Vita Ambayo Itavimaliza Vita

MELI-ANGA ya Ujeremani iliyo kubwa sana ilipita polepole ikitutuma angani wakati wa usiku. Ilikuwa ikirudi kwenye maskani ya kwao baada ya kuvamia London, na ilipokuwa ikipita juu ya kijiji kimoja katika Essex, makombora yaliangushwa. Moja la hayo liliua mwuguzi mmoja aliyekuwa katika likizo kutoka vitani Ufaransa.

Hilo lilikuwa tukio dogo la matukio mengi ya Vita ya Ulimwengu 1, lakini lilikuwa na mimaanisho mikubwa sana. Lilikuwa kielelezo cha jinsi karne ya 20 imekuwa na usitawi mkubwa mno wa silaha na nyanja za vita pia, ikiwa mbali sana na kuleta wakati ambao mwanadamu ‘hangejifunza vita tena.’ (Isaya 2:2-4) Kwa maelfu ya miaka, vita vimepiganwa katika bara na juu ya uso wa bahari. Lakini katika Vita ya Ulimwengu 1, pigano hilo lilienea juu mpaka ndani ya anga na kule chini ya uso wa bahari. Tokeo ni kwamba, raia waliokuwa mamia ya kilometa kutoka kwenye safu za pigano waliuawa na makombora, na meli nyingi zilididimizwa kwenye sakafu ya bahari kuu na sabmarini ambazo hazikuonwa.

Kweli kweli, wakati wa vita hiyo ya kwanza ya ulimwengu iliyo mbaya sana, askari milioni 8 walikufa katika pigano hilo, na raia waliokadiriwa kuwa milioni 12 wakafa kutokana na visababishi ambavyo vilikuwa ni pamoja na ukosefu mkubwa wa chakula na kuachwa bila kinga ya hali mbaya sana ya hewa. “Msiba wa ile Vita Kuu [Vita ya Ulimwengu 1],” kulingana na mwanahistoria H. A. L. Fisher, “ulikuwa kwamba ilipiganwa kati ya jamii za watu walioerevuka zaidi katika Ulaya kuhusu suala ambalo lingaliweza kumalizwa kwa urahisi na watu wachache wenye akili za kiasi.” Ili kutetea machinjo yale ya kuogofya sana, hiyo iliitwa “vita ya kuvimaliza vita.” Lakini muda si muda kifungu hicho cha maneno kikaja kusikika sana kuwa kisicho na maana.

Tengenezo la Amani

Amani ilipokwisha kutangazwa katika 1918, kizazi chenye uchungu mkali kilidai kwamba hatua zichukuliwe kuhakikisha kwamba vita kama hiyo haingaliweza kamwe kutukia tena. Hivyo, Ushirika wa Mataifa ulizaliwa katika 1919. Lakini Ushirika huo ulikuwa mtamausho mkubwa. Katika 1939 ulimwengu ulitumbukizwa tena ndani ya vita ya ulimwengu​—vita iliyokuwa ya kufisha zaidi hata kuliko ile ya kwanza.

Katika Vita ya Ulimwengu 2, majiji mengi yaliharibiwa yakabaki mabomoko, uhai wa raia ukifanywa kuwa kama jinamizi la usiku tu. Halafu katika 1945 makombora ya atomi yakaangushwa juu ya Hiroshima na Nagasaki, hiyo ikiingiza mwanadamu katika kipindi cha nyukilia. Yale mawingu-uyoga ya kutisha ambayo yaliinuka juu ya majiji hayo mawili ya Kijapani yalikuwa matabiri ya tisho ambalo limening’inia juu ya aina ya binadamu muda wote wa tangu hapo.

Ijapokuwa hivyo, hata kabla ya makombora hayo kuanguka, matayarisho yalikuwa yakifanywa ili kuanzisha tengenezo lililo kama Ushirika wa Mataifa uliokufa. Tokeo likawa ni lile Tengenezo la Umoja wa Mataifa, ambalo kwa msingi lilikuwa na lengo lile lile kama mtangulizi walo​—la kudumisha amani ya ulimwengu. Hilo limetimiza nini? Eeh, hakujawa na vita yoyote ya ulimwengu tangu 1945, lakini kumekuwa na vita vingi vilivyo vidogo zaidi ambamo mamilioni ya watu wamekufa.

Je! hiyo inamaanisha kwamba aina ya binadamu haitaona kamwe utimizo wa ile ahadi ya Mungu kupitia Isaya kwamba watu ‘hawatajifunza vita tena’? Sivyo. Inamaanisha tu kwamba jambo hilo halitaletwa na mwanadamu. Biblia, ambayo inaitwa ‘mwanga wa njia yetu,’ ndicho kitabu kilicho na ahadi hiyo iliyovuviwa. Na Biblia ndiyo inayoonyesha kwamba hakuna mwingine ila Mungu mwenyewe ambaye hatimaye atakomesha vita vyote.​—Zaburi 119:105.

Mwisho kwa Vita Vyote

Kama ilivyotajwa katika makala iliyotangulia, kulikuwako kikundi kimoja katika karne ya kwanza ambacho kilianzisha udugu wa kimataifa ambamo lingalikuwa jambo lisilofikirika kwa mshiriki mmoja kufanya vita dhidi ya ndugu au dada yake. Hicho kilikuwa lile kundi la Kikristo, ambalo washiriki walo katika maana halisi sana walikuwa ‘wamefua panga zao zikawa makasi ya kupogolea.’ Leo, ingawa aina ya binadamu kwa ujumla haiwezi kutokeza njia ya kufutilia mbali vita, hapa tena pana kikundi cha watu ambao wametimiza mradi uo huo ulio wa kustaajabisha. Hao ni akina nani?

Katika miaka iliyotangulia 1914, kikundi hicho kidogo kilikuwa na uhakika katika Biblia. Kwa sababu hiyo, wao walijua kwamba jitihada za wanadamu kufutilia mbali vita hazingefanikiwa. Kutokana na funzo lao la Biblia, wao walipata kujua kwamba mwaka 1914 ungekuwa hatua ya badiliko kubwa katika historia ya kibinadamu, na wakatoa onyo la jambo hilo kwa miaka 40. Kwa kutimiza ukweli wa unabii wa Biblia, 1914 ukawa mwanzo wa wakati wenye kutiwa alama na njaa kubwa-kubwa, magonjwa ya kipuku, na matetemeko ya dunia, na pia vita. (Mathayo 24:3, 7, 8; Luka 21:10, 11) Kwa habari ya Vita ya Ulimwengu 1, mwanahistoria James Cameron aliandika hivi: “Katika 1914 ulimwengu, kama ulivyojulikana na kukubaliwa wakati huo, ulikuja kwenye mwisho.”

Kabla ya vita hiyo kwisha, kipuku cha homa kali sana kilitokea duniani pote na kuua watu milioni 20—zaidi ya mara mbili za hesabu ya askari waliokufa katika ile vita yenyewe. Tangu wakati huo, magonjwa kama vile kansa na, hivi majuzi zaidi, UKIMWI yameogofya sana aina ya binadamu.

Sasa angalia unabii mwingine wa Biblia: “Na kwa sababu ya kuongezeka kwa kutokutii sheria upendo wa wengi zaidi utapoa.” (Mathayo 24:12, NW) Je! jambo hilo linatimizwa? Kwa uhakika! Kila siku, vyombo vya habari vinafichua wazi ukosefu wa kutokutii sheria ulimwenguni pote: mauaji, matendo ya kuvizia watu, na fujo-fujo za ujumla. Zaidi ya hilo, utabiri mmoja wa kisiasa kwa habari ya Vita ya Ulimwengu 2 ulikuwa kwamba hiyo ingeleta “uhuru wa kutokuwa na hofu.” Kwa utofautiano, Biblia ilitabiri kwa usahihi kwamba watu ‘wangezirai kwa sababu ya woga na taraja la vitu vinavyokuja juu ya dunia inayokaliwa.’ (Luka 21:26, NW) Kwa mara nyingine tena matabiri ya kibinadamu yalikosea, na maneno ya Mungu ya kiunabii yakawa kweli.

Muundaji Vita Aliye Mkuu

Muundaji vita ni mmoja ambaye huchochea vita. Wanasiasa, makasisi, na hata wafanya biashara wamekuwa na fungu hilo. Lakini muundaji vita aliye mkubwa zaidi si mwingine ila Shetani Ibilisi, ambaye katika Maandiko anaitwa “mungu wa huu mfumo wa mambo.”​—2 Wakorintho 4:4, NW.

Shetani Ibilisi aliasi dhidi ya Yehova Mungu mileani kadhaa zilizopita, na baadaye yeye alitongoza kikosi kikubwa cha malaika wajiunge naye. Lakini katika 1914 wakati wake ukawa umeisha. Biblia inatuambia hivi: “Kulikuwa na vita mbinguni; Mikaeli na malaika zake wakapigana na yule joka; yule joka akapigana nao na malaika zake, nao hawakushinda, wala pahali pao hapakuonekana tena mbinguni. Yule joka akatupwa, yule mukubwa, nyoka ya zamani anayeitwa Diabolo, na Shetani, anayedanganya dunia yote; akatupwa hata dunia, na malaika zake wakatupwa pamoja naye.”​—Ufunuo 12:7-9, ZSB.

Hiyo inaeleza ni kwa nini dunia imekuwa ikiwa mahali hatari hivyo tangu 1914. Biblia ilitabiri tokeo la kuanguka chini kwa Shetani: “Ole wao wanaokaa kwa dunia . . . Kwani yule Diabolo ameshuka kwenu mwenye gazabu nyingi kwa sababu anajua ana wakati mufupi tu.” (Ufunuo 12:12, ZSB) Wakati mfupi kadiri gani? Yesu alisema hivi: “Kizazi hiki [kile chenye kuona matukio yaliyoanza katika 1914] hakitapita, hata hayo yote yatakapotimia.” (Mathayo 24:34) Mambo gani hayo? Misiba yote na msukosuko ambao Yesu aliyatolea unabii kwa ajili ya siku yetu.

Hata hivyo, Biblia inaonyesha kwamba ijapokuwa Ushirika wa Mataifa ulimalizika ghafula na sasa Tengenezo la Umoja wa Mataifa liko hoi, mataifa hayangekomesha jitihada zayo yenyewe za kufanya amani. Kweli kweli, wakati utakuja ambapo wao watafikiri wamefanikiwa. Kutakuwa mpaazo mkubwa wa sauti juu ya “amani na usalama,” lakini hiyo itafuatwa na “uharibifu wa ghafula” wa ulimwengu huu mfisadi. Kwa kuwa wamo katika giza, watu watashtukiwa na mbadiliko huo wa matukio, ambao utakuja “kama mwivi usiku.”​—1 Wathesalonike 5:2, 3, NW.

Hiyo itaongoza kwenye nini? Kwenye vita ambayo kwa kweli ni “vita ya kuvimaliza vita”: pigano la Har–Magedoni, ambalo katika Biblia linaitwa “vita ya siku ile kuu ya Mungu Mwenyezi.” Hiyo itamaanisha uharibifu wa viasili vyote vya uovu na wenye kuviunga mkono. “Watenda mabaya wataharibiwa.” (Ufunuo 16:14-16; Zaburi 37:9) Hatimaye, Shetani, yule muundaji vita aliye mkuu, atazuiliwa katika mahali ambamo yeye hawezi tena kuwa na uvutano juu ya wanadamu. Mwishowe, yeye pia ataharibiwa.​—Ufunuo 20:1-3, 7-10.

Hata hivyo, angalia kwamba hiyo haitakuwa vita ya uharibifu usiotumia akili wenye kuwachinja kijinga wasio na hatia na wenye hatia hali kadhalika. Kutakuwa na waokokaji, na hao watakuwa ni wale ambao “wanatolea [Mungu] utumishi mtakatifu mchana na usiku.” Ndiyo, wale wanaokoma kujifunza vita hata sasa na ambao wanafuata njia za amani za Mkristo wa kweli wataokoka vita hiyo kuu, iliyo ya mwisho. Je! watakuwa wengi? Biblia inawaita “umati mkubwa, ambao hakuna mwanadamu aliyeweza kuhesabu, kutoka mataifa yote na makabila na jamii za watu na ndimi.”​—Ufunuo 7:9, 14, 15, NW.

Baada ya Ile Dhoruba

Ni kitulizo kilichoje ambacho hawa watahisi! Badala ya serikali nyingi zenye kutukuza mataifa yazo, kutakuwa na serikali moja: Ufalme wa Mungu. (Danieli 2:44; Mathayo 6:9,10) Badala ya walio na kiburi na tamaa ya makuu, wasikivu watarithi dunia na “watajifurahisha kwa wingi wa amani.” (Zaburi 37:10, 11) “Mungu mwenyewe . . . atafuta kila chozi katika macho yao, wala mauti haitakuwapo tena; wala maombolezo, wala kilio, wala maumivu hayatakuwapo tena.” (Ufunuo 21:3, 4) Yehova ‘atavikomesha vita hata mwisho wa dunia.’ Panga zitafuliwa ziwe majembe ya plau, mikuki iwe makasi ya kupogolea, na “hawatajifunza vita tena.”​—Zaburi 46:8, 9, UV; Isaya 2:4, NW.

Je! wewe hungependa kuishi katika ulimwengu wa jinsi hiyo? Bila shaka ungependa! Basi, uwezekano upo. Hatua ya kwanza ni kujifunza Neno la Mungu, Biblia, na kujihakikishia mwenyewe kwamba tumaini hilo ni la kweli na lina msingi timamu. Halafu, upate kujua kutokana na Biblia mapenzi ya Mungu ni nini kwako sasa na utende kulingana nayo. Ni kweli, funzo linamaanisha jitihada, lakini inastahiki kufanya jitihada hiyo. Yesu alisema kwamba maarifa yale unayopata yatamaanisha “uzima wa milele,” ikiwa utayatumia ifaavyo. (Yohana 17:3) Je! kuna kitu chochote kilicho cha maana kuliko hicho?