Tianeni Moyo Kwa Kadiri Siku Ile Inavyokaribia

“[Mwe] na kuhimizana [kutiana moyo, NW]; na kuzidi kufanya hivyo, kwa kadiri mwonavyo siku ile kuwa inakaribia.’—WAEBRANIA 10:25.

1, 2. Ni siku gani inayokaribia, na mtazamo wa watu wa Yehova unapasa kuwa nini?

WALE wanaoshiriki leo katika kusema, ‘Njoo utwae maji ya uzima,’ hawajitengi wawe peke yao. Siku kubwa ya ushindi wa Yehova inapokaribia, wanatumia shauri hili la Kibiblia: “Tukaangaliane sisi kwa sisi na kuhimizana katika upendo na kazi nzuri; wala tusiache kukusanyika pamoja, kama ilivyo desturi ya wengine; bali tuonyane; na kuzidi kufanya hivyo, kwa kadiri mwonavyo siku ile kuwa inakaribia.”—Waebrania 10:24, 25.

² Maandiko yanatoa unabii juu ya “siku” hiyo kuwa ni “siku ya Yehova.” (2 Petro 3:10, NW) Kwa kuwa ni Yehova Aliye Juu Zaidi, Mungu aliye mweza yote, hakuna siku ambayo ingeweza kuishinda siku yake kwa vyovyote. (Matendo 2:20) Inamaanisha kutetea enzi kuu yake akiwa ndiye Mungu juu ya ulimwengu wote mzima. Siku hiyo yenye umaana usio na kifani inakaribia.

3. Siku ya Yehova ilikuwa ikikaribiaje kwa Wakristo katika karne ya kwanza, na namna gani kwa sisi leo?

³ Mtume Paulo aliwaambia Wakristo kati-ka karne ya kwanza ya Wakati wa Kawaida wetu kwamba siku ya Yehova ilikuwa inakaribia. Wao walitazamia kuja kwa siku hiyo, lakini huko nyuma, siku hiyo ilikuwa mbali kwa miaka zaidi ya 1,900. (2 Wathesalonike 2:1-3) Ijapokuwa hivyo, wao walipasa kutiwa moyo kwa sababu kwa wazi siku hiyo ingekuja, na ikiwa Wakristo wangesonga mbele kwa uthabiti katika imani hiyo, wangeingia katika siku hiyo yenye baraka. (2 Timotheo 4:8) Huko nyuma, siku hiyo ilionwa ikikaribia. Kwetu sisi leo, siku ya Yehova imekaribia kweli kweli. Matimizo yote ya ajabu ya unabii wa Biblia yanathibitisha uhakika huu wenye kutia shangwe. Karibuni, jina la Mungu wetu, Yehova, litatakaswa mpaka umilele wote.—Luka 11:2.

Kutiwa Moyo na Jina la Kimungu

4. Kulingana na Ufunuo 19:6, ni nani atakuwa Mfalme, na jina lake linafahamiwaje?

⁴ Jina la kimungu linapasa kuwa jambo la upendezi kwa familia nzima ya kibinadamu. Today’s English Version inasema hivi: “Sifuni Mungu! Kwa maana Bwana, Mungu wetu Mweza Yote, ni Mfalme!” (Ufunuo 19:6) Kulingana na tafsiri hiyo ya Biblia ya karne ya 20, yeye ndiye Bwana, Mungu mweza yote. Tafsiri hiyo, na pia fasiri nyingine nyingi za ki-siku-hizi, haitoi jina la Mtu wa kimungu anayeanza kutawala akiwa Mfalme. Hata hivyo, jina la kimungu limehusishwa katika ule mpaazo-sauti wa kusema “Haleluya!” (“Sifuni Yah” au, “Sifuni Yehova”) unaopatikana katika Revised Standard Version, New International Version, na tafsiri ya Moffatt ya Ufunuo 19:6. Kwa muda mwingi wa Wakati wa Kawaida wetu, kwa kadiri kubwa jina la kimungu limefichwa katika tafsiri za Biblia. Hata hivyo, kama vile tutakavyoona, jina hilo limekuwa na kitia-moyo kingi kwa watu wa Mungu, katika nyakati za kale na za ki-siku-hizi pia.

5, 6. (a) Kwa nini Musa alihitaji kujua jina la Mungu aliyemwakilisha? (b) Ni lazima matokeo yawe yalikuwa nini juu ya Waisraeli Musa alipokazia jina la kimungu?

⁵ Tunakumbuka kwamba Musa alipotumwa na Mungu Aliye Juu Zaidi kwa watu wa Israeli waliofanywa watumwa katika bara la Misri, swali la nani aliyemtuma lilijitokeza katika akili za watu ambao Musa alitumwa kwao. Musa alitazamia kwamba Wayahudi hao wenye kuteseka wangetaka kujua jina la Mungu aliyemwakilisha. Kwa habari hii tunasoma hivi kwenye Kutoka 3:15, ZSB: “Mungu akasema tena na Musa: Utasema hivi na wana wa Israeli: BWANA [Yehova, NW], Mungu wa baba zenu, Mungu wa Abrahamu, Mungu wa Isaka, na Mungu wa Yakobo amenituma kwenu; hili ni jina langu hata milele, na huu ni ukumbusho wangu kizazi hata kizazi.”

⁶ Habari hizi zilipokaziwa kwao, ni lazima Waisraeli wawe walihisi wametiwa moyo sana. Ukombozi wao ulihakikishwa na Mungu wa pekee wa kweli, Yehova. Na ni lazima iwe ilitia moyo kama nini kuwa na tazamio la kufahamiana na Mungu wakati ambapo angeonyesha umaana wa jina lake la kibinafsi—si kujitenga kwa kiburi akae peke yake!—Kutoka 3:13; 4:29-31.

7. (a) Tunajuaje kwamba wanafunzi wa Yesu walifahamiana na jina la kimungu? (b) Jina la Mungu lilisukumwaje kando?

⁷ Pia wanafunzi wa Bwana Yesu Kristo walitiwa moyo sana na jina la kimungu, Yehova, na kile ambacho lilisimamia. (Yohana 17:6, 26) Wakati wa huduma ya kidunia ya Yesu, kwa uhakika yeye hakulisukuma kando jina la kimungu, na halikuwa kusudi lake kufanya jina lake mwenyewe, Yesu, litangulizwe kwanza. Baada ya kuanza kwa ule uasi-imani uliotabiriwa wa kuiacha imani ya kweli ya Kikristo, hapo tu ndipo jina la kimungu lilipata kusukumwa kando, naam, likawa ni kama limefutwa kabisa katika masemezano ya Kikristo. (Mate-ndo 20:29, 30) Jina la Mwana wa Mungu likiisha kuanza kupewa umashuhuri mkubwa zaidi, likifunika lile la Baba, wenye kudai kuwa Wakristo wangekuta ibada yao kwa Baba ikizidi kuelekezwa kwa kitu kisicho na utu, ikikosa ukaribu wa kifamilia, na hivyo basi isiyotia moyo sana.

8. Ni tokeo gani limekuwa likiendelea kuwa juu ya watu wa Mungu waliochukua jina Mashahidi wa Yehova?

⁸ Hivyo, ilikuwa sababu ya shangwe isiyosemeka wakati Wanafunzi wa Biblia wa Kimataifa wenye kushirikiana na Watch Tower Society walipolichukua jina Mashahidi wa Yehova katika 1931. Si kwamba tu lilikuwa jambo la kutia shangwe bali pia la kutia moyo sana. Kwa sababu hii, wanafunzi wa Biblia waliopata jina jipya karibuni wangeweza kutiana moyo.—Linganisha Isaya 43:12.

9. Wakristo wa kweli wana hisia gani juu ya yule Mmoja ambaye wao ni Mashahidi wake?

⁹ Kwa hiyo, Wakristo wa kweli leo wanaona inafaa kumtambulisha Mmoja ambaye wao ni Mashahidi wake waliotabiriwa, kama vile Yesu Kristo Kiongozi wao alivyofanya alipokuwa hapa duniani. (Ufunuo 1:1, 2) Naam, wanatambulisha kwamba ni yeye peke yake ambaye jina lake ni Yehova.—Zaburi 83:18.

Kujawa na Shangwe na Roho Takatifu

10-12. (a) Ni nini lingekuwa tokeo la kani ya utendaji juu ya wafuasi wa Yesu? (b) Mashahidi wa Yehova wenye kutiwa shangwe wanataka kutendeanaje?

¹⁰ Yesu Kristo alisema hivi katika maneno yake ya kuagana na mitume wake: “Kwa hiyo nendeni mkafanye wanafunzi kutoka kwa watu wa mataifa yote, kuwabatiza katika jina la Baba na la Mwana na la roho takatifu, kuwafundisha kushika mambo yote ambayo nimewaamuru ninyi. Na, tazama! mimi nipo pamoja na nyinyi siku zote mpaka umalizio wa mfumo wa mambo.”—Mathayo 28:19, 20, NW.

¹¹ Angalia kwamba Wakristo waliofundishwa karibuni walipaswa kubatizwa katika jina la roho takatifu. Hii roho takatifu si mtu bali kani ya utendaji ya Yehova Mungu, ambayo Yeye anatumia kwa njia ya Yesu Kristo. Kwenye Pentekoste, Yehova Mungu, kupitia Yesu, alimimina hii kani ya utendaji juu ya wafuasi waliojiweka wakfu wa Yesu Kristo. (Matendo 2:33) Walijazwa na hii roho takatifu, na mmoja wa maonyesho, au matunda, ya roho takatifu ni shangwe. (Wagalatia 5:22, 23; Waefeso 5:18-20) Shangwe ni sifa yenye kuchochea. Wanafunzi wanapaswa kujawa na shangwe ya roho takatifu. Sala iliyosemwa na mtume Paulo inafaa sana: “Mungu apaye tumaini na ajaze nyinyi shangwe yote na amani kwa kuamini kwenu, kwamba nyinyi mpate kuwa na wingi wa tumaini kwa nguvu ya roho takatifu.”—Warumi 15:13, NW.

¹² Kwa kujawa na roho hii yenye kuvuvia shangwe, Mashahidi wa Yehova leo, kutia na “umati mkubwa,” watataka, naam, watasukumwa na moyo, kutiana moyo katikati ya mfumo huu wa mambo usio na urafiki. Kwa hiyo, mtume Paulo alisema juu ya “mbadilishano wa kitia-moyo.”—Ufunuo 7:9, 10; Warumi 1:12, NW; 14:17, UV.

Kila Sababu ya Kutiwa Moyo

13. Tuna sababu gani za kutiwa moyo na kutiana moyo?

¹³ Kwa kuwa wanajikuta wakiwa katikati ya mfumo huu wa mambo, ambao mpinzani wa kila jambo adilifu ndiye mtawala na hata ndiye mungu wao, Wakristo watataka kutiana moyo ndani ya kundi la Kikristo la ulimwenguni pote, ambalo linaenewa na roho takatifu ya Yehova Mungu. (Waebrania 10:24, 25; Matendo 20:28) Tuna kila sababu ya kutiwa moyo. Naam, sisi tuna shukrani kama nini kuwa na maarifa sahihi juu ya Yehova na juu ya Mwana Wake na juu ya kani ya utendaji wanayoitumia, yaani, roho takatifu! Tuna shukrani kama nini kwa tumaini ambalo wao wanatupa sisi! Hivyo ibada yetu imejawa na shangwe. Mtume Paulo aliwaambia Wakristo aliowaandikia barua yake kwamba wanapaswa kutiana moyo na kujengana katika imani yao iliyo takatifu sana. Wangepaswa kufanya hivyo ‘na kuzidi kufanya hivyo, kwa kadiri walivyoona kwa njia ya mfano siku ile kuwa inakaribia.’ Zaidi ya hilo, mamlaka za kisiasa za dunia hii zinapofutilia mbali Ukristo wa jina tu, pamoja na dini nyingine zote za bandia, hali itatudai tutiane moyo hata zaidi.

14. Ni nani wanaopaswa kuwa wakitiana moyo, na jinsi gani?

¹⁴ Ingawa wazee wanaongoza katika kuwatia moyo kondoo katika makundi yao moja moja, Wakristo wote wanahitaji kutiana moyo, kama vile Waebrania 10:25 inavyoonya kwa upole. Kwa uhakika, hili ni takwa la Kikristo. Ikiwa wewe ni mshiriki wa kundi, je! wewe unatoa kitia-moyo hiki? Huenda ukashangaa, ‘Nawezaje? Naweza kufanya nini?’ Kwanza, kwa wewe kuwako tu mikutanoni na kuunga mkono mpango wa Kikristo, je! ndugu na dada wengine wote hawatiwi moyo, kama vile inavyoelekea kwamba wewe mwenyewe unatiwa moyo unapoona wengine wakihudhuria mikutano ya kundi kwa uaminifu? Wao pia wanaweza kutiwa moyo na mfano wako wa uvumilivu wa uaminifu. Kwa kuendelea kwako katika mwendo wa Kikristo ijapokuwa matatizo na magumu ya maisha, bila kuzimia moyo kamwe, unaweza kuweka mfano wenye kutia nguvu.

Zuia Kivunja-Moyo Kutoka kwa Ibilisi

15. Kwa nini Ibilisi ana “ghadhabu nyingi,” na kwa nani?

¹⁵ Si sisi peke yetu tunaojua kwamba siku ya Yehova iko karibu. Shetani Ibilisi pia anajua. Ufunuo 12:12 unatuambia kwamba sasa kuna ole kwa dunia “kwa maana yule Ibilisi ameshuka kwenu mwenye ghadhabu nyingi, akijua ya kuwa ana wakati mchache tu.” Kama vile Ufunuo 12:17 unavyoonyesha, hasira yake kubwa inaelekezwa kwa wale “wazishikao amri za Mungu, na kuwa na ushuhuda wa Yesu.” Hakuna shaka juu ya hilo—Ibilisi anataka kutuvunja moyo! Naye anajua kabisa jinsi ya kujaribu kufanya hivyo. Yeye anajua manyonge na matatizo yetu, na anayatumia kwa makusudi mabaya.

16. Kwa nini Shetani anatumia kivunja-moyo kuwa silaha?

¹⁶ Kwa nini Ibilisi anatumia kivunja-moyo kama silaha? Kwa sababu kinafanikiwa mara nyingi. Hata mtu ambaye amevumilia upinzani na mnyanyaso mwingi sana huenda akawezwa na kivunja-moyo. Shetani anataka kumdhihaki Yehova Mungu na kujaribu kuthibitisha kwamba anaweza kugeuza watu wasimtumikie Yeye. (Mithali 27:11; linganisha Ayubu 2:4, 5; Ufunuo 12:10.) Akiweza kukuvunja moyo, huenda akafanya upunguze mwendo katika utumishi wako kwa Mungu; huenda hata akasababisha uache, uwe asiyetenda katika kuhubiriwa kwa habari njema za Ufalme.—2 Wakorintho 2:10, 11; Waefeso 6:11; 1 Petro 5:8.

17. Matokeo hasi (mabaya) ya kivunja-moyo yalionekanaje wazi katika siku ya Musa?

¹⁷ Matokeo hasi (mabaya) ya kivunja-moyo yanaweza kuonwa katika kisa cha Waisraeli katika Misri ya kale. Baada ya Musa kusema na Farao, mtawala huyo dhalimu aliongezea sana mizigo yao na uonevu wake kwao. Mungu alimwambia Musa awahakikishie Waisraeli kwamba kwa kweli Yeye angewakomboa, awafanye kuwa watu Wake, aandae mponyoko wao, na kuwaleta ndani ya bara la ahadi. Musa alisema hilo kwa wana wa Israeli. Lakini Kutoka 6:9 inaripoti hivi: “Hawakumsikiliza Musa kwa ajili ya uchungu [mvunjiko, NW] wa moyo, na kwa ajili ya utumwa mgumu.” Mpaka wakati ambapo Yehova alimsadikisha Musa na kumtia moyo, itikio hilo lilivunja Musa moyo asitake kusema na Farao kama alivyoamriwa.—Kutoka 6:10-13.

18. Kwa nini kuna uhitaji mkubwa kwa watu wa Mungu kuzuia kivunja-moyo kinacholetwa na Ibilisi?

¹⁸ Shetani Ibilisi anajua vema sana matokeo hasi ambayo kivunja-moyo kinaweza kuwa nayo juu ya mtumishi wa Mungu. Kama Mithali 24:10 inavyosema: “Ukizimia siku ya taabu, nguvu zako ni chache.” Kwa kuwa tunaishi ndani sana ya wakati wa mwisho, tunahitaji kuwa wenye nguvu na imara kiroho. Ni vibaya kadiri ya kutosha kwamba tunalazimika kushindana na hali zetu za kutokamilika, udhaifu, na kasoro ambazo huenda zikatufanya tusite-site; lakini huku Shetani akijaribu kutumia kasoro hizi, tunahitaji msaada.

Itegemee kwa Uthabiti Dhabihu ya Kristo

19. Ni nini kitakachotusaidia tuzuie kivunja-moyo, na kwa nini?

¹⁹ Msaada mkubwa kwa habari hii ni uandalizi wa ukombozi ambao Yehova alifanya uwezekane kwa njia ya Yesu Kristo. Tunaweza kuwa washinda-magumu kwa kuutegemea ukombozi kwa uthabiti. Ni hatari kupunguza umaana wa uandalizi huu. Naam, bado tutafanya makosa, au dhambi, madhali sisi ni wasiokamilika. Lakini si lazima tuvunjike moyo na kuacha, tukihisi hakuna tumaini, na hapo tutumbukie katika mtego wa Shetani. Tunajua kwamba tuna dhabihu kamili kwa ajili ya dhambi. Ukombozi unaweza kuondoa dhambi. Ikiwa sisi ni wa “umati mkubwa,” ni lazima tuwe na imani na tumainio kamili kwamba tunaweza kuosha majoho yetu na kuyafanya meupe katika damu ya Mwana-Kondoo.—Ufunuo 7:9, 14, NW.

20. Ufunuo 12:11 unaonyeshaje kwamba yule mvunja-moyo mkubwa, Ibilisi, anaweza kushindwa?

²⁰ Kwenye Ufunuo 12:10 Shetani anaele-zwa kuwa “mshitaki wa ndugu zetu . . . awashitakiye mbele za Mungu wetu, mchana na usiku.” Tunaweza kumshindaje mshitaki huyo mwovu na mvunja moyo aliye dubwana? Mstari wa 11 wa sura hiyo unaandaa jibu: “Wakamshinda kwa damu ya Mwana-Kondoo, na kwa neno la ushuhuda wao; ambao hawakupenda maisha yao hata kufa.” Hivyo watu wa Yehova wanahitaji kuendeleza uhakika kamili katika dhabihu ya ukombozi, damu ya Mwana-Kondoo. Kiendeleze kikiwa imara kitia-moyo unachopata kutokana na kutoa ushahidi, ukishiriki kwa ukawaida habari njema za Ufalme wa Mungu pamoja na kila mtu unayeweza.

21. Ni jinsi gani huenda sisi tukashiriki katika kazi ya Ibilisi ya kuwavunja moyo ndugu zetu bila kukusudia?

²¹ Nyakati fulani, hata bila kukusudia, huenda tukashiriki katika kazi ya Ibilisi ya kuwavunja moyo ndugu zetu. Jinsi gani? Kwa kuwa wachambuzi mno, kuwa wenye kudai mno, au kuwa waadilifu kupita kiasi. (Mhubiri 7:16) Sisi sote tuna mapungukio na udhaifu mbalimbali. Tusiyatumie kwa makusudi mabaya kama afanyavyo Ibilisi. Bali, tuseme mambo ya kutia moyo juu ya ndugu zetu na watu wa Yehova wakiwa kikundi kilichopangwa kitengenezo. Tunataka kuendelea kuongezeana moyo na hivyo basi tuepuke kupunguziana moyo.

Kutia Moyo kwa Kadiri Ile Siku Inavyokaribia

22, 23. (a) Kwa nini haitupasi kuwaachia wazee peke yao kuwa vyanzo vya kitia-moyo? (b) Waangalizi katika kundi la Kikristo wanaweza kutiwaje moyo?

²² Tunapaswa kufanya liwe azimio letu imara kutiana moyo sikuzote kwa kadiri ile siku inavyokaribia. Watie wengine moyo kwa mfano wako wa uaminifu na maneno ya faraja. Iga Yehova na Bwana Yesu Kristo kwa habari hii. Usiwaachie wazee wa kundi tu wawe ndio chanzo cha kitia-moyo. Kwani, wazee wenyewe wanahitaji kitia-moyo. Wao wana udhaifu na unyonge mbalimbali kama kondoo wengineo wa kundi, na wanalazimika kukabili matatizo yale yale katika kuandalia familia zao riziki katika ulimwengu wenye kuchakaa. Kuongezea hilo, wana ule ambao Paulo aliuita wasiwasi kwa ajili ya makundi. (2 Wakorintho 11:28, 29, NW) Yao ni kazi ngumu—wanahitaji kitia-moyo.

²³ Wewe unaweza kuwatia moyo sana wale walio katika vyeo vya uangalizi katika kundi la Kikristo kwa kushirikiana nao. Ndipo utakuwa ukifuata shauri la Waebrania 13:17: “Watiini wenye kuwaongoza, na kuwanyenyekea; maana wao wanakesha kwa ajili ya roho [nafsi, NW] zenu, kama watu watakaotoa hesabu, ili kwamba wafanye hivyo kwa furaha wala si kwa kuugua; maana isingewafaa ninyi.”

24. Katika siku hii ya kivunja-moyo, tunapaswa kuwa tukifanya nini, na kwa nini?

²⁴ Tunaishi katika siku ya kivunja-moyo. Mioyo ya wanadamu kwa kweli imezimia kwa kuhofu na kutazamia mambo yanayokuja juu ya dunia inayokaliwa, kama alivyotabiri Yesu. (Luka 21:25, 26) Kukiwa na matatizo mengi sana yanayoelekea kushusha na kupunguza moyo, iweni wenye ‘kuhimizana; na kuzidi kufanya hivyo, kwa kadiri mwonavyo siku ile kuwa inakaribia.’ Fuateni shauri jema la Paulo kwenye 1 Wathesalonike 5:11: “Farijianeni, na kujengana kila mtu na mwenzake, vile vile kama mnavyofanya.”

Wewe Ungejibuje?

◻ Kwa nini Wakristo wanapaswa kuwa wenye kutiana moyo, hata zaidi ya hapo kwanza?

◻ Maarifa juu ya jina la kimungu yamewatiaje moyo watu wa Yehova?

◻ Sisi mmoja mmoja tunaweza kutiana moyo kwa njia zipi?

◻ Kwa nini ni lazima tuepuke kushiriki katika kazi ya Ibilisi ya kuwavunja moyo ndugu zetu?

[Picha katika ukurasa wa 17]

Wazee wanachukua uongozi katika kuwatia moyo kondoo katika makundi yao