Kushirikiana na Baraza Linaloongoza Leo
“Yeye atamweka juu ya mali zake zote.”—Luka 12:44, NW.
1. Kristo alianza kutawala katika ufalme gani katika 33 W.K., na kwa njia gani?
Katika Pentekoste 33 W.K., Yesu Kristo, Kichwa cha kundi, alianza kutawala kwa kutenda katika ufalme wa watumwa wake waliopakwa mafuta kwa roho. Jinsi gani hivyo? Kwa njia ya roho takatifu, malaika, na baraza lenye kuongoza lionekanalo. Kama mtume Paulo alivyoonyesha, Mungu ‘alikomboa wapakwa-mafuta kutoka mamlaka ya giza na kuwaingiza ndani ya ufalme wa Mwana wa upendo wake.’—Wakolosai 1:13-18, NW; Matendo 2:33, 42; 15:2; Wagalatia 2:1, 2; Ufunuo 22:16.
2. Kristo alianza kutawala katika Ufalme gani mkubwa zaidi katika 1914?
2 Mwishoni mwa “nyakati zilizowekwa za mataifa,” Yehova aliongeza ukubwa wa mamlaka ya kifalme ya Kristo, akiipanua hata ipite mipaka ya kundi la Kikristo. (Luka 21:24) Ndiyo, katika mwaka 1914, Mungu alimpa Mwana wake mamlaka ya kifalme juu ya “mataifa,” “ufalme wa ulimwengu,” ainabinadamu yote.—Zaburi 2:6-8; Ufunuo 11:15, NW.
Awekwa Rasmi “Juu ya Mali Zake Zote”
3, 4. (a) Katika kielezi cha Yesu cha mina (fedha), ni nani aliyewakilishwa na mwanamume wa uzawa-sharifu (mutu mwenye heshima, ZSB) (b) Ni matukio gani ya Ufalme yaliyotukia katika 1918 na 1919?
3 Kinachostahiki kuangaliwa hapa ni kielezi cha Yesu juu ya mwanamume wa uzawa-sharifu (mutu mwenye heshima, ZSB). (Luka 19:11-27) Kabla ya kusafiri ng’ambo akajipatie mamlaka ya kifalme, aliwapa watumwa wake fedha (mina) wazifanyize kazi. Aliporudi, mwanamume huyo, ambaye awakilisha Kristo, aliwaita mbele yake “watumwa aliowapa fedha, ili ajue faida aliyopata kila mtu kwa biashara yake.” (Luka 19:15) Hiyo ingekuwaje baada ya Yesu kujipatia mamlaka ya kifalme?
4 Katika 1918 Yesu Kristo Mfalme aliyetawazwa alipata kikundi kidogo cha Wakristo ambao hapo kwanza walikuwa wameacha makanisa ya Jumuiya ya Wakristo na walikuwa wakijishughulisha kuangalia masilahi ya kidunia ya Bwana-mkubwa wao. Baada ya kuwasafisha kana kwamba kwa moto, katika 1919 Yesu aliwapa watumwa wake mamlaka iliyoongezeka. (Malaki 3:1-4; Luka 19:16-19) Aliwaweka “juu ya mali zake zote.”—Luka 12:42-44, NW.
“Magawio ya Chakula kwa Wakati Unaofaa”
5, 6. (a) Mtumishi-nyumbani wa Kristo alipokea mgawo gani ulioongezewa ukubwa? (b) Ni unabii gani uliokaribia kutimizwa baada ya 1914, na jamii ya mtumishi-nyumbani ingeshirikije kwa utendaji katika utimizo wao?
5 Mfalme Yesu Kristo anayetawala alimpa mtumishi-nyumbani wake, au maneja (msimamizi) wa nyumba, mgawo uliopanuliwa duniani. Wakristo wapakwa-mafuta wangepaswa kuwa “mabalozi” wa Mungu walio badala ya mfalme aliyevikwa taji akiwa amepewa mamlaka ya kutawala juu ya vikundi vyote vya watu wa dunia. (2 Wakorintho 5:20; Danieli 7:14) Daraka lao la ujumla halingekuwa tena lile la kulipa baraza la watumishi wapakwa-mafuta wa Kristo “kipimo cha magawio ya chakula kwa wakati unaofaa.” (Luka 12:42, NW) Sasa wangeshiriki sehemu katika kutimizwa kwa unabii mwingi uliokuwa karibu kutimizwa baada ya kusimamishwa kwa Ufalme katika 1914.
6 Hiyo ilimaanisha nini katika utendaji halisi? Ilimaanisha kupanua kuhubiriwa kwa ‘habari njema hizi za ufalme kwenye dunia yote inayokaliwa.’ (Mathayo 24:14) Zaidi ya hilo, ilimaanisha kutangaza jumbe zenye nguvu za hukumu dhidi ya mfumo mwovu wa Shetani na wenye kuunga mkono. Jambo hilo likawa na tokeo la ‘kutikisa mataifa.’ Hivyo, “vitu vyenye kutamanika,” “kondoo wengine” wa Kristo, walianza kuingia ndani. (Hagai 2:7; Yohana 10:16, NW) Kutoka 1935 na kuendelea, “mkutano mkubwa” ulianza kumiminika makundi makundi ndani ya tengenezo la ulimwenguni pote la Yehova. (Ufunuo 7:9, 10) Hiyo ilitaka tengenezo lifanywe kuwa zuri zaidi kimaendeleo. Kusema kitamathali, mahali pa mawe pangekuwa chuma, mahali pa mbao shaba, mahali pa chuma fedha, na mahali pa shaba dhahabu. (Isa 60:17) Yote hayo yametukia tangu 1919 chini ya mwelekezo wenye kutenda na wa karibu karibu wa Yesu Kristo, ambaye amekabidhi masilahi yote ya kidunia ya Ufalme, au mali, kwa jamii ya mtumwa wake mwaminifu na Baraza Linaloongoza lake.
7. Madaraka yaliyoongezwa ya mtumishi-nyumbani yalihusisha nini ndani?
7 Twaweza kuelewa kwa urahisi kwamba mzigo ulioongezeka wa daraka unaokalia mtumwa wa Bwana-mkubwa, mtumishi-nyumbani, au maneja wa nyumba yake ulitia ndani utendaji mwingi wa kuandika na kuhariri. Magawio ya chakula cha kiroho yalikuwa lazima yaendelee kuchapishwa kwa ukawaida kwa wakati unaofaa katika Mnara wa Mlinzi. Katika 1919 The Golden Age (gazeti andamani ambalo baadaye lingekuwa Consolation, halafu Amkeni!) lilianza kuchapishwa ili kuamsha upendezi wa umma, zaidi ya kujenga ‘watu wa nyumba.’ (Mathayo 24:45, NW) Pia kwa muda wa miaka iliyopita vitabu, vijitabu, na trakti zimefanyizwa kwa wingi wenye kufurika.
Misafisho Yenye Kuendelea
8. Washiriki wa Baraza Linaloongoza walitambulishwa na nini, na Mnara wa Mlinzi ulifanya taarifa gani katika 1944?
8 Tukitazama nyuma katika huu “wakati wa mwisho,” hatushangai kwamba hapo mwanzoni washiriki wa Baraza Linaloongoza walishirikishwa karibu karibu na wafanya kazi wa uhariri wa Sosaiti ya Mnara wa Mlinzi. (Danieli 12:4) Makala “Mpango wa Kitheokrasi Leo,” iliyochapishwa katika Mnara wa Mlinzi (Kiingereza) wa Novemba 1, 1944, ilisema hivi: “Kupatana na akili, wale waliokabidhiwa uchapishaji wa kweli zilizofunuliwa walitegemewa kuwa baraza lenye kuongoza la Bwana lililochaguliwa kuongoza wale wote waliotamani kuabudu Mungu katika roho na katika ukweli na kumtumikia kwa umoja katika kueneza kweli hizo zilizofunuliwa kwa wengine wanaoona njaa na kiu.”
9. Baraza Linaloongoza lilikuja kushirikishwa na nini karibu karibu, na kwa nini?
9 Yalikuwako matakwa ya kisheria yaliyohusika katika kuchapisha magazeti na misaada mingine ya kujifunza Biblia. Hivyo, Sosaiti ya Mnara wa Mlinzi Biblia na Trakti ilianzishwa na ikaandikishwa katika mkoa wa Pennsylvania, U.S.A. Kwa miaka mingi, Baraza Linaloongoza lionekanalo lilikuja kushirikishwa na baraza la waelekezi wa shirika hili lililoanzishwa ili kuchapisha misaada ya kujifunza Biblia iliyohitajiwa na inayotumiwa na watu wa Bwana duniani pote.
10, 11. Ni msafisho gani uliotukia katika 1944, na ni elezo gani lililotolewa kuhusu jambo hili katika Mnara wa Mlinzi?
10 Wale waelekezi saba wa Sosaiti walikuwa Wakristo waaminifu. Lakini sehemu waliyotimiza katika shirika la kisheria ingaliweza kudokeza kwamba kule kuchaguliwa kwao na washiriki wa kisheria wa Sosaiti ya Mnara wa Mlinzi ndiko kuliwastahilisha wawe na vyeo katika Baraza Linaloongoza. Zaidi ya hilo, hapo kwanza uanashirika huo na mapendeleo ya kupiga kura uliruhusiwa kisheria kwa baadhi ya wale tu waliotoa michango kwa Sosaiti. Mpango huu ulihitaji kubadilishwa. Hilo lilifanywa kwenye mkutano wa kila mwaka wa shirika la Pennsylvania la Sosaiti ya Mnara wa Mlinzi uliofanywa Oktoba 2, 1944. Sheria-katiba za Sosaiti zilisahihishwa hivi kwamba uanashirika haungetegemea tena msingi wa kifedha. Wanashirika wangechaguliwa miongoni mwa watumishi waaminifu wa Yehova, na hao wamekuja kutia ndani wengi wanaofanya kazi ya wakati wote kwenye makao makuu, katika Brooklyn, New York, na katika matawi yayo kotekote ulimwenguni.
11 Ukiripoti juu ya maendeleo haya, Mnara wa Mlinzi wa Novemba 1, 1944 (Kiingereza), ulitaarifu hivi: “Fedha, kama zinavyowakilishwa katika michango ya kifedha, hazipaswi kuwa na sauti ya kuamua, kwa hakika hazipaswi kuwa na lolote la kufanya katika kujazwa na baraza linaloongoza la mashahidi wa Yehova duniani. . . . Roho takatifu, kani tendaji inayoshuka kutoka kwa Yehova Mungu kupitia Kristo Yesu, ndiyo inayopaswa kuamua na kuongoza katika mambo haya.”
Tofauti na Baraza la Waelekezi
12. Ni nini kinachoonyesha kwamba Yehova alibariki ile misafisho chini ya mwelekezo wa Baraza Linaloongoza?
12 Kuendelea kwa kazi ya kuhubiri wakati wa miongo iliyofuata huthibitisha kwamba Yehova alibariki misafisho hiyo katika uelewevu wa Baraza Linaloongoza. (Mithali 10:22) Kwani, hesabu ya wapiga mbiu ya Ufalme kotekote duniani iliruka kutoka punde kuliko 130,000 katika 1944 kufika 1,483,430 katika 1970! Lakini maendeleo zaidi yalikuwa bado yatakuja.
13. (a) Kufikia 1971, hali ilikuwa nini kuhusu Baraza Linaloongoza? (b) Ni nini lililotukia kwenye mkutano wa Sosaiti wa kila mwaka katika 1971?
13 Mpaka 1971 wale wa Baraza Linaloongoza walikuwa wangali wakishirikishwa na Sosaiti ya Mnara wa Mlinzi Biblia na Trakti ya Pennsylvania. Msimamizi wa Sosaiti alibeba mzigo ulio mkubwa wa daraka la kufanya maamuzi yanayohusu kuendeshwa kwa matawi ya Sosaiti kotekote ulimwenguni. Lakini hotuba zenye kuleta kipindi kipya zilitolewa kwenye mkutano wa kila mwaka uliofanywa Oktoba 1, 1971. Msimamizi wa Sosaiti alinena juu ya kichwa “Kuleta Mahali Patakatifu Katika Hali Nzuri,” na makamu wa msimamizi akanena juu ya kichwa “Baraza Linaloongoza Kama Linavyotofautiana na Shirika la Kisheria.” Kuna tofauti gani kati ya Baraza Linaloongoza na shirika hilo la kisheria?
14. Ni tofauti gani zilizopo kati ya shirika la kisheria na Baraza Linaloongoza?
14 Kama ilivyotajwa tayari, Sosaiti ya Mnara wa Mlinzi Biblia na Trakti ya Pennsylvania ina baraza la waelekezi lililowekewa mpaka wa kuwa na hesabu ya washiriki saba tu. Wanaume hawa Wakristo waliojiweka wakfu wanachaguliwa kwa muda wa miaka mitatu na wanashirika wasiozidi jumla ya 500, wengi wao wakiwa si Wakristo wapakwa-mafuta. Tena, kwa kuwa shirika lipo kwa kusudi la kisheria tu, likiwa na makao makuu yaliyowekewa mipaka ya kijiografia, linaweza kuvunjwa na Kaisari, yaani, Serikali. (Marko 12:17) Hata hivyo, kwa kweli Baraza Linaloongoza si chombo cha kisheria. Washirika walo hawachaguliwi. Wanawekwa rasmi kupitia roho takatifu chini ya mwelekezo wa Yehova Mungu na Yesu Kristo. (Linganisha Matendo 20:28.) Tena, wale wa Baraza Linaloongoza ni wanaume waliowekwa kwa roho bila wajibu wowote wa mahali palipowekewa mipaka ya kijiografia.
15. Ni taarifa gani kuhusu tengenezo lililofanywa katika Mnara wa Mlinzi wa Desemba 15, 1971, na ni jambo gani laweza kusemwa juu ya Baraza Linaloongoza la ki-siku-hizi?
15 Likitoa maelezo juu ya misafisho hiyo katika uelewevu, Mnara wa Mlinzi wa Mei 1, 1972, ulisema hivi: “Kwa kushukuru mashahidi wa Yehova wa Kikristo wanajua na wanasema kwa nguvu kwamba hili si tengenezo la kidini la mtu mmoja, bali kwamba lina baraza yenye kuongoza ya Wakristo waliopakwa mafuta kwa roho.” Baraza Linaloongoza la jamii ya mtumwa mpakwa-mafuta na la waandamani wao mamilioni miongoni mwa kondoo wengine limezidi kurekebishwa liweze kutunza cheo chalo cha uangalizi.
16. Mali za kidunia za Kristo zimeongezekaje kuanzia 1971, na ni nini baadhi ya hizi ambazo amekabidhi kwenye utunzi wa mtumwa mwaminifu na mwenye busara, mwenye kuwakilishwa na Baraza Linaloongoza lake?
16 Mali za kidunia za Mfalme Yesu Kristo zimezidi kukua. Tangu 1971 hesabu ya Mashahidi imeruka kutoka chini ya 1,600,000 kufikia kilele cha zaidi ya 3,700,000 katika 1989. Ni uthibitisho ulioje wa baraka ya Mungu! (Isaya 60:22) Ukuzi huu umefanya ihitajiwe kabisa kuwe na upanuzi wa vifaa kwenye makao makuu na katika matawi mengi, pamoja na kufanya njia za kutokeza vichapo na kuvigawanya ziwe za ki-siku-hizi. Ukuzi huo umetokeza ujenzi wa Majumba ya UfaIme na Majumba ya Kusanyiko mengi kote-kote duniani. Wakati wote huo, Baraza Linaloongoza limeendelea kuchukua daraka la kuangalia kazi ya kuhubiri, kutokeza habari za kujifunza Biblia, na kuweka waangalizi katika matawi, wilaya, mizunguko, na makundi. Hayo ndiyo masilahi ya Ufalme ambayo Kristo amekabidhi yaangaliwe na mtumwa mwaminifu na mwenye busara, mwenye kuwakilishwa na Baraza Linaloongoza lake.
17. Ni maendeleo gani zaidi katika uangalizi yaliyofanywa katika 1971, 1974, na 1976?
17 Baraza lenye kuongoza la karne ya kwanza liliongezewa ukubwa kutia ndani zaidi ya mitume wa Yesu. Suala la kutahiri lilipoamuliwa, kwa wazi baraza hilo lilikuwa ni kutia ndani “mitume na wanaume wazee katika Yerusalemu.” (Matendo 15:1, 2, NW) Kwa ulinganiko, Baraza Linaloongoza liliongezewa ukubwa katika 1971 na tena katika 1974. Ili kuendesha kazi yao ya uangalizi, Baraza Linaloongoza lilipanga kuwe na halmashauri tano zianze kutenda kazi Januari 1, 1976. Kila halmashauri ina washiriki wa kudumu kuanzia watatu kufika sita, wote wakiwa na mamlaka sawa ya kusema katika mambo yanayozungumzwa. Mwenyekiti wa kila halmashauri hutumikia kwa mwaka mmoja, na washiriki mmoja mmoja wa Baraza Linaloongoza hutumikia katika moja au zaidi ya halmashauri hizi. Kila moja ya halmashauri tano hizi hutoa uangalifu wa pekee kwa upande hususa wa mali za kidunia za Kristo. Halmashauri ya sita—Halmashauri ya Mwenyekiti, ambayo washiriki hupokezana zamu kila mwaka, hushughulikia matatizo yenye umuhimu.
Ushirikiano Wenye Utendaji Pamoja na Baraza Linaloongoza
18. Baraza Linaloongoza hufanya kazi jinsi gani, na ni nini njia moja ambayo sisi twaweza kuonyesha ushirikiano wetu nalo?
18 Halmashauri za Baraza Linaloongoza hufanya mikutano ya kila juma kupitia mambo yenye umaana, kufanya maamuzi baada ya mafikirio yenye sala, na hupangia utendaji wa kitheokrasi wa wakati ujao. Kama ilivyoonwa mapema kidogo, Matendo sura ya 15 huonyesha kwamba swali zito lenye kuhitaji azimio lilipelekwa kwa baraza lenye kuongoza ili liangaliwe. Vivyo hivyo leo, maswali ya maana hupelekwa kwa Baraza Linaloongoza zima, ambalo hukutana kila juma au mara nyingi zaidi ikihitajika kabisa. Washiriki wa Baraza Linaloongoza, ambao kwa sasa ni 12, hutafuta mwelekezo wa Yehova Mungu kupitia Maandiko na kwa sala. Njia moja ambayo sisi twaonyesha ushirikiano wetu na Baraza Linaloongoza ni kuwakumbuka katika sala zetu za kila siku hawa waliowekwa kwa njia ya pekee.—Warumi 12:12.
19. Maagizo ya Baraza Linaloongoza hufikiaje makundi?
19 Maagizo na maamuzi ya Baraza Linaloongoza hufikiaje makundi? Baada ya washiriki wa baraza lenye kuongoza la karne ya kwanza kuwa limefikia uamuzi wao kwa msaada wa roho ya Mungu, walipeleka barua kwa makundi. (Matendo 15:22-29) Hata hivyo, njia kubwa leo ni kupitia vichapo vya Kikristo.
20. (a) Ni msafisho gani zaidi wa kitengenezo uliofanywa katika 1976? (b) Halmashauri za Tawi hushirikianaje na Baraza Linaloongoza?
20 Kuanzia Februari 1, 1976, kila tawi la Sosaiti ya Mnara wa Mlinzi limekuwa na Halmashauri ya Tawi ambayo washiriki ni wanaume wenye uwezo waliowekwa na Baraza Linaloongoza. Wakiwa wawakilishi wa Baraza Linaloongoza kwa ajili ya nchi au nchi kadhaa zilizo chini ya usimamizi wa tawi lao, ni lazima ndugu hao wawe wanaume waaminifu, washikamanifu. Hilo latukumbusha juu ya wanaume wenye uwezo, wenye kuhofu Mungu na wenye kutumainika waliosaidia Musa kuhukumu watu katika Israeli ya kale. (Kutoka 18:17-26) Washiriki wa Halmashauri ya Tawi wanafanyiza kazi maagizo yanayopokewa kwa njia ya vitabu na magazeti ya Sosaiti na Huduma ya UfaIme Yetu, na pia katika barua za ujumla na za pekee zinazoshughulika na matatizo ya kwao. Halmashauri za Tawi hupasha Baraza Linaloongoza habari za karibuni zaidi juu ya maendeleo ya kazi katika kila nchi na juu ya matatizo yoyote ambayo huenda yakazuka. Ripoti hizo zinazopokewa kutoka sehemu zote za ulimwengu husaidia Baraza Linaloongoza kuamua ni habari gani zinazopasa kuzungumzwa katika vichapo vya Sosaiti.
21. Waangalizi wasafirio huwekwaje, na wajibu wao ni kutia ndani nini?
21 Chini ya mwelekezo wa roho takatifu, Halmashauri za Tawi hupendekeza wanaume wa kiroho, waliokomaa watumikie wakiwa waangalizi wa mzunguko na wilaya. Wanapowekwa moja kwa moja na Baraza Linaloongoza, wao hutumikia wakiwa waangalizi wasafirio. Ndugu hao hutembelea mizunguko na makundi ili kuyajenga kiroho na kuyasaidia yatumie maagizo yaliyopokewa kutoka kwa Baraza Linaloongoza. (Linganisha Matendo 16:4; Warumi 1:11, 12.) Waangalizi wasafirio hupeleka ripoti kwenye ofisi ya tawi. Kwa msaada wa roho takatifu na Maandiko yaliyovuviwa, wao hushiriki pamoja na wazee wenyeji katika kupendekeza ndugu wanaostahili wawekwe kuwa watumishi wa huduma na wazee na Baraza Linaloongoza au na wawakilishi walo.—Wafilipi 1:1; Tito 1:5; linganisha 1 Timotheo 3:1-13; 4:14.
22. (a) Wazee wa kundi hushirikianaje na Baraza Linaloongoza? (b) Ni nini huthibitisha kwamba Yehova anabariki mpango huu wa kitheokrasi?
22 Kwa zamu yao, wale walio mabaraza ya wazee ‘hutoa uangalifu kwa wao wenyewe na kwenye kundi lote, ambalo miongoni mwao roho takatifu imewaweka kuwa waangalizi.’ (Matendo 20:28, NW) Waangalizi hawa hutafuta kutumia kwa uaminifu maagizo wanayopokea kutoka kwa Yehova Mungu na Yesu Kristo kwa njia ya mtumwa mwaminifu na mwenye busara na Baraza Linaloongoza lake. Yehova anabariki mpango huu wa kitheokrasi, kwa maana ‘makundi yaendelea kuimarishwa katika imani na kuongezeka hesabu siku kwa siku.’—Matendo 16:5, NW.
23. Kuhusu Baraza Linaloongoza, twapaswa kuazimia kufanya nini?
23 Jinsi ilivyo vizuri kwamba Yehova Mungu na Bwana-mkubwa, Yesu Kristo, wanadhihirisha kupitia Baraza Linaloongoza kwamba wanaunga mkono watu wa Mungu! (Zaburi 94:14) Tukiwa sehemu ya tengenezo la Yehova, sisi mmoja mmoja twanufaika na uungaji mkono huo. (Zaburi 145:14) Hilo lapasa kuimarisha azimio letu kushirikiana na Baraza Linaloongoza la Mashahidi wa Yehova tusongapo mbele kuelekea wakati ambapo “dunia itajawa na maarifa ya kumjua Yehova kama vile maji yafunikavyo bahari yenyewe.” —Isaya 11:9, NW.
Mambo Makuu ya Kukumbuka
◻ Katika 1919 jamii ya mtumishi-nyumbani ilipokea madaraka gani yaliyoongezwa?
◻ Kwa miaka mingi, Baraza Linaloongoza lionekanalo lilishirikishwa na nini?
◻ Ni misafisho gani yenye kuendelea iliyofanywa katika kuwekwa kwa washiriki wa Baraza Linaloongoza?
◻ Ni nini baadhi ya mali za kidunia za Kristo ambazo yeye amekabidhi jamii ya mtumwa na Baraza Linaloongoza lake?
◻ Sisi twaweza kushirikianaje na Baraza Linaloongoza?
[Picha katika ukurasa wa 16, 17]
Likiwa kwenye makao makuu yalo ya ulimwengu katika Brooklyn, New York, Baraza Linaloongoza husimamia uchapishaji na kazi ya kuhubiri ya Mashahidi wa Yehova katika matawi 93 ya Sosaiti ya Mnara wa Mlinzi
Ujeremani
Japani
Afrika Kusini
Brazili