Kizazi cha 1914 Kwa Nini ni cha Maana?

“Wasomaji wetu wajua kwamba kwa miaka kadhaa tumekuwa tukitazamia Muhula huu umalizike kwa wakati mbaya sana wa taabu, na tunatazamia utokee kwa ghafula na kwa nguvu si muda mrefu baada ya Oktoba, 1914.”—Kutoka The Watch Tower and Herald of Christ’s Presence, Mei 15, 1911.

TANGU 1879 gazeti lililojulikana wakati huo kuwa The Watch Tower and Herald of Christ’s Presence (linalojulikana sasa kuwa Mnara wa Mlinzi Unaotangaza Ufalme wa Yehova) mara nyingi lilielekezea 1914 kuwa mwaka ulioonyeshwa katika unabii wa Biblia. Mwaka huo ulipokaribia, wasomaji walikumbushwa kwamba “wakati mbaya sana wa taabu” ungeweza kutazamiwa.

Habari hiyo ilitangazwa kotekote na Wakristo, walioitegemeza juu ya uelewevu wao wa zile “nyakati saba” na “nyakati za Wasio Wayahudi” zilizotajwa katika Biblia.a Walielewa kipindi hicho kuwa miaka 2,520—kikianza na kupinduliwa kwa ufalme wa kale wa Kidaudi katika Yerusalemu na kikiishia Oktoba 1914.b—Danieli 4:16, 17; Luka 21:24, King James Version.

Oktoba 2, 1914, Charles Taze Russell, aliyekuwa wakati huo msimamizi wa Watch Tower Bible and Tract Society, alitangaza kwa ujasiri: “Nyakati za Wasio Wayahudi zimeisha; wafalme wamekuwa na siku yao.” Maneno yake yalithibitika kuwa ya kweli kama nini! Katika Oktoba 1914, tukio lisiloweza kuonekana kwa macho ya kibinadamu lenye umaana wa kuutetemesha ulimwengu lilitukia mbinguni. Yesu Kristo, Mrithi wa daima wa “kiti cha enzi cha Daudi,” alianza utawala wake akiwa Mfalme juu ya ainabinadamu yote.—Luka 1:32, 33; Ufunuo 11:15.

‘Lakini,’ huenda ukauliza, ‘ikiwa Kristo alianza kutawala katika 1914, ni kwa nini hali duniani zikawa mbaya zaidi?’ Kwa sababu Shetani adui ya ainabinadamu asiyeonekana alikuwako bado. Kufikia 1914, Shetani angeweza kwenda mbinguni. Hali hiyo ilibadilika wakati Ufalme wa Mungu uliposimamishwa katika 1914. “Kulikuwa na vita mbinguni.” (Ufunuo 12:7) Shetani na roho waovu wake walishindwa na kutupwa duniani, kukiwa na matokeo yenye kuletea ainabinadamu msiba mkuu. Biblia ilitabiri hivi: “Ole wa nchi na bahari! kwa maana yule Ibilisi ameshuka kwenu mwenye ghadhabu nyingi, akijua ya kuwa ana wakati mchache tu.”—Ufunuo 12:12.

Katika karne ya kwanza W.K., Yesu alisema kwamba kuwapo kwake kusikoonekana akiwa Mfalme mpya wa dunia kungeonyeshwa na ishara yenye kuonekana. Aliulizwa hivi: “Ni nini itakayokuwa ishara ya kuwapo kwako na ya umalizio wa mfumo wa mambo?” Jibu lake likawa nini? “Taifa litainuka dhidi ya taifa na ufalme dhidi ya ufalme, na kutakuwako upungufu wa chakula na matetemeko ya dunia mahali hapa na mahali hapa. Mambo hayo yote ni mwanzo wa maumivu makali ya ghafula ya taabu.”—Mathayo 24:3, 7, 8, NW.

Kulingana na hilo, vita iliyotokea katika 1914 iliandamana na upungufu wa chakula mbaya sana, kwa kuwa uzalishaji wa mazao ya chakula kulikatishwa kwa muda wa zaidi ya miaka minne. Vipi “matetemeko ya dunia mahali hapa na mahali hapa”? Katika mwongo uliofuata 1914, matetemeko ya dunia yenye uharibifu yasiyopungua kumi yaliua watu zaidi ya 350,000. (Ona sanduku.) Kwa kweli, kizazi cha 1914 kiliona “mwanzo wa maumivu makali ya ghafula ya taabu.” Na tangu wakati huo, maumivu makali ya ghafula ya taabu yamepiga kwa ukawaida kwa namna ya misiba-asilia, njaa, na vita vingi sana.

Hata hivyo, habari ya kusimamishwa kwa Ufalme wa Mungu katika 1914 ni habari njema kwa sababu Ufalme huo utaokoa dunia hii kutoka uharibifu. Jinsi gani? Utaondoa dini zote bandia, za kinafiki, serikali zenye ufisadi, na uvutano mwovu wa Shetani. (Danieli 2:44; Warumi 16:20; Ufunuo 11:18; 18:4-8, 24) Isitoshe, utaleta ulimwengu mpya ambao “haki yakaa ndani yake.”—2 Petro 3:13.

Upesi baada ya Vita ya Ulimwengu 1, Wanafunzi wa Biblia wenye mioyo myeupe, kama Mashahidi wa Yehova walivyojulikana wakati huo, walianza kutambua pendeleo lao kuhusu sehemu nyingine ya ishara ya kuwapo kwa Yesu akiwa Mfalme. Yesu Kristo alitabiri hivi: “Habari njema ya ufalme itahubiriwa katika ulimwengu wote, kuwa ushuhuda kwa mataifa yote; hapo ndipo ule mwisho utakapokuja.”—Mathayo 24:14.

Kutoka mianzo midogo katika 1919, Mashahidi wa Yehova wameendelea bila kuacha kueneza hizo “habari njema.” Likiwa tokeo, mamilioni kutoka nchi zaidi ya 200 sasa wanakusanywa kuwa raia wa Ufalme wa Mungu. Na ni mibaraka iliyoje inayowangojea raia hao! Ufalme huo utaondolea mbali vita, njaa, uhalifu, na uonevu. Utashinda hata ugonjwa na kifo!—Zaburi 46:9; 72:7, 12-14, 16; Mithali 2:21, 22; Ufunuo 21:3, 4.

Kabla ya kizazi cha 1914 kupitilia mbali, kazi ya kuhubiri Ufalme itakuwa imetimiza kusudi layo. “Kwa kuwa,” akatabiri Yesu, “kutakuwapo dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe. Na kama siku hizo zisingalifupizwa, asingeokoka mtu ye yote; lakini kwa ajili ya wateule zitafupizwa siku hizo.”—Mathayo 24:21, 22.

Usifanye lile kosa ambalo kizazi cha kabla ya 1914 kilifanya. Mambo hayataendelea sikuzote jinsi yalivyo sasa. Mabadiliko ya ajabu yako mbele. Lakini kwa wale watendao kwa hekima, kuna matarajio mazuri ajabu.

Sikiliza basi, maneno ya nabii mmoja wa zamani: “Mtafuteni BWANA [Yehova, NW], enyi nyote mlio wanyenyekevu wa dunia . . . Itafuteni haki, utafuteni unyenyekevu; huenda mtafichwa katika siku ya hasira ya BWANA [Yehova, NW].” (Sefania 2:3) Twaweza kutumiaje shauri hilo? Makala zifuatazo zitasaidia kulijibu swali hilo.

[Maelezo ya Chini]

[Chati katika ukurasa wa 7]

MATETEMEKO YA DUNIA Katika Mwongo Uliofuata 1914

Tarehe: Mahali: Vifo:

Januari 13, 1915 Avezzano, Italia 32,600

Januari 21, 1917 Bali, Indonesia 15,000

Februari 13, 1918 Wilaya ya Kwangtung, Uchina 10,000

Oktoba 11, 1918 Puerto Rico (magharibi) 116

Januari 3, 1920 Veracruz, Meksiko 648

Septemba 7, 1920 Reggio di Calabria, Italia 1,400

Desemba 16, 1920 Wilaya ya Ningsia, Uchina 200,000

Machi 24, 1923 Wilaya ya Szechwan, Uchina 5,000

Mei 26, 1923 Iran (kaskazini-mashariki) 2,200

Septemba 1, 1923 Tokyo-Yokohama, Japani 99,300

Kutoka orodha ya “Matetemeko ya Dunia ya Maana ya Ulimwengu” katika kitabu Terra Non Firma cha James M. Gere na Haresh C. Shah.