Saburi ya Mungu Itaendelea kwa Muda Gani?

MIAKA kama 3,000 iliyopita, mtu mwenye hekima alisema hivi: “Mwanadamu ametawala mwanadamu kwa kumwumiza.” (Mhubiri 8:9, NW) Tangu wakati alipoonelea hivyo, hali hazijakuwa bora. Katika historia yote, watu mmoja mmoja au vikundi vya watu, vimetwaa mamlaka kwa nguvu, kimoja baada ya kingine, kikitawala na kujifaidi kwa kuwatumia wanadamu wengine. Yehova Mungu amevumilia hayo kwa saburi.

Yehova amekuwa mwenye saburi wakati serikali zimesababisha vifo vya mamilioni ya watu katika vita na kuruhusu hali za ukosefu wa haki kiuchumi zenye kupita kiasi. Leo, bado anasubiri wanadamu wanapoharibu tabaka ya gesi ozoni na kuchafua hewa na bahari. Jinsi inavyomwumiza kuona ardhi yenye kuzaa na misitu na wanyama wa porini vikiharibiwa bure!

Ni Kwa Nini Mungu Ni Mwenye Saburi Sana?

Kielezi rahisi huenda kikatusaidia kujibu swali hilo. Fikiria jinsi biashara yaweza kuathiriwa wakati mwajiriwa anapoendelea kuja kazini akiwa amechelewa. Mwenye biashara apaswa kufanya nini? Haki ya kimsingi huenda ikataka kwamba amfute kazi mwajiriwa huyo mara moja. Lakini huenda akakumbuka mithali hii ya Biblia: “Asiye mwepesi wa hasira ana fahamu nyingi; bali mwenye roho ya hamaki hutukuza upumbavu.” (Mithali 14:29) Utambuzi huenda ukamfanya angojee kabla ya kuchukua hatua. Huenda akaamua kuruhusu wakati wa ku-mzoeza mwajiriwa mwingine ili biashara isiharibike hata zaidi.

Hisia-mwenzi huenda pia ikamfanya angojee. Vipi kumwonya mwajiriwa huyo mlegevu kuona ikiwa atabadilisha mwenendo wake? Kwa nini asiongee naye kupata kuona kama kuchelewa kwake kwa ukawaida kunasababishwa na tatizo ambalo laweza kutatuliwa au na mwelekeo mbaya usiorekebika? Ingawa mwenye biashara aweza kuamua kusubiri, hata hivyo, saburi yake haitakuwa bila kikomo. Mwajiriwa angepaswa abadili tabia au hatimaye akabiliane na kufutwa kazi. Hilo lingefaidi tu biashara yenyewe na waajiriwa wanaofuata kanuni za mwongozo.

Kwa njia inayofanana na hiyo, Yehova Mungu amesubiri huku akishughulika na matendo mabaya ili kuruhusu wakati wa kutokeza suluhisho lenye haki kwa matatizo fulani. Zaidi ya hayo, saburi yake huwapa watenda mabaya nafasi ya kubadili njia zao na kupata manufaa za milele. Kwa hiyo, Biblia hututia moyo tusihuzunike kwa sababu ya saburi ya Mungu. Badala ya hiyo, yasema hivi: “Uhesabuni uvumilivu wa Bwana kuwa ni wokovu.” 2 Petro 3:15.

Mfano wa Saburi ya Mungu

Yehova Mungu alikuwa mwenye saburi kabla ya Gharika kuu ya siku ya Noa. Ulimwengu wa wakati huo ulijaa jeuri nao ulikuwa mwovu sana. Twasoma hivi: “BWANA [Yehova, NW] akaona ya kuwa maovu ya mwanadamu ni makubwa duniani . . .  BWANA [Yehova, NW] akasema, Nitamfutilia mbali mwanadamu niliyemwumba usoni pa nchi.” (Mwanzo 6:5, 7) Naam, Yehova alikuwa na nia ya kusuluhisha kabisa tatizo la uovu la wakati huo: kuondolea mbali watu waovu. Lakini hakuchukua hatua mara moja. Kwa nini?

Kwa sababu si kila mtu alikuwa mwovu. Noa na familia yake walikuwa waadilifu machoni pa Mungu. Kwa hiyo kwa manufaa yao, Yehova alingoja kwa saburi ili awaruhusu wale watu waadilifu wachache wafanye mipango kwa ajili ya wokovu. Zaidi ya hayo, kungoja huko kwa muda mrefu kulimpa Noa nafasi ya kuwa “mhubiri wa uadilifu,” akiwapa wale watu waovu nafasi ya kubadili njia zao. Biblia husema hivi: “Uvumilivu wa Mungu ulipokuwa ukingoja, siku za Nuhu, safina ilipokuwa ikitengenezwa; ambamo ndani yake wachache, yaani, watu wanane, waliokoka kwa maji.”—2 Petro 2:5 NW; 1 Petro 3:20.

Sababu Kwa Nini Mungu Ni Mwenye Saburi Leo

Leo, hali iko kama hiyo. Ulimwengu umejaa jeuri tena. Kama katika siku ya Noa, Mungu tayari amehukumu ulimwengu huu, ambao, Biblia husema, ‘umewekwa kwa ajili ya siku ile ambapo watu wasiomcha Mungu watahukumiwa na kuangamizwa.’ (2 Petro 3:7) Hilo litukiapo, hakutakuwapo tena uharibifu wa mazingira, uonevu wa wadhaifu, au utumizi mbaya wa uwezo.

Basi, kwa nini Mungu hajawaharibu watu wasiomhofu muda wote huo? Kwa sababu kumekuwa masuala ya kusuluhisha na mambo ya muhimu ya kupanga. Kwa kweli Yehova anaelekea kwenye suluhisho lenye kudumu kwa tatizo la uovu linalohusisha mambo mengi, kutia na wokovu wa wanadamu wenye mioyo minyofu kutoka kwenye utumwa wa ugonjwa na kifo.

Akikumbuka tokeo hilo, Yehova alikusudia kuandaa Mwokozi ambaye angetoa fidia kwa ajili ya dhambi zetu. Biblia husema hivi kuhusu yeye: “Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele.” (Yohana 3:16) Ilichukua maelfu ya miaka kumtayarishia Yesu njia ya kuja na kudhabihu uhai wake kwa ajili ya ainabinadamu. Kwa muda wa miaka hiyo yote, kwa upendo Mungu alikuwa mwenye saburi. Lakini je, uandalizi huo haukustahili kungojewa?

Yesu aliandaa fidia kwa ajili ya ainabinadamu karibu miaka elfu mbili iliyopita. Basi, kwa nini Mungu angali anasubiri? Sababu moja ni kwamba, kifo cha Yesu kilikuwa ishara ya mwanzo wa kampeni ya elimu. Ainabinadamu ilipaswa ijifunze juu ya uandalizi huo wenye upendo na kupewa nafasi ya kuukubali au kuukataa. Hiyo ingechukua wakati, lakini huo ungekuwa wakati uliotumiwa vizuri. Biblia husema hivi: “Bwana [Yehova, NW] hakawii kuitimiza ahadi yake, kama wengine wanavyokudhani kukawia, bali huvumilia kwenu, maana hapendi mtu ye yote apotee, bali wote wafikilie toba.”—2 Petro 3:9.

Suala la Serikali

Jambo jingine la muhimu lingechukua wakati pia. Kulikuwako uhitaji wa kusuluhisha tatizo la serikali ya kutawala ainabinadamu. Mwanzoni, mwanadamu alikuwa chini ya serikali ya kimungu. Lakini katika shamba la Edeni, wazazi wetu wa kwanza waliipa serikali hiyo visogo vyao. Walichagua kujitegemea bila Mungu, wakitaka kujitawala wenyewe. (Mwanzo 3:1-5) Lakini, kwa kweli, mwanadamu hakuumbwa ajitawale mwenyewe. Nabii Yeremia aliandika hivi: “Ee BWANA [Yehova, NW], najua ya kuwa njia ya mwanadamu haimo katika nafsi yake; kuelekeza hatua zake si katika uwezo wa mwanadamu.”—Yeremia 10:23; Mithali 20:24.

Hata hivyo, tangu suala la serikali lilipotokezwa, kwa saburi Yehova ameruhusu wakati ili kulisuluhisha. Kwa kweli, ameruhusu kwa ukarimu maelfu ya miaka ili mwanadamu ajaribu kila namna ya serikali iwezayo kuwazika. Tokeo limekuwa nini? Imeonekana wazi kwamba hakuna serikali yoyote ya kibinadamu iwezayo kuondoa uonevu, ukosefu wa haki, au visababishi vinginevyo vya huzuni.

Kwa kweli, kwa kufikiria historia ya kibinadamu, je, mtu yeyote aweza kusema kweli kweli kwamba Mungu si mwenye haki anapotangaza nia yake ya kuondolea mbali serikali zote za kibinadamu na kuweka yake mwenyewe mahali pazo? Bila shaka sivyo! Pasipo shaka tunakaribisha utimizo wa unabii huu wa Biblia: “Katika siku za wafalme hao Mungu wa mbinguni atausimamisha ufalme ambao hautaangamizwa milele, wala watu wengine hawataachiwa enzi yake; bali utavunja falme hizi zote vipande vipande na kuziharibu, nao utasimama milele na milele.”—Danieli 2:44.

Mfalme wa kimbingu wa Ufalme huo ni Yesu aliyefufuliwa. Kumtayarisha kwa ajili ya cheo hicho—pamoja na kuchagua wanadamu kuwa watawala wenzake—kumechukua wakati. Muda wa wakati huo wote, Mungu amekuwa mwenye saburi.

Nufaika Sasa Kutokana na Saburi ya Mungu

Leo, mamilioni ya watu katika nchi angalau 212 hunufaika kutokana na saburi ya Mungu. Wameunganishwa katika tamaa yao ya kutii Mungu na kutumikia serikali yake ya kimbingu. Wanapokutana pamoja katika Majumba ya Ufalme yao, wanajifunza jinsi ilivyo bora zaidi kutumia kanuni za Biblia maishani mwao. Hawashiriki katika siasa za ulimwengu zenye kuleta mgawanyiko, ingawa wanajitiisha wenyewe kwa serikali za kibinadamu maadamu Mungu kwa saburi azi-ruhusu zitende.—Mathayo 22:21; Warumi 13:1-5.

Ushirikiano kama huo miongoni mwa watu wengi sana unatetea Yehova kuwa yule Mmoja anayeweza kuleta upatano miongoni mwa watu wenye uwezo wa kujichagulia wenyewe ambao hujifunza kumpenda na ambao hutaka kumtumikia. Bila shaka umekutana na watu hao wanapoendeleza kazi ile ile ambayo Yesu mwenyewe alianzisha, ile ya kuhubiri habari njema ya Ufalme wa Mungu. Yesu alitabiri upeo wa kazi hiyo aliposema hivi: “Habari njema ya ufalme itahubiriwa katika ulimwengu wote, kuwa ushuhuda kwa mataifa yote; hapo ndipo ule mwisho utakapokuja.”—Mathayo 24:14.

Si Muda Mrefu Zaidi!

Uthibitisho unaoonekana waonyesha kwamba mipango ya serikali ya Mungu yenye uadilifu ya kutwaa utawala wa dunia wa siku kwa siku iko karibu kukamilika. Baada ya kusimulia matokeo mabaya ya kushindwa kwa serikali ya kibinadamu ambayo tumeona muda wa karne hii, Yesu alisema hivi: “Mwonapo mambo hayo yanaanza kutokea, tambueni ya kwamba ufalme wa Mungu u karibu.”—Luka 21:10, 11, 31.

Karibuni, Mungu ataondolea mbali waovu kutoka duniani. Maneno ya mtunga zaburi yatakuwa na matumizi halisi: “Watenda mabaya wataharibiwa . . . Maana bado kitambo kidogo asiye haki hatakuwapo, utapaangalia mahali pake wala hatakuwapo.” (Zaburi 37:9, 10) Waweza kuwazia ulimwengu usio na uovu? Ni nani atakayesimamia mambo wakati huo? Biblia husema hivi: “Tazama, mfalme [Kristo Yesu aliyetawazwa mbinguni] atamiliki kwa haki, na wakuu [washikamanifu duniani wenye kuwekwa naye], watatawala kwa hukumu. Na kazi ya haki itakuwa amani; na mazao ya haki yatakuwa ni utulivu na matumaini daima. Na watu wangu watakaa katika kao la amani; na katika maskani zilizo salama, na katika mahali pa kupumzikia penye utulivu.”—Isaya 32:1, 17, 18.

Hivyo, serikali ya Mungu ya kimbingu itatangua matokeo mabaya ya matendo mabaya ya mwanadamu na kupanga kitengenezo wale wanaotumaini katika Yeye kuwa jamii ya kibinadamu yenye upatano. Ikisimulia upatano huo, Biblia husema hivi: “Mbwa-mwitu atakaa pamoja na mwana-kondoo, na chui atalala pamoja na mwana-mbuzi; ndama na mwana-simba na kinono watakuwa pamoja, na mtoto mdogo atawaongoza . . . Hawatadhuru wala hawataharibu katika mlima wangu wote mtakatifu; maana dunia itajawa na kumjua BWANA [Yehova, NW], kama vile maji yanavyoifunika bahari.”—Isaya 11:6-9.

Ni tokeo zuri ajabu kama nini la Mungu kuwa mwenye saburi! Hivyo, badala ya kulalamika kwamba Mungu amengoja muda mrefu mno, kwa nini usitumie kwa faida saburi yake kwa kujitiisha mwenyewe kwa Ufalme wake? Jifunze viwango vyake kutoka kwa Biblia na kuvifuata. Shiriki na wengine ambao wamejitiisha kwake kwa upatano. Kisha, saburi ya Mungu litatokeza mibaraka ya milele kwako.