Wakati wa Kufuliza Kuwa Macho

“Katika mataifa yote lazima ile habari njema ihubiriwe kwanza. . . . Lakini yeye ambaye amevumilia hadi mwisho ndiye atakayeokolewa.” —MARKO 13:10, 13, NW.

1. Kwa nini tuvumilie na kujipa moyo mkuu?

NI LAZIMA tuvumilie—kati ya kizazi kisicho na imani na kilichopotoka! Tangu 1914 kizazi cha watu kimekuwa chenye ufisadi, kama ilivyokuwa tu katika siku ya Yesu. Na leo ufisadi umeenea ulimwenguni pote. Katika hizi “siku za mwisho,” zile “nyakati za hatari zilizo ngumu kushughulika nazo” zinazoelezwa na mtume Paulo zinakumba wanadamu. ‘Watu waovu na walaghai wanaendelea kutoka ubaya hadi ubaya zaidi.’ Kwa wazi, “ulimwengu wote unakaa katika nguvu ya yule mwovu,” Shetani Ibilisi, ambaye sasa anafanya jitihada za mwisho za kuharibu dunia. Lakini jipe moyo mkuu! Kuna “dhiki kubwa” inayokuja itakayoleta kitulizo cha daima kwa wale wote wanaopenda uadilifu.—2 Timotheo 3:1-5, 13, NW; 1 Yohana 5:19, NW; Ufunuo 7:14, NW.

2. Unabii ulitimizwaje katika 1914?

² Kwa furaha, sasa Yehova amemtawaza Bwana Yesu Kristo mbinguni, katika matayarisho ya kuwaondoa maadui wa wanadamu wenye uonevu. (Ufunuo 11:15) Kama vile unabii ulivyotimizwa katika kuja kwa Mesiya kwa mara ya kwanza, ndivyo unabii wenye kutokeza ulioandikwa na Danieli umetimizwa katika karne hii. Katika Danieli 4:16, 17, 32, twaambiwa juu ya kuondolewa kwa ufalme wenye haki juu ya dunia kwa kipindi cha “nyakati saba.” Katika utimizo wazo mkuu, hizi nyakati saba zajumlika kuwa miaka saba ya Kibiblia kila mwaka ukiwa wenye ‘siku’ 360, au miaka 2,520 kwa ujumla.a Miaka hiyo yaanzia 607 K.W.K., Babiloni ilipoanza kukanyaga-kanyaga ufalme wa Israeli, hadi 1914 W.K., mwaka ambao Yesu alitawazwa mbinguni kuwa Mfalme mwenye haki wa wanadamu. Kisha “nyakati zilizowekwa za mataifa” zikakwisha. (Luka 21:24, NW) Lakini mataifa yamekataa kuukubali Ufalme wa Kimesiya unaokuja.—Zaburi 2:1-6, 10-12; 110:1, 2.

3, 4. (a) Ni ulinganisho gani unaoweza kufanywa wa matukio ya karne ya kwanza na yale ya wakati wetu? (b) Ni maswali gani yanayohusika yawezayo kuulizwa?

³ Juma la 70 la miaka (29-36 W.K.) lilipokaribia, na tena mwaka 1914 ulipokaribia, watu wenye kumhofu Mungu walikuwa wakitazamia kufika kwa Mesiya. Na kweli alifika! Lakini, katika kila hali, namna alivyokuja ilitofautiana na matazamio. Na vilevile katika kila hali, baada ya kipindi cha muda mfupi kwa kulinganisha, “kizazi” kiovu hatimaye chaangamizwa kwa amri ya kimungu.—Mathayo 24:34.

⁴ Katika makala yetu iliyotangulia, tuliona jinsi kizazi kiovu cha Kiyahudi kilichotaka Yesu auawe kilivyoharibiwa. Basi, vipi juu ya kizazi cha wanadamu chenye uharibifu ambacho hata sasa humpinga au kumpuuza? Hukumu juu ya kizazi hiki kisicho na imani itatekelezwa lini?

“Fulizeni Kulinda”!

5. (a) Ni kwa sababu gani nzuri hatuhitaji kujua wakati wa ‘siku na saa’ ya Yehova? (b) Kulingana na Marko, Yesu alimalizia unabii wake kwa shauri gani zuri?

⁵ Baada ya kutoa unabii juu ya matukio yaongozayo kwenye wakati wa “dhiki kubwa,” Yesu aliongezea hivi: “[Kwa] habari ya siku ile na saa ile hakuna aijuaye, hata malaika walio mbinguni, wala Mwana, ila Baba peke yake.” (Mathayo 24:3-36; Marko 13:3-32) Hatuhitaji kujua wakati hasa wa matukio hayo. Badala ya hivyo, ni lazima tukazie fikira kuwa wenye kulinda, kusitawisha imani thabiti, na kuendelea kujishughulisha katika utumishi wa Yehova—si kuhesabu tarehe fulani. Yesu alimalizia unabii wake mkubwa kwa kusema: “Fulizeni kutazama, fulizeni kuwa macho, kwa maana hamjui ni lini ulio wakati uliowekwa. . . . Fulizeni kulinda . . . Lile niwaambialo nyinyi nawaambia wote, Fulizeni kulinda.” (Marko 13:33-37, NW) Kuna hatari inayotisha ulimwengu wa leo. Ni lazima tufulize kuwa macho!—Warumi 13:11-13.

6. (a) Imani yetu inapaswa kutegemezwa juu ya nini? (b) Twaweza ‘kuhesabuje siku zetu’? (c) Yesu amaanisha nini hasa na “kizazi”?

⁶ Hatupaswi kukaza uangalifu tu kwa unabii mbalimbali uliopuliziwa kuhusu siku hizi za mwisho za mfumo mwovu bali pia ni lazima tutegemeze imani yetu hasa juu ya dhabihu yenye thamani ya Kristo Yesu na ahadi za Mungu zilizo nzuri ajabu zinazoitegemea. (Waebrania 6:17-19; 9:14; 1 Petro 1:18, 19; 2 Petro 1:16-19) Wakitamani kuona mwisho wa huu mfumo mwovu, watu wa Yehova nyakati nyingine wamekisia-kisia juu ya wakati ambapo “dhiki kubwa” ingetokea, hata wakiunganisha kukisia huko na muda wa kuishi wa kizazi cha tangu 1914. Hata hivyo, ‘twajipatia moyo wa hekima,’ si kwa kukisia-kisia juu ya ni miaka mingapi au siku ngapi hivi zinazofanyiza kizazi kimoja, bali kwa kufikiria jinsi ya “kuzihesabu siku zetu” katika kumletea Yehova sifa yenye shangwe. (Zaburi 90:12) Badala ya kuandaa kanuni ya kupima wakati, neno “kizazi” kama lilivyotumiwa na Yesu hurejezea hasa watu wanaoishi wakati mmoja katika kipindi fulani cha kihistoria, wakiwa na tabia fulani za kuwatambulisha.b

7. Profesa wa historia aandika nini kuhusu “kizazi cha 1914,” na yale aliyoandika yaunganaje na unabii wa Yesu?

⁷ Kwa kupatana na yaliyo juu, profesa wa historia Robert Wohl aliandika katika kitabu chake The Generation of 1914: “Kizazi cha kihistoria hakifafanuliwi na tarehe zacho . . . Hicho si kipindi cha tarehe.” Lakini alitaja kwamba Vita ya Ulimwengu 1 ilitokeza “hisia nyingi sana za mtengano na wakati uliopita,” naye akaongezea: “Wale walioishi kupitia vita hiyo wasingeweza kusahau kamwe kwamba ulimwengu mmoja ulikuwa umeisha na mwingine ukaanza katika Agosti 1914.” Hilo ni kweli kama nini! Lakazia suala kuu la habari. “Kizazi hiki” cha wanadamu cha tangu 1914 kimeona mabadiliko yenye kuhofisha sana. Kimeona dunia ikiloweshwa chepechepe na damu ya mamilioni ya watu. Vita, maangamizi ya jamii nzima-nzima, uharamia, uhalifu, na uvunjaji wa sheria zimefyatuka ulimwenguni kote. Njaa kuu, maradhi, na ukosefu wa adili zimekumba dunia yetu. Yesu alitoa unabii: “Nyinyi pia, wakati mwonapo [wanafunzi wake] mambo hayo yakitukia, jueni kwamba ufalme wa Mungu uko karibu. Kweli nawaambia nyinyi, Kizazi hiki hakitapitilia mbali kwa vyovyote mpaka mambo yote yatukie.”—Luka 21:31, 32, NW.

8. Manabii wa Yehova hukaziaje uhitaji wa kufuliza kuwa macho?

⁸ Ndiyo, ushindi kamili wa Ufalme wa Kimesiya u karibu! Basi, je, kuna faida ya kuchunguza tarehe au kukisia-kisia juu ya muda halisi wa kuishi wa “kizazi” fulani? La hasha! Habakuki 2:3 lasema hivi waziwazi: “Maana njozi hii bado ni kwa wakati ulioamriwa, inafanya haraka ili kuufikilia mwisho wake, wala haitasema uongo; ijapokawia, ingojee; kwa kuwa haina budi kuja, haitakawia.” Siku ya Yehova ya kutoza hesabu inakaribia sana upesi.—Yeremia 25:31-33; Malaki 4:1.

9. Ni matukio gani ya tangu 1914 yaonyeshayo kwamba wakati ni mchache?

⁹ Ufalme wa Kristo ulipoanza kutawala katika 1914, Shetani alitupwa duniani. Jambo hilo limetokeza “ole wa nchi . . . kwa maana yule Ibilisi ameshuka kwenu mwenye ghadhabu nyingi, akijua ya kuwa ana wakati mchache tu.” (Ufunuo 12:12, italiki ni zetu.) Kwa kweli wakati huo ni mchache, ukilinganishwa na maelfu ya miaka ya utawala wa Shetani. Ufalme u karibu, na ndivyo ilivyo siku na saa ya Yehova ya kutekeleza hukumu juu ya kizazi hiki kiovu!—Mithali 3:25; 10:24, 25.

“Kizazi” Kinachopitilia Mbali

10. “Kizazi hiki” kinafananaje na kile cha siku ya Noa?

¹⁰ Ebu tuchunguze kwa ukaribu zaidi taarifa ya Yesu katika Mathayo 24:34, 35, NW: “Kweli nawaambia nyinyi kwamba kizazi hiki hakitapitilia mbali kwa vyovyote mpaka mambo yote hayo yatukie. Mbingu na dunia zitapitilia mbali, lakini maneno yangu hayatapitilia mbali kwa vyovyote.” Maneno ya Yesu yafuatayo yaonyesha kwamba ‘hakuna mtu ajuaye siku ile na saa ile.’ Jambo muhimu zaidi, yeye aonyesha kwamba ni lazima tuepuke mitego inayotuzingira katika kizazi hiki. Hivyo Yesu aongezea: “Kwa maana kama vile siku za Noa zilivyokuwa, ndivyo kuwapo kwa Mwana wa binadamu kutakavyokuwa. Kwa maana kama walivyokuwa katika siku hizo kabla ya furiko, wakila na kunywa, wanaume wakioa na wanawake wakiozwa, mpaka siku ambayo Noa aliingia ndani ya safina; nao hawakujali mpaka furiko likaja na kuwafagilia mbali wote, ndivyo kuwapo kwa Mwana wa binadamu kutakavyokuwa.” (Mathayo 24:36-39, NW) Hapa Yesu alilinganisha kizazi cha siku yake na kile cha siku ya Noa.—Mwanzo 6:5, 9, NW; kielezi-chini.

11. Yesu alifanya ulinganisho gani wa ‘vizazi,’ kama ilivyoripotiwa na Mathayo na Luka?

¹¹ Hii haikuwa mara ya kwanza ambayo mitume walimsikia Yesu akifanya ulinganisho huu wa ‘vizazi,’ kwa kuwa siku kadhaa mapema alikuwa amesema hivi kujihusu mwenyewe: ‘Lazima Mwana wa binadamu apatwe na mateso mengi na kukataliwa na kizazi hiki. Zaidi ya hayo, sawa na vile ilivyotukia katika siku za Noa, ndivyo itakavyokuwa pia katika siku za Mwana wa binadamu.’ (Luka 17:24-26, NW) Hivyo, Mathayo sura ya 24 na Luka sura ya 17 hufanya ulinganisho uo huo. Katika siku ya Noa ‘kila mwenye mwili aliyekuwa amejiharibia njia yake duniani’ na aliyeharibiwa katika Furiko alikuwa “kizazi hiki.” Katika siku ya Yesu watu wa Kiyahudi wenye kuasi-imani waliokuwa wakimkataa Yesu walikuwa “kizazi hiki.”—Mwanzo 6:11, 12; 7:1.

12, 13. (a) Leo, “kizazi hiki” ambacho ni lazima kipitilie mbali ni nini? (b) Watu wa Yehova wanakabilianaje sasa na hiki “kizazi kilicho kombo na kilichopotoka”?

¹² Basi, katika utimizo wa mwisho wa unabii wa Yesu leo, “kizazi hiki” chaonekana kurejezea watu wa dunia wanaoona ishara ya kuwapo kwa Kristo lakini wanakataa kurekebisha njia zao. Kwa kutofautisha, sisi tukiwa wanafunzi wa Yesu twakataa kufinyangwa na mtindo wa maisha wa “kizazi hiki.” Ingawa tumo ulimwenguni, ni lazima tusiwe sehemu yao, “kwa maana wakati uliowekwa uko karibu.” (Ufunuo 1:3, NW; Yohana 17:16) Mtume Paulo atuhimiza hivi: “Fulizeni kufanya mambo yote bila manung’uniko na mabishano, ili mpate kuja kuwa bila lawama na wasio na hatia, watoto wa Mungu wasio na waa miongoni mwa kizazi kilicho kombo na kilichopotoka, ambao miongoni mwao mnang’aa mkiwa wamulikaji katika ulimwengu.”—Wafilipi 2:14, 15, NW; Wakolosai 3:5-10; 1 Yohana 2:15-17.

¹³ ‘Kung’aa kwetu tukiwa wamulikaji’ kwatia ndani kuonyesha utu safi wa Kikristo na zaidi ya yote, kutimiza agizo hili la kiunabii la Yesu: “Habari njema ya ufalme itahubiriwa katika ulimwengu wote, kuwa ushuhuda kwa mataifa yote; hapo ndipo ule mwisho utakapokuja.” (Mathayo 24:14) Hakuna binadamu yeyote awezaye kusema mwisho huo utakuwa lini, lakini twajua kwamba mwisho wa “kizazi hiki” cha watu waovu utakuja mara ushahidi utakapokuwa umetolewa kiwango cha kumridhisha Mungu “mpaka sehemu ya mbali zaidi sana ya dunia.”—Matendo 1:8, NW.

“Siku Ile na Saa Ile”

14. Ni onyo gani la upole ambalo Yesu na Paulo walitoa kuhusu “nyakati na majira,” nasi tuitikieje?

¹⁴ Ushahidi wa duniani pote utakapokuwa umetimizwa kwa kadiri Yehova akusudiavyo, itakuwa ‘siku na saa’ yake ya kuondolea mbali mfumo huu wa ulimwengu. Hatuhitaji kujua tarehe hiyo kimbele. Hivyo, kwa kufuata kielelezo cha Yesu, mtume Paulo aonya hivi kwa upole: “Sasa kwa habari ya nyakati na majira, akina ndugu, hamhitaji kuandikiwa kitu. Kwa maana nyinyi wenyewe mwajua vema kabisa kwamba siku ya Yehova inakuja sawasawa kabisa na mwizi usiku. Wakati wowote ule ambao wanasema: ‘Amani na usalama!’ ndipo uharibifu wa ghafula utakapokuwa mara hiyo juu yao kama vile maumivu makali ya ghafula ya taabu juu ya mwanamke mwenye mimba; nao hawataponyoka kwa vyovyote.” Ona jambo analokazia Paulo: ‘Wakati ambao wanasema.’ Ndiyo, wakati kuna mazungumzo ya “amani na usalama,” wakati isipotazamiwa kabisa, hukumu ya Mungu itatekelezwa kwa ghafula. Shauri hili la Paulo lafaa kama nini: “Basi, na tusiendelee kulala usingizi kama wengine, bali na tukae macho na kutunza akili zetu”!—1 Wathesalonike 5:1-3, 6, NW; ona pia mistari 7-11; Matendo 1:7.

15, 16. (a) Kwa nini tusifikirie kwamba Har–Magedoni ni mbali zaidi kuliko tulivyoamini? (b) Ni lazima enzi kuu ya Yehova itukuzweje karibuni?

¹⁵ Je, maoni haya yaliyo sahihi zaidi juu ya “kizazi hiki” yamaanisha kwamba Har–Magedoni iko mbali zaidi kuliko tulivyokuwa tumefikiri? La hasha! Ingawa hakuna wakati wowote tuliopata kujua “siku ile na saa ile,” sikuzote Yehova Mungu ameijua, naye habadiliki. (Malaki 3:6) Kwa wazi, ulimwengu unadidimia zaidi na zaidi kuelekea uharibifu wa mwisho. Uhitaji wa kufuliza kuwa macho ni muhimu zaidi kuliko ulivyopata kuwa. Yehova ametufunulia “mambo ambayo lazima yatukie upesi,” nasi twapaswa kuitikia kwa hisia ya hima zaidi.—Ufunuo 1:1, NW; 11:18; 16:14, 16.

¹⁶ Wakati ukaribiapo, fuliza kuwa macho, kwa kuwa Yehova yu karibu kuleta msiba juu ya mfumo wote wa Shetani! (Yeremia 25:29-31) Yehova asema: “Nami nitajitukuza, na kujitakasa, na kujidhihirisha, mbele ya macho ya mataifa mengi; nao watajua ya kuwa mimi ndimi BWANA.” (Ezekieli 38:23) ‘Siku hiyo ya Yehova’ ya kukata maneno yakaribia!—Yoeli 1:15; 2:1, 2; Amosi 5:18-20; Sefania 2:2, 3.

“Mbingu Mpya na Dunia Mpya” Zenye Uadilifu

17, 18. (a) Kulingana na Yesu na Petro, “kizazi hiki” kinapitiliaje mbali? (b) Kwa nini tufulize kulinda kuhusu mwenendo na matendo ya ujitoaji kimungu?

¹⁷ Kuhusu ‘mambo yote hayo ambayo lazima yatukie’ Yesu alisema: “Mbingu na dunia zitapitilia mbali, lakini maneno yangu hayatapitilia mbali kwa vyovyote.” (Mathayo 24:34, 35, NW) Yaelekea Yesu alikuwa akifikiria “mbingu na dunia”—watawala na watawalwa—za “kizazi hiki.” Mtume Petro alitumia maneno kama hayo katika kurejezea “mbingu na dunia zilizopo sasa,” ambazo “zimewekwa akiba kwa moto na zinawekwa akiba mpaka siku ya hukumu na ya uangamizo wa watu wasiomwogopa Mungu.” Kisha afafanua jinsi “siku ya Yehova ita[kavyo]kuja kama mwizi, ambayo katika hiyo mbingu [za kiserikali] zitapitilia mbali” pamoja na jamii ya kibinadamu yenye ufisadi, au “dunia,” na matendo yayo ya dhambi. Kisha mtume huyo atuhimiza tuwe na “matendo matakatifu ya mwenendo na vitendo vya ujitoaji kimungu, [tungojeapo] na kufuliza kukumbuka kuwapo kwa siku ya Yehova, ambayo kupitia kwayo mbingu zikiwa zimewaka moto zitafumuliwa, na elementi zikiwa moto sana zitayeyuka!” Ni nini kifuatacho? Petro aelekeza fikira zetu kwa ‘mbingu mpya na dunia mpya ambazo katika hizo uadilifu utakaa.’—2 Petro 3:7, 10-13, NW.c

¹⁸ Hizo “mbingu mpya,” utawala wa Ufalme kupitia Kristo Yesu na wafalme-washiriki wake, zitaletea baraka jamii ya “dunia mpya” yenye uadilifu ya wanadamu. Je, unatazamia kuwa mshiriki wa jamii hiyo? Ikiwa ndivyo, una sababu nzuri ya kuchachawa juu ya wakati ujao mtukufu ulio mbele!—Isaya 65:17-19; Ufunuo 21:1-5.

19. Sasa twaweza kufurahia pendeleo gani kubwa?

¹⁹ Ndiyo, “kizazi” chenye uadilifu cha wanadamu kinakusanywa hata sasa. Leo, “mtumwa mwaminifu mwenye akili” aliyetiwa mafuta anaandaa elimu ya kimungu kwa kupatana na maneno ya Zaburi 78:1, 4: “Enyi watu wangu, sikilizeni sheria yangu, tegeni masikio kwa maneno ya kinywa changu . . . , huku [m]kiwaambia kizazi kingine, sifa za BWANA, na nguvu zake, na mambo yake ya ajabu aliyoyafanya.” (Mathayo 24:45-47) Katika Aprili 14 mwaka huu, katika zaidi ya makutaniko 75,500 na katika nchi zipatazo 230, zaidi ya watu 12,000,000 duniani kote walihudhuria Ukumbusho wa kifo cha Kristo. Je, ulikuwa miongoni mwao? Na uweke imani yako juu ya Kristo Yesu na ‘kuliitia jina la Yehova uokolewe.’—Warumi 10:10-13, NW.

20. Kwa kuwa “muda ubakio si mwingi,” ni lazima tufulize kulinda kwa njia gani, na tukiwa na matazamio gani?

²⁰ “Muda ubakio si mwingi,” akasema mtume Paulo. Basi, huu ni wakati wa kufuliza kabisa kuwa macho na kujishughulisha katika kazi ya Yehova, tuvumiliapo majaribu na chuki ziletwazo na kizazi hiki kiovu cha wanadamu. (1 Wakorintho 7:29; Mathayo 10:22; 24:13, 14) Na tufulize kulinda, tukitazama mambo yote yaliyotabiriwa katika Biblia yatakayopata “kizazi hiki.” (Luka 21:31-33) Kwa kuponyoka mambo hayo na kwa kusimama mbele ya Mwana wa binadamu tukiwa na kibali cha kimungu, hatimaye twaweza kupata thawabu ya uhai udumuo milele.

[Maelezo ya chinis]

Maswali ya Kupitia:

◻ Baada ya kuona utimizo wa Danieli 4:32, twapaswa ‘kufuliza kulinda’ kwa njia gani sasa?

◻ Gospeli za Mathayo na Luka zatambulishaje “kizazi hiki”?

◻ Tungojeapo “siku ile na saa ile,” twaona nini, nasi tuitikieje?

◻ Matazamio ya “mbingu mpya na dunia mpya” yatutie moyo kufanya nini?

[Picha katika ukurasa w17]

Wanadamu wenye kuugua watapata kitulizo kizazi hiki kiovu kilicho jeuri kipitiliapo mbali

[Hisani]

Alexandra Boulat/Sipa Press

[Hisani]

Kushoto na chini: Luc Delahaye/Sipa Press

[Picha katika ukurasa wa18]

“Mbingu mpya na dunia mpya” zenye utukufu ziko karibu sana kwa jamii zote za wanadamu