Mazoezi ya Gileadi Katika Imani Iliyo Takatifu Sana

“WANAFUNZI wetu wamezoezwa vema katika imani iliyo takatifu sana.” Hayo yalikuwa maneno ya kufungua kwenye programu ya uhitimu ya darasa la 95 la Watchtower Bible School of Gilead, iliyofanywa mnamo Jumapili, Septemba 12 1993. Asubuhi hiyo wale wageni 4,614 walioalikwa pamoja na washiriki wa familia ya Betheli waliokusanyika kwenye Jumba la Kusanyiko la Jersey City waliongozwa katika sala ya kufungua na George Gangas. Ndugu Gangas amekuwa mshiriki wa familia ya Betheli kwa miaka 65 na akiwa na umri wa miaka 97 ni mshiriki wa Baraza Linaloongoza aliye na umri mkubwa zaidi ya wote.

Albert Schroeder, ambaye pia ni wa Baraza Linaloongoza na aliyekuwa mwenyekiti wa programu, alisema hivi: “Kwa miezi mitano mtalaa wa Gileadi umetegemea imani iliyo takatifu sana.” Lakini ‘imani iliyo takatifu sana’ ni nini? Alieleza kwamba hiyo ‘imani iliyo takatifu sana,’ iliyotajwa kwenye Yuda 20, ni ile chungu nzima ya kweli ya Biblia. Kwa hiyo mtalaa wa Gileadi unategemea Neno la Yehova, Biblia, ambacho ndicho kitabu chao kikuu cha mafundisho.

Wanafunzi Wapokea Mafundisho Zaidi

Msemaji wa kwanza alikuwa John Stuefloten wa Halmashauri ya Watchtower Farms, aliyesema juu ya kichwa “Kunufaika na Uvutano wa Watu Wenye Hekima.” Biblia husema kwamba wale ‘watembeao pamoja na wenye hekima watakuwa na hekima.’ (Mithali 13:20, NW) Katika mtalaa wa Gileadi, wanafunzi walitumia muda wa saa 900 wakijifunza Biblia. Ndugu Stuefloten aliwauliza wanafunzi hivi: “Uvutano wa Yehova utaathirije wakati ujao wenu? Mnaenda nchi 18 zenye jumla ya wakazi milioni 170 hivi. Kwa hiyo mtakuwaje na uvutano juu ya watu hao?” Kwa kuangaza hekima ya Yehova, wamishonari hao wapya wataweza kuwasaidia wengine kuwa waabudu wa Yehova, aliye Chanzo cha hekima kisicho na mpaka.

Kichwa cha hotuba iliyofuata kilikuwa “Kuwa Hali Zote kwa Watu Wote,” kilichokuzwa na Lloyd Barry wa Baraza Linaloongoza. (1 Wakorintho 9:22) Miaka 45 hivi iliyopita, Ndugu Barry mwenyewe alikuwa mwanafunzi katika darasa la 11 la Gileadi. Sasa darasa la 95 lilithamini kupokea shauri lenye mafaa kutoka kwa mmoja aliyekuwa mishonari hapo kwanza mwenye maarifa ya miaka kadhaa katika bara la kigeni. Aliwatia moyo wanafunzi wapatane na watu upesi katika eneo lao jipya la kigeni kwa kupata kujua utamaduni wa mahali hapo na kujifunza lugha ya wenyeji. Alisema kwamba hilo laweza kufanywa kwa njia bora zaidi kwa kushiriki na kufanya kazi pamoja na wenyeji na pia kwa kujifunza desturi zao na kuzitumia inapofaa.

Kisha, Dean Songer wa Halmashauri ya Viwanda alisema juu ya kichwa chenye kuvutia “Kuwekwa Huru na Wajibu.” Baada ya miaka zaidi ya 35 ya utumishi wa wakati wote, Ndugu Songer aelewa kinachomaanishwa na kuishi maisha yenye kukaziwa mradi hususa, yaliyo sahili, yakikazia kazi inayohitaji kufanywa, bila mahangaiko ya kimwili. Na hilo lilikuwa ndilo jambo kuu la shauri lake kwa wanafunzi. Waimbaji kwenye hekalu la Yehova waliwekwa huru na wajibu mbalimbali uliokuwa wa kawaida kwa Walawi wengine ili kujitoa kikamili kwa mgawo wao wa pekee. (1 Mambo ya Nyakati 9:33) Vivyo hivyo, wamishonari wa Gileadi wamewekwa huru na mambo ya kawaida kama vile kazi ya kimwili ili waweze kukazia fikira utumishi wao wa pekee. Ndugu Songer alimalizia kwa onyo hili la upole: “Dumisheni mtazamo wenu ukiwa umekaziwa mradi hususa na maisha yenu yakiwa sahili. Daraka lenu mkiwa wale waliowekwa huru na wajibu ni kuwa katika kazi hiyo mchana na usiku, mkimsifu Yehova.”

Mshiriki wa Baraza Linaloongoza Daniel Sydlik alifuata na kichwa “Kuwafundisha Wengine Jinsi ya Kupata Faida Zote za Maisha.” Aliwatia moyo wanafunzi “wasifundishe mafunzo ya kiibada tu bali pia wawe wajasiri kiasi cha kuweza kuwaonyesha watu ni nini wapaswalo kufanya ili kupatanisha maisha zao na mapenzi ya Mungu.” Walimu wema ni lazima wachochee na kumotisha. “Mwe na utambuzi wa kuwafundisha watu wakuze sifa za Kikristo badala ya kufundisha amri na kanuni tu,” yeye akasema kisha akaongeza kwa umalizio: “Juu ya hayo yote, ndugu wapendwa, jifunzeni wenyewe na wengine jinsi ya kupenda, kwani ndicho kifungo kikamilifu cha muungano.”—1 Wakorintho 13:1-3; Wakolosai 3:14.

Baada ya miezi kadhaa ya mazoezi, wanafunzi walikuja kuwapenda sana wafunzi wao wawili wa Gileadi. Jack Redford, ambaye pia alikuwa mishonari hapo kwanza, alizungumza kwanza, juu ya kichwa “Mmefanya Chaguo lifaalo.” Katika ulimwengu wa Wayahudi wa kale, kabla ya kuwa mtume Mkristo, Paulo alikuwa na cheo, umashuhuri, uvutano, na usalama wa kifedha. Lakini kwenye Wafilipi 3:8, Paulo alisimulia hayo yote kuwa “kama mavi,” au “takataka,” kulingana na tafsiri ya Phillips. Alihangaikia sana huduma, na alifanya chaguo lifaalo. Tofauti na hilo, walio wengi kati ya ainabinadamu leo huonyesha kwa machaguo yao maishani kwamba wao huziona mali zao za kimwili kuwa zenye thamani kubwa kuliko uhai wa milele. Wamishonari wa Gileadi wamefanya chaguo lifaalo. Jack Redford alimalizia kwa kusema: “Hakuna jambo lolote ambalo ulimwengu wa Ibilisi waweza kuwatolea lilinganalo na utumishi wa mishonari. Tunzeni pendeleo hilo lisilokadirika, na acheni ulimwengu utunze takataka zao!”

Kwa muda wa miaka 32 iliyopita, Ulysses Glass amekuwa mfunzi wa Gileadi. Aliwapa wanafunzi shauri la kuaga lenye kichwa “Ni Mungu Pekee Awezaye Kuufanya Mti,” akitegemeza hotuba yake kwenye Zaburi 1:3. Tekinolojia ya kisasa haijaweza wakati wowote kuiga muundo wa mti, uliobuniwa na Mungu. Katika maana fulani, Wakristo wa kweli ni kama miti, iliyopandwa na kunyunyiziwa maji na Yehova. Ndugu Glass alionyesha kwamba kwa miezi mitano, wanafunzi walikuwa “wamenyunyiziwa maji kwa kawaida kutoka chemchemi ya maji yatoayo uhai katika Neno la Mungu,” kama vile miti katika shamba au paradiso ya kiroho. Lakini, wakiwa wamishonari, ni lazima walinde “mfumo wao wa mizizi wa kiroho dhidi ya uharibifu wowote.” Walihimizwa ‘waendelee kunywa maji ya uhai kutoka kwa Yehova kwa sababu ni Mungu pekee awezaye kuufanya mti.’

Hotuba ya mwisho ilitolewa na Carey Barber, mshiriki wa Baraza Linaloongoza. Baada ya miaka 70 ya utumishi wa wakati wote, Ndugu Barber aliweza kusema kwa hakika juu ya habari “Mpeni Yehova Ujitoaji Usiohusisha Mwingine.” Walio wengi sana kati ya ainabinadamu hawajampa Yehova ujitoaji usiohusisha mwingine. (Kumbukumbu la Torati 5:9) Hata hivyo, kama vile Ndugu Barber alivyoonyesha, kujapokuwa kutokamilika kwetu, “yawezekana kabisa kujitoa kwa Mungu kikamili.” Aliongeza hivi: “Kwa kweli hakuna awezaye kusema: ‘Ibilisi ndiye alinifanya nitende hilo.’” Lakini Ibilisi aweza kutushinda tukishindwa kumpinga. (Yakobo 4:7) Kuendelea kuwa na shughuli katika kazi ya Yehova ndiyo njia ya maana zaidi ya kumpinga Shetani na ulimwengu wake na kumpa Yehova ujitoaji usiohusisha mwingine.

Kuwekwa Kuwa Wamishonari

Programu ya asubuhi ilimalizia kwa kuwekwa rasmi kwa wanafunzi wote 46 kuwa wamishonari. Wale wenzi wa ndoa 23 walipokea diploma zilizotaarifu kwa sehemu kwamba wahitimu hao wana “sifa za pekee za kustahili kushiriki katika kazi ya kielimu, wakiendeleza nia njema na kufanya kazi kwa ajili ya amani ya kudumu na ile sheria ya utaratibu na uadilifu mkamilifu miongoni mwa watu wote.” Darasa la 95 la Gileadi litajitahidi kwa hakika kutimiza utume huo wa juu sana katika zile nchi 18 ambako wamegawiwa kwenda. Migawo yaenea ulimwengu wote na yatia ndani nchi katika Asia, Afrika, Ulaya, Amerika ya Latini, na Karibea.

Alasiri, baada ya Funzo la Mnara wa Mlinzi lenye kufupishwa lililoongozwa na Charles Woody wa Halmashauri ya Idara ya Utumishi, wahitimu wapya wa Gileadi walitoa programu yao ya wanafunzi, yenye kichwa “Gileadi Imetutayarisha Kufundisha Tukiwa Wamishonari.” Kipindi kilimalizia kwa drama “Machaguo Yanayotukabili.”

Baada ya programu hiyo yenye kusisimua, wamishonari hao wapya walikuwa tayari sasa kutumwa hadi pande zote za dunia ili kushiriki na wengine ‘imani iliyo takatifu sana.’

[Sanduku katika ukurasa wa 26]

Takwimu za Darasa

Hesabu ya nchi zenye kuwakilishwa: 7

Hesabu ya nchi walikogawiwa: 18

Hesabu ya wanafunzi: 46

Hesabu ya wenzi wa ndoa: 23

Wastani wa umri: 30.06

Wastani wa miaka katika kweli: 12.92

Wastani wa miaka katika huduma ya wakati wote: 9.4

[Picha katika ukurasa wa 26]

95th Graduating Class of the Watchtower Bible School of Gilead

In the list below, rows are numbered from front to back, and names are listed from left to right in each row.

(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.