Wao Huwachunga Kondoo Wadogo kwa Huruma

KATI ya wanyama wote wanaofugwa na wanadamu, hakuna wowote walio kama kondoo wa kufugwa. Wanyama wengi wana nguvu na silika zinazohitajiwa ili kutafuta chakula na kuepa viumbe wanaowawinda, lakini kondoo ni tofauti. Anaweza kukamatwa kwa urahisi na wanyama-wawindaji, bila uwezo mkubwa wa kujikinga. Bila mchungaji, kondoo ni mwenye hofu na ni hoi. Akitengwa na kundi, anapotea kwa urahisi. Kwa hiyo kondoo watiifu wana sababu zenye nguvu sana za kuhisi ushikamano kwa mchungaji wao. Bila yeye wasingeweza kuendelea kuishi. Kwa sababu ya sifa hizo, Biblia hutumia kondoo kitamathali kufananisha watu wasio na hatia, wanaotendwa vibaya, au wasio na kinga.

Bila shaka, thawabu za mchungaji zastahili sana. Maisha yake si rahisi. Anapatwa na joto na baridi, na kuwa na masiku bila usingizi. Ni lazima alinde kundi dhidi ya wanyama-wawindaji, mara nyingi akijihatarisha mwenyewe. Kwa kuwa ni lazima mchungaji ahakikishe kwamba kundi liko pamoja, wakati wake mwingi hutumiwa akiwatafuta kondoo wanaotangatanga au kupotea. Ni lazima awatibu wagonjwa na waliojeruhiwa. Wana-kondoo dhaifu au waliochoka inabidi wabebwe. Kuna hangaiko la daima juu ya kupata chakula na maji ya kutosha. Ni jambo la kawaida kwa mchungaji kukaa usiku kucha kondeni ili kuhakikisha usalama wa kundi. Kwa hiyo, kuchunga ni maisha magumu yanayohitaji utumishi wa mwanamume aliye hodari, mwenye bidii-nyendelevu, na mwenye busara. Zaidi ya hayo yote, ni lazima awe na uwezo wa kuonyesha hangaiko la kweli kwa ajili ya kundi alilokabidhiwa kutunza.

Kulichunga Kundi la Mungu

Biblia hufananisha watu wa Mungu na kondoo watiifu na wale wanaowasimamia na wachungaji. Yehova mwenyewe ndiye ‘mchungaji na mwangalizi wa roho zetu.’ (1 Petro 2:25) Yesu Kristo, “mchungaji mwema,” alionyesha tamaa yake kwamba kondoo wapokee utunzaji wenye huruma alipomwambia mtume Petro hivi: ‘Lisha wana-kondoo wangu, chunga kondoo zangu wadogo, lisha kondoo zangu wadogo.’ (Yohana 10:11; 21:15-17, NW) Waangalizi Wakristo wameagizwa kwa uzito ‘kulichunga kutaniko la Mungu.’ (Matendo 20:28, NW) Na kazi yao wakiwa wachungaji wa kiroho inahitaji sifa za mchungaji mwema halisi—uhodari, bidii-nyendelevu, busara, na hasa, hangaiko la kuhisiwa moyoni kwa ajili ya hali njema ya kundi.

Katika siku za nabii wa Mungu, Ezekieli, wengi wa wachungaji waliowekwa kutunza mahitaji ya watu wa Yehova katika Israeli walishindwa kutimiza wajibu wao. Kundi la Mungu liliteseka sana, wengi katika kundi wakiacha ibada ya kweli. (Ezekieli 34:1-10) Leo, makasisi wa Jumuiya ya Wakristo hujionyesha wenyewe kuwa wachungaji wa lile liitwalo kutaniko la Kikristo eti, lakini hali yayo ya ugonjwa wa kiroho inathibitisha kwamba makasisi ni kama wale walaghai waovu waliopuuza na kuwatenda watu vibaya wakati Yesu alipokuwa duniani. Viongozi wa kidini wa Jumuiya ya Wakristo ni kama yule “mtu wa mshahara” ambaye “mambo ya kondoo si kitu kwake.” (Yohana 10:12, 13) Hawana nia hata kidogo, wala hawawezi, wala hawana sifa za kustahili kulichunga kundi la Mungu.

Wachungaji Wanaojali Kikweli

Yesu aliweka kielelezo kikamilifu kwa wote ambao wangelichunga kundi la Yehova. Alikuwa mwenye upendo, mwenye fadhili, mwenye huruma, na mwenye kuwasaidia wanafunzi wake katika njia zote. Alichukua hatua ya kwanza kuwatafuta wale wenye uhitaji. Ingawa Yesu alikuwa mwenye shughuli na mara nyingi alikuwa amechoka, sikuzote alichukua wakati kusikiliza matatizo yao na kuwapa kitia-moyo. Nia yake ya kusalimisha nafsi yake kwa ajili yao ulikuwa wonyesho mkuu zaidi wa upendo.—Yohana 15:13.

Leo, wazee wote wa kutaniko waliowekwa, pamoja na watumishi wa huduma, hushiriki daraka hilo kuelekea kundi. Kwa hiyo, hata uwezekano wa kupata faida za kimwili katika nchi nyingine hauwashawishi wengi kati ya wanaume hao wenye kuchukua daraka wahamie huko na hivyo kuacha makutaniko bila msaada na usimamizi wa kutosha. Likiishi katika “nyakati [hizi] zilizo ngumu kushughulika nazo,” kundi linahitaji kitia-moyo na mwongozo. (2 Timotheo 3:1-5, NW) Kuna hatari iliyopo daima kwamba wengine watawindwa na Shetani, aliye ‘kama simba angurumaye, akitafuta mtu ammeze.’ (1 Petro 5:8) Sasa kuliko wakati mwingine wowote, ni muhimu kwa wachungaji Wakristo ‘kuwaonya wasiokaa kwa utaratibu; kuwatia moyo walio dhaifu; kuwatia nguvu wanyonge.’ (1 Wathesalonike 5:14) Kukesha daima ni muhimu ikiwa watazuia wale wasio thabiti wasipeperuke mbali kutoka kundini.—1 Timotheo 4:1.

Mchungaji anaweza kuamuaje wakati kondoo anapohitaji msaada? Baadhi ya ishara zilizo wazi zaidi ni kushindwa kuhudhuria mikutano ya Kikristo, kutoshiriki kwa kawaida katika huduma ya shambani, na mwelekeo wa kuepuka kushirikiana na wengine kwa ukaribu. Udhaifu mbalimbali waweza pia kuonekana kwa kutazama kwa uangalifu mtazamo wa kondoo na mwelekeo wa mazungumzo yao. Huenda wakawa na mbetuko wa kuwachambua wengine, labda wakionyesha hisia za kinyongo. Huenda mazungumzo yao yakakazia sana ufuatiaji wa vitu vya kimwili kuliko miradi ya kiroho. Ukosefu wa ujumla wa idili, matazamio mazuri, na shangwe waweza kumaanisha kwamba imani yao imekuwa dhaifu. Sura yenye huzuni ingeweza kuwa ishara kwamba wanasongwa na watu wa ukoo au na marafiki wa kilimwengu wenye kupinga. Akiona ishara hizo, mchungaji anaweza kujitahidi kuamua ni msaada wa aina gani unaohitajiwa.

Wanapozuru ili kumsaidia mwamini mwenzao, wachungaji Wakristo wanahitaji kukumbuka kusudi lao kuu. Hiyo si ziara ya kirafiki tu yenye mazungumzo juu ya mambo madogo-madogo. Mradi wa mtume Paulo wa kuwazuru ndugu zake ulikuwa ‘kuwapa karama ya rohoni, ili wafanywe imara; yaani, wafarijiane yeye na wao.’ (Warumi 1:11, 12) Ili kutimiza hilo, matayarisho ya kimbele yanahitajiwa.

Kwanza, changanua yule mtu, na kujaribu kujua hali yake ya kiroho ni nini. Hilo linapothibitishwa, fikiria aina ya mwelekezo, kitia-moyo, au shauri litakalokuwa lenye manufaa zaidi. Neno la Mungu, Biblia, lapaswa kuwa chanzo kikuu cha habari kwa sababu hilo “hutia nguvu.” (Waebrania 4:12, NW) Magazeti Mnara wa Mlinzi na Amkeni! yanaweza kuchunguzwa ili kupata makala zinazoshughulika na mahitaji hususa ya kondoo wanaokabiliwa na matatizo ya pekee. Maono yenye kusisimua na yenye kuburudisha yanaweza kupatikana katika Kitabu-Mwaka cha Mashahidi wa Yehova. Mradi ni kutoa jambo fulani la kiroho ambalo ‘litakuwa jema kwa kumjenga mtu huyo.’—Warumi 15:2, NW.

Uchungaji Unaojenga

Mchungaji wa kundi la kondoo halisi ajua kwamba wanamtegemea ili kupata ulinzi na utunzaji. Hatari zilizo za kawaida zaidi hutokana na kupotea, ugonjwa, uchovu, kujeruhiwa, na wanyama-wawindaji. Katika njia iyo hiyo ni lazima mchungaji wa kiroho atambue na kushughulikia hatari kama hizo zinazotisha hali njema ya kundi. Yafuatayo ni matatizo fulani ya kawaida na madokezo machache juu ya yale yanayoweza kusemwa ili kutoa habari yenye kujenga kiroho.

(1) Kama vile kondoo wasiotambua, Wakristo fulani wanapeperuka kutoka katika kundi la Mungu kwa sababu wanashawishwa na mambo yenye kuvutia yanayoonekana kuwa yasiyo na hatia na yenye kupendeza. Huenda wakakengeushwa na huenda hata wakapeperuka kwa sababu ya kufuatia miradi inayoshirikishwa na vitu vya kimwili, tafrija, au vitumbuizo. (Waebrania 2:1) Watu hao wangeweza kukumbushwa juu ya uharaka wa nyakati, juu ya uhitaji wa kukaa karibu na tengenezo la Yehova, na juu ya umaana wa kuweka masilahi ya Ufalme kwanza maishani. (Mathayo 6:25-33; Luka 21:34-36; 1 Timotheo 6:8-10) Shauri lenye msaada linapatikana katika makala “Dumisha Usawaziko Wako—Jinsi Gani?” katika Mnara wa Mlinzi la Mei 15, 1984, kurasa 8-11 (Kiingereza).

(2) Mchungaji ahitaji kuandaa tiba kwa kondoo wanaopatwa na magonjwa. Vivyo hivyo, ni lazima wachungaji wa kiroho wasaidie Wakristo wanaokuwa wagonjwa kiroho kwa sababu ya mambo yasiyofaa maishani mwao. (Yakobo 5:14, 15) Huenda wasiwe na kazi ya kuajiriwa, huenda wakawa na tatizo kubwa la kiafya, au huenda ikawa wana magumu katika maisha yao ya familia. Huenda watu hao wasiwe na hamu sana ya chakula cha kiroho au ya kushirikiana na watu wa Mungu. Hilo nalo hutokeza kujitenga na kuvunjika moyo. Wanahitaji kuhakikishiwa kwamba Yehova huwajali na atawategemeza katika nyakati ngumu. (Zaburi 55:22; Mathayo 18:12-14; 2 Wakorintho 4:16-18; 1 Petro 1:6, 7; 5:6, 7) Yaweza kusaidia pia kupitia ile makala “Tazama Mbele Kabisa Ukiwa Mkristo,” inayopatikana katika Mnara wa Mlinzi la Septemba 15, 1981, kurasa 3-6.

(3) Mchungaji anapaswa kuwa mwangalifu kuona kondoo wanaochoka. Wengine wamevumilia kwa uaminifu katika utumishi wa Yehova kwa kipindi cha miaka kadhaa. Wameng’ang’ana katika mitihani na majaribu mengi. Sasa wanaonyesha ishara za kuchoka katika kufanya mema na huenda hata wakaonyesha kutilia shaka juu ya uhitaji wa utendaji mwingi wa kuhubiri. Ni muhimu kuhuisha nia yao, kufanya upya uthamini wao kwa ajili ya shangwe na baraka zinazotokana na utumishi wa moyo wote kwa Mungu kwa kumwiga Yesu Kristo. (Wagalatia 6:9, 10; Waebrania 12:1-3) Labda wanaweza kusaidiwa kuona kwamba Yehova huthamini utumishi wao mwaminifu-mshikamanifu na anaweza kuwaimarisha kwa ajili ya utendaji wa wakati ujao kwa sifa yake. (Isaya 40:29, 30; Waebrania 6:10-12) Yaweza kunufaisha kushiriki mawazo kutoka katika makala “Usichoke Kutenda Yaliyo Mema,” iliyotokea katika Mnara wa Mlinzi la Julai 15, 1988, kurasa 9-14.

(4) Kama vile kondoo wanaojeruhiwa, Wakristo fulani wameumizwa na ule wanaoona kuwa mwenendo wenye kuudhi. Lakini, tukiwasamehe wengine, Baba yetu wa kimbingu atatupa msamaha unaohitajiwa. (Wakolosai 3:12-14; 1 Petro 4:8) Huenda ikawa ndugu au dada fulani walipokea shauri au nidhamu waliyohisi haikuwa ya haki. Hata hivyo, sisi sote twaweza kunufaika kutokana na shauri na nidhamu ya kiroho, na inafariji kujua kwamba Yehova huwatia nidhamu wale awapendao. (Waebrania 12:4-11) Kwa sababu hawajapewa mapendeleo ya utumishi ambayo wanahisi wanastahili kupewa, wengine wameruhusu kinyongo kifanyize ufa kati yao na kutaniko. Lakini ikiwa tungejitenganisha na tengenezo la Yehova, pasingekuwa mahali pengine pa kupata wokovu na shangwe ya kweli. (Linganisha Yohana 6:66-69.) Habari yenye msaada kulingana na hayo inaweza kupatikana katika makala “Kudumisha Umoja Wetu wa Kikristo,” inayopatikana katika Mnara wa Mlinzi la Agosti 15, 1988, kurasa 28-30.

(5) Ni lazima kondoo walindwe dhidi ya wanyama-wawindaji. Katika njia inayolingana na hiyo, huenda wengine wakapingwa na kutishwa na watu wa ukoo au wafanyakazi wasioamini. Huenda uaminifu-maadili wao ukashambuliwa wanaposongwa kukatiza utumishi wao kwa Mungu au kuacha kushiriki katika huduma ya Kikristo. Hata hivyo, wanaimarishwa wanaposaidiwa kutambua kwamba upinzani unapasa kutazamiwa na kwa kweli ni uthibitisho mmoja kwamba sisi ni wanafunzi wa kweli wa Yesu Kristo. (Mathayo 5:11, 12; 10:32-39; 24:9; 2 Timotheo 3:12) Huenda ikawa yenye manufaa kuonyesha kwamba wakiwa waaminifu, Yehova hatawaacha kamwe na atathawabisha uvumilivu wao. (2 Wakorintho 4:7-9; Yakobo 1:2-4, 12; 1 Petro 5:8-10) Makala yenye kichwa “Kuvumilia kwa Furaha Ijapokuwa Mateso,” katika Mnara wa Mlinzi la Septemba 15, 1982, kurasa 13-19, yaandaa kitia-moyo zaidi.

Wachungaji —Timizeni Madaraka Yenu

Mahitaji ya kundi la Mungu ni mengi, na utunzaji ufaao ni kazi ngumu. Kwa hiyo ni lazima wachungaji Wakristo wawe wenye huruma, wenye kuhangaika kikweli, na wanaopendezwa kusaidia. Subira na utambuzi ni wa maana. Ilihali watu fulani wanahitaji shauri na himizo, wengine wananufaika zaidi kutokana na kitia-moyo. Huenda ziara chache za kibinafsi zikatosha nyakati fulani, ilihali nyakati nyingine huenda funzo la Biblia la kawaida likahitajiwa. Katika kila hali lengo kuu ni kutoa mwongozo wenye kujenga kiroho au shauri lenye upendo litakalomchochea mtu huyo kuanza mazoea mazuri ya kujifunza, kuwa wa kawaida au kuendelea kwa ukawaida kuhudhuria mikutano ya kutaniko, na kufurahia ushiriki wenye bidii katika huduma ya Kikristo. Hizo ndizo njia kuu za kuwapa msaada waamini wenzetu na kuwasaidia kufungulia njia mtiririko usiozuiwa wa roho takatifu ya Yehova.

Wachungaji wanaoandaa utegemezo wa aina hiyo wanatoa utumishi wenye thamani zaidi kwa ajili ya kundi la Mungu. (Ona Mnara wa Mlinzi la Novemba 15, 1985, kurasa 22-6.) Yale yanayofanywa na wachungaji wa kiroho yanathaminiwa sana na kundi. Baada ya kupokea msaada kama huo, mmoja aliye kichwa cha familia alisema hivi: ‘Baada ya sisi kuwa katika kweli kwa miaka 22, upendo wa vitu vya kimwili ulituvuta ndani ya ulimwengu. Mara nyingi tulitaka kuhudhuria mikutano, lakini ilionekana tu kwamba hatuwezi kwenda. Hatukufaana vizuri na mfumo wa Shetani, kwa hiyo tulikuwa peke yetu kabisa, tukiwa tumejitenga. Hilo lilituacha tukiwa tumekata tamaa na kushuka moyo. Tulihitaji maneno ya kitia-moyo. Mzee mmoja wa kutaniko alipotutembelea, tulikubali kwa furaha uandalizi wa funzo la Biblia nyumbani mwetu. Sasa sisi sote tumerudi katika tengenezo la Yehova lenye usalama. Siwezi kueleza ile furaha ninayohisi!

Kuna sababu ya kushangilia sana wakati ndugu na dada zetu waliopeperuka au kuvunjika moyo wanapohuishwa kiroho na kutendeshwa tena. (Luka 15:4-7) Kusudi la Yehova kuelekea watu wake linatimizwa wanapounganishwa “kama kondoo wa Bozra [zizi, NW].” (Mika 2:12) Katika kao hilo lenye usalama, ‘wanapata raha nafsini mwao’ kwa msaada wa yule Mchungaji Mwema, Yesu Kristo. (Mathayo 11:28-30) Kundi la ulimwenguni pote lililounganika hupokea mwongozo, faraja, na ulinzi pamoja na wingi wa chakula cha kiroho.

Leo, kupitia utendaji huo wa uchungaji, Yehova anatimiza kazi yenye upendo inayopatana na ahadi yake ya kale: “Mimi, nitawatafuta kondoo zangu, na kuwaulizia. . . . Nami nitawaokoa katika mahali pote walipotawanyika . . . Nami nitawalisha malisho mema . . . Nami nitawatafuta waliopotea, . . . nitawafunga waliovunjika, nitawatia nguvu wagonjwa.” (Ezekieli 34:11-16) Kuna faraja iliyoje kujua kwamba Yehova ndiye Mchungaji wetu!—Zaburi 23:1-4.

Kwa sababu ya maandalizi ya kimungu kwa ajili ya kulichunga kundi la Mungu, tukiwa watumishi wa Yehova twaweza kushiriki maoni ya Daudi, aliyesema hivi: “Katika amani nitajilaza na kupata usingizi mara, maana wewe, BWANA [Yehova, NW], peke yako, ndiwe unijaliaye kukaa salama.” (Zaburi 4:8) Naam, watu wa Yehova huhisi usalama katika utunzaji wake wenye upendo na wanashukuru kwamba wazee Wakristo huwachunga kondoo wadogo kwa huruma.

[Hisani ya Picha katika ukurasa wa 20]

Potter’s Complete Bible Encyclopedia