Je! Kweli Kuna Wakati Ambapo Mungu Ataondoa Ukosefu wa Haki?

“HIYO si haki hata kidogo.” Ilioneka na wazi kwamba mwanafunzi huyo mchanga aliudhika, akijawa na ghadhabu baada ya kutendwa jambo ambalo ni wazi halikuwa haki ya kiwango kifaacho. “Ikiwa kweli kuna Mungu,” msichana huyo akaendelea kusema, “yeye awezaje kuruhusu ukosefu huo wa haki?” Je! wewe ungalionyesha hisiamwenzi kwa kibibi huyu? Labda ndivyo. Lakini je! ungalijibu kipingamizi chake?

Ulipokuwa mtoto, huenda nyakati fulani ukawa ulihisi kwamba wazazi wako walikuruhusu utendwe isivyo haki. Lakini huo wenye kuonekana kuwa ukosefu wa haki haukuthibitisha kwamba wao hawako, sivyo? Vilevile, kuruhusu kwa Mungu ukosefu wa haki hakuthibitishi kwa njia yoyote kwamba yeye hayuko.

Hata hivyo, mwanafunzi mchanga huyo alijibu kwamba hilo lilikuwa jambo tofauti kabisa. Alionyesha kwamba baba wa kibinadamu asiye mkamilifu angeweza hata kukosa haki yeye mwenyewe. Au kwa sababu ya kutojua mambo yote ya uhakika, huenda asiweze kutambua ukosefu wa haki akiuona. Zaidi ya hilo, kwa sababu ya mipaka ya uwezo wa kibinadamu, huenda asiwe na mamlaka ya kufanya lolote kuhusu matendo ya ukosefu wa haki ambayo ayaona. Msichana huyo alitoa hoja ya kwamba hakuna lolote la mambo haya lingehusu Mungu wa haki ambaye ni mjua-yote na mweza-yote.

Huenda wewe pia ukahisi kwamba kuruhusiwa kwa ukosefu wa haki hakupatani kabisa na sifa za kimungu. Hata hivyo, je! ingeweza kuwa kwamba katika hekima yake isiyo na kifani, Mungu ana sababu ya kuaminika kuhusu kwa nini ameruhusu ukosefu wa haki kwa muda wenye urefu fulani?

Waandikaji wa Biblia walifikiria Mungu kuwa “mpenda uadilifu na haki.” “Njia zake zote ni haki. Mungu wa uaminifu, ambaye ukosefu wa haki haupo pamoja naye,” akaandika Musa.—Zaburi 33:5; Kumbukumbu 32:4, NW; Ayubu 37:23.

Zaidi ya kumwona Yehova kuwa Mungu wa haki ambaye hafurahii ukosefu wa haki, waandikaji wa Biblia walikubali kwamba siku moja yeye angeuondolea mbali. Kwa kielelezo, Isaya alitabiri hali hii: “Tazama! Mfalme atatawala kwa ajili ya uadilifu wenyewe; na kwa habari ya wana-wafalme, wao watatawala wakiwa wana-wafalme kwa ajili ya haki yenyewe. Na kwa uhakika haki itakaa katika jangwa, na katika kiunga uadilifu wenyewe utakaa.” (Isaya 32:1, 16, NW) Lakini wakati gani? Na ikiwa Mungu atamani kuondoa kabisa ukosefu wa haki usiwe ulimwenguni, kwa nini aliuruhusu pale pale mwanzoni?

Ukosefu wa Haki—Kwa Nini Waruhusiwa?

Kuna wakati ambapo hakukuwa na ukosefu wa haki katika ulimwengu wote mzima. Ni tangu tu Adamu na Hawa walipofanya uasi wakiwa chini ya mbano wa Shetani Ibilisi kwamba ukosefu wa haki umejulikana kwa aina ya binadamu. Shetani hakuharibiwa mara ile ile ya uasi. Kwa kusudi lake mwenyewe lililo jema, Mungu aliruhusu kipindi ambapo mwanadamu angetenda mambo yasiyo ya haki, na kusudi lingekuwa kutahini wale wenye kujitolea yeye, ionwe kama wangethibitika kuwa wenye imani kwake. Kuchagua kwao kuwa washikaji uaminifu wa kimaadili kungekanusha kwamba Shetani hana uwezo wa kugeuza viumbe wote wa kibinadamu wawe dhidi ya Mungu. Enzi kuu ya Mungu ikiisha kutetewa hivyo, kazi za Shetani zingeharibiwa, na matendo yote ya ukosefu wa haki yangeondolewa.

Kwa sasa, kama Mungu angetumia nguvu kuzuia watu wasishughulike kwa njia isiyo ya haki, angekuwa akiwanyang’anya uhuru wa kuchagua. Zaidi ya hilo, kwa kuruhusu watu wahisi matokeo yasiyo haki ya vitendo vibaya vya wengine, Mungu atoa kielezi cha jinsi lilivyokuwa jambo lenye madhara Adamu na Hawa kuasi isivyo haki dhidi ya virekebi-rekebi vya kimungu, huku wakivibadilisha kwa viwango vyao wenyewe vyenye dosari. Kwa kuruhusu aina ya binadamu ivune kile ambacho imepanda, Mungu asaidia watu wenye kufuata haki wang’amue ubora mwingi zaidi wa kufanya mambo kwa njia yake.—Yeremia 10:23; Wagalatia 6:7.

Kwa kuongezea, vitendo vya haki au vya ukosefu wa haki ambavyo watu mmoja mmoja hufanya vyaandaa ushuhuda wa wazi kabisa. Vitendo hivi vyaandalia Mungu msingi sahihi wa kuhukumu ni nani mwenye ustahiki wa kuishi katika ulimwengu mpya duniani wakati haki kamili itakuwa imerudishwa. Kwa kudokeza hivyo, twasoma: “Lakini mtu mbaya akighairi, na kuacha dhambi zake zote alizozitenda, na kuzishika amri zangu zote, na kutenda yaliyo halali na haki, hakika ataishi.”—Ezekieli 18:21.

Ukosefu wa Haki Utaisha Wakati Gani?

Shughuli za Yehova Mungu pamoja na aina ya binadamu zimekuwa za haki sikuzote na zikatiwa alama na fadhili-upendo. Kwa kutoa kielezi cha jambo hilo, wakati Abrahamu mtumishi wa Mungu mwenye imani alipokuwa hawezi kuelewa kwa nini jambo fulani lilikuwa linatendeka, yeye alisema hivi kuhusu Mungu: “Ni jambo lisiloweza kuwaziwa juu yako kwamba wewe [ungejua mtu mwadilifu pamoja na mmoja aliye mwovu hivi kwamba yapasa kutukia kwa mtu mwadilifu kama itukiavyo kwa aliye mwovu! Ni jambo lisiloweza kuwaziwa juu yako wewe. Je! Hakimu wa dunia yote hatatenda lililo sawa?” (Mwanzo 18:25, NW) Kristo alipokuja, sifa za Mungu za haki na fadhili-upendo zilikuzwa. Mpango wa dhabihu ya ukombozi kwa njia ya Kristo Yesu ulimfungulia njia kila mtu, Myahudi na asiye Myahudi kadhalika, ili apate uhai wa milele. Hiyo iliongoza mtume Petro kusema: “Hakika natambua ya kuwa Mungu hana upendeleo; bali katika kila taifa mtu amchaye na kutenda haki hukubaliwa na yeye.”—Matendo 10:34, 35.

Mashahidi wa Yehova ni watendaji katika kupiga mbiu kwamba Mfalme wa Kimesiya wa Mungu ameanza utawala wake na kwamba wakati u karibu ambapo haki itarudishwa kwenye dunia yetu kwa kipimo kikamilifu.a Hilo litafanywa wakati Mfalme huyo atakapoharibu ulimwengu uliopo usio wa haki na kuvunja mamlaka ya mungu wao asiyeonekana, Shetani Ibilisi. Biblia yaonyesha kwamba hilo litatukia karibuni kwenye “vita ya siku ile kuu ya Mungu Mwenyezi,” ambayo kwa ujumla huitwa Har–Magedoni.—Ufunuo 16:14, 16.

“Mungu si mkosefu wa haki wakati afunguliapo hasira yake kuu,” kwa hiyo Har–Magedoni itakuwa vita ya haki. (Warumi 3:5, NW) Baadaye, Kristo Yesu na watawala wenzake, kama wale mitume, watatawala wakiwa mbinguni kwa miaka elfu moja. (Ufunuo 20:4) Mamilioni ya watu ambao wameteswa na mambo yasiyo ya haki wakati uliopita watafufuliwa ndani ya mfumo mwadilifu duniani, kao la hapo awali la aina ya binadamu, ili wajionee haki kamilifu kwa mara ya kwanza katika maisha zao.

“Je! Hiyo Basi Ni Kuonyesha Kwamba Mungu Si Mwenye Haki?”

Mtume Paulo aliuliza hivyo kuhusu moja ya shughuli za Mungu. Jibu likawa nini? “Bila shaka sivyo,” Paulo akaandika. Kwa kuwafananisha na udongo wa mfinyanzi wanadamu ambao wamejiruhusu wafanyizwe na mfinyanga-vyungu wakawe vyombo vinavyostahili hasira kuu ama rehema, Paulo alieleza hivi: “Ingawa Mungu yuko tayari kuonyesha kasirani yake na kuonyesha wazi nguvu yake, hata hivyo yeye huchukuliana kwa saburi pamoja na watu ambao humtia kasirani, hata iwe ni kadiri gani ambavyo wao wastahili kuharibiwa. Yeye huchukuliana nao kwa ajili ya watu wale wengine, ambao yeye ataka kuwa mwenye rehema kwao, ambao yeye ataka kuwafunulia utajiri wa utukufu wake.”—Warumi 9:14, 20-24, The Jerusalem Bible.

Kama ilivyokuwa kwa mwanafunzi mchanga aliyetajwa mapema kidogo, nyakati fulani huenda wewe ukaona ni vigumu kuelewa ni kwa nini Mungu huruhusu ukosefu wa haki kwa ujumla au kosa fulani lililo wazi. Lakini sisi ni nani—sisi mifinyango ya mkono wake—hata tutie shaka juu ya saburi na hekima yake katika kufanya hivyo? Yehova Mungu alisema hivi kwa Ayubu: “Je! hata hukumu yangu utaibatilisha? Utanitia mimi hatiani, upate kuhesabiwa haki?”—Ayubu 40:8.

Sisi hatutataka kamwe kuwa na hatia ya kufanya hivyo. Bali, tutataka kushangilia katika kujua kwamba ingawa ukosefu wa haki ungali pamoja nasi, karibuni Mungu wa haki atauondoa kwenye dunia nzima.

[Maelezo ya Chini]

[Picha katika ukurasa wa 23]

Kuruhusiwa kwa ukosefu wa haki hakuwezi kutumiwa kwa njia yoyote kuthibitisha kwamba hakuna Mungu

Je! Mungu ndiye mwenye kasoro kwa sababu dereva mlevi akataa kutumia sifa za kutumia akili yake, kujidhibiti, na kufikiria wengine?

Wakati u karibu ambapo haki kamili itarudishwa kwenye dunia yetu