Paradiso Iliyorudishwa Yamtukuza Mungu
“Nami nitapatukuza mahali pa miguu yangu.”—ISAYA 60:13.
1, 2. (a) Kupitia mnabii wake Isaya, Mungu alitabiri nini kuhusu dunia? (b) Tunapotazama miaka elfu moja ndani ya wakati ujao, twaona nini?
YEHOVA aliiumba dunia iwe sayari iliyo chini ya nyayo zake, iwe kibago cha ufananisho cha kuwekea nyayo zake. Kupitia Isaya mnabii wake, Mungu alitabiri kwamba yeye ‘angepatukuza mahali penyewe pa nyayo zake.’ (Isaya 60:13, NW) Kwa msaada wa Biblia iliyovuviwa, twaweza kutazama, kana kwamba kwa darubini yenye nguvu nyingi, miaka elfu moja ndani ya wakati ujao wa kibinadamu. Macho yetu yakabiliana na muono wenye uvutio wa kupindukia! Dunia nzima yang’aa kwa upendezi wa ajabu uliotokezwa na Mtunza-bustani aliye mkubwa wa wote katika ulimwengu wote mzima. Wakati huo aina ya binadamu itakuwa imerudishiwa Paradiso duniani pote!
2 Ndiyo, Mtu wa kimungu Aliye Mkubwa Zaidi ambaye alianzisha kuwako kwa mwanadamu katika paradiso ya kibustani afikiria kumpa mwanadamu furaha iliyo kubwa kupita zote. Ni vizuri kweli kweli kwa aina ya binadamu kuwa na Muumba mwenye upendo jinsi hiyo, ambaye kwa habari yake si uneni wa kutia chumvi kusema kwamba, “Mungu ni upendo”! (1 Yohana 4:8, 16) Katika Paradiso iliyorudishwa, wanaume na wanawake wakomavu wakaa pamoja katika ukamilifu wa kibinadamu usio na dosari yoyote wakiwa ndugu na dada wenye upendo. (Isaya 9:6) Kwa kusukumwa na upendo, wao wamo katika ujitiisho kamili kwa Muumba mtukufu wa mbingu na dunia, Yehova Mungu.
3, 4. (a) Mbingu na dunia zitalinganaje? (b) Malaika wataitikiaje Paradiso irudishwapo duniani?
3 Maelfu ya miaka kabla ya hapo, katika elezo lililovuviwa kimungu kuhusu makao yake, Mungu alinena maneno haya ya kuvutia kwa watu wake wachaguliwa: “Mbingu ni kiti changu cha ufalme, na dunia ni kibago cha kuwekea nyayo zangu.” (Isaya 66:1, NW) Utukufu wenyewe tu wa “kibago cha kuwekea nyayo” zake, ile dunia-Paradiso, wapasa ufaane na utukufu wa kiti chake cha enzi katika vile vimo vya juu visivyoonekana.
4 Wakati wa kuumbwa kwa dunia, wale waliokuwa wakitumikia kwenye kiti cha enzi cha Mungu waliifikiria tamasha ya kidunia iliyopo chini. Ni lazima wawe walihisi uvutio wa kupindukia wakati macho yao yalipokuwa yakiutazama mng’ao wayo mtukufu! Wangewezaje kujizuia kububujikwa na wimbo? (Linganisha Sefania 3:17, Revised Standard Version; Zaburi 100:2, The Jerusalem Bible.) Muumba mwenye kupendezwa na kufurahi alimvuvia mwandishi wake wa kidunia kuonyesha elezo sahihi la tamasha ya kimbingu, akisema: ‘Nyota za asubuhi ziliimba pamoja, na wana wote wa Mungu walipiga kelele kwa furaha.’ (Ayubu 38:7) Wana wa Mungu watapaaza sauti ya shangwe kubwa hata zaidi, kwa utukufu wa Mungu, wakati Paradiso itakaporudishwa!
5. Twapaswa kuhisije kuhusu mfikio wa shabaha ya Mungu ya awali kuhusu dunia?
5 Inatuchangamsha moyo kweli kweli kuhakikishiwa na Maandiko Matakatifu yaliyovuviwa kwamba shabaha ambayo Mungu alikuwa nayo tangu pale pale mwanzoni ni kwamba kuwe na mfikio mzuri ajabu wa dunia-paradiso. Upeo huu wenye kuvuvia shangwe na kuchochea sifa kuhusu kusudi la Mungu kwa dunia hii ndilo jambo lifaalo kabisa kutarajiwa kwa Mungu ambaye hutoka kwenye utukufu mmoja hadi utukufu mwingine bila kushindwa kuonyesha ubora wake uzidio. Sifa yote na imwendee huyo!—Zaburi 150:1,2; Isaya 45:18; Ufunuo 21:3-5.
Wenye Kufufuliwa Wasaidia Katika Kurudisha Paradiso
6. Baada ya Har–Magedoni, dunia itajazwaje wakaaji?
6 Ingawa waokokaji wa Har–Magedoni watakuwa wachache kwa ulinganisho, dunia haitajazwa watu kikamili kwa kuzaa watoto tu kwa upande wao. Yehova ‘atapatukuza pia mahali pa nyayo zake’ kwa kuwarudisha kwenye uhai wale walio katika makaburi ya ukumbusho ambao waja chini ya manufaa za dhabihu ya ukombozi ya Kristo. Hao, nao, watakuwa na pendeleo la kuishiriki kazi yenye upendezi tele ya kugeuza tufe letu la kidunia liwe paradiso yenye uzuri uzidio chochote kile.—Matendo 24:15.
7. Waokokaji wa Har–Magedoni watakumbuka maneno gani ya Yesu?
7 Waokokaji wa Har–Magedoni watayakumbuka muda wote maneno yenye kuichochea nafsi ya Bwana Yesu Kristo katika pindi ambapo yeye alisukumwa na moyo kusema hivi: “Msistaajabie maneno hayo; kwa maana saa yaja, ambayo watu wote waliomo makaburini [makaburi ya ukumbusho, NW] wataisikia sauti yake. Nao watatoka.” (Yohana 5:28, 29) Hiyo itakuwa saa nzuri wee, wakati wafu wa kibinadamu walio katika makaburi ya ukumbusho waanzapo kuisikia sauti ya Mwana wa Mungu ikisema maneno yenye kufanana na yale aliyoambiwa Lazaro, ambaye maiti yake ililala kaburini kule Bethania: “Lazaro, njoo huku nje”!—Yohana 11:43.
8, 9. Yaelekea ni nani watakaokuwa wa kwanza kufufuliwa waje kwenye uhai uliofanywa upya duniani, na hiyo ikiwaletea upendezi gani waokokaji wa Har–Magedoni?
8 Ni nani ambao yaelekea watakuwa ndio wa kwanza kufufuliwa kwenye uhai uliofanywa upya duniani chini ya Utawala wa Miaka Elfu wa Yesu Kristo na iwe hivyo kwa kuitikia amri yake? Kwa kusababu mambo vizuri wangekuwa ni “kondoo wengine” waliokufa katika siku za mwisho zilizoutangulia mwisho wa huu mfumo wa mambo. Wao watapata ufufuo wa mapema kidogo. (Yohana 10:16) Labda wao wangekuwa na ugumu kidogo sana katika kujirekebisha wafaane na ulimwengu mpya.—Linganisha Mathayo 25:34; Yohana 6:53, 54.
9 Itawapendeza kama nini waokokaji wa Har–Magedoni waonapo wakifufuliwa wale wa “kondoo wengine” waliokufa katika kizazi kilichokuwako kabla ya “dhiki kubwa”! (Mathayo 24:21) Kwa sababu wana nguvu za akili za kutambua watu vizuri, waokokaji wa Har–Magedoni wawatambua hao, wawakaribisha, na wakiwa pamoja nao waendelea kuufanya upya utumishi wao kwa Mungu Aliye Juu Zaidi!
10. Kwa kuokoka Har–Magedoni, huenda wewe ukashuhudia nini?
10 Kwa kuwa mmoja wa waokokaji wa Har–Magedoni, wewe waweza kushuhudia aliye wa kwanza kati ya watu wa ukoo wako mwenyewe wa kidunia akifufuliwa. Hisia zako za moyoni zingewezaje kupatwa na matokeo mengine ila yale tu yaliyowapata wazazi waliomwona Bwana Yesu akimrudisha binti yao wa miaka 12 awe hai kwenye mikono yao yenye hamu nyingi ya kumpokea? “Mara wakashangaa mshangao mkuu.” (Marko 5:42) He, jamani, wewe utapata shangwe isiyoneneka wakati wafu watakapokuwa wakifufuliwa kutoka Hadesi na baharini. (Ufunuo 20:13) Lo, hiyo itakuwa kesho tukufu kama nini, kesho ambayo muda si muda itafika!
“Wana-Wafalme Katika Dunia Yote”
11, 12. (a) Zaburi 45:16 yakazia nini upya? (b) Ni kutoka miongoni mwa nani Mfalme Yesu Kristo angeweza kuweka “wana-wafalme katika dunia yote”?
11 Kwa kujizoeza nguvu zake za kufufua wafu wa kibinadamu aliowatolea uhai wake mkamilifu wa kibinadamu uwe dhabihu ya ukombozi, Yesu ataweza kuitimiza Zaburi 45:16, NW. Mwenye kuambiwa yaliyomo katika zaburi hii kwa njia ya unabii ni Yesu Kristo akiwa Mfalme aliyetawazwa: “Katika mahali pa babu zako [wa kidunia] watakuja kuwa wana wako, ambao wewe utawaweka wawe wana-wafalme katika dunia yote.” Zaburi hii yakazia upya uhakika wa kwamba Yesu Kristo atakuwa baba wa kimbingu kwa watoto watakaokuwa hapa duniani na kwamba yeye ataweka wana kutoka miongoni mwao wawe “wana-wafalme katika dunia yote.” Akiwa ndiye “mwana wa Daudi” na akiwa ndiye mwana mzaliwa wa kwanza wa bikira Mariamu Myudea, Yesu alikuwa na babu wa kidunia walio wanadamu muda wote wa kurudi nyuma hadi kwa yule baba wa kwanza, Adamu.—Luka 3:23-38.
12 Je! Zaburi 45:16 inasema kwamba wale ambao hapo kwanza walikuwa baba za kiasili waliomtangulia Yesu watakuwa wanaye awafufuapo kutoka kwa wafu? Ndiyo. Je! Zaburi 45:16 inasema pia kwamba kwa sababu ya kuheshimu kwamba yeye alitokana na ukoo wao, Yesu atawaonyesha hao upendeleo wa pekee wa kifalme na kuwaweka wawe “wana-wafalme katika dunia yote” katika hali yayo ya Paradiso? Sivyo. Kuutimiza unabii kwa njia hiyo kungeruhusu kuwe na hesabu ndogo tu ya “wana-wafalme” katika dunia yote. Zaidi ya uhakika huo, si wote kati ya hawa babu wake waliokuwa wa kutokeza sana hata wastahili umashuhuri wa pekee duniani wakati wa Utawala wa Mileani yake. Mfalme Yesu Kristo atakuwa na watu wasiohesabika walio wengi kuliko babu zake wa kidunia wa kuwekwa wawe “wana-wafalme”—watu wenye kustahili kati ya waokokaji wa Har–Magedoni, wakiwa ni wa “kondoo wengine,” kutia na wanaume wenye imani wa wakati ulioutangulia Ukristo. Kutokana na wote hawa, yeye aweza kuweka watu wanaostahili washike cheo cha uana-ufalme wakiwa wawakilishi wake wa kidunia.
13, 14. Waokokaji wa Har–Magedoni watapendelewa kuwaona wafufuliwa gani kwa macho yao wenyewe?
13 Fikiria watu wa jinsi hiyo walio katika mstari wa kuelekea kufufuliwa chini ya Ufalme wa Kimesiya. Tazama! Je! haya si makubwa tuyaonayo kwa macho yetu? Abeli yule pale, mwanadamu wa kwanza kufia imani, na Enoki ndiye yule, aliyeendelea kutembea pamoja na Mungu wa kweli. Ndiye yule Noa, pia, yule mjenzi wa safina. Ndio wale akina Abrahamu, Isaka na Yakobo, babu wa taifa la Israeli. Musa wa kabila la kikuhani la Lawi na Daudi ambaye agano la milele kwa ajili ya Ufalme lilifanywa pamoja naye, ndio wale pale. Tena ona pale, Isaya, Yeremia, Ezekieli, Danieli, na wanabii wengine wote Waebrania walioandika Biblia na kuteremka chini hadi kwa aliye wa mwisho kati yao, Malaki, na, bila shaka, Yohana Mbatizaji na pia Yusufu, yule baba mlezi wa Yesu.
14 Katika pindi moja Yesu alisema kwa Wayahudi kwamba wao ‘wangeona Abrahamu na Isaka na Yakobo na wanabii wote katika ufalme wa Mungu, lakini [wao wenyewe] wakitupwa nje.’ (Luka 13:28, NW) “Umati mkubwa” wa waokokaji wa “vita ya ile siku kubwa ya Mungu Mweza Yote” watapendelewa kwa pendeleo la kuwaona kihalisi “Abrahamu na Isaka na Yakobo na wanabii wote” wafufuliwa wakirudi hapa katika dunia-Paradiso na katika utumishi wa kifalme chini ya Ufalme wa Mungu kupitia yule “Baba wa Milele,” Yesu Kristo.—Ufunuo 7:9, 14; 16:14; Isaya 9:6.
15. Ni pendeleo gani lisilolinganika lawangoja wale watakaookoka Har–Magedoni?
15 Litakuwa jambo lenye kuwachochea nafsi kama nini nyinyi mtakaookoka mwisho wa ulimwengu mwovu wa sasa kulinganisha maandishi ya habari mlizojiwekea pamoja na maandishi ya habari zilizowekwa na Noa na jamaa yake mwenyewe, “nafsi nane,” ambao waliokoka mwisho wa ulimwengu wa kwanza katika Gharika ya duniani pote katika 2370 K.W.K.! Hakuna mtu mwingine ye yote hadi umilele wote atakayekuwa amejionea mambo kama yako na hivyo aweze kutumikia akiwa Shahidi wa Yehova Mungu kwa njia hii ya kutokeza sana, isiyoweza kurudiwa.—1 Petro 3:20; Marko 13:19; 2 Petro 3:5-7.
Mtenda Maovu Mwenye Huruma Akumbukwa
16, 17. (a) Yesu amkumbukapo mtenda maovu mwenye huruma, waokokaji wa Har–Magedoni na wengine walio hai wakati huo watakuwa na pendeleo gani? (b) Ni tumaini gani lililopo kuhusu yule mtenda maovu mfufuliwa?
16 Bila shaka, kufikia wakati huo Paradiso itakuwa imeanza kurudishwa duniani. Yule mtenda makosa aliyetundikwa mtini juu ya Kalvari akiwa kando ya Yesu halafu kwa kuitambua ishara iliyokuwa juu ya kichwa Chake akasema, “Yesu, nikumbuke utakapoingia katika ufalme wako,” atafufuliwa kwenye uhai wa kidunia katika Paradiso itakayorudishwa. (Luka 23:42) Litakuwa pendeleo la waokokaji wa Har–Magedoni na wengine watakaokuwa hai wakati huo kumpokea arudi kutoka kwa wafu. Watamfundisha kikamili kuhusu Mfalme anayetawala sasa, Yesu Kristo, ambaye yeye alimwonyesha huruma ya kina kirefu siku ya Nisani 14 ya mwaka 33 W.K.
17 Bwana Yesu Kristo hatashindwa kumkumbuka yeye wakati fulani katika utawala Wake wa miaka elfu moja. Bila shaka mtenda maovu huyo mfufuliwa mwenye huruma ataonyesha uthamini wake kwa Mfalme anayetawala, Yesu Kristo, ambaye kwake ana deni la ufufuliwa wake, kwa kuthibitisha uaminifu wake kwa Mwenye Enzi Kuu wa ulimwengu wote mzima, Yehova Mungu. Hapo ndipo angehesabiwa kuwa anastahili kuona shangwe ya kuishi katika ulimwengu mpya wa Paradiso kwa umilele wote, akiwa pamoja na wale wengine wote wa aina ya binadamu yenye utii.
Maisha Katika Bustani ya Edeni Iliyorudishwa Duniani Pote
18. Maisha yatakuwaje katika Paradiso iliyorudishwa?
18 Katika Paradiso iliyorudishwa, kila mtu ana urafiki kwa kila mtu mwingineye. Vifungo vya uhusiano wa kijamaa ulimwenguni pote vyahisiwa na kila mtu hadi kwenye vina vya nafsi yake. Wote waelewana. Wananena lugha moja ya watu wote ulimwenguni. Yaelekea ni ile lugha ya awali ya aina ya binadamu, iliyonenwa na kila mtu duniani katika muda wa miaka 1,800 ya kwanza ya kuwako kwa mwanadamu—kuanzia kuumbwa kwa Adamu katika 4026 K.W.K. mpaka siku ya Pelegi (2269 hadi 2030 K.W.K.), kwa maana “katika siku zake dunia [yaani, wakaaji wa dunia] iligawanyika.” (Mwanzo 10:25; 11:1, NW) Kila mmoja anafurahia pendeleo la kuishi, na kila siku mpya yapokewa kwa ushukuru wa kuipata nyongeza ya siku moja ya uhai. Hali ya kutojiweza kimwili haiongezeki kadiri wakati upitavyo. Kani zenye kutendesha mwili zinaongezeka, na miili haichakai.—Linganisha Ayubu 33:25.
19. Ni nini kitakachoonwa kuhusu wale waliokuwa wamekuwa na vizuizi vya kimwili?
19 Na lo, tazama! Waliokuwa vilema wanatembea, naam, wanaruka-ruka kwa shangwe. Mikono na miguu iliyopotea imerudishwa kimuujiza. Waliokuwa vipofu waona, viziwi wasikia, mabubu wanena na kuimba kwa shangwe tupu. (Linganisha Isaya 35:5, 6.) Umbo la mwili wa kibinadamu laishiwa kabisa na sura mbaya ya maumbuko yenye kuchukiza. Cheo cha uanaume wa kibinadamu chasawazika vizuri sana na cheo cha uanauke wa kibinadamu. (Mwanzo 2:18) Ukamilifu wa kibinadamu wamtukuza Yehova Mungu, Muumba wa mwili mkamilifu wa kibinadamu.
20. Ni nini kitakachoonwa kuhusu kani za asili, vyakula, viumbe-wanyama, na jinsi dunia itakavyotumiwa?
20 Dunia nzima inakuwa kieneo kimoja kizuri cha tufe lote. Hakuna sehemu yoyote ya dunia kunakotoka ripoti yoyote ya ukavu wala ya mvua yenye mabubujiko ya uharibifu wala ya tufani, vimbunga, chamchela, na dhoruba kali za uangamizi. (Linganisha Marko 4:37-41.) Kani zote za asili zinasawazishwa kikamilifu ili kuifanya dunia nzima iwe mahali pa kupendeza kabisa kuishi humo. Hakuna ukosefu wa chakula kokote, kwa maana dunia inazaa kwa ukamili. (Zaburi 72:16) Amani na usalama vyaenea ulimwenguni pote kwa ajili ya mwanadamu hata mnyama, sawa na vile Yehova alivyotaarifu: “Hawatadhuru wala hawataharibu katika mlima wangu wote mtakatifu.” (Isaya 11:9; ona pia mistari 6-8.) Kwa njia hii dunia itafanywa iwe mahali pa kupendeza sana kuishi humo na pa kuendeshea ibada na utumishi wa Yehova Mungu, Muumba na Mwenyeji wa dunia. Yastahili itumiwe kwa njia yenye kumfurahisha na kumtukuza, kwa maana ni mali yake kwa haki ya kwamba ndiye aliyeiumba.—Linganisha Isaya 35:1, 2, 6, 7.
21. Aina ya binadamu wakombolewa watakionaje kila kitu kilichopo duniani, na ni muziki gani utakaosikiwa?
21 Vitu vina upya wa kuburudisha—ndivyo kilivyo kila kitu duniani kwa ajili ya wanadamu wakombolewa wasiopata kamwe kuwa ndani ya bustani ya Paradiso ya Edeni ambamo uhai wa kibinadamu ulianza kwa ukamilifu wa kupendeza! (Ufunuo 21:5) Weee, ni muziki wa kupendeza kama nini utakaosikiwa wakati huo ukitoka kwenye ala za muziki na sauti za vinywani pia—wote huo ukimsifu Yehova!—1 Nyakati 23:4, 5; Zaburi 150:3-6.
22. Mtu atahisije kwa kuishi katika ulimwengu mpya wa Paradiso?
22 Itakuwa vizuri kama nini kuishi katika dunia yenye uhai tele wa kibinadamu na ambamo hatua zote za utaratibu wa kufa kutokana na dhambi ya awali ya Adamu zitakuwa zimefutiliwa mbali! (Linganisha Yohana 10:10.) Ndiyo, itakuwa dunia ambamo kila kiumbe mkubaliwa wa kibinadamu aangaza kwa kuiga mfano na sura ya Yehova Mungu ambayo mtu wa kwanza Adamu aliumbwa akiwa nayo! (Mwanzo 1:26, 27) Wakati huo macho ya maserafi, ya makerubi, na malaika waangavu wa mbinguni hayatanyezwa tena na sura mbaya ya dunia. Wazielekezapo nyuso zao zenye kupendeka kwenye dunia, wakiichungulia huku chini ikiwa imerembwa uzuri wa kiparadiso, sifa na shukrani zitakuwa ndilo jambo la pekee watakalokuwa nalo kumtajia yule Mmoja waliye na pendeleo la kumtazama uso moja kwa moja—Yehova, Mwenye Enzi Kuu wa Ulimwengu Wote Mzima.—Mathayo 18:10.
Wakati Ujao Wenye Furaha na Usiokoma
23. Ni jambo gani lawezekana kuhusu Wakristo wapakwa-mafuta, na tokeo likiwa nini kwa wakaaji wa Paradiso ya kidunia?
23 Yawezekana kukawa na uwezekano na uelekeo wa kwamba, siku fulani wakati ujao, majina ya wale Wakristo wapakwa-mafuta ambao wamefanya ‘wito na uchaguliwa’ wao uwe hakika kwenye Ufalme wa kimbingu na ambao wamebarikiwa na ufufuo huu wenye kuvutia kwa adhama ya kimbingu yatatangazwa kwa chapa kamili ili kuipasha habari jamaa ya kibinadamu katika Paradiso yao ya kidunia. (2 Petro 1:10; Zaburi 87:5, 6) Hivyo, kila mtu ataridhika kwa kuelewa kikamili kwamba wanafunzi wapakwa-mafuta 144,000 wa Yesu Kristo waliozaliwa kwa roho hawamo katika Paradiso ya kidunia, huku akiwashangilia kwa moyo mzima na wao wakishangilia pamoja naye.
24. (a) Yehova atakuwa ametimiza nini kuhusu “kibago cha kuwekea nyayo” zake? (b) Twajuaje kwamba ulimwengu mpya hautakwisha tena, na ni wimbo gani wa kiunabii utakaotimizwa?
24 Wakati ujao usiokoma utakuwa wenye furaha kwa wote wenye kubaki wakiwa na ujitoaji usiovunjika kwa Yehova, Mwenye Enzi Kuu aliye mstahilifu kabisa wa ulimwengu wote mzima. Dunia ya Paradiso itakayokuwa imejazwa kistarehe itakuwa mahali penye kufaa, mahali penye kustahili kuwa “kibago cha kuwekea nyayo” ambacho chaweza kuwekewa nyayo za Mungu kwa njia ya kitamathali. Naam, kwa umilele wote Yehova atakuwa amepatukuza ‘mahali penyewe pa nyayo zake,’ na aina ya binadamu wote itakuwa imejitiisha kwake bila kuyumba-yumba! (Mathayo 5:34, 35; Matendo 7:49) Ulimwengu mpya utakuwa ulimwengu usio na mwisho kwa sababu “kwa wingi wa utawala wa kimwana-mfalme na kwa amani kutakuwa hakuna mwisho.” (Isaya 9:7, NW) Halafu, ule wimbo wa kiunabii wa malaika wa kimbingu wakati wa kuzaliwa kwa Yesu katika Bethlehemu wa Yudea katika 2 K.W.K. utatimizwa: “Atukuzwe Mungu juu mbinguni, na duniani iwe amani kwa watu aliowaridhia.” —Luka 2:13, 14.
25. (a) Wale walio wa “umati mkubwa” wa “kondoo wengine” wathamini nini sasa? (b) Tamaa yetu yenye kuhisiwa moyoni yapasa kuwa nini?
25 Wale walio wa “umati mkubwa” wa “kondoo wengine” wa Mchungaji Mwema wayathamani maneno yenye kuichochea nafsi ya ahadi inayohusu Paradiso iliyorudishwa. Ni pendeleo lao kushirikiana na tengenezo la Mungu sasa na kujihusisha kwa bidii katika kazi iliyotabiriwa na Bwana Yesu Kristo, kuzihubiri habari njema za Ufalme katika dunia yote yenye kukaliwa ili kutoa ushahidi wa mwisho. (Mathayo 24:14; Marko 13:10) Sisi Mashahidi wa Yehova twahisi tukitamani kwa moyo mweupe kuudumisha ukamilifu wetu bila kutiwa dosari kwa umilele wote, kwa utukufu wa nyakati zote zijazo na kutetewa kwa Mwenye Enzi Kuu wa ulimwengu wote mzima, Yehova Mungu, na tukiwa chini ya utawala wa kifalme wa Mwana wake mzaliwa-pekee, Yesu Kristo. “Haleluya.”—Ufunuo 19:1, 3, 4, 6, RSV, New International Version; Mithali 10:9.
Wewe Ungejibuje?
◻ Ni ahadi gani ambayo Yehova amefanya kuhusu dunia, kibago cha kuwekea nyayo zake kitamathali?
◻ Nani atasaidia kuirudisha Paradiso?
◻ Ni kutoka miongoni mwa nani Mfalme Yesu Kristo ataweka “wana-wafalme katika dunia yote”?
◻ Huenda wewe ukajionea mwenyewe tukio gani lenye kuichochea nafsi wakati ufufuo utukiapo?
◻ Ni wakati ujao gani wenye kuwangoja wale wabakio katika ujitoaji usiovunjika kwa Yehova?