Maswali Kutoka kwa Wasomaji

■ Ni nini “kitabu cha uzima” cha Mungu, na jina langu linaweza kuandikwa na kudumishwaje humo?

Maandiko mbalimbali ya Biblia yanaonyesha kwamba Yehova Mungu ana “kitabu,” au “hatikunjo,” kinachoorodhesha watu waaminifu walio katika mstari wa kupokea uzima wa milele, iwe ni mbinguni au duniani.

Akiwa kwenye mbingu yule Mungu wa kweli anaona wanadamu wanaodhihirisha imani, wakistahili kibali chake na ukumbuko. Tunasoma hivi kuhusu Wayahudi fulani katika siku za Malaki: “Ndipo wale waliomcha Bwana [Yehova, NW] waliposemezana wao kwa wao. Naye Bwana [Yehova, NW] akasikiliza, akasikia; na kitabu cha ukumbusho kikaandikwa mbele zake, kwa ajili ya hao waliomcha Bwana [Yehova, NW], na kulitafakari jina lake.”—Malaki 3:16.

Kwa wazi, kutoka wakati wa Abeli na kuendelea mbele, Mungu amekuwa akiona, kama kwamba akiwaandika katika kitabu, wale katika ulimwengu wa wanadamu wanaoweza kuokolewa ambao wanapaswa kukumbukwa wapewe uzima wa milele. (Mathayo 23:35; Luka 11:50, 51) Wakristo wapakwa-mafuta, pia, wameandikwa ‘majina katika hiki kitabu cha uzima,’ au kitabu cha ukumbuko ili wapokee uzima wa milele; na kwao huo utakuwa uzima wa kimbingu. (Wafilipi 3:14, 20; 4:3) Kwa kutofautisha, Ufunuo 17:8, NW, unasema hivi juu ya wale ‘wanaoshangaa kwa kusifu mno’ kuhusu “yule mnyama-mwitu”: “Majina yao hayajaandikwa juu ya ile hatikunjo ya uzima tangu kuwekwa msingi wa ulimwengu.”

Kuonwa kwa mtu kwa ukumbuko na kibali (kuwa na jina lake “katika kile kitabu cha uzima”) hakumaanishi anapewa uhakikisho kamili wa uzima wa milele, kama kwamba hilo ni jambo lililoandikiwa maisha yao tangu kale au lisiloweza kubadilishwa. Kuhusu Waisraeli, Musa alimwomba Yehova hivi: “Sasa, ikiwa utawasamehe dhambi yao—na kama sivyo, unifute, nakusihi, katika kitabu chako ulichokiandika.” Mungu alijibu hivi: “Mtu ye yote aliyenitenda dhambi, ndiye nitakayemfuta katika kitabu changu.” (Kutoka 32:32, 33) Ndiyo, hata baada ya Mungu kuorodhesha mtu fulani kwa kibali katika “kitabu” chake, mtu huyo angeweza kuwa asiye mtiifu au kuacha imani yake. Kama jambo hilo lingetukia, Mungu ‘angelifuta jina lake katika kitabu cha uzima.’—Ufunuo 3:5.

Kwa upande ule mwingine, ikiwa sasa majina yetu yamo katika “kitabu cha uzima” cha Mungu, au “kitabu cha ukumbusho,” sisi tuna sharti la kuendelea kujizoeza imani. Kwa njia hiyo tutadumisha majina yetu humo. Vivyo hivyo, watu wanapoendelea kuinuliwa katika ‘ufufuo wa wasio waadilifu’ unaokuja, wao watapata nafasi ya kujizoeza imani na kwa sababu hiyo wastahili kuandikwa majina yao katika kitabu hicho. (Matendo 24:15) Mwishowe, watu mmoja mmoja walioandikwa hivyo wataweza kudumisha majina yao humo daima. Hivyo ndivyo ilivyo juu ya wapakwa-mafuta wanapoendelea kujithibitisha‘waaminifu hata kufa.’ (Ufunuo 2:10; 3:5) Kwa habari ya wale walio na mataraja ya kidunia, kwa kujithibitisha waaminifu sasa, moja kwa moja mpaka Utawala wa Mileani ya Kristo ukamalizike, na ndipo walipite jaribu litakalofuata la kukata maneno, majina yao yatakuwa ‘yameandikwa katika kile kitabu cha uzima’ daima.​—Ufunuo 20:5-15, NW.