Waokolewa Wakiwa Hai Kupitia Dhiki Kubwa

“Hao ndio wanatoka katika dhiki ile iliyo kuu [“dhiki kubwa,” “NW”], nao wamefua mavazi yao, na kuyafanya meupe katika damu ya Mwana-Kondoo.”—UFUNUO 7:14.

1. Ni nani watakaokaribisha wale watakaofufuliwa katika ufufuo wa kidunia?

MAMILIONI mengi ya watu wainuliwapo katika “ufufuo wa waadilifu na wasio waadilifu,” wao hawatarudishwa kwenye uhai katika dunia iliyo tupu. (Matendo 24:15, NW) Wao wataamka kwenye mazingira mazuri mno yaliyorekebishwa na kupata kwamba wametayarishiwa makao ya kuishi, mavazi, na chakula kingi. Ni nani watakaofanya matayarisho hayo yote? Kwa wazi, kutakuwa na watu wanaoishi katika ulimwengu mpya kabla ya ufufuo wa kidunia kuanza. Ni nani hao? Biblia yaonyesha kwamba wao watakuwa waokokaji wa ile dhiki kubwa inayokuja. Kati ya mafundisho yote ya Biblia, bila shaka hili ni mojapo lenye kutatanisha zaidi—kwamba waaminifu wengine wataokolewa wakiwa hai kupitia dhiki kubwa na kwamba hawatalazimika kamwe kufa. Tumaini hilo limethibitishwa sana katika Maandiko Matakatifu.

Kama Siku za Noa

2, 3. (a) Kuna mambo gani yafananayo kati ya siku za Noa na wakati wetu? (b) Ni nini kinachoonyeshwa na kuokolewa kwa Noa na familia yake kupitia Furiko?

² Katika Mathayo 24:37-39, Yesu Kristo alilinganisha siku za Noa na siku za mwisho, tulimo sasa. Yeye alisema hivi: “Kama vile ilivyokuwa siku za Nuhu, ndivyo kutakavyokuwa kuja kwake Mwana wa Adamu. Kwa kuwa kama vile siku zile zilizokuwa kabla ya Gharika watu walivyokuwa wakila, na kunywa, wakioa na kuolewa, hata siku ile aliyoingia Nuhu katika safina, wasitambue, hata Gharika ikaja, ikawachukua wote, ndivyo kutakavyokuwa kuja kwake Mwana wa Adamu.”

³ Furiko la duniani pote lilifagilia mbali wale wote ambao hawakutii ujumbe wa Mungu wenye onyo. Hata hivyo, hilo halikufagilia mbali Noa na familia yake. Wao ‘waliingia katika safina,’ kama Yesu alivyosema. Kwa sababu ya ujitoaji kimungu wao, Yehova aliwaandalia njia ya kuponyoka. Petro wa Pili 2:5, 9 larejezea kuokolewa kwa Noa na familia yake lisemapo hivi: “[Mungu] . . . alimhifadhi Nuhu, mjumbe wa haki, na watu wengine saba, hapo alipoleta Gharika juu ya ulimwengu wa wasiomcha Mungu. Bwana ajua kuwaokoa watauwa na majaribu.” Yesu alilinganisha siku ya Noa na siku za mwisho ili kuonyesha kwamba watu kwa ujumla hawangetii ujumbe wa Mungu wenye onyo. Hata hivyo, kwa kufanya hivyo alithibitisha pia kwamba Noa na familia yake walitii Yehova Mungu, wakaingia katika safina, na kuokoka hilo Furiko kubwa. Kuokolewa kwa Noa na familia yake kwaelekeza kwenye kuokolewa kwa watumishi waaminifu wa Mungu katika mwisho wa ulimwengu huu.

Kigezo cha Karne ya Kwanza

4. Kwa utimizo wa maneno ya Yesu, ni matukio gani yaliongoza kwenye uharibifu wa Yerusalemu katika 70 W.K.?

⁴ Yesu alisema pia juu ya matukio ambayo yangetukia katika mwisho wa ulimwengu huu. Kwenye Mathayo 24:21, 22, twasoma hivi: “Wakati huo kutakuwapo dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe. Na kama siku hizo zisingalifupizwa, asingeokoka mtu ye yote; lakini kwa ajili ya wateule zitafupizwa siku hizo.” Maneno haya yalipata utimizo wa kwanza katika karne ya kwanza ya Wakati wa Kawaida wetu. Katika 66 W.K. jiji la Yerusalemu lilizingirwa na majeshi ya Waroma chini ya uongozi wa Sesho Galo. Vikosi vya Waroma vilifikia hatua ya kubomoa ukuta wa hekalu, na Wayahudi wengi walikuwa tayari kujisalimisha. Hata hivyo, bila kutazamiwa, na bila sababu yoyote, Sesho Galo aliondoa vikosi vyake. Walipoona Waroma wakiondoka, Wakristo walitenda kulingana na maneno ya Yesu, yaliyosemwa miaka mingi iliyokuwa imepita: “Hapo mtakapoona mji wa Yerusalemu umezungukwa na majeshi, ndipo jueni ya kwamba uharibifu wake umekaribia. Ndipo walio katika Uyahudi na wakimbilie milimani, na walio katikati yake wakimbilie nje, na walio katika mashamba wasiuingie.” (Luka 21:20, 21) Wayahudi waliokubali Ukristo, wale wateule, waliondoka mara iyo hiyo kwenye jiji hilo la Yerusalemu lililokuwa liangamizwe na hivyo kuokoka ule uharibifu mbaya sana uliolipata muda mfupi baadaye. Katika 70 W.K., vikosi vya Waroma vilirudi vikiongozwa na Jemadari Tito. Vilipiga kambi kuzunguka Yerusalemu, vikalizingira jiji hilo, na kuliangamiza.

5. Ni kwa maana gani dhiki iliyopata Yerusalemu ilifupizwa katika 70 W.K.?

⁵ Yule mwanahistoria Myahudi Yosefo asimulia kwamba Wayahudi 1,100,000 walikufa, hali 97,000 waliokoka na kupelekwa utumwani. Kwa hakika hao Wayahudi wasio Wakristo waliookoka hawakuwa “wale wateule” wa unabii wa Yesu. Alipokuwa akisema na taifa la Kiyahudi lenye kuasi, Yesu alikuwa amesema hivi: “Angalieni, nyumba yenu mmeachiwa hali ya ukiwa. Kwa maana nawaambia, Hamtaniona kamwe tangu sasa, hata mtakaposema, Amebarikiwa ajaye kwa jina la Bwana.” (Mathayo 23:38, 39) Hakuna rekodi yoyote ionyeshayo kwamba wale Wayahudi waliokuwa wamezingirwa katika Yerusalemu walimkubali Yesu kuwa Mesiya katika dakika ya mwisho, wakawa Wakristo, na kupokea upendeleo wa Yehova. Hata hivyo, dhiki iliyokuja juu ya Yerusalemu katika 70 W.K. ilifupizwa. Mazingiwa ya mwisho ya jeshi la Waroma hayakuwa ya muda mrefu. Hayo yaliruhusu Wayahudi kadhaa waokoke, ingawaje walipelekwa kwenye sehemu mbalimbali za Milki ya Waroma kuwa watumwa.

Umati Mkubwa wa Waokokaji

6, 7. (a) Ni jiji gani kubwa la kidini ambalo bado litaharibiwa, likiwa sehemu ya dhiki gani isiyo na kifani? (b) Yohana alitoa unabii gani kuhusu dhiki kubwa inayojia ulimwengu huu?

⁶ Ingawa uharibifu wa Yerusalemu katika 70 W.K. kwa kweli ulileta “dhiki kubwa” kwa jiji hilo la kidini, utimizo mkubwa wa maneno ya Yesu haujatukia bado. Jiji kubwa zaidi la kidini, Babiloni Mkubwa, milki ya ulimwengu ya dini ya uongo, litapata dhiki kubwa yenye kuliletea kifo ikifuatwa mara hiyo na dhiki isiyo na kifani kwa sehemu inayobaki ya mfumo wa mambo wa Shetani. (Mathayo 24:29, 30; Ufunuo 18:21) Miaka 26 hivi baada ya uharibifu wa Yerusalemu, mtume Yohana aliandika juu ya hiyo dhiki kubwa itakayopata ulimwengu wote katika Ufunuo 7:9-14. Alionyesha kwamba umati mkubwa wa watu wangeiokoka.

⁷ Waokokaji hawa, waitwao “umati mkubwa,” watambuliwa kwa hatua fulani za uamuzi wanazochukua. Kulingana na Ufunuo 7:14, mmoja wa wale wazee 24 walio mbinguni alimwambia Yohana hivi: “Hao ndio wanatoka katika dhiki ile iliyo kuu, nao wamefua mavazi yao, na kuyafanya meupe katika damu ya Mwana-Kondoo.” Ndiyo, umati mkubwa wamshangilia Yehova kuwa ndiye chanzo cha wokovu wao. Nao wadhihirisha imani katika damu ya Yesu iliyomwagwa na wana msimamo wenye uadilifu mbele ya Muumba na Mfalme wake aliyewekwa, Yesu Kristo.

8. Kuna uhusiano gani mzuri ulioko kati ya “umati mkubwa” na ndugu za Yesu watiwa-mafuta wanaosalia?

⁸ Leo, washiriki wanaokaribia milioni tano wa ule umati mkubwa wanaishi chini ya ukichwa unaotenda kazi wa yule Mfalme wa kimbingu, Yesu Kristo. Wanajitiisha kwa Kristo na kushirikiana kwa ukaribu na ndugu zake watiwa-mafuta walio duniani bado. Kuhusu njia ambayo umati mkubwa wanavyowatendea hawa watiwa-mafuta, Yesu asema hivi: “Amin, nawaambia, kadiri mlivyomtendea mmojawapo wa hao ndugu zangu walio wadogo, mlinitendea mimi.” (Mathayo 25:40) Kwa sababu wanatoa msaada bila ubinafsi kwa ndugu wa Kristo watiwa-mafuta, wale wa umati mkubwa wanahukumiwa kuwa walikuwa wamefanya mema kwa Yesu mwenyewe. Hilo lawasaidia kuwa na uhusiano wenye usalama pamoja na Yesu Kristo na Yehova Mungu. Wamependelewa kujiunga na mabaki ya watiwa-mafuta katika kuwa Mashahidi wa Mungu na wachukuaji wa jina lake.—Isaya 43:10, 11; Yoeli 2:31, 32.

Kukesha

9, 10. (a) Ni lazima tufanye nini ili kudumisha msimamo wenye uadilifu mbele ya Mwana wa binadamu? (b) Ni lazima tutendeje ili ‘kukesha’?

⁹ Lazima umati mkubwa udumishe msimamo wao wenye uadilifu mbele ya Mwana wa binadamu bila kuacha, jambo linalotaka kukesha mpaka mwisho. Yesu alitaja hilo waziwazi aliposema: “Jiangalieni, mioyo yenu isije ikalemewa na ulafi, na ulevi, na masumbufu ya maisha haya; siku ile ikawajia ghafula, kama mtego unasavyo; kwa kuwa ndivyo itakavyowajilia watu wote wakaao juu ya uso wa dunia nzima. Basi, kesheni ninyi kila wakati, mkiomba, ili mpate kuokoka katika hayo yote yatakayotokea, na kusimama mbele za Mwana wa Adamu.”—Luka 21:34-36.

¹⁰ Ili kufanikiwa kusimama mbele ya Mwana wa binadamu, ni lazima tuwe na kibali chake, ambacho hatutapata tukijiruhusu kuvutwa na fikira za ulimwengu huu. Fikira za kilimwengu ni zenye kushawishi na zaweza kuchochea mtu ashiriki kupita kiasi katika anasa za kimwili au kulemewa sana na matatizo ya maisha hivi kwamba hatangulizi tena masilahi ya Ufalme. (Mathayo 6:33) Mwendo kama huo hudhoofisha mtu kiroho na waweza kumfanya asijali madaraka yake kuelekea Mungu na wengine. Angeweza kuwa asiyetenda au kuhatarisha mahali pake kutanikoni kwa sababu ya kutenda dhambi nzito, labda hata kuonyesha mtazamo wa kutotubu. Ni lazima kila mtu aliye katika umati mkubwa ajiangalie. Lazima ajitenge na ulimwengu huu usiomcha Mungu pamoja na mazoea yao.—Yohana 17:16.

11. Matumizi ya kanuni zipi za Kimaandiko zitatusaidia kuokoka Har–Magedoni?

¹¹ Kwa kusudi hilo, Yehova ameandaa yale tunayohitaji kupitia Neno lake, roho takatifu yake, na tengenezo lake lionekanalo. Ni lazima tuzitumie hizo kikamili. Na zaidi, lazima tuwe wenye kusali na watiifu kwa Mungu ikiwa twatazamia kupata upendeleo wake. Kwanza, lazima tukuze chuki yenye nguvu kuelekea yaliyo mabaya. Mtunga-zaburi alisema hivi: “Sikuketi pamoja na watu wa ubatili, wala sitaingia mnamo wanafiki. Nimelichukia kusanyiko la watenda mabaya, wala sitaketi pamoja na watu waovu. Usiiondoe nafsi yangu pamoja na wakosaji, wala uhai wangu pamoja na watu wa damu.” (Zaburi 26:4, 5, 9) Katika kutaniko la Kikristo, vijana pamoja na wale wenye umri mkubwa wanapaswa kuepuka ushirika pamoja na wale wasiojiweka wakfu kwa Yehova. Ili kupokea upendeleo wa Mungu, sisi hujitahidi kuwa bila lawama na bila doa kutokana na ulimwengu. (Zaburi 26:1-5; Yakobo 1:27; 4:4) Hivyo, tutahakikishiwa kwamba Yehova hatatufagilia mbali katika kifo pamoja na wale wasiomcha Mungu kwenye Har–Magedoni.

Wengine ‘Hawatakufa Kamwe’

12, 13. (a) Kabla ya kumfufua Lazaro, Yesu alisema maneno yapi ambayo Martha hakuyaelewa kabisa? (b) Ni nini hakikumaanishwa na maneno ya Yesu kuhusu wengine ‘kutokufa kamwe’?

¹² Inasisimua kufikiria kuokoka mwisho wa mfumo huu wa mambo na uwezekano wa kutokufa kamwe. Hilo ndilo taraja tunalopewa na Yesu. Kabla tu ya kumfufua rafiki yake mfu Lazaro, Yesu alimwambia Martha dadake Lazaro hivi: “Mimi ndimi huo ufufuo, na uzima. Yeye aniaminiye mimi, ajapokufa, atakuwa anaishi; naye kila aishiye na kuniamini hatakufa kabisa [“kamwe,” NW] hata milele. Je! unayasadiki hayo?” Martha aliamini katika ufufuo, lakini hakuelewa yale yote ambayo Yesu alikuwa akisema.—Yohana 11:25, 26.

¹³ Yesu hakumaanisha kwamba mitume wake waaminifu wangeendelea kuishi kihalisi na kwamba hawangekufa kamwe. Mbali na hivyo, baadaye alionyesha kwamba wanafunzi wake wangekufa. (Yohana 21:16-23) Kwa hakika, kutiwa kwao mafuta kwa roho takatifu katika Pentekoste ya 33 W.K. kulimaanisha kwamba ilikuwa lazima wafe ili kupokea urithi wao wa kimbingu wakiwa wafalme na makuhani. (Ufunuo 20:4, 6) Kwa hiyo, baada ya muda fulani, Wakristo wote wa karne ya kwanza walikufa. Hata hivyo, Yesu alisema maneno yale kwa kusudi fulani. Maneno yake juu ya kuishi bila kufa kamwe yatatimizwa?

14, 15. (a) Maneno ya Yesu juu ya wengine ‘kutokufa kamwe’ yatatimizwaje? (b) Ni nini hali ya ulimwengu huu, lakini waadilifu wana tumaini gani?

¹⁴ Kwanza, Wakristo waaminifu watiwa-mafuta hawatapatwa kamwe na kifo cha milele. (Ufunuo 20:6) Pia, maneno ya Yesu yaelekezea wakati hususa ambapo Mungu ataingilia mambo ya binadamu na kufutilia mbali uovu kutoka duniani, kama alivyofanya katika siku ya Noa. Waaminifu wapatikanao wakifanya mapenzi ya Mungu wakati huo hawatalazimika kufa kwa matendo ya hukumu ya Mungu. Badala ya hivyo, kama Noa na familia yake, wao watakuwa na fursa ya kuokoka uharibifu wa ulimwengu huu. Tumaini hilo lina msingi mzuri, likitegemea mafundisho ya Biblia na kuonyeshwa kwa vielelezo vingi. (Linganisha Waebrania 6:19; 2 Petro 2:4-9.) Utimizo wa unabii wa Biblia waonyesha kwamba hivi karibuni ulimwengu uliopo wenye jamii ya wanadamu isiyo na uadilifu utaisha katika uharibifu. Hali iliyopo haiwezi kurekebishwa, kwani ulimwengu ni wenye uovu usiorekebika. Yale ambayo Mungu alisema juu ya ulimwengu wa siku ya Noa yafanana na ya ulimwengu wa leo. Uovu wajaa mioyo ya wanadamu walio wengi, na fikira zao ni mbaya tu wakati wote.—Mwanzo 6:5.

¹⁵ Yehova ameruhusu wanadamu watawale dunia kwa karne nyingi bila mwingilio wa kimungu, lakini wakati wao umekaribia kuisha. Karibuni, Yehova atawaangamiza waovu wote duniani, kama vile tu Biblia husema. (Zaburi 145:20; Mithali 2:21, 22) Hata hivyo, yeye hatawaharibu waadilifu pamoja na waovu. Mungu hakupata kamwe kufanya kitendo kama hicho! (Linganisha Mwanzo 18:22, 23, 26.) Kwa nini awaharibu wale wanaojitahidi kumtumikia kwa uaminifu, wakiwa na hofu ya kimungu? Ni kusababu kuzuri tu kwamba waabudu waaminifu wa Yehova wanaoishi wakati dhiki kubwa ianzapo watapata upendeleo machoni pake nao hawataharibiwa, kama vile Noa na familia yake hawakuharibiwa wakati ulimwengu mwovu wa siku yake ulipoisha kwa msiba. (Mwanzo 7:23) Watakuwa na himaya ya kimungu nao wataokoka mwisho wa ulimwengu huu.

16. Ni mambo gani ya ajabu yatatendeka katika ulimwengu mpya, jambo linalomaanisha nini kwa waokokaji?

¹⁶ Kisha nini? Katika ulimwengu mpya, baraka zenye kuponya zitatiririkia wanadamu wakati manufaa za fidia ya dhabihu ya Yesu zitakapotumiwa kikamili. Biblia yasema juu ya mfano wa “mto wa maji ya uzima, wenye kung’aa kama bilauri, ukitoka katika kiti cha enzi cha Mungu, na cha Mwana-Kondoo, katikati ya njia kuu yake. Na upande huu na upande huu wa ule mto, ulikuwapo mti wa uzima, uzaao matunda, aina kumi na mbili, wenye kutoa matunda yake kila mwezi; na majani ya mti huo ni ya kuwaponya mataifa.” (Ufunuo 22:1, 2) Ni ajabu sana kwamba ‘kuponya’ huko kwahusisha kule kushindwa kwa kifo chenyewe cha Kiadamu! “Amemeza mauti hata milele; na Bwana MUNGU atafuta machozi katika nyuso zote.” (Isaya 25:8) Hivyo, wale wanaookoka dhiki kubwa na kuingia katika ulimwengu mpya hawatalazimika kamwe kukabili kifo!

Tumaini Hakika

17. Tumaini la kwamba wengine wataokoka Har–Magedoni na ‘kutokufa kamwe’ ni lenye uhakika kadiri gani?

¹⁷ Je! twaweza kuwa na uhakika kamili katika tumaini hili la kustaajabisha? Bila shaka! Yesu alidokezea Martha kwamba kungekuwa na wakati ambapo watu wangeishi bila kufa kamwe. (Yohana 11:26) Zaidi ya hayo, katika sura ya 7 ya Ufunuo ambao Yesu alimpa Yohana, ilifunuliwa kwamba umati mkubwa watoka katika ile dhiki kubwa, wakiiokoka. Je! twaweza kumwamini Yesu Kristo na lile simulizi la kihistoria kuhusu Furiko la siku ya Noa? Bila shaka! Isitoshe, Biblia ina masimulizi mengine ya pindi ambazo Mungu alihifadhi watumishi wake wakiwa hai kupitia nyakati za hukumu na kuanguka kwa mataifa. Je, tusitarajie kwamba atafanya vivyo hivyo katika wakati huu wa mwisho? Je, kuna jambo lisilowezekana kwa Muumba?—Linganisha Mathayo 19:26.

18. Twaweza kuhakikishiwaje uhai katika ulimwengu mpya wa Yehova wenye uadilifu?

¹⁸ Kwa kumtumikia Yehova kwa uaminifu sasa, tuna uhakikisho wa kupata uhai wa milele katika ulimwengu wake mpya. Kwa mamilioni mengi ya watu, uhai katika ulimwengu huo mpya utakuja kupitia ufufuo. Hata hivyo, katika siku yetu, mamilioni ya watu wa Yehova—ndiyo, umati mkubwa ambao hakuna mwanadamu awezaye kuuhesabu au kuuwekea mpaka—watakuwa na pendeleo lisilo na kifani la kuokolewa wakiwa hai kupitia dhiki kubwa. Nao hawatalazimika kamwe kufa.

Tafadhali Eleza

◻ Kuokoka Har–Magedoni kulitangulia kuonyeshwaje katika siku ya Noa?

◻ Ni lazima tufanye nini ili tuendelee kusimama Yesu ajapo kutekeleza hukumu za Yehova?

◻ Kwa nini twaweza kusema kwamba waokokaji wa Har–Magedoni hawalazimiki ‘kufa kamwe’?

[Picha katika ukurasa wa 15]

Wakristo waliokoka dhiki ya Yerusalemu