‘Endelea Kuwa Bila Doa, Bila Kasoro, na Katika Amani’
“Fanyeni bidii sana ili mwishowe mkutwe naye mkiwa hamna madoa na kasoro na katika amani.”—2 PETRO 3:14, NW.
1, 2. Utakatifu ni nini?
YEHOVA MUNGU ni mtakatifu. Mwanaye Yesu Kristo alimwita katika sala “Baba mtakatifu.” (Yohana 17:1, 11) Na viumbe wa kiroho katika mbingu wanaonyeshwa wakitangaza hivi: “Mtakatifu, Mtakatifu, Mtakatifu, ni [Yehova] wa majeshi.” (Isaya 6:3) Lakini utakatifu ni nini?
2 Maneno “-takatifu” na “utakatifu” yametafsiriwa kutokana na maneno ya Kiebrania yaliyo na asili inayoweza kumaanisha “kuwa -angavu,” “kuwa mpya au kipya-kipya, bila doa au kilicho safi” kimwili. Lakini, katika Maandiko maneno hayo yanatumiwa hasa katika maana ya kiadili au kiroho. Kiebrania cha awali pia kinatoa wazo la kuwa katika hali ya kujitenga, kutokuhusika na kitu kingine cho chote, au utakaso wa Mungu mtakatifu, Yehova. Katika maandiko ya Kigiriki ya Kikristo, pia, maneno hayo yaliyotafsiriwa “-takatifu” na “utakatifu” yanamaanisha kujitenga kwa ajili ya Mungu. Yanatumiwa pia kumaanisha utakatifu ukiwa sifa ya Yehova, na pia kuhusu utakato au ukamilifu katika mwenendo wa mtu binafsi. Kwa hiyo utakatifu unamaanisha usafi, utakato, na heshima nyingi ya kimungu.
Watu wa Yehova Wanatakwa Wawe na Utakatifu
3. Kwa sababu gani Yehova anastahili ibada safi?
3 Basi, lile tangazo la kimbingu linamaanisha nini kwa kusema: “Mtakatifu, mtakatifu, mtakatifu, [Yehova] Mungu Mwenyezi”? (Ufunuo 4:8) Hiyo ni kumhesabia Mungu utakatifu, usafi wa kipimo kilicho cha juu kabisa! Basi, Yehova, “Aliye Mtakatifu Zaidi,” anastahili ibada safi. (Mithali 9:10, NW). Kwa hiyo, Yehova Mungu alimwagiza nabii Musa awaambie Waisraeli hivi: “Mtakuwa watakatifu; kwa maana mimi [Yehova], Mungu wenu ni Mtakatifu.”—Mambo ya Walawi 19:1, 2.
4. Ni kwa njia gani tu inawezekana kumwabudu Yehova kwa njia inayokubalika?
4 Mtu ye yote anayedai kuwa anamtolea Yehova utumishi unaokubalika na huku akizoea uchafu ni wa kuchukiza sana machoni pake. Kwa maana ni kwa hekima ya kimungu na utakatifu tu inawezekana kumwabudu yeye kwa njia inayokubalika. (Mithali 20:25; 21:27) Hivyo, wakati Mungu alipotabiri kwamba angewafungulia watu wake waliohamishwa njia kurudi Yerusalemu kutoka Babuloni, yeye alisema: “Nayo itaitwa, Njia ya utakatifu; wasio safi hawatapita juu yake.” (Isaya 35:8) Mabaki waliorudi mwaka 537 K.W.K walifanya hivyo wakiwa na makusudio matakatifu, kuirudisha ibada ya kweli ya “yule Aliye Mtakatifu zaidi.” Na Waisraeli wangaliweza kuwa watakatifu kwa kumtii Mungu. Lakini walishindwa kuendelea kuwa watakatifu, wasio na doa kulingana na maoni yake.—Linganisha Yakobo 1:27.
5. Paulo alionyeshaje kwamba ni lazima Waisraeli wa kiroho wamwabudu Mungu kwa utakatifu?
5 Waisraeli wa kiroho, au Wakristo waliopakwa mafuta, ni lazima pia wamwabudu Yehova kwa utakatifu. (Wagalatia 6:16) Katika habari hii mtume Paulo aliwasihi waamini wenzake ‘waitoe miili yao iwe dhabihu iliyo hai,takatifu, yenye kukubalika kwa Mungu.’ Ili kufanya hivyo, waamini hao wangalipaswa kuhakikisha kwamba walikuwa wakifanya mapenzi ya kimungu, kwa maana Paulo aliongeza hivi: “Mwache kufanyizwa kulingana na mtindo wa huu mfumo wa mambo, bali mgeuzwe kwa kubadili akili zenu, ili mpate kujithibitishia wenyewe mapenzi ya Mungu.”—Warumi 12:1, 2, NW.
6. Ni lazima Wakristo wote wajihadhari ni nini?
6 Katika wakati huu wa ongezeko, wapya wengi wanamiminika kuingia ndani ya tengenezo la Yehova. Wao, pia, wanamwabudu Yehova kwa utakatifu. Wanalishangilia kama nini lile taraja la kuokoka “dhiki kubwa” na kufurahia uzima wa milele katika dunia-paradiso wakiwa katika Utaratibu Mpya wenye uadilifu! (Mathayo 24:21; Luka 23:43) Lakini ili wale walio na matumaini ya kimbingu na “mkutano mkubwa” walio na mataraja ya kidunia waweze kufurahia maisha yasiyo na kikomo,ni lazima wajilinde na tabia zenye kuchafua au jambo lo lote jingine lililo kinyume cha maadili na mafundisho ya kimaandiko.—Ufunuo 7:9, 14.
7. Petro alisema nini linalokazia uhitaji wa kuwa mifano miema “katika vitendo vitakatifu vya mwenendo”?
7 Akielekeza kwenye wakati wetu, mtume Petro aliandika: “Siku ya Yehova itakuja kama mwivi, ambayo katika hiyo mbingu [ambazo ni serikali za kilimwengu] zitatokomea kwa kelele ya si-si-si-si, lakini kwa kuwa vitu vya asili (mielekeo na njia za kilimwengu) vitapata moto mwingi sana vitafumuliwa, na dunia [jamii ya kibinadamu iliyotengwa mbali na Mungu] na kazi zilizomo vitavumbuliwa” viwe vyenye kuchomeka kama “mbingu” na “vitu vya asili” katika “moto” wenye uharibifu wa siku ya Yehova. Kwa hiyo Petro aliongeza hivi: “Kwa kuwa vitu vyote hivyo vitafumuliwa hivyo, ninyi yawapasa kuwa watu wa namna gani katika vitendo vitakatifu vya mwenendo na matendo ya utawa, mkingojea na kukaribisha akilini kuwapo kwa siku ya Yehova ambayo kupitia kwayo mbingu zikiwa katika moto zitafumuliwa na vitu vya asili vikiwa na moto mwingi sana vitayeyuka!” Ndiyo, mashahidi wote wa Yehova wanapaswa kuwa mfano mwema “katika vitendo vitakatifu.” Na wale wanaodumisha utakatifu wanaweza kutazamia mahali penye usalama ndani ya ‘mbingu mpya na dunia mpya’ zenye uadilifu za Mungu. (2 Petro 3:7, 10-13, NW)Hayo ni mataraja yenye baraka kama nini!
8. Mkristo anahitaji kufanya nini ikiwa ametoka kwenye mwendo wa utakatifu?
8 Lakini, namna gani ikiwa Mkristo amefanya vizuri katika utumishi wa Yehova kwa muda fulani lakini baadaye akasitawisha tabia zenye kuchafua au akaenda kinyume cha mafundisho au maadili ya Biblia? Basi yeye amepotoka akauacha mwendo wa utakatifu na anahitaji kuonyesha toba ya kweli na kuchukua hatua zinazofaa kurekebisha hali hiyo. Ni kama vile Paulo alivyowaambia wapakwa mafuta wenzake: “Basi, wapenzi wangu, kwa kuwa tuna ahadi hizo, na tujitakase nafsi zetu na uchafu wo wote wa mwili na roho, huku tukitimiza utakatifu katika kumcha Mungu.” (2 Wakorintho 7:1) Mkristo ye yote anayehitaji kusahihisha mwendo wake wa kupotoka atayaona mashauri ya Kimaandiko ya uangalizi wenye upendo kuwa baraka kweli kweli.—Mithali 28:13; Yakobo 5:13-20.
9. Kulingana na 2 Petro 3:14, ni ulizo gani linalotokea?
9 Baada ya kuelekeza kwenye utaratibu mpya wa uadilifu, Petro aliongeza hivi: “Wapendwa, kwa kuwa mnangojea mambo hayo, fanyeni bidii sana ili mwishowe mkutwe [na Yehova Mungu] mkiwa hamna madoa na kasoro na katika amani.” (2 Petro 3:14, NW ) Maneno hayo yalielekezwa kwa Wakristo wapakwa mafuta, lakini ni lazima mashahidi wote wa Yehova wakutwe ‘wakiwa hawana doa, na kasoro, na katika amani. Basi, ni lazima tufanye nini?
‘Bila Doa na Kasoro’
10. Wale wa “mkutano mkubwa” wamefanyaje “mavazi” yao yakawa safi katika damu ya Yesu?
10 Tunahitaji kufanya yote tuwezayo ili tukutwe ‘hatuna doa na kasoro.’ wale wa “mkutano mkubwa” ‘wamefua mavazi yao, na kuyafanya meupe katika damu ya Mwana-Kondoo.’ Wakati mmoja, wao walikuwa sehemu ya ulimwengu huu wa dhambi nao ulikuwa umeyapaka mavazi yao ya utambulishi madoa, wakawa wametiwa uchafu machoni pa Yehova. Waliyafanyaje mavazi yao meupe-pe katika “damu ya Mwana-kondoo,” Yesu Kristo? Ni kwa kuonyesha imani yao kwamba ‘pasipo kumwaga damu hakuna ondoleo la dhambi linalofanyika’ na kwamba Yesu ndiye “Mwana-kondoo wa Mungu, aichukuaye dhambi ya ulimwengu.” (Ufunuo 7:9, 14; Waebrania 9:22; Yohana 1:29, 36) Wao walitenda hivyo kwa kufanya wakfu usio na masharti kuelekea Mungu na kuuonyesha kwa kubatizwa, kuzamishwa kwa ukamili katika maji. Wakfu wa namna hiyo ulipasa kufanywa kupitia Yesu Kristo na kwa usadiki wa kwamba damu yake iliyomwagwa ndiyo inayofanya iwezekane Mungu kusamehe dhambi zetu na kuwafanya wakubalike machoni pake.
11. Kwa kuwa dhambi inaharibu amani pamoja na Yehova, tunahitaji kubaki katika hali gani?
11 Ule “mkutano mkubwa” ni lazima uyafanye “mavazi” yao yawe meupe kwa kutotiwa doa na uulimwengu na hivyo kupoteza utu wao wa Kikristo na utambulishi wa kuwa mashahidi waliokubaliwa wa Yehova. Kwa kweli, wakristo wote wa kweli wanahitaji kujizuia wasitiwe waa na njia, vitendo, na mielekeo ya kilimwengu. Kwa kuwa dhambi inavuruga amani yetu na Yehova, ni kwa kubaki tu katika hali ambayo dhambi zinaweza kufidiwa kwamba tunaweza kukutwa tukiwa “katika amani” kwenye ile “siku ya Yehova” kuu inayokuja. Ni lazima tuwe bila madoa yanayotokana na mazoea ya dini ya uwongo au ukosefu wa adili wa ulimwengu huu.
12. Andiko la 2 Petro 2:13 linaweza kutumiwaje hata ndani ya kundi la Kikristo?
12 Kubaki bila doa na bila waa kunatuhitaji tuwe na mwenendo na mielekeo iliyo kinyume cha ile ya “walimu wa uongo” ambao juu yao Petro aliandika hivi: “Wanaona maisha ya anasa wakati wa mchana kuwa raha. Wao ni madoa na mawaa, wakifurahia mafundisho yao ya udanganyifu kwa furaha isiyozuilika wanapokula karamu pamoja nanyi “(2 Petro 2:1, 13, NW) Ndiyo, hata ndani ya kundi ni lazima tujihadhari na walimu wa uwongo ‘wanaoona maisha ya anasa wakati wa mchana kuwa raha.’ Wakati wa saa zetu za mchana, ambapo mambo mengi sana yangeweza kufanywa kwa faida ya kiroho ya wengine, watu wasio wa kiroho huenda wakajitia katika kutenda makosa, pamoja na sherehe zenye makelele mengi na ulaji na unywaji wa kupindukia. Huenda wakajaribu kugeuza matukio ya kujifurahisha kama vile karamu za arusi yawe pindi za muziki wenye kuamsha nyege, dansi zenye kuchochea tamaa, ulafi, na matumizi kupita kiasi ya vileo. Lo lote la mambo hayo halipasi kuruhusiwa kati ya watu wa Yehova.—Isaya 5: 11, 12; Ona Mnara wa Mlinzi, Septemba 15, 1984, kur. 13-19.
13. Mwenye kukaribisha anaweza kufanya nini ili kikusanyiko cha kirafiki kiwe chenye kujenga kiroho?
13 Mwenye kukaribisha ndiye mwenye daraka kwa yanayotukia kwenye kikusanyiko cha kujifurahisha anachofanya. Ili tukio hilo liwe lenye kujenga kiroho, ni jambo la hekima kulifanya likiwa na ukubwa unaoweza kusimamiwa vizuri na kutokualika mtu ye yote atakayeelekea kuleta mavutano yasiyofaa. Kama vile maneno ya Paulo kwenye 2 Timotheo 2:20-22 anavyoonyesha, si wote walio wenzi wa kutamanika kwa sababu tu wanashirikiana na kundi. Kwa hiyo, Mkristo mwenye kukaribisha hana wajibu wa kualika watu wanaojulikana kuwa wasiozuia ulimi wao kwa hatamu au wanaopita kiasi katika kula au kunywa. Anakumbuka kwamba ‘tuwe tunakula au tunakunywa au kutenda lo lote jingine, inatupasa tufanye yote kwa utukufu wa Mungu.’—1 Wakorintho 10:31.
14. Ni msimamo gani unaopaswa kuchukuliwa kuhusu walimu wa uwongo?
14 Ni wachache tu walio ‘madoa na mawaa, wakifurahia mafundisho ya udanganyifu’ wanaposhirikiana nasi. Lakini ni lazima waangalizi na wengine kundini wawe macho, wawakatae kwa uthabiti walimu wo wote wa uwongo ambao huenda wakajipenyeza ndani ya kundi na kujaribu kuendeleza ukosefu wa adili au fundisho lisilofaa. (Yuda 3, 4) Ni kwa kushika kwa uthabiti tu viwango vya uadilifu wa Mungu itakapowezekana kuliendeleza kundi likiwa bila doa na bila waa.
Ni Mambo Gani Yanayotakwa Ili Kuwa “Katika Amani”?
15. (a) Mtu anaweza kupataje amani pamoja na Mungu? (b) Ni lazima tufanye nini ili tukutwe “katika amani” kwenye ile siku kuu ya Yehova inayokuja?
15 Ili wakutwe “katika amani,” ni lazima watu wa Yehova wadumishe amani pamoja naye. (2 Petro 3:14) Sisi tumepewa msimamo huo kupitia Yesu Kristo, ambaye juu yake Paulo aliandika: “Mungu aliona vema ujazi wote ukae katika yeye, na kupitia kwake apatanisha tena kwake mwenyewe vitu vingine vyote kwa kufanya amani kupitia damu ambayo alimwaga juu ya mti wa mateso, si kitu kama ni vitu vilivyo duniani ama vitu vilivyo katika mbingu.” (Wakolosai 1:19, 20, NW) Dhambi nzito zinaharibu uhusiano wa mtu na Yehova na kumfanya mtu huyo asumbuliwe na dhamiri, awe katika hali ya hangaiko, lakini amani ni mali ya wale wanaotii amri za Mungu. (Zaburi 38:3; Isaya 48:18) Basi, ili tupatikane “katika amani” kwenye siku ile kuu ya Yehova inayokuja ni lazima tubaki katika hali ya kumwogopa Mungu inayowezesha dhambi zetu zifidiwe kwa “damu ya Yesu iliyomwagwa juu ya mti wa mateso. “
16. Kulingana na mtume Paulo, tunaweza kufuatiaje amani pamoja na waamini wenzetu?
16 Ni lazima pia tuwe na amani pamoja na waabudu wale wengine wa Yehova. Paulo alihimiza hivi: “Na tufuate mambo ya amani na mambo yafaayo ya kujenga.” Habari zinazozunguka andiko hilo zinaonyesha kwamba ni lazima tujihadhari tusije tukakwaza waamini wenzetu kuhusiana na chakula, kinywaji, au kitu kinginecho chote. (Warumi 14:13-23) Lakini kuna mengi zaidi yanayohusika, kwa maana Paulo aliwaambia Wakristo wa Efeso hivi: “Nawasihi . . . .mwenende kama inavyoustahili wito wenu mlioitiwa; kwa unyenyekevu wote na upole, kwa uvumilivu, mkichukuliana katika upendo; na kujitahidi kuhifadhi umoja wa [roho] katika kifungo cha amani.” (Waefeso 4:1-3) Kwa uhakika, tunataka kuonyesha umoja wetu kwa kuepuka maneno na matendo yote ya kuchafua amani na kwa kusimama imara tukiwa wateteaji wa enzi kuu ya Yehova.
17. Kulingana na 1 Petro 3:10-12, ni mambo gani yanayohusika katika ‘kutafuta amani’?
17 Hakika ‘kutafuta amani’ kunataka kwamba tuangalie matendo na hata maneno yetu kwa maana mtume Petro aliandika hivi: “Yeye ambaye angependa uzima na kuona siku njema, na azuie ulimi usiseme mabaya na midomo yake isiseme udanganyifu, lakini na aepuke yaliyo mabaya na kutenda mema; na atafute amani na kuifuatia. Kwa maana macho ya Yehova yako juu ya waadilifu, na masikio yake yanaelekea maombi yao; bali uso wa Yehova u kinyume cha wale wanaotenda mambo mabaya.” 1 Petro 3:10-12, NW; Zaburi 34:12-16. Basi, kwa njia mbalimbali watumishi washikaminifu wa Yehova ni lazima waendelee ‘kutafuta amani’ kama wanataka wakutwe wakiwa “katika amani”.
Tegemea Msaada wa Yehova
18. Tunaweza kufanya nini ikiwa njia, vitendo, au mielekeo ya ulimwengu inatuvutia sisi?
18 Petro alionyesha kwamba “vitu vya asili,” roho, au mielekeo na njia za kilimwengu, ‘vitafunguliwa,’ au kuharibiwa, wakati wa “siku ya Yehova.” (2 Petro 3:7, 10, NW) Lakini tunaweza kufanya nini ikiwa njia, vitendo, au mielekeo ya ulimwengu inatuvutia sisi? Kwa uhakika, tunahitaji kujifaidi kwa ukamili na maandalizi ya kiroho yanayofanywa kupitia tengenezo la Yehova. Kati ya mambo mengine, inatupasa tujifunze Neno la Mungu kwa ukawaida na vichapo vya Kikristo vilivyoandaliwa na “mtumwa mwaminifu mwenye akili.” (Mathayo 24:45-47) Ni lazima pia tuonyeshe shukrani zenye kuendelea kwa ajili ya uandalizi wa ukombozi, “damu [ya Yesu] ya thamani, kama ya mwana kondoo asiye na ila, asiye na waa.”—1 Petro 1:18, 19.
19. Sala inaweza kusaidaje ikiwa mielekeo ya kilimwengu inatuvuta sisi?
19 Inatupasa tusali tupewe msaada wa Mungu ili ‘tuufuatie uadilifu.’ (1 Timotheo 6: 11-14, NW) Tukitambua kwamba mielekeo ya kilimwengu inatuongoza, au fikira zetu zikielekezwa kwenye jambo hilo na waamini wenzetu wenye upendo, lingekuwa jambo la hekima kutaja wazi tatizo hilo katika sala zetu kwa kumwomba Yehova atusaidie tushinde maelekeo hayo. Kwa uhakika, ingefaa kuomba tupewe roho ya Mungu na msaada wake ili kusitawisha matunda yanayotofautiana sana na mielekeo na njia za kilimwengu. (Wagalatia 5:16-26; Zaburi 25:4, 5; 119; 27, 35) Yehova anaweza kutusaidia tukaze sana fikira zetu juu ya mambo ya uadilifu yaliyo safi, yaliyo mema, na yanayostahili .Tena inafaa kama nini kumwomba sana kwa bidii ili “amani ya Mungu” isiyo na kifani ilinde mioyo na nguvu zetu za akili! (Wafilipi 4:6, 7, NW) Ikiwa hivyo, mahangaikio, vishawishi, na mambo ya namna hiyo hayataongezeka kufikia kiasi ambacho hayazuiliki. Bali, maisha zetu zitaonekana kuwa zenye utulivu tuliopewa na Mungu. Kwa kweli, “wana amani nyingi waipendao sheria [ya Yehova].”—Zaburi 119:165.
Baki Ukiwa ‘Bila Doa, Bila Waa, na Katika Amani’
20. Kwa sababu gani tunaweza kusema kwamba inawezekana kuwa na hali ya kiroho isiyo na waa?
20 Jambo la kufurahisha ni kwamba wote walio ndani ya tengenezo la Yehova, kutia na wapya wanaoingia sasa, wanaweza kukubalika machoni pa Mungu. (Matendo 10:34, 35) Kwa msaada wa Yehova, inawezekana “kuikataa kabisa hali ya kumkana Mungu na tamaa za kilimwengu” na kuishi kama wanavyopasa Wakristo. (Tito 2:11-14, NW) Ingawa wakati mmoja tulikuwa tumetengwa mbali na Yehova na akili zetu zilikuwa zikifikiria kazi mbovu, tumekwisha kupatanishwa na Mungu kupitia kifo cha Kristo. Hivyo inawezekana kuwa na hali ya kiroho isiyo na waa, mradi tutaendelea kuwa katika imani na hatutaondoshwa kwenye lile tumaini la habari njema.—Wakolosai 1:21-23.
21. Tunawezaje mwishowe kukutwa bila doa, bila waa, na katika amani?
21 Kwa msaada wa Yehova, Neno lake, na tengenezo lake, tunaweza kubaki bila kutiwa doa na ulimwengu wala kutiwa waa na njia, vitendo, na mielekeo yao. Hivyo tunaweza kuonyesha pia amani ya kweli. Ndiyo, kwa kustahimili katika ibada takatifu yetu kwa Yehova, mwishowe tunaweza kukutwa tukiwa bila doa, bila waa, na katika amani.
Wewe Ungejibuje?
◻ Kwa sababu gani watu wa Yehova wanatakwa wawe na utakatifu?
◻ Tunaweza kubaki namna gani tukiwa bila doa na bila waa?
◻ Ni nini lilalotakwa ili kuwa “katika amani”?
◻ Ni katika njia gani tunaweza kuonyesha tunategemea msaada wa Mungu?
[Picha katika ukurasa wa 16, 17]