (Wagalatia 6:7, 8) Zaidi ya hilo, inatupasa tukumbuke maumizo yanayowapata wengine wakati sisi tunapotenda dhambi mbaya sana. Juu ya yote, tunahitaji kuchukia na kuepuka mabaya yote ili tusilete suto juu ya Yehova Mungu.

14. (a) Ili tujiweke tukiwa safi kiadili, ni lazima tujihadhari na nini? (b) Akina dada wana wajibu gani katika jambo hilo?

¹⁴ Ili tujiweke safi, ni lazima pia tujihadhari na mambo kama kufurahia mawazo ya ufisadi na kusemezana-semezana au kushikana-shikana na mwanamke au mwanamume asiye mwenzi wetu wa ndoa kwa njia ya mapenzi ya mchezo-mchezo tu. Kama vile Paulo alivyoshauri kwenye 1 Timotheo 5:1, 2, wanaume Wakristo wanapaswa kutendea dada zao wa kiroho wenye umri mkubwa kama akina mama na wanawake vijana kama dada zao wa kimwili kwa usafi wote wa tabia. Lakini katika yote hayo dada zetu pia wana daraka la kutimiza, yaani, “wajipambe kwa mavazi ya kujisitiri, pamoja na adabu nzuri, na moyo wa kiasi.” (1 Timotheo 2:9, 10) Wakati wanawake wanapojiangalia kwenye kioo, bila shaka wao wanajua kama sura yao ni ya kiasi au kama kujivika na kuonekana kwao kuna mapambo ya kupita kiasi yanayoweza kuamsha nyege za watu. Kiasi ndicho kinyume cha kutaka kuamsha nyege za watu kwa njia ya kilimwengu.​—Mika 6:8.

Uwe Unajua Uhitaji Wako wa Kiroho!

15. Ni hatua gani zenye mwelekeo unaofaa ambazo ni lazima tuchukue ili kujiweka tukiwa safi?

¹⁵ Lakini, kuchukia yaliyo mabaya ni njia inayoonyesha watu mwelekeo usiofaa tu, bila kutaja unaofaa. Basi ni lazima pia tuchukue hatua za kuelekea upande unaofaa. Nyakati zote ni lazima tuujue uhitaji wetu wa kiroho. (Mathayo 5:3, NW) Inahitaji sana kwamba “wapenda Yehova” wajilishe Neno lake kwa ukawaida! (Zaburi 119:105-112) Ni lazima tuthamini kwa moyo shauri lililo kwenye Wafilipi 4:8, tujaze akili zetu mambo safi, yenye kujenga. Msaada mkubwa ni kushika kwa kichwa maandiko na maneno ya nyimbo za Ufalme. Halafu maandiko na maneno hayo yatakuwa yakijiamsha yenyewe tu akilini wakati wa starehe, au usiku wakati usingizi unapokuwa umetupotea.​—Zaburi 63:6; 77:6.

16. Ushirika wa kuwa pamoja na ndugu zetu unaweza kuwaje msaada katika kujiweka kuwa watakatifu na safi?

¹⁶ Ikiwa tunaujua uhitaji wetu wa kiroho, tutahudhuria mikutano ya kundi kwa ukawaida, na huko tunaweza kuchocheana tuwe na upendo na kazi nzuri zilizo safi. (Waebrania 10:23-25) Sawa na vile washirika wabaya wanavyoweza kutuchafua, ndivyo mashirika mema yatakavyotusaidia tuendelee kuwa safi kiroho. Tunahitajiwa sana pia tuchunge ushirika wetu katika nyakati za starehe ili tuweze kuendelea kuwa safi kiroho.​—1 Wakorintho 15:33, NW.

17. Kwa sababu gani sala inaweza kutusaidia tubaki tukiwa safi?

¹⁷ Wala haitupasi kusahau msaada tunaopata kutokana na sala. Tunashauriwa ‘tudumu katika kusali,’ ‘tuombe bila kukoma.’ (Warumi 12:12; 1 Wathesalonike 5:17) Haitupasi kamwe kuwa wenye shughuli mno hata tusiwe na nafasi ya sala. Acheni tusali tupate hekima, nguvu na roho takatifu ya Mungu. Halafu, tukijitahidi kufanya kulingana na kile tulichotolea sala, tutafurahia “amani ya Mungu” itakayolinda mioyo yetu na nguvu za akili na kutuwezesha tubaki tukiwa washikamanifu na safi.​—Wafilipi 4:6, 7.

18. Kuendelea kuwa wenye kazi nyingi katika utumishi wa Yehova kutatusaidiaje?

¹⁸ Kuongea na wengine habari za Ufalme wa Mungu, kukaa katika utumishi wa Yehova tukiwa wenye kazi nyingi, ni msaada mwingine mkubwa katika kuendelea kuwa watakatifu na safi. Wengine wamehusika katika mwenendo mbaya walipokuwa wakistarehe, kwa mfano wakiwa katika likizo. Tuna mfano wa kutuonya sana wa Mfalme Daudi! Ilitukia kwamba, wakati wa masika ambao ndipo wafalme kwa ujumla walikuwa wakienda vitani, Daudi alibaki nyumbani, akajistarehesha tu! Hapo ndipo alipoingia matatani pamoja na Bath-sheba. (2 Samweli 11:1-4) Basi ni wazi kwamba lazima tujihadhari nyakati zote kama kweli tutaweza kuendelea kuwa wachukuaji safi wa vyombo vya Yehova.

19. Kwa sababu gani kujiweza ni jambo la maana sana katika kujiweka kuwa safi?

¹⁹ Kujiweza kunahitajiwa kabisa ikiwa tunataka Yehova Mungu aendelee kututumia tuchukue vyombo vyake. (Wagalatia 5:22, 23, NW; 1 Wakorintho 9:27) Ni lazima tuzitie akili zetu adabu na kulinda mioyo yetu, kukataa kila kishawishi, kuua maelekeo yo yote ya kutaka kufikiria-fikiria mambo machafu. Kama vile Yesu Kristo alivyosema, ni lazima tuwe na nia ya kung’oa jicho au kukata mkono au mguu, kwa usemi wa mfano, ikiwa vitu hivyo vinaelekea kutukwaza. (Marko 9:43-48) Mashauri mema kuhusiana na jambo hilo yametolewa na Paulo kwenye Waefeso 4:29–5:5.

20, 21. (a) Kumpenda Yehova Mungu kunaweza kutimiza sehemu gani katika kutusaidia tubaki tukiwa safi? (b) Ni kwa njia gani upendo kwa ndugu zetu na wengine unaweza kutusaidia tujiweke wenyewe tukiwa safi kiroho?

²⁰ Hasa kumpenda Yehova ndiko kutatusaidia tuendelee kuwa safi. Je! sisi ni “wapenda Yehova” kweli kweli? Je! sisi tunathamini mambo yote ambayo ametufanyia? Je! sisi tumekaza nia tutembee pamoja naye, kama walivyofanya wanaume waaminifu wa kale? (Mwanzo 5:24; 6:9) Ikiwa ndivyo, kuwa na upendo mshikamanifu kwa Yehova Mungu kutatusaidia tuendelee kuwa watakatifu na safi. Ndiyo, ikiwa tunampenda kikweli kwa moyo wetu wote, nafsi yote, akili na nguvu zote, tutaogopa kumkasirisha. Kwa hiyo, sisi “wapenda Yehova” tusirudi nyuma kamwe wala tusijiache tupakwe doa na ulimwengu au na maelekeo yetu wenyewe yenye dhambi.​—Marko 12:29, 30, NW; Waebrania 10:38, 39.

²¹ Wenye msaada mkubwa pia katika kujiweka safi na watakatifu ni upendo wa moyo mweupe usio na choyo kwa ndugu zetu. Ikiwa tunapendezwa kikweli na kuona wakiwa na masilahi ya kiroho, tutajiangalia tusiwaudhi wala kuwafanya wajisikie wamechafuliwa na maongezi machafu yetu wenyewe. Hatutawatazama kwa macho yenye kuwatamani kwa njia chafu wala hatutasemezana au kushikana nao kwa njia ya mapenzi ya mchezo-mchezo tu, wakiwa ni wanawake au ni wanaume. Tena hatutajitia katika mwenendo mchafu. Kumbuka kwamba upendo “haufurahii udhalimu.” (1 Wakorintho 13:4, 6) Kuwa na upendo usio na choyo kwa Mungu na jirani yetu kutatuepusha tusitende dhambi katika pande hizo. Kutatufanya tutumie kujiweza, ‘kuifanyia miguu yetu njia za kunyoka.’​—Waebrania 12:13.

Thawabu za Kujiweka Tukiwa Safi

22, 23. Ni nini nyingine za thawabu ambazo sisi binafsi tutapokea kwa sababu ya kukaa tukiwa safi?

²² Ni nini thawabu zetu za kujiweka tukiwa safi sisi wachukuaji wa vyombo vya Yehova? Kati yazo kuna “dhamiri njema” na “moyo safi.” (1 Timotheo 1:5) Amani ya akilini ni thawabu nyingine. Kwa kujiweka wenyewe tukiwa safi kiroho, hatutajisikia kamwe tukiwa na maumivu yanayoweza kuletwa na dhamiri mbaya​—huzuni, kukosa usingizi nyakati za usiku, kuwa na woga wa kujulikana kosa au wa kufunuliwa wazi. Ndiyo, tukijiweka wenyewe kuwa safi hatutakuwa kamwe wadanganyifu wanaojaribu kuficha jambo fulani. Kwa uhakika uhuru wa kutokuwa na mambo ya namna hiyo ni thawabu nzuri.

²³ Thawabu nyingine ya kujiweka tukiwa watakatifu na safi ni kwamba tutakuwa na uhusiano mwema pamoja na ndugu zetu, jamaa zetu wenyewe na watu wa nje. Dhamiri yetu haitakuwa na masumbufu ya kwamba tumekwaza mtu fulani. Zaidi ya hilo, kwa kujiweka tukiwa safi tutaweza kujengana kupitia upendo. (1 Wakorintho 8:1) Hivyo tutapata furaha iliyo kubwa zaidi ya kutoa, ya kuongezea masilahi ya kiroho ya wengine.​—Matendo 20:35.

24. Ni nini sababu iliyo kubwa na bora kupita zote ya kutaka kujiweka tukiwa safi sisi watu wa Yehova?

²⁴ Juu ya yote, kwa kujiweka tukiwa safi sisi tunaochukua vyombo vya Yehova tutaufurahisha moyo wa Baba yetu wa kimbingu na jambo hilo litamwezesha kumpa jibu Shetani mwenye kucheka kwa madharau. (Mithali 27:1) Kwa uhakika, kwa sababu ya mambo yote ambayo Yehova Mungu ametufanyia, tuna deni ya kufanya aweze kumjibu Shetani. Kwa hiyo sisi sote tulio mashahidi waaminifu wa Yehova, na tujiweke tukiwa safi, watakatifu, sisi wachukuaji wa vyombo vyake. Ili kumletea Mungu utukufu, heshima na sifa, na ili kujenga ndugu zetu na jamaa zetu, na kwa kusudi la kujipatia wokovu wa milele, acheni tujiweke tukiwa safi!—Kutoka w5/1/83.

Je! Wewe Unaweza Kukumbuka?

□ Kwa kuwa Yehova ni mtakatifu, yeye anataka nini kwa watu wake?

◻ Uhakika wa kwamba wengine hawakuendelea kuwa safi wakiwa watumishi wa Yehova unakazia umaana wa onyo gani lililotolewa na mtume Paulo?

◻ Ni maadui gani watatu wanaotutokezea mwito wa ushindani kutuzuia tusiendelee kuwa safi kiroho?

◻ Ili tuendelee kuwa safi kiroho, ni lazima tuchukue hatua gani zenye mwelekeo unaofaa?

◻ Kukaa tukiwa wenye kazi nyingi katika utumishi wa Yehova kunaweza kutusaidiaje tujiweke wenyewe kuwa safi?

◻ Ni nini sababu iliyo kubwa zaidi ya zote ya kujiweka tukiwa safi sisi Mashahidi wa Yehova?