Sababu kwa Nini Mlo wa Jioni wa Bwana Una Maana Kwako

YESU KRISTO alianzisha Mlo wa Jioni wa Bwana katika usiku wa mwisho wa uhai wake wa kibinadamu. Hiyo ilikuwa jioni ya Alhamisi, Machi 31, na Yesu alikufa Ijumaa alasiri, Aprili 1. Kwa kuwa siku za kalenda ya Kiyahudi zilianza kutoka jioni ya siku moja hadi ile ya siku ifuatayo, Mlo wa Jioni wa Bwana na kifo cha Yesu vilitukia katika Nisani 14, 33 W.K.

Kwa nini Yesu alianzisha mlo huo? Ni nini umaana wa mkate na divai aliyotumia? Ni nani wanaopaswa kushiriki? Mlo huo unapaswa kuadhimishwa mara nyingi kadiri gani? Na unawezaje kuwa na maana kwako?

Kwa Nini Ulianzishwa?

Kuhusu Mlo wa Jioni wa Bwana, Yesu aliwaambia mitume wake hivi: “Endeleeni kufanya hivi katika kukumbuka mimi.” (NW) Kulingana na fasiri nyingine, alisema hivi: “Fanyeni hivi kama ukumbusho wa mimi.” (1 Wakorintho 11:24; The New English Bible) Kwa kweli, Mlo wa Jioni wa Bwana hurejezewa mara nyingi kuwa Ukumbusho wa kifo cha Kristo.

Yesu alikufa akiwa mshika uaminifu-maadili mwenye kuunga mkono enzi kuu ya Yehova na hivyo akamthibitisha Shetani kuwa mwongo mwenye kudhihaki kwa ajili ya kusisitiza kwamba wanadamu wanyoofu wanamtumikia Mungu kwa makusudi ya kibinafsi tu. (Ayubu 2:1-5) Kifo chake kilifanya moyo wa Mungu ushangilie.—Mithali 27:11.

Kupitia kifo chake akiwa mwanadamu mkamilifu, Yesu pia ‘alitoa nafsi yake iwe fidia ya wengi.’ (Mathayo 20:28) Kwa kutenda dhambi dhidi ya Mungu, mwanadamu wa kwanza alipoteza uhai mkamilifu wa kibinadamu na mataraja yao. Lakini “Mungu aliupenda ulimwengu [wa ainabinadamu], hata akamtoa Mwanawe pekee, ili kila mtu amwaminiye asipotee, bali awe na uzima wa milele.” (Yohana 3:16) Naam, “mshahara wa dhambi ni mauti; bali karama ya Mungu ni uzima wa milele katika Kristo Yesu Bwana wetu.”—Warumi 6:23.

“Nalipokea kwa Bwana”

Maneno haya ya mtume Paulo yaelewesha wazi zaidi juu ya ukumbusho wa kifo cha Kristo: “Nalipokea kwa Bwana niliyowapa nanyi, ya kuwa Bwana Yesu usiku ule aliotolewa alitwaa mkate, naye akiisha kushukuru akaumega, akasema, Huu ndio mwili wangu ulio kwa ajili yenu; fanyeni hivi kwa ukumbusho wangu. Na vivi hivi baada ya kula akakitwaa kikombe akasema, Kikombe hiki ni agano jipya katika damu yangu; fanyeni hivi kila mnywapo, kwa ukumbusho wangu. Maana kila mwulapo mkate huu na kukinywea kikombe hiki, mwaitangaza mauti ya Bwana hata ajapo.”—1 Wakorintho 11:23-26.

Kwa kuwa Paulo hakuwapo pamoja na Yesu na wale mitume 11 katika Nisani 14, 33 W.K., kwa wazi habari hiyo ‘ilipokewa kutoka kwa Bwana’ kupitia ufunuo uliopuliziwa. Yesu alianzisha Ukumbusho “usiku ule aliotolewa” na Yuda kwa maadui wa kidini Wayahudi, waliowafanya Warumi wamtundike Kristo. Wale wanaostahili kushiriki mkate na divai wa kimfano wangefanya hivyo katika kumkumbuka yeye.

Kuuadhimisha Mara Nyingi Kadiri Gani?

Ni nini maana ya maneno ya Paulo: “Kila [mara nyingi, NW] mwulapo mkate huu na kukinywea kikombe hiki, mwaitangaza mauti ya Bwana hata ajapo”? Wakristo wapakwa-mafuta waaminifu wangeshiriki mifano ya Ukumbusho “mara nyingi” mpaka wafe, baadaye wafufuliwe kwenye uhai wa kimbingu. Hivyo, mbele za Mungu na ulimwengu, wangetangaza mara nyingi imani yao katika uandalizi wa dhabihu ya Yesu. Kwa muda gani? “Hata ajapo,” akasema Paulo, kwa wazi akimaanisha kwamba miadhimisho hiyo ingeendelea mpaka kuwasili kwa Yesu ili kuwapokea wafuasi wake wapakwa-mafuta mbinguni kupitia ufufuo wakati wa “kuwapo” kwake. (1 Wathesalonike 4:14-17, NW) Hilo lapatana na maneno ya Kristo kwa wale mitume waaminifu-washikamanifu 11: “Nikienda na kuwaandalia mahali, nitakuja tena niwakaribishe kwangu; ili nilipo mimi, nanyi mwepo.”—Yohana 14:3.

Je! kifo cha Kristo kikumbukwe kila siku au labda kila juma? Yesu alianzisha Mlo wa Jioni wa Bwana na akauawa katika Sikukuu ya Kupitwa, iliyokumbusha juu ya kukombolewa kwa Israeli kutoka katika utumwa wa Misri. Kwa kweli, yeye aitwa “Kristo kupitwa kwetu” kwa sababu yeye ndiye Mwana-Kondoo aliyetolewa dhabihu kwa ajili ya Wakristo. (1 Wakorintho 5:7, NW) Sikukuu ya Kupitwa iliadhimishwa mara moja tu kwa mwaka, katika Nisani 14. (Kutoka 12:6, 14; Mambo ya Walawi 23:5) Hilo ladokeza kwamba kifo cha Yesu chapasa kukumbukwa mara nyingi kadiri tu ambavyo Sikukuu ya Kupitwa ilikumbukwa—kila mwaka, si kila siku au juma.

Kwa karne kadhaa wengi waliodai kuwa Wakristo walikumbuka kifo cha Yesu mara moja kwa mwaka. Kwa sababu walifanya hivyo katika Nisani 14, waliitwa Wakwotodesimi, linalomaanisha “wa kumi na nne.” Kuhusu wao, mwanahistoria J. L. von Mosheim aliandika hivi: “Wakristo wa Esia Ndogo walizoea kuadhimisha karamu hiyo takatifu, iliyokumbusha juu ya kuanzishwa kwa mlo wa jioni wa Bwana, na kifo cha Yesu Kristo, wakati uleule ambapo Wayahudi walikula mwana-kondoo wao wa Pasaka, yaani jioni ya siku ya kumi na nne ya mwezi wa kwanza [Nisani]. . . . Walihisi kuwa na wajibu wa kufuata mfano huo wa Yesu kama vile walivyofuata sheria.”

Umaana wa Mifano

Paulo alisema kwamba Yesu “alitwaa mkate, naye akiisha kushukuru akaumega.” Mkate huo mkavu uliookwa kwa unga na maji bila chachu (au, hamira) ulihitaji kumegwa ili uliwe. Katika ufananisho wa Biblia, chachu huonyesha dhambi au uharibifu. Akiwahimiza Wakristo Wakorintho wamwondoshe mwanamume asiye na adili kutoka katika kundi, Paulo alisema hivi: “Hamjui kwamba chachu kidogo hulichachusha donge zima? Basi, jisafisheni, mkatoe ile chachu ya kale, mpate kuwa donge jipya, kama vile mlivyo hamkutiwa chachu. Kwa maana Pasaka wetu amekwisha kutolewa kuwa sadaka, yaani Kristo; basi na tuifanye karamu, si kwa chachu ya kale, wala kwa chachu ya uovu na ubaya, bali kwa yasiyochachika, ndio weupe wa moyo na kweli.” (1 Wakorintho 5:6-8) Kama vile kinyunga kidogo kilichochacha kinavyochachusha donge, au mikate mingi, ndivyo ambavyo kundi lingekuwa chafu machoni pa Mungu ikiwa uvutano wenye kuharibu wa mtu huyo mwenye dhambi usingeondoshwa. Walihitaji kuondoa “chachu” kutoka miongoni mwao, kama vile Waisraeli wasingeweza kuwa na chachu ndani ya nyumba zao wakati wa Sikukuu ya Keki Zisizochachishwa iliyofuata Sikukuu ya Kupitwa.

Kwa habari ya mkate wa Ukumbusho usiotiwa chachu, Yesu alisema hivi: “Huu ndio [humaanisha, NW] mwili wangu ulio kwa ajili yenu.” (1 Wakorintho 11:24) Mkate unawakilisha mwili mkamilifu wa nyama wa Yesu, ambao Paulo aliandika hivi juu yao: “[Yesu] ajapo ulimwenguni, asema, Dhabihu na toleo hukutaka, lakini mwili uliniwekea tayari; sadaka za kuteketezwa na sadaka za dhambi hukupendezwa nazo; ndipo niliposema, Tazama nimekuja (katika gombo la chuo nimeandikiwa) niyafanye mapenzi yako, Mungu. . . . Katika mapenzi hayo tumepata utakaso, kwa kutolewa mwili wa Yesu Kristo mara moja tu.” (Waebrania 10:5-10) Mwili mkamilifu wa kibinadamu wa Yesu haukuwa na dhambi na ulitumikia ukiwa dhabihu ya fidia kwa ajili ya ainakibinadamu.—Waebrania 7:26.

Baada ya kutoa sala juu ya kikombe cha divai nyekundu isiyoghoshiwa, Yesu alisema: “Kikombe hiki ni [humaanisha, NW] agano jipya katika damu yangu.” (1 Wakorintho 11:25) Fasiri nyingine ni: “Kikombe hiki humaanisha agano jipya lililothibitishwa kwa damu yangu.” (Moffatt) Kama vile damu ya mafahali na mbuzi waliotolewa dhabihu ilivyohalalisha agano la Sheria kati ya Mungu na taifa la Israeli, ndivyo damu ya Yesu iliyomwagwa katika kifo ilivyohalalisha agano jipya. Jambo la kwamba agano hilo lilitajwa latusaidia tutambulishe washiriki halali wa mifano ya Ukumbusho.

Ni Nani Wanaopaswa Kushiriki?

Wafuasi wapakwa-mafuta wa Yesu, ambao wamo ndani ya agano jipya wanashiriki ifaavyo mifano ya Ukumbusho. Agano hilo linafanywa kati ya Mungu na Israeli ya kiroho. (Yeremia 31:31-34; Wagalatia 6:16) Lakini hatimaye agano jipya litaleta baraka kwa ainabinadamu yote tiifu, na wewe waweza kuwa miongoni mwa wale watakaopokea baraka hizo.

Ni lazima washiriki wa mifano ya Ukumbusho wawe katika lile agano la binafsi kwa ajili ya Ufalme ambalo Yesu alifanya. Alipoanzisha mlo huo, Yesu aliwaambia mitume wake waaminifu-washikamanifu hivi: “Mimi nafanya agano pamoja na ninyi, kama vile Baba yangu amefanya agano pamoja na mimi, kwa ajili ya ufalme.” (Luka 22:29, NW) Agano la Ufalme lililofanywa na Mungu pamoja na Mfalme Daudi lilielekeza mbele kwenye kuja kwa Yesu, ambaye angetawala milele katika Ufalme wa kimbingu. Waisraeli wa kiroho 144,000, watakaoshiriki utawala pamoja na yeye, wanaonyeshwa wakisimama juu ya Mlima Sayuni wa kimbingu pamoja na Mwana-Kondoo, Yesu Kristo. Wanapofufuliwa, watatawala pamoja na Kristo wakiwa wafalme na makuhani washiriki. (2 Samweli 7:11-16; Ufunuo 7:4; 14:1-4; 20:6) Ni wale tu ambao wamo ndani ya agano jipya na katika lile agano la binafsi pamoja na Yesu wanaoshiriki ifaavyo mifano ya Mlo wa Jioni wa Bwana.

Roho ya Mungu inashuhudia pamoja na roho ya wapakwa-mafuta kwamba wao ni watoto Wake na watawala pamoja na Kristo. Paulo aliandika hivi: “Roho mwenyewe hushuhudia pamoja na roho zetu, ya kuwa sisi tu watoto wa Mungu; na kama tu watoto, basi, tu warithi; warithi wa Mungu, warithio pamoja na Kristo; naam, tukiteswa pamoja naye ili tupate na kutukuzwa pamoja naye.” (Warumi 8:16, 17) Roho takatifu, au kani ya utendaji ya Mungu, hufanyiza katika wapakwa-mafuta uhakikishio wa kwamba mwisho wao utakuwa uhai wa kimbingu. Wanaona kama yote ambayo Maandiko husema juu ya uhai wa kimbingu yameelekezwa kwao na wana nia ya kudhabihu mambo yote ya kidunia, kutia na uhai wa kibinadamu. Ingawa uhai katika Paradiso ya kidunia ungekuwa mzuri ajabu, wao hawana tumaini hilo. (Luka 23:43) Tumaini la kimbingu lililo la hakika na lisilobadilika ambalo halitegemei maoni bandia ya kidini linawastahilisha washiriki mifano ya Ukumbusho.

Yehova angeudhika ikiwa mtu angejiwakilisha mwenyewe kuwa mmoja ambaye ameitwa kuwa mfalme na kuhani wa kimbingu hali hana mwito wa jinsi hiyo. (Warumi 9:16; Ufunuo 22:5) Mungu alimwua Kora kwa ajili ya kujitafutia ukuhani kimbelembele. (Kutoka 28:1; Hesabu 16:4-11, 31-35) Kwa hiyo, namna gani ikiwa hisiamoyo zenye nguvu au mawazo ya kidini ya zamani yalimfanya mtu ashiriki mifano ya Ukumbusho isivyofaa? Basi yeye apaswa aache kushiriki na apaswa kusali kwa unyenyekevu ili kupata msamaha wa Mungu.—Zaburi 19:13.

Jinsi Ambavyo Unahusika

Mtu hahitaji kushiriki mifano ya Ukumbusho ili kunufaishwa na dhabihu ya fidia ya Yesu na kupokea uhai wa milele duniani. Kwa mfano, Biblia haionyeshi kwamba watu wenye kumhofu Mungu kama vile Abrahamu, Sara, Isaka, Rebeka, Boazi, Ruthu, na Daudi watapata kushiriki mifano hiyo wakati wowote. Lakini wao na wengine wote wanaotamani uhai usioisha kwenye dunia hii watahitaji kuzoea imani katika Mungu na Kristo na katika uandalizi wa Yehova wa dhabihu ya fidia ya Yesu. (Yohana 3:36; 14:1) Mwadhimisho wa kila mwaka wa kifo cha Kristo unatumikia ukiwa ukumbusho wa dhabihu hiyo kubwa.

Umaana wa dhabihu ya Yesu ulionyeshwa wakati mtume Yohana aliposema hivi: “Nawaandikia haya ili kwamba msitende dhambi. Na kama mtu akitenda dhambi tunaye Mwombezi kwa Baba, Yesu Kristo mwenye haki, naye ndiye kipatanisho kwa dhambi zetu; wala si kwa dhambi zetu tu, bali na kwa dhambi za ulimwengu wote.” (1 Yohana 2:1, 2) Wakristo wapakwa-mafuta wanaweza kusema kwamba Yesu “ndiye kipatanisho kwa dhambi [zao].” Hata hivyo, yeye ni dhabihu pia kwa ajili ya dhambi za ulimwengu wote, akifanya uhai wa milele uwezekane kwa ainabinadamu tiifu katika ile dunia Paradiso iliyo karibu sana sasa!

Kwa kuwapo kwa ajili ya ukumbusho wa kifo cha Yesu, utanufaika kutokana na hotuba ya Biblia yenye kuchochea fikira. Utakumbushwa juu ya yale mengi ambayo Yehova Mungu na Yesu Kristo wametufanyia. Litakuwa jambo lenye kuthawabisha kiroho kukusanyika pamoja na wale walio na staha yenye kina kwa ajili ya Mungu na Kristo na kwa ajili ya dhabihu ya fidia ya Yesu. Pindi hiyo huenda sana ikaimarisha tamaa yako ya kuwa mwenye kupokea fadhili isiyostahiliwa ya Mungu, inayoongoza kwenye uhai wa milele. Twakukaribisha kwa moyo ukutane pamoja na Mashahidi wa Yehova baada ya jua kushuka katika Aprili 6, 1993, ili kukumbuka kifo cha Yesu Kristo kwa sababu Mlo wa Jioni wa Bwana unaweza kuwa na maana kubwa kwako.