Siku ya Yehova Yenye Kutia Hofu Iko Karibu

“Kitabu cha ukumbusho kikaandikwa mbele zake, kwa ajili ya hao waliomcha [“waliomhofu,” “NW”] BWANA, na kulitafakari jina lake.”—MALAKI 3:16.

1, 2. Malaki aonya kimbele juu ya siku gani yenye kutia hofu?

YENYE KUTIA HOFU! Siku ilipopambazuka mnamo Agosti 6, 1945, jiji kubwa lilibomolewa ghafula. Wafu walikuwa wapatao 80,000! Makumi ya maelfu walikuwa wamejeruhiwa vibaya sana! Moto uliwaka kwelikweli! Kombora la nyukilia lilikuwa limelipuka. Ilikuwaje kwa Mashahidi wa Yehova katika msiba huo mkuu? Kulikuwa na Shahidi mmoja tu katika Hiroshima—ambaye kwa sababu ya uaminifu-maadili wake wa Kikristo alikuwa amefungwa katika gereza lililotoa himaya wakati huo. Gereza hilo liliporomoka likawa rundo la mawe, lakini ndugu yetu hakuumia. Kama vile alivyosema, yeye alitolewa gerezani kwa mlipuko wa kombora la atomu—labda hilo lilikuwa jambo pekee lililo zuri ambalo kombora hilo lilitimiza.

² Ingawa mlipuko huo wa kombora ulikuwa wenye kuhofisha sana, huo wafifia usiwe wenye umaana unapolinganishwa na “siku ya Yehova iliyo kuu na yenye kutia hofu” iliyoko mbele tu. (Malaki 4:5, NW) Oh, ndiyo, kumekuwa na siku zenye kutia hofu katika wakati uliopita, lakini hii siku ya Yehova itapita hizo zote.—Marko 13:19.

3. Ni tofauti gani ipasayo kuonwa kati ya “kila mwenye mwili” na familia ya Noa ikiongoza kwenye Gharika?

³ Katika siku ya Noa, “kila mwenye mwili [alikuwa] amejiharibia njia yake duniani,” na Mungu akatangaza hivi: “Wameijaza dunia dhuluma, basi nitawaharibu pamoja na dunia.” (Mwanzo 6:12, 13) Kama ilivyorekodiwa kwenye Mathayo 24:39 (NW), Yesu alisema kwamba watu “hawakujali mpaka furiko likaja na kuwafagilia mbali wote.” Lakini Noa mwaminifu, aliye “mhubiri wa uadilifu,” aliokoka Gharika hiyo pamoja na familia yake yenye kumhofu Mungu.—2 Petro 2:5, NW.

4. Ni kielelezo kipi cha kuonya kinachoandaliwa na Sodoma na Gomora?

⁴ “Kama vile,” Yuda 7 lasimulia, “Sodoma na Gomora na miji iliyokuwa kando-kando, waliofuata uasherati . . . wakaenda kufuata mambo ya mwili yasiyo ya asili, imewekwa kuwa dalili, wakiadhibiwa katika moto wa milele.” Hao watu wasiomhofu Mungu waliangamia kwa sababu ya mtindo-maisha wao mchafu kwa njia yenye kuchukiza. Acheni jumuiya zenye kutegemea ngono za ulimwengu huu wa kisasa zionywe! Hata hivyo, ona kwamba Loti mwenye kumhofu Mungu na binti zake walihifadhiwa hai wakati wa msiba huo mkuu, kama vile waabudu wa Yehova watakavyolindwa wakati wa dhiki kubwa inayokaribia upesi.—2 Petro 2:6-9.

5. Twaweza kujifunza nini kutokana na hukumu zilizotekelezwa juu ya Yerusalemu?

⁵ Kisha fikiria vile vielelezo vya kuonya vilivyoandaliwa wakati Yehova alipotumia majeshi ya kushambulia kufagilia mbali Yerusalemu, lile jiji tukufu ambalo wakati mmoja lilikuwa limekuwa “furaha ya dunia yote.” (Zaburi 48:2) Matukio hayo yenye kuhuzunisha yalitendeka, kwanza katika 607 K.W.K. na tena katika 70 W.K., kwa sababu watu hao waliojulikana kuwa wa Mungu waliacha ibada ya kweli. Kwa furaha, watumishi wa Yehova waaminifu-washikamanifu waliokoka. Ule msiba wa 70 W.K. (ambao umeonyeshwa chini) unafafanuliwa kuwa “dhiki, jinsi isivyokuwa tangu mwanzo wa kuumba alipoumba Mungu hata sasa.” Uliondolea mbali kabisa mfumo wa mambo wa Kiyahudi ulioasi imani, na kwa hakika kwa habari hiyo “haitakuwa kamwe.” (Marko 13:19) Lakini kutekelezwa huko kwa hukumu ya kimungu kulikuwa kivuli tu cha “dhiki kubwa” ambayo sasa yatisha mfumo wa mambo wa ulimwengu wote.—Ufunuo 7:14, NW.

6. Kwa nini Yehova huruhusu misiba?

⁶ Kwa nini Mungu angeruhusu misiba mibaya, kukiwa na vifo vingi sana? Katika visa vya Noa, Sodoma na Gomora, na Yerusalemu, Yehova alikuwa akitekeleza hukumu juu ya wale waliokuwa wamejiharibia njia yao duniani, waliokuwa wameichafua sayari hii yenye kupendeza kwa uchafuzi halisi na kwa hali mbaya ya kiadili, na ambao walikuwa wameasi imani, au kukataa katakata ibada ya kweli. Leo twasimama ukingoni mwa utekelezaji wa hukumu utakaotia ndani wote na kuangamiza ulimwengu wote.—2 Wathesalonike 1:6-9.

“Katika Siku za Mwisho”

7. (a) Hukumu za kimungu za kale zilitoa unabii juu ya nini? (b) Ni taraja jipi tukufu lililo mbele?

⁷ Uharibifu huo mbalimbali wa nyakati za kale ulitoa unabii juu ya dhiki kubwa yenye kutia hofu inayofafanuliwa kwenye 2 Petro 3:3-13. Mtume asema hivi: “Mkijua kwanza neno hili ya kwamba katika siku za mwisho watakuja na dhihaka zao watu wenye kudhihaki, wafuatao tamaa zao wenyewe.” Kisha akikazia siku ya Noa, Petro aandika hivi: “Dunia ile ya wakati ule iligharikishwa na maji, ikaangamia. Lakini mbingu za sasa na nchi zimewekwa akiba kwa moto, kwa neno lilo hilo, zikilindwa hata siku ya hukumu, na ya kuangamia kwao wanadamu wasiomcha Mungu.” Kufuatia dhiki hiyo iliyo kubwa zaidi ya zote, ule utawala wa Ufalme wa Mesiya ambao umengojewa sana utakuwa na cheo kipya—“mbingu mpya na nchi mpya . . . , ambayo haki yakaa ndani yake.” Hilo ni taraja lenye shangwe kama nini!

8. Matukio ya ulimwengu yanasongaje kwenye upeo?

⁸ Wakati wa karne yetu ya 20, matukio ya ulimwengu yamesonga hatua kwa hatua kuelekea upeo. Ingawa kuharibiwa kwa Hiroshima hakukuwa wakati wa ukaguzi wa kimungu, kwaweza kutiwa ndani ya “mambo ya kutisha” ambayo Yesu alitabiri kwa wakati wa mwisho. (Luka 21:11) Ulianzisha tisho la nyukilia ambalo ladumu kama wingu la dhoruba linalotisha wanadamu. Hivyo, kichwa kikuu katika The New York Times la Novemba 29, 1993, lasomwa hivi: “Huenda Bunduki Zikawa Zenye Kutu Kidogo Lakini Silaha za Nyukilia Zingali Zang’aa.” Wakati uo huo, vita vya kimataifa, vya kirangi, na vya kikabila vyaendelea kuvuna mavuno yenye kuhofisha mno. Katika enzi zilizopita wafu walio wengi sana walikuwa miongoni mwa askari-jeshi. Leo, asilimia 80 ya wafu kutokana na vita wanaripotiwa kuwa raia, kuongezea wale mamilioni wanaotoroka makwao wakiwa wakimbizi.

9. Viongozi wa kidini wameonyeshaje urafiki na ulimwengu?

⁹ Viongozi wa kidini wameonyesha mara nyingi, na huendelea kuonyesha, “urafiki na ulimwengu” kwa kuhusika sana katika vita na mapinduzi yenye umwagaji wa damu. (Yakobo 4:4, NW) Wengine wameshirikiana na wakuu wenye pupa wa ulimwengu wa kibiashara huku hawa wakitokeza silaha kwa wingi na kujenga milki za ulanguzi wa madawa ya kulevya. Kwa kielelezo, katika kuripoti kuuawa kwa mlanguzi mashuhuri wa madawa ya kulevya wa Amerika Kusini, The New York Times ilisema hivi: “Akiwa ameficha shughuli zake za ulanguzi wa madawa ya kulevya kwa madai ya utajiri halali wa kibiashara na kuwa mfadhili, yeye alikuwa na kipindi chake mwenyewe cha redio na mara nyingi aliandamana na mapadri wa Katoliki ya Kiroma.” The Wall Street Journal laripoti kwamba kuongezea kule kuharibu maisha za mamilioni waliokuja kuwa waraibu wa madawa ya kulevya, mlanguzi huyu mashuhuri wa madawa ya kulevya aliagiza binafsi kuuawa kimakusudi kwa maelfu. The Times la London lilisema hivi: “Mara nyingi wauaji hulipia Misa ya pekee ya kutoa shukrani . . . wakati uleule ambao misa ya maziko ya mtu aliyeuawa inapoendelea kwingineko.” Ni uovu ulioje!

10. Twapaswa kuonaje hali za ulimwengu zinazozidi kuwa mbaya?

¹⁰ Ni nani ajuaye hasara itakayosababishwa duniani bado na watu wenye kupuliziwa na roho waovu? Kama vile 1 Yohana 5:19 lisemavyo, “dunia yote pia hukaa katika yule mwovu,” Shetani Ibilisi. Leo ni “ole wa nchi na bahari! kwa maana yule Ibilisi ameshuka kwenu mwenye ghadhabu nyingi, akijua ya kuwa ana wakati mchache tu.” (Ufunuo 12:12) Lakini, kwa furaha, Warumi 10:13 latuhakikishia kwamba “kila atakayeliitia Jina la Bwana ataokoka.”

Mungu Akaribia Katika Hukumu

11. Ni hali zipi katika Israeli zilizozusha unabii wa Malaki?

¹¹ Kwa habari ya wakati ujao wa wanadamu ulio karibu, unabii wa Malaki waelewesha wazi kile kitakachotokea karibuni. Malaki amewekwa mwisho katika mstari mrefu wa manabii Waebrania wa kale. Israeli lilikuwa limeona kufanywa ukiwa kwa Yerusalemu katika 607 K.W.K. Lakini miaka 70 baadaye Yehova alikuwa ameonyesha fadhili zenye upendo na rehema katika kurudisha taifa hilo kwenye bara lalo. Hata hivyo, katika muda wa miaka mia moja, Israeli lilikuwa likipeperuka tena kuelekea uasi imani na uovu. Watu hawakuwa wakiheshimu jina la Yehova, walikuwa wakipuuza sheria zake zenye uadilifu, na kuchafua hekalu lake kwa kuleta wanyama vipofu, vilema, na wagonjwa kwa ajili ya dhabihu. Walikuwa wakitaliki wake wa ujana wao ili waweze kuoa wanawake wa kigeni.—Malaki 1:6-8; 2:13-16.

12, 13. (a) Ni usafishaji upi umekuwa wa lazima kwa jamii ya kikuhani yenye kutiwa mafuta? (b) Umati mkubwa hunufaikaje pia na usafishaji?

¹² Kazi ya usafishaji ilihitajiwa. Inafafanuliwa kwenye Malaki 3:1-4. Kama vile Israeli la kale, Mashahidi wa Yehova wa siku za kisasa walihitaji kusafishwa, kwa hiyo kazi ya usafishaji inayofafanuliwa na Malaki yaweza kutumiwa kuwahusu. Vita ya ulimwengu ya kwanza ilipokuwa ikikaribia kuisha, baadhi ya Wanafunzi wa Biblia, kama vile Mashahidi walivyojulikana wakati huo, hawakudumisha kutokuwamo kamili katika mambo ya kilimwengu. Katika 1918, Yehova alimtuma “mjumbe [Wake] wa agano,” Kristo Yesu, kwenye mpango Wake wa hekalu la kiroho ili kusafisha kile kikundi kidogo cha waabudu Wake kutoa mawaa ya kilimwengu. Yehova alikuwa ameuliza hivi kiunabii: “Ni nani atakayestahimili siku ya kuja kwake [mjumbe huyo]? au ni nani atakayesimama atakapoonekana yeye? Kwa maana yeye ni mfano wa moto wa mtu asafishaye fedha, ni mfano wa sabuni ya mtu afuaye nguo; naye ataketi kama asafishaye fedha na kuitakasa, naye atawatakasa wana wa Lawi, atawasafisha kama dhahabu na fedha; nao watamtolea BWANA dhabihu katika haki.” Wakiwa watu waliosafishwa, wao wamefanya vivyo hivyo!

¹³ Kikundi hicho cha kikuhani chenye kutiwa mafuta kina idadi ya 144,000 pekee. (Ufunuo 7:4-8; 14:1, 3) Lakini, namna gani Wakristo wengine leo waliojiweka wakfu? Sasa wakiwa wanaongezeka kufikia mamilioni, hawa hufanyiza “umati mkubwa” ambao ni lazima pia usafishwe kutoka katika njia za kilimwengu, ‘wakifua mavazi yao, na kuyafanya meupe katika damu ya Mwana-Kondoo.’ (Ufunuo 7:9, 14, NW) Hivyo, kwa kudhihirisha imani katika dhabihu ya fidia ya Mwana-Kondoo, Kristo Yesu, wanaweza kudumisha msimamo safi mbele ya Yehova. Wanaahidiwa wokovu kupitia muda wote wa dhiki kubwa, ile siku ya Yehova yenye kutia hofu.—Sefania 2:2, 3.

14. Watu wa Mungu wanapaswa kutii maneno gani leo waendeleapo kukuza utu mpya?

¹⁴ Pamoja na mabaki wa kikuhani, ni lazima umati mkubwa utii maneno haya zaidi ya Mungu: “Nitawakaribieni ili kuhukumu; nami nitakuwa shahidi mwepesi juu ya wachawi, na juu ya wazinzi, na juu yao waapao kwa uongo; na juu yao wamwoneao mwenye kuajiriwa, kwa ajili ya mshahara wake, wamwoneao mjane na yatima, na kumpotosha mgeni asipate haki yake, wala hawaniogopi [“hawanihofu,” NW] mimi . . . Kwa kuwa mimi, BWANA, sina kigeugeu [“sikubadilika,” NW].” (Malaki 3:5, 6) La, viwango vya Yehova havibadiliki, kwa hiyo katika hofu ya Yehova, ni lazima watu wake leo waepukane na ibada ya sanamu ya aina zote na kuwa wenye kusema ukweli, wenye kufuatia haki, na wakarimu waendeleapo kukuza utu wa Kikristo.—Wakolosai 3:9-14.

15. (a) Yehova hutoa mwaliko gani wenye rehema? (b) Twaweza kuepukaje ‘kumwibia’ Yehova?

¹⁵ Yehova atoa mwaliko kwa wowote ambao huenda wakawa wamegeuka kando kutoka kwenye njia zake zenye uadilifu, akisema hivi: “Nirudieni mimi, nami nitawarudia ninyi.” Hawa wakiuliza: “Turudi kwa namna gani?” yeye ajibu hivi: “Ninyi mnaniibia mimi.” Na kwa kujibu swali hili la kuongezea: “Tumekuibia kwa namna gani?” Yehova asema kwamba wamemwibia kwa kushindwa kuleta vitu vyao bora zaidi kuwa matoleo kwa ajili ya utumishi wake wa hekalu. (Malaki 3:7, 8) Tukiwa tumekuja kuwa sehemu ya watu wa Yehova, twapaswa kwa kweli kutaka kutoa sehemu bora zaidi ya nishati zetu, uwezo wetu mbalimbali, na vitu vyetu vya kimwili kwa utumishi wa Yehova. Hivyo, badala ya kumwibia Mungu, ‘twaendelea kutafuta kwanza ufalme wake, na haki yake.’—Mathayo 6:33.

16. Ni kitia-moyo kipi tunachopata kwenye Malaki 3:10-12?

¹⁶ Kuna zawadi tukufu kwa wote wanaokataa njia za ulimwengu za kujitumikia na kufuatia vitu vya kimwili kama vile Malaki 3:10-12 lionyeshavyo: “Mkanijaribu kwa njia hiyo, asema BWANA wa majeshi; mjue kama sitawafungulia madirisha ya mbinguni, na kuwamwagieni baraka, hata isiwepo nafasi ya kutosha.” Kwa wale wote wenye uthamini, Yehova aahidi ufanisi na mavuno ya kiroho. Yeye aongeza hivi: “Mataifa yote watawaiteni heri; maana mtakuwa nchi ya kupendeza sana.” Je, hilo halijawa kweli miongoni mwa mamilioni ya watu wa Mungu wenye shukrani kotekote duniani leo?

Washika Uaminifu-Maadili Katika Kitabu cha Uhai

17-19. (a) Mchafuko katika Rwanda umeathirije ndugu zetu huko? (b) Hawa wote waaminifu wamesonga mbele wakiwa na usadikisho upi?

¹⁷ Sasa, twaweza kueleza juu ya uaminifu-maadili wa ndugu na dada zetu Warwanda. Sikuzote wao wameleta matoleo ya kiroho yaliyo bora zaidi kwenye nyumba ya Yehova ya kiroho ya ibada. Kwa kielelezo, kwenye “Ufundishaji wa Kimungu” Mkusanyiko wao wa Wilaya katika Desemba 1993, wahubiri wao 2,080 wa Ufalme walivuna hudhurio la ujumla la 4,075. Kulikuwa na Mashahidi wapya 230 waliobatizwa, na kati yao, karibu 150 walijiandikisha katika utumishi wa upainia-msaidizi kwa mwezi uliofuata.

¹⁸ Chuki ya kikabila ilipotokea kwa ghafula katika Aprili 1994, angalau Mashahidi 180, kutia na mwangalizi wa jiji katika Kigali, lililo jiji kuu, na familia yake yote, waliuawa. Wale watafsiri sita kwenye ofisi ya Watch Tower Society katika Kigali, wanne wao wakiwa Wahutu na wawili Watutsi, waliendelea kufanya kazi kwa majuma kadhaa wakiwa wanatishwa sana, mpaka wale Watutsi wakalazimika kutoroka, ila tu kuuawa kwenye kituo cha uchunguzi. Hatimaye, wakichukua vifaa vyao vya kompyuta vilivyosalia, wale wanne waliobaki walikimbilia Goma, katika Zaire, ambapo waliendelea kwa uaminifu mshikamanifu kutafsiri Mnara wa Mlinzi katika lugha ya Kinyarwanda.—Isaya 54:17.

¹⁹ Wajapokuwa katika hali mbaya, sikuzote Mashahidi hao wakimbizi waliomba chakula cha kiroho mbele ya maandalizi ya kimwili. Kwa kujidhabihu sana, ndugu wenye upendo kutoka mabara kadhaa waliweza kuwapelekea maandalizi. Kupitia usemi na utaratibu wao wakiwa chini ya mkazo, wakimbizi hawa wametoa ushahidi mzuri ajabu. Kwa kweli wameendelea kuleta vitu vyao bora zaidi kwa ibada ya Yehova. Wameonyesha usadikisho kama wa Paulo uonyeshwao kwenye Warumi 14:8: “Kama tukiishi, twaishi kwa Bwana, au kama tukifa, twafa kwa Bwana. Basi kama tukiishi au kama tukifa, tu mali ya Bwana.”

20, 21. (a) Ni majina ya nani ambayo hayakuandikwa katika kitabu cha ukumbusho cha Yehova? (b) Ni majina ya nani yaliyomo katika kitabu hicho, na kwa nini?

²⁰ Yehova hukumbuka wote wanaomtumikia kwa uaminifu-maadili. Unabii wa Malaki waendelea hivi: “Ndipo wale waliomcha [“waliomhofu,” NW] BWANA waliposemezana wao kwa wao. Naye BWANA akasikiliza, akasikia; na kitabu cha ukumbusho kikaandikwa mbele zake, kwa ajili ya hao waliomcha [“waliomhofu,” NW] BWANA, na kulitafakari jina lake.”—Malaki 3:16.

²¹ Ni jambo la maana kama nini leo kwamba tuonyeshe hofu ya kimungu katika kuheshimu jina la Yehova! Kwa kufanya hivyo, sisi hatutapatwa na hukumu mbaya, kama vile wale wanaounga mkono mifumo ya ulimwengu huu kwa kuisifu mno. Ufunuo 17:8 (NW) lasimulia kwamba “majina yao hayakuandikwa juu ya hati-kunjo ya uhai.” Kwa kupatana na kufikiri kuzuri, jina lipitalo mengine yote ambalo limeandikwa katika kitabu cha uhai cha Yehova ni lile la Wakili Mkuu wa uhai, Mwana wa Mungu mwenyewe, Yesu Kristo. Mathayo 12:21 latangaza hivi: “Na jina lake mataifa watalitumainia.” Dhabihu ya fidia ya Yesu huhakikisha uhai wa milele kwa wote wadhihirishao imani katika dhabihu hiyo. Ni pendeleo lililoje kuwa na majina yetu mmoja-mmoja yakiwa yametiwa ndani pamoja na jina la Yesu katika hati-kunjo hiyo!

22. Ni tofauti gani itakayokuwa wazi Yehova atekelezapo hukumu?

²² Itakuwaje kwa watumishi wa Mungu katika hukumu? Yehova ajibu kwenye Malaki 3:17, 18: “Nitawaachilia [“nitawaonyesha huruma,” NW] kama vile mtu amwachiliavyo [“amwonyeshavyo huruma,” NW], mwanawe mwenyewe amtumikiaye. Ndipo mtakaporudi, nanyi mtapambanua kati ya wenye haki na waovu, na kati ya yeye atumikiaye Mungu na yeye asiyemtumikia.” Mgawanyo utakuwa wazi kwa wote: waovu kutenganishwa kwa ajili ya kukatiliwa mbali milele, na waadilifu, kukubaliwa kwa ajili ya uhai wa milele katika makao ya Ufalme. (Mathayo 25:31-46) Hivyo umati mkubwa wa watu wenye mfano wa kondoo utaokoka ile siku ya Yehova iliyo kuu na yenye kutia hofu.

Je, Wakumbuka?

◻ Yehova alitekeleza hukumu zipi katika nyakati za Biblia?

◻ Hali leo zafananaje na zile za nyakati za kale?

◻ Ni usafishaji upi umetukia kwa utimizo wa unabii wa Malaki?

◻ Ni majina ya nani ambayo yameandikwa katika kitabu cha ukumbusho cha Mungu?