Kuwa Mhudumu Mwagizwa Rasmi Njia ya Mungu!

INAELEKEA kwamba mgeni mwenye kuzuru angalivutiwa ajabu—labda hata kufadhaishwa—na aliyosikia. Tamasha yenyewe ilikuwa mkusanyiko mmoja wa Mashahidi wa Yehova. Hotuba ilikuwa ikitolewa kwa kikundi cha watu waliokuwa karibu kubatizwa. Kwa kushangaza, mnenaji aliambia hawa wenye kutaka kubatizwa hivi: “Kuwapo kwako katika kikundi hiki cha wenye kutaka kubatizwa kunaonyesha tamaa yako ya kuwa mhudumu mwagizwa rasmi wa Ufalme.”

‘Inaweza kuwa hivyo jinsi gani?’ huenda mgeni mwenye kuzuru akawa aliuliza. ‘Je! ubatizo si kwa ajili ya watu walioanza kujua habari za Ukristo juzi tu—na kwa ajili ya watoto wachanga? Je! haichukui miaka kadha ya kuzoezwa na kuelimishwa sana ili kuwa mhudumu mwagizwa rasmi’? Labda wewe ungefikiri kwa kutegemea sababu kama hiyo. Lakini huenda wewe ukashangazwa na mambo ambayo kwa kweli Biblia inasema nini juu ya ubatizo na kuagizwa rasmi.

Kabla ya Mmoja Kubatizwa

Kwanza, ubatizo si kwa ajili ya watu wasiofahamiana sana na ujumbe wa Kikristo. Biblia, kwenye Matendo 8:12, NW, inaonyesha kwamba watu katika karne ya kwanza walibatizwa baada ya ‘wao kuitikadi.’ Mathayo 28:19 inaonyesha pia kwamba ni lazima mtu awe “mwanafunzi” kabla ya ubatizo. Na ni jinsi gani mmoja anavyokuwa ‘mwitikadi,’ au ‘mwanafunzi,’ (‘mfunzwa’)? Ni kupitia funzo la uangalifu la Biblia! Katika njia hii, mtu anapata maarifa sahihi juu ya Yesu na Yehova Mungu. (Yohana 17:3) Ni baada tu ya kupata maarifa haya mwanafunzi anakuwa katika hali ya kufikiria kubatizwa. Katika karne ya kwanza Wakristo waliokwisha kuwa thabiti waliwapa waongofu wapya maagizo hayo.​—Matendo 8:31, 35, 36.

Katika makundi ya Mashahidi wa Yehova leo, mipango inafanywa vivyo hivyo kwa ajili ya watu mmoja mmoja wanaopendezwa ili wafurahie kuwa na funzo la nyumbani la Biblia bila malipo. Mtu mwenye moyo wa kuitikia anakuja pole kwa pole kuthamini mambo anayojifunza. Yeye anavutwa kushiriki pamoja na wengine masadikisho yake aliyoyapata karibuni. (Warumi 10:8-10) Yeye anaanza kuhudhuria mikutano ya Kikristo kwa ukawaida ambako yeye anapata maagizo mengi zaidi ya Kibiblia. (Waebrania 10:24, 25) Na baada ya majuma au miezi ya jambo hili, yule mwitikadi mpya anakuza tamaa ya kufuata shauri la Biblia kwenye Warumi 12:1, NW: “Kwa hiyo mimi nawasihi ninyi kwa huruma za Mungu ndugu, mtoe miili yenu iwe dhabihu iliyo hai, takatifu, yenye kukubalika kwa Mungu, utumishi mtakatifu pamoja na nguvu zenu za kufikiri.”

Hata hivyo, maarifa peke yayo hayastahilishi mmoja kufanya wakfu huu. Ni lazima mmoja atubu pia na ‘kugeuka.’ (Matendo 3:19) Kwa nini iko hivyo? Kwa kusema wazi, watu fulani wamekuwa na mitindo ya maisha ya ukosefu wa adili kabla ya kupata kujua viwango vya Mungu. Wengine wamekuwa wamehusika mno katika shughuli za kufuatia mambo ya ubinafsi. Lakini ili wajitokeze wenyewe kwa Mungu wakiwa ‘watakatifu, wanaokubalika,’ ni lazima waonyeshe majuto kwa vitendo hivyo vya wakati uliopita. Ni lazima waone majonzi kwa kuwa walitumia maisha yao, siha yao, na uwezo mbalimbali katika shughuli zisizo za Kimaandiko. Ni lazima majonzi hayo yaambatane na kitendo kinachofaa ili kwa kweli ‘wageuke,’ au wabadili mwendo wao wa maisha.

Ili kumsaidia zaidi mwitikadi yule mpya, wazee wa Kikristo wanapanga kukutana pamoja naye na kutumia wakati wakipitia mafundisho yale ya msingi ya Biblia. Hiyo, kwa upande mmoja, inahakikishia wazee kwamba huyo anayetazamiwa kuwa Mkristo amejipatia maarifa sahihi ya makusudi ya Mungu. Na, bila shaka, pitio hilo linathibitika kuwa lenye msaada sana kwa mwanafunzi huyo. Kwa kadiri inayohitajiwa, mambo fulani ambayo hayakueleweka kwa usahihi yanaeleweshwa wazi.

Kwa ujumla mabatizo hufanywa kwa kuhusiana na mikusanyiko au makusanyiko ya Mashahidi wa Yehova. Katika pindi hizo, hotuba yenye kutaja mambo waziwazi inatolewa kwa wanaotaka kubatizwa. Wao wanakumbushwa kwamba ubatizo si jambo la kujiunga na dini mpya. Yesu alisema: “Ikiwa mmoja ye yote anataka kuja baada yangu mimi, acheni akane kuwa wa yeye mwenyewe na kuinua mti wa mateso wake na kuendelea kunifuata mimi.”​—Mathayo 16:24, NW.

Wenye kutaka kubatizwa wanazidi kukumbushwa juu ya umaana wenye kina kirefu wa ubatizo. Mara nyingi lile andiko kwenye 1 Petro 3:21, NW, husomwa: “Lile linalolingana na hili pia linaokoa ninyi sasa, yaani, ubatizo, (si kuondolewa kwa uchafu wa mwili, bali ombi linalotolewa kwa Mungu ili kupata dhamiri njema,) kupitia ufufuo wa Yesu Kristo.” Hapa, Petro analinganisha ubatizo na aliyojionea Noa kwa kupita katika maji ya ile Gharika. Ingawa maji hayo yalithibitika kuwa yenye kufisha idadi ya waovu duniani, yalithibitika kuwa yenye kuokoa uhai kwa Noa yalipomchukua juu-juu kwa usalama akiwa katika safina. Vilevile, ubatizo ‘huokoa’ Wakristo kutoka kwenye ulimwengu huu mwovu. Wakati mtu fulani, kwa kutegemea msingi wa imani yake katika manufaa za kifo na ufufuo wa Yesu Kristo, anapobatizwa, mtu huyo, katika maana fulani, yumo katika hali ya ‘kuokolewa’ mbele za Mungu. Yeye haonwi tena kuwa sehemu ya kizazi hiki kiovu kilichohukumiwa uharibifu.​—Ona Matendo 2:40, NW.

Basi, kubatizwa si hatua inayopasa kuchukuliwa kwa kusisimuka hisia za moyoni tu, kama inavyotukia mara nyingi kwenye mikutano ya kuwatia nguvu mpya wanadini waliopoa. Unaokazia jambo hili ni uhakika wa kwamba kabla wanafunzi wapya hawajazamishwa, mhudumu mwenye kusimamia kwenye ubatizo anawauliza maswali mawili yenye kupenya. Majibu yao ya kusema ndiyo ni “tangazo la peupe” la imani yao katika ukombozi na uhakika wa kwamba wao wamejiweka wakfu wenyewe kwa Yehova bila kuweka masharti yo yote. (Warumi 10:9, 10, NW) Sasa wao wako tayari kwa ubatizo wa maji.

Wanaagizwa Rasmi Wawe Wahudumu wa Ufalme

Uzamisho kamili katika maji ni ishara inayofaa ya wakfu wao kwa Mungu. Wanapokuwa chini ya maji, ni kama kwamba wao wamekufa kuhusiana na mwendo wa maisha yao wa hapo kwanza. Wanapokuja nje kutoka majini, ni kama kwamba wao sasa wanaishi kuhusiana na mwendo mpya wa kujidhabihu katika utumishi kwa Mungu.​—Linganisha Warumi 6:2-4.

Ingawa hivyo, ni jinsi gani kuagizwa rasmi kunavyopatana na ile hatua ya ubatizo? Angalia yale ambayo Cyclopædia of Biblical, Theological, and Ecclesiastical Literature ya M’Clintock na Strong (1877), Buku 7, ukurasa 411, inavyosema: “Kuagizwa rasmi kunamaanisha kuwekwa rasmi au kuelekezwa kwa mtu kwenye ofisi fulani ya kihuduma, iwe ina sherehe zenye kuambatana nayo au haina.” (Italiki ni zetu.) Hiyo inakiri kwamba hakuna uhitaji wa sherehe yenye mambo mengi au cheti cha kuagizwa rasmi kuwa mhudumu wa Kikristo.

Lakini je! Biblia inafundisha jambo hili? Fikiria Yesu Kristo. Hakuna swali kwamba alikuwa ndiye mhudumu wa Mungu aliye wa mbele kabisa. Hata hivyo, je! yeye alikuwa na sherehe fulani yenye mambo mengi ya kuagizwa rasmi kabla ya kuanza kazi yake ya kuhubiri? Je! yeye alikuwa na cheti cha kumtambulisha kuwa mhudumu? Sivyo kabisa. Ni baada ya yeye kubatizwa katika maji kwamba Mungu alionyesha ukubali wake kuwa Yesu ni Mwanaye na kumwagiza rasmi awe mhudumu Wake.​—Marko 1:9-11; Luka 4:18-21.

Namna gani juu ya Wakristo wa karne ya kwanza? Hakuna ripoti yo yote ya kwamba wahudumu hawa wa Kikristo wa mapema waliagizwa rasmi kwa njia ya kujionyesha. Kumbukumbu lililoandikwa kwenye Matendo linaeleza kwa kurudia-rudia kwamba mabatizo ya waitikadi yalifanywa bila kuhusisha ndani mambo mengi. Jambo hili lilifuatwa na kushiriki kwao kwa bidii katika huduma ya peupe.​—Ona Matendo 2:41-47; 8:36-39; 22:14-16.

Wahudumu hao walikuwa na ithibati gani juu ya kuagizwa rasmi kwao? Paulo anasema kwenye 2 Wakorintho 3:1-3, NW: “Je! sisi tunaanza tena kujipendekeza wenyewe? Au je! sisi, labda, kama wanaume fulani, tunahitaji barua za pendekezo kuwapa ninyi au kutoa kutoka kwenu ninyi? Ninyi wenyewe ni barua yetu, iliyoandikwa juu ya mioyo yetu na kujulikana na kusomwa na aina ya binadamu yote. Kwa maana ninyi mnaonyeshwa kuwa barua ya Kristo iliyoandikwa nasi tukiwa wahudumu, iliyoandikwa si kwa wino bali kwa roho ya Mungu aliye hai, si juu ya mbao za mawe, bali juu ya mbao za kimnofu, juu ya mioyo.” Tokeo la roho ya Mungu juu ya mioyo hii iliyofundishwa lilitokeza utu mpya wa Kikristo, ambao ungeweza kusomwa na watazamaji wote. Huu ulikuwa ushuhuda wa kutosha kwamba kweli kweli Mungu alikuwa amewaagiza rasmi wenye kushiriki katika kufundisha wanafunzi hawa wapya.

Kujitahidi Mwenyewe Katika Huduma

Vilevile leo, mhudumu anatambuliwa kwa kazi zake. Yeye anafanya kwa moyo ‘kujitahidi mwenyewe kisulubu’ katika huduma yake. (Luka 13:24, NW) Yeye anaona huduma yake kama pendeleo kubwa kutoka kwa Mungu. Haichukui kivivi-hivi.​—1 Timotheo 1:12-16.

Kuhubiri Ufalme ndio wajibu wa kwanza kabisa wa wahudumu hao. Shughuli nyinginezo zote lazima ziwekewe mpaka ili wao waweze ‘kutimiza kikamili huduma yao.’ (2 Timotheo 4:2, 5, NW) Bila shaka, ni lazima wao watunze mahitaji yao wenyewe ya kimwili na pia ya jamaa zao. Hata hivyo, wao ‘wanaridhika na chakula na nguo.’ Hawaruhusu shughuli za kibinafsi au tamaa za kibinafsi ziwaondoshee fikira kwenye huduma. (1 Timotheo 5:8; 6:7, 8; Wafilipi 2:20-22) Wao wanahakikisha juu ya “mambo yaliyo ya maana zaidi.” (Wafilipi 1:10, NW) Wao wanajitahidi kujiwekea mbele yao wenyewe kielelezo kile kizuri cha Yesu Kristo, ambaye maisha yake yalitegemea hasa kuuhubiri Ufalme.​—Luka 4:43; Yohana 18:36, 37.

Hata hivyo, wakati mtu anapobatizwa kuwa mhudumu aliyeagizwa rasmi, kwa kweli yeye yumo katika hatua za mapema za utumishi wake kwa Mungu. Ni kweli kwamba yeye amepata maarifa juu ya Kristo Yesu na Yehova mungu. Yeye amefanya pia mabadiliko mengi katika maisha yake ili kwamba huduma yake ya Kikristo isiweze kupatwa na kasoro. (2 Wakorintho 6:3) Bado Mkristo ambaye amebatizwa hivi karibuni anapaswa kukua sana. Ubatizo wake, unaomaanisha kuagizwa rasmi kwake, ni hatua moja tu iliyo kubwa katika ukuzi wake akiwa Mkristo. (Wafilipi 3:16) Basi, ni lazima kila mhudumu aliyeagizwa rasmi aendelee kujenga uthamini wake wa moyoni kwa mambo ya kiroho. Anahitaji kuratibu wakati kwa ajili ya funzo la kibinafsi. Inampasa atumie kwa faida maandalizi yote yaliyofanywa ili kundi likutane pamoja. Inampasa ajitahidi kufanyia maendeleo ubora wa sala zake, hiyo ikitokeza uhusiano wa kibinafsi ulio wa karibu zaidi pamoja na Mungu.​—Luka 6:45; 1 Wathesalonike 5:11; 1 Petro 4:7.

Sisi tunatumaini mawazo haya ya Kimaandiko yamekusaidia kuelewa kwa nini digrii ya chuo kikuu si takwa kwa wale wanaotaka kutumikia wakiwa wahudumu wa Mungu. Zaidi ya milioni tatu za Mashahidi wa Yehova wanatumikia Mungu kwa imani wakiwa wahudumu wake, wakizitangaza kweli zilizotajwa katika Neno lake. Kwa nini usiache mmoja wao akusaidie wewe katika kupata maarifa ya kujua Biblia?

[Picha katika ukurasa wa 29]

Kulingana na Biblia, mhudumu wa Kikristo anaagizwa rasmi kwenye ubatizo