Dumisha Imani Thabiti
“Mtasita-sita katikati ya mawazo mawili hata lini?”—1 WAFALME 18:21.
1. Wengine wanatendaje wanapousikia ukweli?
ELEKEO la kutia shaka, ambalo ni la kawaida sana leo, laweza kugeuza hata nia yako kumwelekea Mungu na Biblia. Watu wengine wanausikia ukweli,wanaupenda na kujifunza Biblia kwa muda fulani. Wanahudhuria mikutano michache ya Kikristo lakini hawaelewi kabisa uhakika wa kwamba kumtumikia Mungu kwapasa kuwa kusudi lao maishani.—Mathayo 13:3-9.
2. (a) Nao wengine wanatendaje? (b) Ni shauri gani zuri linalopatikana katika Waebrania 10:36-39?
2 Kuna wengine ambao wameukubali ukweli, wakaweka wakfu maisha zao kwa Yehova Mungu kupitia Yesu Kristo na wameonyesha wakfu huo kwa ubatizo wa maji. Lakini wanakosa kufanya maendeleo. Pindi kwa pindi wanatumia saa moja au mbili katika huduma ya shambani. Lakini hawaishi kweli kweli kupatana na wakfu wao, kwa maana kujiweka wakfu kabisa kwa Mungu kunamaanisha kujitoa kikamili na kwa bidii kwake.—Mathayo 16:24; Waebrania 10:36-39.
3. Eliya alisema nini juu ya hali iliyofanana na hiyo kidogo?
3 Watu mmoja mmoja wenye kusita huenda wakaupenda ukweli, lakini wanaupenda pia ulimwengu. Huenda wakawa wangali wanatamani baadhi ya njia za kale. Ushikamanifu wao ni hapa na hapa. Zamani za kale, Eliya aliuliza Waisraeli hivi: “Mtasita-sita katikati ya mawazo mawili hata lini? [Yehova] akiwa ndiye Mungu, mfuateni; bali ikiwa Baali ni Mungu, haya! mfuateni yeye.”—1 Wafalme 18:21.
4. Thamani ya utumishi wa bidii ni nini?
4 Watu wa Yehova wanapata furaha na burudiko katika utumishi wa bidii. (Tito 2:13, 14) Unawasaidia waendelee kuwa hai kiroho. Wengi, hasa wale walio na ujuzi wa muda mrefu katika utumishi wa Mungu, wanaonyesha bidii yenye kutokeza. Lakini ripoti kutoka sehemu nyingi zinadokeza kwamba wengine walio vijana au walio wapya wangali wanashawishwa na ulimwengu, badala ya kujiingiza kwa moyo wote katika utumishi wa Yehova. Ebu fikiria furaha na baraka ambazo wangekuwa nazo kama wangeshikilia ukweli kwa uthabiti na kusonga mbele kwa nguvu katika utumishi mtakatifu, pengine wakiwa mapainia wa wakati wote, na kukaza juu ya wengine uharaka wa nyakati zetu.
5. Ingeweza kuwa vizuri kujiuliza maulizo gani?
5 Huenda ikawa vizuri kujiuliza mwenyewe hivi: Je! kweli kweli mimi ni thabiti katika imani, au je, ninatazama pande zote mbili? Je! ninaruhusu mambo ambayo yanafurahisha lakini yenye thamani ndogo yamalize wakati wangu? Je! ninatumia wakati zaidi nikitazama televisheni, nikifuatia michezo au kufanya mambo mengine ya kustarehesha lakini yenye kumaliza wakati kuliko ule ninaotumia katika utumishi wa Mungu? Au je, kutii kwa unyenyekevu na kumtumikia Mungu ndilo kusudi halisi maishani mwangu? Ikiwa kufanya mapenzi ya kimungu ndilo kusudi lako maishani, Mungu atakutegemeza, na utaweza kufurahia baraka zake milele.
6. Ni shauri gani katika barua ya Yakobo linaloweza kutusaidia tudumishe imani thabiti?
6 Ni jambo la maana kuchukua hatua thabiti ili udumishe imani yako ikiwa thabiti ukitazamia uzima wa milele katika Utaratibu Mpya wa Mungu. Eliya aliwasihi wengine wategemeze yaliyo haki kwa ujasiri. Yakobo aliandika: “Basi mtiini Mungu. Mpingeni Shetani, naye atawakimbia. Mkaribieni Mungu, naye atawakaribia ninyi. Itakaseni mikono yenu, enyi wenye dhambi, na kuisafisha mioyo yenu, enyi wenye nia mbili.” Yakobo alikuwa akiandikia wale waliokuwa wenye uhitaji wa kutubu kwa sababu mioyo yao yenye nia mbili ilikuwa ikiwaongoza washiriki katika utendaji mbalimbali usiompendeza Mungu. Shauri lake laweza kuwa lenye kusaidia ikiwa umeshawishwa na njia za ulimwengu. Yakobo aliandika: “Huzunikeni na kuomboleza na kulia. Kucheka kwenu na kugeuzwe kuwa kuomboleza, na furaha yenu kuwa [kusikitika]. Jidhilini mbele za [Yehova], naye atawakuza.—Yakobo 4:7-10.
Maarifa Yanaijenga Imani
7. (a) Maarifa yanahusianaje na imani? (b) Kwa sababu gani unapaswa utumie Biblia kusitawisha imani?
7 Imani ni tendo la kutumaini. Msingi wake ni maarifa sahihi na mambo yaliyoonwa. Unavyojua zaidi juu ya Mungu na unapokuwa na ujuzi zaidi katika Neno lake na njia zake, ndivyo imani yako itakavyokuwa yenye nguvu. Biblia inasema: “Imani ni taraja lililohakikishwa la mambo yanayotumainiwa.” (Waebrania 11:1, NW) Imani yako ingewezaje kuhakikishwa ikiwa una maarifa machache tu ya mambo ambayo Yehova amefanya? Mungu alikupa wewe ubongo, akili na uwezo wa kufahamu. Hizo ni zawadi, naye anakutazamia uzitumie katika kujifunza juu yake. Ukimwandikia mtu fulani barua, unatazamia aisome, wala si aiweke juu ya rafu wala kuiweka juu ya meza kama kitu cha kupamba. Je! wewe umekwisha kusoma na kujifunza barua ambazo Mungu ametuandikia sisi—Neno lake lililoandikwa? Kwa kujifunza na kulielewa utajifunza mambo ambayo kama si hivyo hungeyajua. Ni jambo la hekima kukumbuka thamani ya habari ambayo Biblia inatoa. Mzee mmoja Mkristo alisema: “Watu wenye mashaka wakati mwingi hawajifunzi sana. Hawajui mengi juu ya Biblia—kwa kweli hawaufanyi kamwe ukweli uwe wenye kuwahusu.”
8. Ni jambo gani linalopendekezwa mtu akitokeza ulizo usiloweza kujibu?
8 Mtu anapotokeza ulizo usiloweza kujibu, je, hilo liwe lenye kuleta wasiwasi katika imani yako? Bila shaka hapana. Hakuna mtu anayejua kila jambo. Kwa hiyo, fanya uchunguzi. Chunguza andishi hilo. Soma mistari inayozunguka na kuhakikisha jambo hilo. Vitabu Comprehensive Concordance of the New World Translation of the Holy Scriptures, Aid to Bible Understanding na Watch Tower Publications Indexes vinaweza kukusadia uone maandishi yanayohusiana na hilo, habari zenye kueleza jambo hilo na mazungumzo yanayohusu habari hiyo. Wakristo waliokomaa zaidi wanaweza pia kusaidia. Shahidi mmoja mwenye ujuzi wa miaka mingi alisema: “Sijakosa kamwe kupata jibu lenye kuridhisha.”
9. Tunaweza kujifunza nini kwa mfano wa Waberoya?
9 Tunapaswa kuwa kama Waberoya waliosifiwa katika Biblia kwa sababu walikuwa ‘wakiyachunguza Maandiko kila siku’ ili wahakikishe kwamba mambo ambayo mtume Paulo alifundisha yalikuwa kweli. Hayakutofautiana na waliyosoma. Kwa hiyo, “watu wengi miongoni mwao wakaamini.” Mmoja wao, aliyeitwa Sopatro, alikuwa na pendeleo la kusafiri pamoja na Paulo kupitia Makedonia katika safari ya tatu ya misionari ya mtume huyo.—Matendo 17:10-12; 20:4.
Unyenyekevu Ni wa Lazima
10. (a) Maarifa yanawezaje kutumiwa vibaya? (b) Unafikiri, kitabu cha Mithali 16:5 kimepasa kuwa na matokeo gani juu ya nia yetu?
10 Maarifa yenyewe si ndio mwisho. Badala yake, ni chombo kinachopaswa kutusaidia tuthamini Yehova Mungu na Neno lake. Maarifa sahihi, pamoja na upendo, yapasa kutokeza unyenyekevu, wala si wazo la kujiona wenye maana sana. Watu wengine wanajifunza, si ili wajue jinsi ya kumtumikia Mungu vizuri zaidi, bali ili wajikweze wao wenyewe pamoja na maoni yao. Huenda wakajiona sana na kulaumu-laumu wengine—ndugu wazee na hata kundi la Kikristo na jumla ya ukweli wa Biblia ambalo linafundisha.—Mithali 16:5; 1 Wakorintho 8:1.
11. Maarifa yetu na akili yetu zilitoka wapi, na jambo hilo lapasa kutufundisha nini juu ya unyenyekevu?
11 Hata hivyo, hakuna jambo lo lote ambalo hatukupokea kutoka chanzo fulani kingine. Tulirithi akili yetu kutoka kwa wazazi wetu, lakini hapo kwanza Muumba wetu, Yehova Mungu ndiye aliyewapa wanadamu. Maarifa yetu yalikuja kupitia wale waliotusaidia, kutokana na mambo tuliyosoma na kutoka kwa Mungu ambaye ndiye chanzo cha ukweli. Kwa kweli, kila jambo tulilo nalo hapo kwanza lilitoka kwa Mungu. Mtume aliandika: “Kwa maana ni nani anayekufanya uwe tofauti na mwingine? Ndiyo, una nini ambacho hukupokea? Ikiwa, basi, ulikipokea kweli, kwa nini wajivuna kama kwamba hukukipokea?”—1 Wakorintho 4:7, NW.
12. Ni jambo gani lenye mkazo linaloonyeshwa katika Zaburi 25:9 na Yakobo 4:6?
12 Yehova hatuhukumu sisi juu ya msingi wa akili tuliyorithi bali kwa unyenyekevu wetu na nia yetu ya kujifunza njia yake na kuifuata. Unyenyekevu na imani vinaenda pamoja. Biblia inasema kwamba “wapole” ndio Mungu atafunza njia yake. Pia inasema: “Mungu huwapinga wajikuzao, bali huwapa neema wanyenyekevu.”—Zaburi 25:9; Yakobo 4:6.
13. Ni mifano gani ya wengine wenye kufundishika?
13 Unyenyekevu unatia ndani nia ya kusahihishwa. Mitume Petro na Tomaso walikuwa mifano yenye kutokeza katika jambo hilo. Petro alikuwa mbelembele katika kusema, lakini jambo hilo lilisawazishwa kwa yeye kusahihishwa, kukaripiwa au hata kukemewa mara nyingi. Hata hivyo Petro alikuwa mtendaji mwenye bidii, na imani yake, kuchukua kwake hatua ya kwanza na uhodari ni mifano yenye kutokeza kwa ajili yetu wote. Tomaso hakuamini kwamba Yesu alikuwa amefufuliwa, lakini ushuhuda ulipotolewa mbele ya macho yake, yeye alikubali mara moja. Je! sisi tunaonyesha unyenyekevu kama huo wakati makosa yetu au kutokuelewa kwetu kunaposahihishwa na Maandiko?—Yohana 20:24-29.
Jaribu Imani Yako
14. Mzee mmoja Mkristo hufanya nini ambayo yanamsaidia adumishe imani thabiti?
14 Mzee mmoja Mkristo, ambaye amekuwa katika ukweli kwa muda mrefu, anajiuliza mara nyingi ni kwa sababu gani imani yake ingali yenye nguvu ambapo watu wengine aliokuwa anajua wamepeperuka. Anasema kwamba sikuzote yeye ameweka akilini shauri la Paulo: “Endeleeni kujijaribu kama mu katika imani, endeleeni kujithibitisha wenyewe mlivyo.” (2 Wakorintho 13:5, NW) Mara nyingi mzee huyo anapoendesha motokaa akienda kazini anajijaribu mwenyewe, akijikumbusha kweli za Biblia akilini mwake. Yeye huwazia mazungumzo ya kweli hizo, akijifanya aeleze akilini kweli hizo na kuzitetea mbele ya watu wa namna zote. Ndugu huyo anataja kwamba hotuba za watu wote kwenye Jumba la Ufalme mara nyingi zinaimarisha tena akilini mwetu uhakika wa kwamba Biblia ni Neno la Mungu kweli kweli. Lakini yeye huuliza: “Tungewezaje kujua mambo haya kama hatungalikuwako kwenye mikutano ambapo yalizungumzwa?” Kwa ukawaida yeye anajiuliza juu ya wema wa Mungu na tengenezo Lake. Mwangalizi huyo Mkristo anatia katika sala zake uthamini wa hayo na kusema: “Namshukuru Yehova kwa kuniruhusu mimi nikae na watu wake.” Je! wewe unaweza kufaidika kwa kujijaribu kwa namna hiyo ili uone kama kweli kweli u “katika imani”?
Sala Ni ya Lazima Sana
15, 16. Kwa sababu gani sala ni ya maana sana ili tudumishe imani thabiti?
15 Mfano huo unatokeza mambo mawili yaliyo ya lazima sana ili kudumisha imani thabiti: sala na mikutano ya Kikristo. Mara nyingi, watu ambao imani yao ni dhaifu wanasali mara tu. Baba mmoja wa Kikristo anakumbuka wakati wote uhakika wa kwamba Danieli alisali mara kadha katika siku, hata baada ya sheria ya kutotoa sala kupitishwa. (Danieli 6:6-10) Mara kadha kwa siku baba huyo humuuliza Yehova hekima na uongozi.
16 Je! wewe unasita kusali? Zaburi inasema: “[Yehova] yu karibu na wote wamwitao, wote wamwitao kwa uaminifu.” Yesu aliuliza: “Basi ikiwa ninyi, mlio waovu, mnajua kuwapa watoto wenu vipawa vyema, je! si zaidi sana Baba yenu aliye mbinguni atawapa mema wao wamwombao?” (Zaburi 145:18; Mathayo 7:11) Hakika, Yehova atawapa “vipawa vyema” wale wanaomwomba kwa imani.
Sehemu Inayotimizwa na Mikutano
17. Ni mifano gani ya Kibiblia inayoonyesha umaana wa kukutana pamoja na waamini wenzetu?
17 Kuongezea sala, kukutana kwa ukawaida na waamini wenzetu ni jambo la lazima pia kwa imani. Mara tatu kila mwaka kila Mwisraeli wa kiume alipaswa ‘kuhudhuria mbele ya Yehova Mungu’ katika Yerusalemu. Wakiwa wanatambua thamani kubwa sana ya kiroho ya pindi hizo, wanaume wengi walienda pamoja na jamaa yao yote. (Kutoka 23:14-17; Luka 2:41-45) Na zaidi, Paulo alitazamia kitia-moyo chenye kujenga imani kutoka kundi la Roma. Yeye kuwa pamoja na waamini wenzake huko ili ‘watiane moyo’ na kujengana kiroho kupitia imani ya mmoja na mwenzake.—Warumi 1:11, 12, NW.
18. Wale wenye nguvu katika imani wanaionaje mikutano ya Kikristo?
18 Watu ambao imani yao ni yenye nguvu wanatumia kwa faida mikutano yote ya Kikristo. Wao hawaondoki baada ya saa ya kwanza kupita, au kuja wakati wa saa ya pili. Wao wanaona mikutano kuwa ya thamani, na kutambua kwamba inatoa nafasi ya kujifunza, kutiwa moyo, kubarikiwa, na kwamba kwenye mikutano hiyo tunaweza kupokea msaada kutoka kwa ndugu wenye upendo na tunaweza kuchocheana “katika upendo na kazi nzuri.” (Waebrania 10:24, 25) Tunawezaje kupokea kitia-moyo hicho bila kushirikiana na wale wanaoweza?
Kutoa Ushuhuda na Imani Yetu
19. Utoaji wa ushuhuda wa Kikristo unatiaje nguvu imani?
19 Kutoa ushuhuda wa Kikristo ni msaada mwingine wa kujenga imani. Yakobo aliandika: “Nionyeshe imani yako pasipo matendo, nami nitakuonyesha imani yangu kwa njia ya matendo yangu. Maana kama vile mwili pasipo roho umekufa, vivyo hivyo na imani pasipo matendo imekufa.” (Yakobo 2:18, 26) Kazi moja kuu ya Wakristo ni kufundisha wengine, na ye yote wa Mashahidi wa Yehova atakuambia: ‘Hakika kutoa ushuhuda kunajenga imani!’ Kufanya hivyo kunafaidi si yule tu anayefundishwa bali pia mwalimu. Ni utendaji wenye kujenga na kutia nguvu imani. Kutoa ushuhuda kunakufanya utetee imani yako. Kunanoa uwezo wako wa kufikiri. Ndiyo, na kutoa ushuhuda wa Ufalme kunaleta baraka za Mungu, kutia ndani uongozi wa roho yake.—Marko 13:11; Warumi 10:14, 15.
Kutumaini “Mtumwa” kwa Uhakika
20, 21. (a) Ni jambo gani la maana kukumbuka juu ya “mtumwa mwaminifu mwenye akili”? (b) Mkristo mmoja alilisemaje jambo hilo?
20 Pia ni jambo la maana kukumbuka tulipojifunzia ukweli kwanza. Ni nani aliyetusaidia tujenge imani yetu katika Biblia na ahadi zayo?Tulipataje kuelewa ambayo Biblia inamaanisha kwetu leo? Yesu alisema kwamba wakati wa kurudi kwake angekuta “mtumwa mwaminifu mwenye akili” akitoa chakula cha kiroho na kwamba “mtumwa” ambaye angekutwa akifanya hivyo angewekwa rasmi juu ya vitu vyote vya bwana.—Mathayo 24:45-47.
21 Mume mmoja Mkristo alisema: “Tengenezo linaloonekana la Yehova ni chanzo chenye kutegemeka sana sana. Halijapata kunipoteza njia kwa vyo vyote hata mara moja. Kila jambo ambalo limesema limekuwa lenye kutegemea Neno la Mungu na limekuwa ndilo jambo bora zaidi kwangu, kwa jamaa yangu na kwa kila mtu ninayejua. Hilo linajenga imani kubwa sana sana kwa habari yangu.”
22. Ni maulizo gani yanayoweza kukusaidia uchanganue jinsi unavyotunza imani yako mwenyewe?
22 Je! wewe umekwisha kujifunza Neno la Mungu, ukalikubali na kuliamini? Je! wewe umekwisha kuweka wakfu maisha yako kwa Mungu na kuonyesha wakfu huo kwa ubatizo wa maji? Je! sasa wewe unaishi kwa kupatana na wakfu huo? Je! wewe unamuuliza Mungu akupe uongozi, maarifa na imani? Je! wewe unaendelea na funzo lako la kibinafsi kwa ukawaida na kwa bidii? Je! sikuzote wewe unakuwako kwenye mikutano ya Kikristo? Je! wewe unatenda na una bidii katika utumishi mtakatifu wa Mungu? Na je, wewe unafanya maendeleo katika ubora wa utendaji wako wa kufanya wanafunzi, au je, umeacha ukawa desturi tu?—Mathayo 28:19, 20.
23. Unapaswa ukabilije matatizo, majaribu na vipingamizi?
23 Bila shaka, sisi sote tuna matatizo, na tuna makosa yetu wenyewe. Lakini tunapokabili majaribu na vipingamizi hatupaswi kusita-sita, au kuwa na nia mbili. Badala yake, tunataka kuwa wenye nia moja na wenye uhakika juu ya ukweli. Yakobo aliandika: “Hesabuni kuwa ni furaha tupu, mkiangukia katika majaribu mbalimbali; mkifahamu ya kuwa kujaribiwa kwa imani yenu huleta saburi.” Paulo alishauri hivi: “Kesheni, simameni imara katika imani, fanyeni kiume, mkawe hodari.” (Yakobo 1:2, 3; 1 Wakorintho 16:13) Ili tubaki katika imani ya kweli tukiwa mashahidi wa Yehova, ni lazima tusitawishe sifa ya imani, tunda la roho takatifu ya Mungu.—Wagalatia 5:22, 23.
24. Kwa sababu gani ni jambo la maana sana kuwa na imani thabiti?
24 Sababu gani ufanye hivyo? Kwa sababu imani ni ngao ya kujilinda na Shetani, ambaye “kama simba angurumaye, huzunguka-zunguka, akitafuta mtu ammeze.” “Zaidi ya yote mkiitwaa ngao ya imani, ambayo kwa hiyo mtaweza kuizima mishale yote yenye moto ya yule mwovu.” (1 Petro 5:8-10; Waefeso 6:16) Ukidumisha imani thabiti, utataka kufanya mambo katika njia ya Mungu. Moyo wako utakuwa sawa. Matendo yako yatakuwa yenye kupatana na maagizo yake, nawe utasonga mbele, wakati wote ukifanya maendeleo katika barabara nyembamba inayoongoza kwenye uzima.—Mathayo 7:14.
Kwa Kujikumbusha
◻ Kwa sababu gani watu wengine wanatia mashaka, na wanaweza kufanya nini wamalize mashaka hayo?
◻ Umejifunza nini juu ya maarifa na unyenyekevu?
◻ Unaweza kutiaje nguvu imani yako?
◻ Kwa sababu gani ni jambo la maana sana kudumisha imani thabiti?
[Picha katika ukurasa wa 9]
Vichapo vya Sosaiti yetu vinasaidia sana katika kufanya uchunguzi wa habari na maulizo ya Biblia