Mtwikeni Yehova Hangaiko Lenu Lote

“Nyenyekeeni chini ya mkono wa Mungu ulio hodari, ili awakweze kwa wakati wake; huku mkimtwika yeye fadhaa zenu zote [“hangaiko lenu lote,” “NW”], kwa maana yeye hujishughulisha sana kwa mambo yenu.”—1 PETRO 5:6, 7.

1. Hangaiko laweza kutuathirije, na hilo laweza kutolewaje kielezi?

HANGAIKO laweza kuathiri maisha yetu sana. Laweza kulinganishwa na mkwaruzo ambao nyakati nyingine huharibu melodia tamu ya muziki isikilizwayo katika redio. Mawimbi ya redio yasipopata hitilafu, melodia zilizo tamu zaweza kufurahiwa nazo zaweza kutokeza hali ya utulivu. Lakini, kelele ya mkwaruzo yaweza kuharibu hata mfuatano bora zaidi wa muziki, ukituudhi na kutufadhaisha. Hangaiko laweza kuwa na athari kama hiyo kwa utulivu wetu. Laweza kutulemea sana hivi kwamba tusiweze kushughulikia mambo muhimu. Kwa kweli, “uzito [“hangaiko,” NW] katika moyo wa mtu huuinamisha.”—Mithali 12:25.

2. Yesu Kristo alisema nini juu ya “mahangaiko ya maisha”?

² Yesu Kristo alisema juu ya hatari ya kukengeushwa na hangaiko lenye kupita kiasi. Katika unabii wake unaohusu siku za mwisho, yeye alihimiza hivi: “Jiangalieni, mioyo yenu isije ikalemewa na ulafi, na ulevi, na masumbufu [“mahangaiko,” NW] ya maisha haya; siku ile ikawajia ghafula, kama mtego unasavyo; kwa kuwa ndivyo itakavyowajilia watu wote wakaao juu ya uso wa dunia nzima. Basi, kesheni ninyi kila wakati, mkiomba, ili mpate kuokoka katika hayo yote yatakayotokea, na kusimama mbele za Mwana wa Adamu.” (Luka 21:34-36) Kama vile kula na kunywa kupita kiasi kwaweza kutokeza hali ya uzembe akilini, ndivyo kulemewa na “mahangaiko ya maisha” kuwezavyo kutufanya tupoteze utimamu wetu wa akili, kwa matokeo yenye msiba.

Maana ya Hangaiko

3. “Hangaiko” limefafanuliwaje, na ni yapi baadhi ya mambo yenye kulitokeza?

³ “Hangaiko” lafafanuliwa kuwa “fadhaiko la akili lenye uchungu au hofu [mara nyingi] juu ya mabaya yatakayotokea au yanayotarajiwa.” Ni “wasiwasi wenye hofu au wa kutaka kujua kitu” na vilevile “hisia isiyo ya kawaida na yenye nguvu sana ya woga na hofu ambayo mara nyingi hutokeza ishara za mwilini (kama kutoa jasho, mkazo, na kuongezeka kwa pigo la moyo), kwa sababu ya shaka kuhusu uhalisi na aina ya tisho fulani, na mtu kukosa kutumaini uwezo wake wa kukabiliana nalo.” (Webster’s Ninth New Collegiate Dictionary) Kwa hiyo hangaiko laweza kuwa tatizo gumu sana. Miongoni mwa visababishi vyalo ni ugonjwa, kuzeeka, hofu ya uhalifu, kupoteza kazi, na wasiwasi juu ya hali njema ya familia.

4. (a) Ni vizuri kukumbuka nini juu ya watu na mahangaiko yao? (b) Ikiwa tunapatwa na hangaiko, ni nini kiwezacho kufanywa?

⁴ Kwa wazi, kuna kadiri mbalimbali za hangaiko, kama vile kulivyo na hali au matukio mbalimbali yawezayo kulisababisha. Si watu wote huitikia hali fulani kwa njia ileile. Kwa hiyo, twahitaji kujua kwamba hata kama jambo fulani halituletei matatizo, hilo laweza kuwa chanzo cha hangaiko kubwa sana kwa baadhi ya waabudu wenzetu wa Yehova. Nini kiwezacho kufanywa hangaiko lifikiapo hatua ya kwamba tunashindwa kukazia akili kweli za Neno la Mungu zenye upatano na zenye kupendeza? Namna gani tukipatwa na hangaiko kiasi cha kwamba hatuwezi kuona vizuri masuala ya enzi kuu ya Yehova na uaminifu wa maadili wa Kikristo? Huenda tusiweze kubadili hali zetu. Badala ya hivyo, twahitaji kutafuta mambo ya Kimaandiko yatakayotusaidia kukabiliana na hangaiko lisilofaa lisababishwalo na matatizo magumu ya maisha.

Msaada Wapatikana

5. Twaweza kutendaje kwa kupatana na Zaburi 55:22?

⁵ Wakristo wahitajipo msaada wa kiroho nao wakiwa wamelemewa na mahangaiko, wao waweza kupata faraja kutoka kwa Neno la Mungu. Hilo huandaa mwongozo wenye kutegemeka na kutupa mahakikisho mengi kwamba hatuko peke yetu tukiwa watumishi wa Yehova wenye uaminifu mshikamanifu. Mathalani, mtunga-zaburi Daudi aliimba hivi: “Umtwike BWANA mzigo wako naye atakutegemeza, hatamwacha mwenye haki aondoshwe milele.” (Zaburi 55:22) Twaweza kutendaje kwa kupatana na maneno haya? Kwa kumtwika Baba yetu wa kimbingu mwenye upendo mahangaiko, mafadhaiko, hofu, na mitamauko yetu yote. Kufanya hivyo kutasaidia kutupa sisi hisia ya usalama na utulivu wa moyo.

6. Kulingana na Wafilipi 4:6, 7, sala inaweza kutufanyia nini?

⁶ Sala ya kawaida itokayo moyoni ni muhimu sana ikiwa tutamtwika Yehova mzigo wetu, kutia na hangaiko letu lote. Hilo litatuletea amani ya ndani, kwa kuwa mtume Paulo aliandika hivi: “Msijisumbue kwa [“Msihangaikie,” NW] neno lo lote; bali katika kila neno kwa kusali na kuomba, pamoja na kushukuru, haja zenu na zijulikane na Mungu. Na amani ya Mungu, ipitayo akili zote, itawahifadhi mioyo yenu na nia zenu katika Kristo Yesu.” (Wafilipi 4:6, 7) “Amani ya Mungu” isiyolinganika ni utulivu usio wa kawaida unaofurahiwa na watumishi wa Yehova waliojiweka wakfu hata wapatapo hali zenye kujaribu zaidi. Latokana na uhusiano wetu wa karibu wa kibinafsi pamoja na Mungu. Tusalipo kwa ajili ya roho takatifu na kuiacha ituchochee, hatuondolewi matatizo yote ya maishani, lakini sisi hufurahia tunda la roho la amani. (Luka 11:13; Wagalatia 5:22, 23) Sisi hatushindwi na hangaiko, kwa kuwa twajua kwamba Yehova hufanya watu wake wote waaminifu ‘wakae salama’ naye hataacha kitu chochote kitakacholeta madhara ya kudumu kitendeke.—Zaburi 4:8.

7. Wazee wa Kikristo waweza kutimiza fungu gani katika kutusaidia kukabiliana na hangaiko?

⁷ Lakini, namna gani hangaiko letu likiendelea kudumu, hata kama tunatafakari juu ya Maandiko na kudumu katika sala? (Warumi 12:12) Wazee waliowekwa rasmi katika kutaniko pia ni andalio la Yehova la kutusaidia kiroho. Wao waweza kutufariji na kutusaidia kwa kutumia Neno la Mungu na kwa kusali pamoja nasi na kwa ajili yetu. (Yakobo 5:13-16) Mtume Petro aliwahimiza wazee wenzake kuchunga kundi la Mungu kwa hiari, kwa moyo, na kwa njia ya kielelezo kizuri. (1 Petro 5:1-4) Wanaume hawa wanapendezwa sana na hali njema zetu, nao wataka kuwa wenye msaada. Bila shaka, ili tunufaike kikamili kwa msaada wa wazee na ili tuendelee vizuri kiroho katika kutaniko, sisi sote twahitaji kutumia shauri la Petro: “Vivyo hivyo ninyi vijana, watiini wazee. Naam, ninyi nyote jifungeni unyenyekevu [“hali ya akili ya kujishusha,” NW] mpate kuhudumiana; kwa sababu Mungu huwapinga wenye kiburi, lakini huwapa wanyenyekevu neema.”—1 Petro 5:5.

8, 9. Ni faraja gani iwezayo kupatikana kwenye 1 Petro 5:6-11?

⁸ Petro aliongezea: “Basi nyenyekeeni chini ya mkono wa Mungu ulio hodari, ili awakweze kwa wakati wake; huku mkimtwika yeye fadhaa zenu zote [“hangaiko lenu lote,” NW], kwa maana yeye hujishughulisha sana kwa mambo yenu. Mwe na kiasi na kukesha; kwa kuwa mshitaki wenu Ibilisi, kama simba angurumaye, huzunguka-zunguka, akitafuta mtu ammeze. Nanyi mpingeni huyo, mkiwa thabiti katika imani, mkijua ya kuwa mateso yale yale yanatimizwa kwa ndugu zenu walioko duniani. Na Mungu wa neema yote, aliyewaita kuingia katika utukufu wake wa milele katika Kristo, mkiisha kuteswa kwa muda kidogo, yeye mwenyewe atawatengeneza, na kuwathibitisha, na kuwatia nguvu. Uweza una yeye hata milele na milele. Amina.”—1 Petro 5:6-11.

⁹ Ni jambo lenye kufariji kama nini kung’amua kwamba twaweza ‘kumtwika Mungu hangaiko letu lote kwa sababu yeye hujishughulisha sana kwa mambo yetu’! Na kama baadhi ya hangaiko letu latokana na majaribu ya Ibilisi ya kuharibu uhusiano wetu pamoja na Yehova kwa kutuletea mnyanyaso na mateseko mengineyo juu yetu, je, si jambo la ajabu kujua kwamba mambo yote yatakuwa mazuri kwa wale washikao uaminifu wa maadili? Ndiyo, baada ya kuteseka kwa muda kidogo, Mungu wa fadhili zisizostahiliwa atamaliza mazoezi yetu naye atatufanya tuwe imara na wenye nguvu.

10. Petro wa Kwanza 5:6, 7 yarejezea sifa zipi tatu ziwezazo kuondoa hangaiko?

¹⁰ Petro wa Kwanza 5:6, 7 yarejezea sifa tatu zinazoweza kutusaidia kukabiliana na hangaiko. Moja ni unyenyekevu, au “hali ya akili ya kujishusha.” Mstari 6 wamalizia kwa maneno “kwa wakati wake,” jambo lidokezalo uhitaji wa saburi. Mstari 7 waonyesha kwamba twaweza kumtwika Mungu hangaiko letu lote tukiwa na uhakika ‘kwa maana yeye hujishughulisha sana kwa mambo yetu,’ na maneno hayo yatia moyo kumtumaini Yehova kabisa. Kwa hiyo ebu tuone jinsi unyenyekevu, saburi, na kumtumaini Mungu kabisa kuwezavyo kusaidia kuondoa hangaiko.

Jinsi Unyenyekevu Uwezavyo Kusaidia

11. Unyenyekevu waweza kutusaidiaje kukabiliana na hangaiko?

¹¹ Tukiwa wanyenyekevu, tutakiri kwamba fikira za Mungu zashinda zetu kwa mbali sana. (Isaya 55:8, 9) Unyenyekevu hutusaidia kutambua uwezo wetu mdogo wa kiakili kwa kulinganishwa na akili ya Yehova inayojua mambo yote. Yeye huona mambo ambayo sisi hatutambui, kama ionyeshwavyo na kisa cha mwanamume mwadilifu Ayubu. (Ayubu 1:7-12; 2:1-6) Kwa kujinyenyekeza “chini ya mkono wa Mungu ulio hodari,” tunakiri hali yetu ya chini kwa kulinganisha na Mwenye Enzi Kuu aliye Mkuu Zaidi. Hilo nalo latusaidia kukabiliana na hali anazoruhusu. Mioyo yetu yaweza kutamani kupata faraja ya mara hiyo, lakini kwa kuwa sifa za Yehova zimesawazika kikamilifu, yeye ajua barabara wakati na jinsi ya kutenda kwa niaba yetu. Basi, kama watoto wachanga na tushike kwa unyenyekevu mkono wa Yehova ulio hodari, tukiwa na hakika kwamba yeye atatusaidia kukabiliana na mahangaiko yetu.—Isaya 41:8-13.

12. Hangaiko juu ya usalama wa mali laweza kupatwa na nini tukitumia kwa unyenyekevu maneno ya Waebrania 13:5?

¹² Unyenyekevu watia ndani kuwa tayari kutumia shauri litokanalo na Neno la Mungu, ambalo mara nyingi laweza kuondoa hangaiko. Kwa mfano, ikiwa hangaiko letu limetokana na kujiingiza mno katika kufuatia mambo ya kimwili, ingekuwa vizuri kufikiria shauri hili la Paulo: “Msiwe na tabia ya kupenda fedha; mwe radhi na vitu mlivyo navyo; kwa kuwa [Mungu] mwenyewe amesema, Sitakupungukia kabisa, wala sitakuacha kabisa.” (Waebrania 13:5) Kwa kutumia shauri hilo kwa unyenyekevu, wengi wameacha kuwa na hangaiko kubwa sana kuhusu usalama wa vitu vya kimwili. Ingawa hali yao ya kifedha huenda isiweze kuwa bora zaidi, hawafikirii sana jambo hilo kiasi cha kutokeza madhara ya kiroho.

Fungu la Saburi

13, 14. (a) Kwa habari ya uvumilivu wenye saburi, mwanamume Ayubu alituandalia kielelezo gani? (b) Kumngoja Yehova kwa saburi waweza kutufanyia nini?

¹³ Maneno “kwa wakati wake” yaliyo katika 1 Petro 5:6 yadokeza uhitaji wa uvumilivu wenye saburi. Nyakati nyingine tatizo hudumu kwa muda mrefu, na hilo laweza kuongeza hangaiko. Wakati huo hasa ndipo tunapohitaji kuacha mambo mikononi mwa Yehova. Mwanafunzi Yakobo aliandika hivi: “Twawaita heri wao waliosubiri. Mmesikia habari ya subira [“uvumilivu,” NW] yake Ayubu, mmeuona mwisho wa Bwana ya kwamba Bwana ni mwingi wa rehema, mwenye huruma.” (Yakobo 5:11) Ayubu alipatwa na uharibifu wa kiuchumi, akapoteza watoto kumi katika kifo, akaugua maradhi yenye kukirihisha, naye alishutumiwa kwa uongo na wafariji bandia. Angalau hangaiko la kadiri fulani lingekuwa sawa katika hali hizo.

¹⁴ Kwa vyovyote vile, Ayubu alikuwa mwenye kielelezo chema katika uvumilivu wenye saburi. Ikiwa twapitia mtihani mgumu sana wa imani, huenda tukalazimika kungojea kupata faraja, kama alivyofanya. Lakini Mungu alitenda kwa niaba yake, hatimaye akimwondolea Ayubu mateseko yake na kumthawabisha kwa wingi sana. (Ayubu 42:10-17) Kumngoja Yehova kwa saburi husitawisha uvumilivu wetu na kufunua kina cha ujitoaji wetu kwake.—Yakobo 1:2-4.

Mtumaini Yehova

15. Kwa nini ni lazima tumtumaini Yehova kabisa?

¹⁵ Petro aliwahimiza waamini wenzake ‘wamtwike Mungu hangaiko lao lote kwa sababu yeye hujishughulisha sana kwa mambo yao.’ (1 Petro 5:7) Kwa hiyo twaweza nasi twapaswa kumtumaini Yehova kabisa. Mithali 3:5, 6 yasema: “Mtumaini BWANA kwa moyo wako wote, wala usizitegemee akili zako mwenyewe; katika njia zako zote mkiri yeye, naye atayanyosha mapito yako.” Kwa sababu ya maono waliyopata awali, baadhi ya wale wenye kujawa na hangaiko hupata ugumu wa kutumaini wanadamu wengine. Lakini tuna sababu nzuri za kumtumaini Muumba wetu, ambaye ni Chanzo na Mwendelezaji wa uhai. Hata kama hatutumaini itikio letu wenyewe kwa jambo fulani, nyakati zote twaweza kumtegemea Yehova kutuokoa kutoka kwenye misiba yetu.—Zaburi 34:18, 19; 36:9; 56:3, 4.

16. Yesu Kristo alisema nini juu ya hangaiko la vitu vya kimwili?

¹⁶ Kumtumaini Mungu kwatia ndani kumtii Mwana wake, Yesu Kristo, aliyefundisha yale aliyojifunza kutoka kwa Baba yake. (Yohana 7:16) Yesu aliwahimiza wanafunzi wake ‘wajiwekee hazina mbinguni’ kwa kumtumikia Yehova. Lakini vipi juu ya mahitaji ya kimwili yahusuyo chakula, mavazi, na makao? “Msisumbukie [“Msihangaikie,” NW] maisha yenu,” akashauri Yesu. Yeye alitaja kwamba Mungu hulisha ndege. Yeye huvisha maua kwa umaridadi sana. Je, watumishi wa Mungu walio wanadamu si bora kuliko haya? Bila shaka wao ni bora. Kwa hiyo Yesu alihimiza hivi: “Utafuteni kwanza ufalme wake, na haki [ya Mungu]; na hayo yote mtazidishiwa.” Yesu aliendelea kusema hivi: “Basi msisumbukie [“msihangaikie,” NW] ya kesho; kwa kuwa kesho itajisumbukia [“itajihangaikia,” NW] yenyewe.” (Mathayo 6:20, 25-34) Ndiyo, twahitaji chakula, kinywaji, mavazi, na makao, lakini tukimtumaini Yehova, hatutakuwa na hangaiko lisilofaa kuhusu mambo haya.

17. Twaweza kutoleaje kielezi uhitaji wa kutafuta kwanza Ufalme?

¹⁷ Kutafuta kwanza Ufalme, ni lazima tumtumaini Mungu na kuendelea kutanguliza ifaavyo mambo yaliyo muhimu. Mpiga-mbizi asiye na chombo cha kupumua aweza kujitumbukiza chini ya maji ili kutafuta chaza mwenye lulu ndani yake. Hiyo ndiyo njia yake ya kuandalia familia yake riziki. Jambo ambalo hakika ni la kutangulizwa! Lakini ni nini kilicho muhimu zaidi? Hewa! Ni lazima arudi juu ya maji mara kwa mara ili ajaze mapafu yake kwa hewa. Hewa ni jambo la kutangulizwa zaidi. Vilevile, huenda tukalazimika kujiingiza kwa njia fulani katika mfumo huu wa mambo ili kupata mahitaji ya maisha. Lakini, ni lazima mambo ya kiroho yawe ya kwanza kwa sababu uhai wenyewe wa nyumba zetu wategemea mambo haya. Ili kuepuka hangaiko lisilofaa juu ya mahitaji ya kimwili, ni lazima tumtumaini Mungu kabisa. Na zaidi, ‘kuwa na mengi ya kufanya katika kazi ya Bwana’ kwaweza kusaidia kuondoa hangaiko kwa kuwa “furaha ya BWANA” huwa nguzo yetu.—1 Wakorintho 15:58, NW; Nehemia 8:10.

Endelea Kumtwika Yehova Hangaiko Lako

18. Kuna uthibitisho gani kwamba kumtwika Yehova hangaiko letu lote kwaweza kutusaidia sana?

¹⁸ Ili kubaki kama tumekazia macho mambo ya kiroho, ni lazima tuendelee kumtwika Yehova hangaiko letu lote. Nyakati zote ukumbuke kwamba yeye kwa kweli hujali watumishi wake. Kwa mfano: Kwa sababu ya mume wa mwanamke mmoja Mkristo kukosa kuwa mwaminifu kwake, hangaiko la mwanamke huyo lilizidi kufikia hatua ambayo hangeweza kupata usingizi. (Linganisha Zaburi 119:28.) Hata hivyo, akiwa kitandani, alikuwa akimtwika Yehova hangaiko lake lote. Alikuwa akimmwagia Mungu moyo wake wote, akimwambia juu ya uchungu ambao yeye na binti zake wawili wachanga walikuwa wakipata. Baada ya kulia ili apate kitulizo katika sala ya bidii, mara nyingi aliweza kulala usingizi, kwa kuwa alitumaini kwamba Yehova angemtunza yeye na watoto wake. Mwanamke huyu aliyepata talaka ya Kimaandiko sasa amefunga ndoa yenye furaha na mzee mmoja.

19, 20. (a) Ni zipi baadhi ya njia ambazo twaweza kukabiliana na hangaiko? (b) Twapaswa kuendelea kufanya nini na hangaiko letu lote?

¹⁹ Tukiwa watu wa Yehova, tuna njia nyingi za kukabiliana na hangaiko. Kutumia Neno la Mungu hasa ni kwenye msaada. Tuna chakula tele cha kiroho kiandaliwacho na Mungu kupitia “mtumwa mwaminifu mwenye akili,” kutia na makala zenye msaada na zenye kufariji zinazochapishwa katika Mnara wa Mlinzi na Amkeni! (Mathayo 24:45-47) Tuna msaada wa roho takatifu ya Mungu. Sala za kawaida na zenye bidii hutusaidia sana. Wazee wa Kikristo waliowekwa rasmi huwa tayari kuandaa msaada na faraja ya kiroho.

²⁰ Unyenyekevu na saburi yetu wenyewe ni wenye mafaa sana katika kushughulika na hangaiko liwezalo kutupata. Jambo la muhimu hasa ni kumtumaini Yehova kabisa, kwa kuwa imani yetu inapata kujengwa tupatapo kuona msaada na mwelekezo wake. Nayo imani katika Mungu yaweza kutuepusha kuwa wenye masumbufu isivyofaa. (Yohana 14:1) Imani hutuchochea kutafuta kwanza Ufalme na kuendelea kuwa wenye shughuli katika kazi ya Bwana yenye shangwe, iwezayo kutusaidia kukabiliana na hangaiko. Utendaji kama huo watufanya tuhisi tukiwa salama miongoni mwa wale watakaoimba sifa za Mungu kwa umilele. (Zaburi 104:33) Kwa hiyo na tuendelee kumtwika Yehova hangaiko letu lote.

Ungejibuje?

◻ Hangaiko laweza kufafanuliwaje?

◻ Ni zipi baadhi ya njia tuwezazo kukabiliana na hangaiko?

◻ Unyenyekevu na saburi zaweza kusaidiaje kuondoa hangaiko?

◻ Katika kukabiliana na hangaiko, kwa nini ni muhimu kumtumaini Yehova kabisa?

◻ Kwa nini ni lazima tuendelee kumtwika Yehova hangaiko letu lote?

[Picha katika ukurasa wa 24]

Je, wajua ni kwa nini Yesu alisema, ‘Msihangaike’?