Kuweza Hasira Yako na ya Wengine

TUNAISHI katika jamii yenye hasira-hasira. Misongamano ya magari barabarani, kanuni zenye kuhitilafiana na kubadilika-badilika, kutoelewana, utovu wa haki, au mivurugo mingine ya akili katika maisha ya kila siku husababisha mkazo mwingi. Mkazo unarundamana, na karibu kila mtu ana kikomo chake cha uvumilivu. Basi, inatupasa tujifunze kustarehe. Sisi tunaweza kuingia katika kila siku tukiwa na mwelekeo unaofaa—tukionyesha saburi, kuvumiliana, na ucheshi mwema. Walio wengi wetu tuna jamaa inayotupenda sisi. Wakristo pia wana Wakristo wenzao washikamanifu katika kundi, na zaidi ya yote, wao wana yule Mchungaji mwenye upendo, Yehova Mungu. Kwa sababu hiyo, hakuna uhitaji wa kuogopa mojapo ya visababishi vya hasira: ile hisia ya kuwa uko peke yako, umeachwa kabisa.—Zaburi 23:1-6; Waebrania 13:5, 6.

Hata hivyo, ikiwa tunahisi hasira au tunalazimika kukabiliana na hasira ya mtu mwingine, inatupasa tuiweze ifaavyo ili tuhifadhi furaha na hali njema yetu. Jinsi gani? Biblia inatuambia sisi: “Asiye mwepesi wa hasira ni mwema kuliko shujaa; na mtu aitawalaye roho yake kuliko mtu atekaye mji.” (Mithali 16:32) Badala ya kuamua haraka-haraka kuonyesha hasira, inatupasa tufikirie yale yanayoweza kuwa matokeo ya matendo yetu. Kuahirisha hasira huenda kukatuzuia tusitende jambo ambalo huenda tukasikitikia badaaye. —Mithali 14:17.

Ikiwa tumekasirika na hatujui sababu, inatupasa kwa unyenyekevu na kwa unyofu tuombe msaada. Kukubali mbele ya wengine, hasa wale wanaotupenda, hofu zetu au uhitaji wa msaada si udhaifu; ni mwendo wa hekima na ushujaa. Ndipo tunaweza kufikia mzizi wa tatizo hilo. Biblia inasema hivi: “Kuna zuio la mipango mahali ambako hakuna mazungumzo ya siri, lakini katika wingi wa washauri kuna timizo.”—Mithali 15:22, NW.

Ikiwa sisi tunajaribu kufahamu sababu kwa nini wengine wanatenda kama wanavyotenda, hilo litatusaidia sisi tuzuie matendo yetu wenyewe ya maono ya moyoni. Zaidi ya hilo, ikiwa sisi tunamjibu hivi yule mtu mwenye hasira, “Mimi nafahamu sababu kwa nini umekasirika,” huenda yeye akapoa kwa haraka. Biblia inashauri: “Busara ya mtu huiahirisha hasira yake; nayo ni fahari yake kusamehe makosa.”—Mithali 19:11.

Ikiwa sisi tunamwumiza mtu fulani bila kukusudia, tuna deni la kumwomba radhi. Kwa mfano, ikiwa mtu fulani anakukanyaga kidole cha mguu, huenda ukaelekea kukasirika. Lakini anapoomba radhi, hasira yako inapoa. Huenda kidole chako cha mguu kikawa kingali kinauma, lakini adhama yako inaheshimiwa. Vivyo hivyo, adabu nzuri kwa upande wetu pamoja na mwendo wa uungwana kwa kawaida na ucheshi unaofaa vyaweza kumaliza uchungu na kudumisha heshima katika uhusiano wetu pamoja na mume au mke wetu, watoto, marafiki, na washiriki wa kundi la Kikristo.—Mithali 16:24; Wakolosai 4:6; 1 Petro 3:8.

Katika kushughulika na hali inayotufanya tuhisi hasira, inasaidia kujua namna ya kuzungumza juu ya hasira yetu bila kushambulia yule mtu mwingine. Kuna tofauti kubwa kati ya shambulizi la maneno (“Punda wewe!” au, “Nitakupiga ngumi ya pua!”) na kuripoti hasira yako (“Mimi nimeudhika sana,” au, “Mimi nahisi kuumizwa”). Kwa kawaida shambulio la maneno linashindwa kutimiza mradi kwa sababu linachochea yule mtu mwingine kulipa kisasi, hali kuripoti jinsi unavyohisi kidogo linaonwa kuwa si shambulio, na huenda yule mtu mwingine akasukumwa afanye marekebisho. Kama isemavyo Biblia: “Jawabu la upole hugeuza hasira; bali neno liumizalo huchochea ghadhabu. Mtu wa hasira huchochea ugomvi; bali asiye mwepesi wa hasira hutuliza mashindano.”—Mithali 15:1, 18.

Hasira ya Uadilifu

Kwa walio wengi wetu ni jambo la asili kuhisi hasira mara kwa mara. Biblia Inaripoti kwamba hata Yehova anahisi hasira. (Sefania 2:2, 3; 3:8) Kwa hiyo si jambo la kushangaza kwamba mwanadamu, akiwa amefanywa kwa mfano Wake, yampasa kuwa na hisia zinazofanana na zake. (Mwanzo 1:26) Kwa sababu hiyo, ile hisia ya hasira yenyewe si dhambi.

Hata hivyo, Yehova anapokasirika, sikuzote ni kwa sababu inayofaa: Kanuni za uadilifu zinakuwa zimevunjwa. Na itikio lake sikuzote huwa sahihi kabisa na limeongozwa kikamilifu. Inakuwa tofauti kwa binadamu wasiokamilika. Mara nyingi sisi tunahisi kukasirika kwa sababu fahari yetu imeumizwa au kwa sababu ya udhaifu mwingine wa kibinadamu. Kwa sababu hiyo kuna uhitaji wa uangalifu katika njia ambayo katika hiyo tunashughulika na hasira yetu. Kama alivyoonya mtume Paulo: “Mwe na hasira, ila msitende dhambi; jua lisichwe na uchungu wenu bado haujawatoka; wala msimpe Ibilisi nafasi.” (Waefeso 4:26, 27) Ndiyo, Shetani anaweza kutumia kwa faida yake hasira yetu isiyozuiwa. Kwa kweli, “hasira” inaorodheshwa miongoni mwa “matendo ya mwili” ambayo yanazuia mtu asirithi Ufalme wa Mungu.—Wagalatia 5:19-21.

Hiyo ndiyo sababu mwanafunzi Yakobo anashauri hivi: “[Jueni hili, NW] ndugu zangu wapenzi. Basi kila mtu na awe . . . si mwepesi wa . . . kukasirika; kwa maana hasira ya mwanadamu haiitendi haki ya Mungu.” (Yakobo 1:19, 20) Hata kama hasira yetu ni kwa sababu inayoweza kuwa na haki, kutokamilika huenda kukatuongoza kwenye kutenda katika njia isiyozuilika, mbaya. Kwa sababu hiyo, inatupasa sikuzote tuongozwe na kanuni hii: “Wapenzi, msijilipize kisasi, bali ipisheni ghadhabu ya Mungu; maana imeandikwa, Kisasi ni juu yangu mimi; mimi nitalipa, anena [Yehova, NW].” (Warumi 12:19) Kumbuka, pia, kwamba sisi tukiwa wanadamu wasiokamilika, huenda tukakosea. Basi, ni jambo la hatari, kuwahukumu wengine kwa haraka kusingizia hasira ya uadilifu. —Yakobo 2:13; 4:11, 12; 5:9.

Kulingana na Maandiko, sisi tunaishi katika wakati wa mwisho. Katika hizi siku za mwisho, “mataifa walikasirika” dhidi ya Ufalme wa Mungu, na Ibilisi ana “ghadhabu nyingi, akijua ana wakati mchache tu.” (Ufunuo 11:17, 18; 12:10-12) Basi kuishi kwetu kulingana na Neno la Mungu ndiyo njia pekee yenye usalama kwetu. (Zaburi 119:105) Upesi, Mungu atatoa hukumu miongoni mwa mataifa, na dunia itasafishwa na kuondolewa ukosefu wote wa uadilifu. (Isaya 35:10; 65:23; Mika 4:3, 4) Katika wakati uliopo, sisi tunahitaji kuwa na uhakika kwamba hatuigi njia za ulimwengu huu wenye hasira. Kuzuia hasira yetu ifaavyo kutasaidia kuhifadhi upendo wa ndoa, umoja wa Kikristo, na amani na furaha ya kibinafsi. Na jambo la muhimu zaidi, kutatusaidia sisi tuendelee kufurahia kibali na baraka ya Yehova Mungu.—Zaburi 119:165.