Maswali Kutoka kwa Wasomaji

◼ Kwa nini Yesu aliuanzisha Ukumbusho pamoja na mitume tu wala si na wanafunzi wengine ambao wangeingizwa katika agano jipya?

Swali hilo laonekana lategemea wazo lenye kosa kwamba Yesu alikusanyika pamoja na mitume wake jioni hiyo ili kuanzisha Chakula cha Jioni cha Bwana pamoja na kundi la Kikristo la waliopakwa mafuta ambao tayari walikuwa katika agano jipya. Kwa kweli, kundi la Kikristo halikuwa limefanyizwa bado, na Yesu alikuja pamoja na mitume wake kwa chakula cha Kupitwa kwa Kiyahudi cha kila mwaka.

Bila shaka, Yesu alikuwa na wanafunzi wengine zaidi ya wale 12 waliojulikana kuwa mitume. Mwaka kabla ya kifo chake, alituma wanafunzi 70 kwenye safari ya kuhubiri. Baada ya kufufuliwa kwake, “aliwatokea ndugu zaidi ya mia tano pamoja.” Na kulikuwako wanafunzi ‘karibu mia moja na ishirini’ waliokusanyika siku ya Pentekoste. (1 Wakorintho 15:6, UV; Matendo 1:15, 16, 23, HNWW; Luka 10:1-24, UV) Lakini acheni tuangalie kikundi kilichokuwa pamoja na Yesu alipoanzisha mwadhimisho wa kila mwaka unaojulikana kuwa Chakula cha Jioni cha Bwana.

Luka 22:7, 8 latoa hali ya wakati, likisema: “Ikafika siku ya mikate isiyotiwa chachu, ambayo ilipasa kuchinja pasaka. Akawatuma Petro na Yohana, akisema, Nendeni, mkatuandalie pasaka tupate kuila.” Usimulizi unaendelea hivi: “Na mtamwambia mwenye nyumba, Mwalimu akuambia, Ki wapi chumba cha wageni, nipate kula pasaka humo pamoja na wanafunzi wangu?” Kwa hiyo jioni hiyo Yesu alikuwa pamoja na wale 12 kwa ajili ya mwadhimisho wa Kiyahudi. Aliwaambia hivi: “Nimetamani sana kuila pasaka hii pamoja nanyi kabla ya kuteswa kwangu.”—Luka 22:11, 15.

Kupitwa kulikuwa mwadhimisho wa kifamilia, tangu mwanzo wako katika Misri. Katika kuanzisha Kupitwa, Mungu alimwambia Musa kwamba kondoo alipaswa achinjwe kwa ajili ya watu wa kila nyumba. Ikiwa familia ilikuwa ndogo sana ili kula kondoo mzima, familia ya jirani ingeweza kualikwa ili kushiriki chakula hicho. Hivyo, ni jambo la kiakili kwamba kwa Kupitwa kwa 33 W.K., walio wengi wa wanafunzi wa Yesu kwa ukawaida wangalikusanyika pamoja na familia zao wenyewe kwa chakula hicho.

Lakini Yesu ‘alitamani sana’ kushiriki kule ambako kungekuwa Kupitwa kwa mwisho kisheria, na usiku wa mwisho kabla ya kifo chake, pamoja na wafuasi wake wa karibu zaidi, waliokuwa wamesafiri pamoja naye wakati mwingi wa huduma yake. Mwishoni mwa chakula hicho cha Kupitwa, Yesu aliwaambia juu ya mwadhimisho mpya ambao ulipasa ufanywe na wafuasi wake wote wakati ujao. Divai ya ule mwadhimisho wa Kikristo uliokuwa bado wa wakati ujao ingewakilisha damu ya “agano jipya” ambalo lingechukua mahali pa agano la Sheria.—Luka 22:20.

Hata hivyo, usiku wa Nisani 14, 33 W.K., agano jipya halikuanza kutenda kazi, kwa kuwa dhabihu ya kuhalalisha—Yesu—haikuwa imetolewa bado. Agano la Sheria bado lilikuwa likitenda kazi. Bado halikuwa limekongomewa kwenye mti. Zaidi ya hayo, haingekuwa wazi mpaka siku ya Pentekoste ndipo mahali pa agano la kale pamoja na Israeli wa asili pangekuwa pamechukuliwa na agano jipya pamoja na Israeli wa kiroho.—Wagalatia 6:16; Wakolosai 2:14.

Hivyo, wala wale mitume waaminifu 11, wala yeyote wa wale wanafunzi wengineo hawakuwa katika agano jipya jioni hiyo. Na Yesu hakuwa anaonyesha kutopendezwa kokote na wanafunzi Wayahudi kwa kuwaacha wakusanyike pamoja na familia zao ili kuadhimisha Kupitwa.