Kwa Nini Tumtolee Yehova?
JUA lilipowaka juu ya mji mdogo wa Sidoni wa Sarepta, mjane aliinama ili kukusanya vijiti. Alihitaji kuwasha moto ili aweze kupika mlo mdogo—labda mlo wa mwisho ambao yeye na mwana wake mchanga wangekula. Alikuwa ameng’ang’ana kuendeleza uhai wake na wa mvulana wake katika kipindi kirefu cha ukame na njaa kuu, na mwisho ukawa huu wenye huzuni. Walikuwa wakiumia kwa njaa.
Mwanamume akamfikia. Jina lake lilikuwa Eliya, na upesi huyo mjane akaona kwamba alikuwa nabii wa Yehova. Yaonekana kwamba alikuwa amesikia juu ya Mungu huyu. Yehova alikuwa tofauti na Baali, ambaye ibada yake yenye ukatili, iliyopotoka ilikuwa imeenea katika nchi yake ya Sidoni. Kwa hiyo Eliya alipomwomba maji ya kunywa, mwanamke huyo alikuwa na hamu ya kusaidia. Labda alihisi kwamba kufanya hivyo kungempa upendeleo wa Yehova. (Mathayo 10:41, 42) Lakini Eliya akamwomba zaidi—chakula kidogo. Mwanamke huyo alieleza kwamba alikuwa na chakula cha kutosha mlo mmoja tu wa mwisho. Hata hivyo, Eliya alisisitiza, akimhakikishia kwamba Yehova angemwandalia mwanamke huyo chakula kimuujiza mpaka ukame uishe. Mwanamke huyo alifanyaje? Biblia husema hivi: “Basi akaenda, akafanya kama alivyosema Eliya.” (1 Wafalme 17:10-15) Maneno hayo sahili hufafanua kitendo cha imani kubwa—kubwa sana, hivi kwamba, kwa kweli, Yesu Kristo alimsifu mjane huyo miaka ipatayo elfu moja baadaye!—Luka 4:25, 26.
Hata hivyo, huenda likaonekana kuwa jambo la ajabu kwamba Yehova angeomba mambo mengi hivyo kutoka kwa mwanamke aliyekuwa maskini sana. Ni hivyo hasa tunapofikiria sala iliyotolewa wakati mmoja na mwanamume mashuhuri sana. Kukusanya michango kwa Mfalme Daudi ili mwana wake Sulemani aitumie katika ujenzi wa hekalu kulichochea ukarimu mkubwa. Kulingana na viwango vya kisasa, zawadi zilizochangwa zilikuwa na thamani ya mabilioni ya dola! Lakini, Daudi alisema hivi katika sala kwa Yehova: “Mimi ni nani, na watu wangu ni nani, hata tuweze kutoa kwa hiari hivi? kwani vitu vyote vyatoka kwako na katika vitu vyako mwenyewe tumekutolea.” (1 Mambo ya Nyakati 29:14) Sawa na alivyosema Daudi, kila kitu ni cha Yehova. Kwa hiyo wakati wowote tutoapo ili kuendeleza ibada safi, tunalofanya tu ni kumtolea Yehova kile kilicho chake tayari. (Zaburi 50:10) Hivyo, swali hili lazuka, Kwa nini Yehova atutaka tumtolee hata hivyo?
Sehemu ya Maana ya Ibada ya Kweli
Jibu lililo sahili zaidi ni kwamba tangu nyakati za mapema Yehova amefanya utoaji uwe sehemu ya maana ya ibada safi. Yule mwanamume mwaminifu Abeli alimtolea Yehova dhabihu ya baadhi ya mifugo yake yenye thamani. Wazee wa ukoo Noa, Abrahamu, Isaka, Yakobo, na Ayubu walifanya matoleo ayo hayo.—Mwanzo 4:4; 8:20; 12:7; 26:25; 31:54; Ayubu 1:5.
Sheria ya Kimusa iliamuru na hata kuelekeza utoaji wa michango kwa Yehova. Kwa kielelezo, Waisraeli wote waliamuriwa kutoa zaka, au kutoa sehemu ya kumi ya mazao ya nchi na ya ongezeko la mifugo yao. (Hesabu 18:25-28) Michango mingine haikuelekezwa kwa ukaribu hivyo. Mathalani, kila Mwisraeli alitakiwa kumtolea Yehova malimbuko ya mifugo na mazao yake. (Kutoka 22:29, 30; 23:19) Hata hivyo, Sheria ilimruhusu kila mtu mmoja-mmoja aamue kiasi cha kutoa cha malimbuko yake, maadamu alitoa sehemu bora zaidi. Sheria iliandalia pia matoleo ya kutoa shukrani na ya nadhiri, yaliyokuwa ya hiari kabisa. (Mambo ya Walawi 7:15, 16) Yehova aliwatia moyo watu wake watoe kulingana na njia aliyokuwa amewabariki. (Kumbukumbu la Torati 16:17) Sawa na ilivyokuwa imekuwa kwa habari ya ujenzi wa tabenakulo na baadaye ujenzi wa hekalu, kila mtu alitoa kile ambacho moyo wake ulimchochea atoe. (Kutoka 35:21; 1 Mambo ya Nyakati 29:9) Kwa hakika michango hiyo ya hiari ilimpendeza Yehova sana!
Chini ya “sheria ya Kristo,” utoaji wote ulipaswa uwe wa hiari. (Wagalatia 6:2; 2 Wakorintho 9:7) Hilo halikumaanisha kwamba wafuasi wa Kristo waliacha kutoa au walitoa kidogo. La hasha! Huku Yesu na mitume wake walipohubiri katika Israeli, kikundi cha wanawake kiliwafuata na kuwahudumia kutokana na mali zao wenyewe. (Luka 8:1-3) Vilevile mtume Paulo alipokea zawadi zilizotegemeza kazi yake ya umishonari, naye alitia moyo makutaniko fulani yawape fedha wengine waliomo katika hali zenye uhitaji. (2 Wakorintho 8:14; Wafilipi 1:3-5) Baraza linaloongoza katika Yerusalemu liliwapa migawo wanaume wenye kuchukua madaraka ili kuhakikisha kwamba vitu vilivyochangwa viligawanywa kwa wale wenye uhitaji. (Matendo 6:2-4) Kwa wazi, Wakristo wa mapema waliona ni pendeleo kutegemeza ibada safi katika njia hizo.
Hata hivyo, huenda tukajiuliza ni kwa sababu gani hasa Yehova hufanya utoaji uwe sehemu ya ibada yake. Fikiria sababu nne.
Sababu Inayotufanya Tutoe
Kwanza, Yehova hufanya utoaji uwe sehemu ya ibada ya kweli kwa sababu kufanya hivyo kunatufaidi. Kunakazia kuthamini kwetu wema wa Mungu. Kwa kielelezo, mtoto akimnunulia au akimpa mzazi zawadi, ni kwa nini mzazi anafurahi sana? Je, zawadi hiyo inatimiza uhitaji fulani mkubwa ambao mzazi asingeweza kutimiza vingine? Labda sivyo. Badala ya hivyo, mzazi anapendezwa kuona mtoto akisitawisha roho yenye uthamini na ya utoaji. Kwa sababu izo hizo Yehova hututia moyo tutoe na anapendezwa tufanyapo hivyo. Hivyo ndivyo tuonyeshavyo kwamba kwa kweli twathamini fadhili zake zote zisizo na mpaka na ukarimu wake kwetu. Yeye ndiye mtoaji wa “kila zawadi njema na kila upaji mkamilifu,” kwa hiyo hatutakosa sababu za kumshukuru. (Yakobo 1:17, NW) Zaidi ya yote, Yehova alimtoa Mwana wake mwenyewe mpendwa, akimruhusu afe ili tuweze kuishi milele. (Yohana 3:16) Je, tungeweza wakati wote kumshukuru vya kutosha?
Pili, ikiwa twafanya utoaji uwe tabia yetu, kwa njia hiyo twajifunza kumwiga Yehova na Mwana wake, Yesu Kristo, katika jambo la maana zaidi. Yehova hutoa sikuzote, ni mkarimu daima. Kama vile Biblia isemavyo, yeye hutupa sisi “uzima na pumzi na vitu vyote.” (Matendo 17:25) Kwa kufaa twaweza kumshukuru kwa kila pumzi tuvutayo, kwa kila umo la chakula tufurahialo, kwa kila furaha na kitambo kidogo chenye utimizo maishani. (Matendo 14:17) Yesu, sawa na Baba yake, alionyesha roho ya utoaji. Alijitoa bila unyimivu. Je, ulijua kwamba Yesu alipofanya miujiza, alifanya hivyo kwa hasara yake mwenyewe? Mara zaidi ya moja Maandiko hutuambia kwamba alipowaponya wagonjwa, nguvu ‘zilimtoka.’ (Luka 6:19; 8:45, 46) Yesu alikuwa mkarimu sana hivi kwamba hata aliimwaga nafsi yake mwenyewe, uhai wake, hadi kifo chenyewe.—Isaya 53:12.
Kwa hiyo tutoapo, uwe ni wakati wetu, nishati yetu, au mali zetu, twamwiga Yehova na kuufanya moyo wake ushangilie. (Mithali 27:11; Waefeso 5:1) Twafuata pia mfano mkamilifu wa mwenendo wa kibinadamu tulioachiwa na Yesu Kristo.—1 Petro 2:21.
Tatu, utoaji hutimiza mahitaji halisi na ya maana. Ni kweli, Yehova angeweza kwa urahisi kutimiza mahitaji ya masilahi ya Ufalme bila msaada wetu, sawa na vile angeweza kupanga kutumia mawe yapige kelele badala ya kututumia kuhubiri neno. (Luka 19:40) Lakini ameamua kutuheshimu kwa kutupa sisi mapendeleo hayo. Kwa hiyo tunapotoa mali zetu ili kuendeleza masilahi ya Ufalme, tunakuwa na uradhi mkubwa wa kujua kwamba tunashiriki sehemu halisi katika ile kazi ya maana zaidi inayoendelea katika ulimwengu huu.—Mathayo 24:14.
Ni wazi kwamba fedha zinatakiwa ili kugharimia kazi ya ulimwenguni pote ya Mashahidi wa Yehova. Katika mwaka wa utumishi wa 1995, Sosaiti ilitumia karibu dola milioni 60 kwa sababu tu ya utunzaji wa mapainia wa pekee, wamishonari, na waangalizi wasafirio katika migawo yao ya utumishi wa shambani. Hata hivyo, hiyo ni gharama ndogo kwa kulinganishwa na ile ya ujenzi na utendaji-kazi wa ofisi za tawi na majengo ya upigaji-chapa kotekote ulimwenguni. Hata hivyo, yote hayo yanawezeshwa na michango ya hiari!
Watu wa Yehova hawadhani kwa ujumla kwamba ikiwa wao wenyewe si matajiri, wanaweza tu kuwaachia wengine wauchukue mzigo huo. Mtazamo huo ungeweza kutufanya tukose fursa nzuri katika sehemu hii ya ibada yetu. Kulingana na mtume Paulo, Wakristo katika Makedonia walikuwa na ‘wingi wa umaskini.’ Hata hivyo, waliomba wapate pendeleo la kutoa. Na Paulo alishuhudia kwamba, kile walichotoa kilikuwa “zaidi ya uwezo wao”!—2 Wakorintho 8:1-4.
Nne, Yehova amefanya utoaji uwe sehemu ya ibada ya kweli kwa sababu utoaji utatusaidia tuwe wenye furaha. Yesu mwenyewe alisema hivi: “Ni heri kutoa kuliko kupokea.” (Matendo 20:35) Hivyo ndivyo Yehova alivyokusudia tuwe. Hiyo ndiyo sababu nyingine ambayo huenda ikatufanya tuhisi kwamba haidhuru kiasi tunachomtolea, tusingeweza kamwe kufikia uthamini tunaohisi kwake moyoni mwetu. Lakini, kwa furaha, Yehova hatazamii zaidi kwetu kuliko kile tuwezacho kutoa. Twaweza kuwa na uhakika kwamba yeye anapendezwa tutoapo kile tuwezacho kwa shangwe!—2 Wakorintho 8:12; 9:7.
Baraka Hutokana na Kuonyesha Roho ya Utoaji
Kwa kurudia kielelezo chetu cha mapema, ebu wazia kwamba yule mjane wa Sarepta alikuwa amesababu kwamba mtu mwingine angeweza kushughulikia uhitaji wa Eliya wa kupata mlo. Basi yeye angalikosa baraka iliyoje!
Hakuna shaka kwamba Yehova hubariki wale waonyeshao roho ya utoaji. (Mithali 11:25) Mjane wa Sarepta hakuhitaji kuteseka kwa sababu ya kutoa ule aliofikiri ulikuwa mlo wake wa mwisho. Yehova alimthawabisha kwa muujiza. Sawa na vile Eliya alivyokuwa ameahidi, vyombo vya mwanamke huyo, vya unga na vya mafuta havikuwa vitupu hata ukame ulipopita. Lakini alipokea thawabu iliyo kubwa hata zaidi. Mwana wake alipopatwa na ugonjwa akafa, Eliya, yule mtu wa Mungu wa kweli, alimrudisha kwake. Hilo lazima lilimjenga kiroho!—1 Wafalme 17:16-24.
Leo hatutazamii kubarikiwa kwa miujiza. (1 Wakorintho 13:8) Lakini Yehova hutuhakikishia kwamba atawategemeza wale wanaomtumikia kwa nafsi yote. (Mathayo 6:33) Kwa hiyo twaweza kuwa kama yule mjane wa Sarepta katika jambo hilo, tukitoa kwa ukarimu, tukiwa na uhakika kwamba Yehova atatutunza. Vilevile, twaweza kufurahia thawabu kubwa za kiroho. Ikiwa utoaji wetu ni sehemu ya utaratibu wa kawaida, badala ya kuwa jambo la ghafula, linalotukia mara moja-moja, utatusaidia kudumisha jicho letu likiwa sahili na lenye kukaziwa masilahi ya Ufalme, sawa na vile Yesu alivyopendekeza. (Luka 11:34; linganisha 1 Wakorintho 16:1, 2.) Pia utatusaidia kuhisi kuwa karibu zaidi na Yehova na Yesu tukiwa wafanyakazi pamoja nao. (1 Wakorintho 3:9) Nao utaongezea ile roho ya utoaji, wenye ukarimu ambayo tayari ni alama inayowadhihirisha waabudu wa Yehova ulimwenguni pote.
[Sanduku katika ukurasa wa 31]
NJIA AMBAZO WATU FULANI HUCHAGUA KUTOA
MICHANGO KWA KAZI YA ULIMWENGUNI POTE
Wengi huweka kando au hupangia kiasi cha fedha ambazo wao hutia katika masanduku ya michango yaliyo na kibandiko hiki: “Michango kwa Kazi ya Sosaiti ya Ulimwenguni Pote—Mathayo 24:14.” Kila mwezi makutaniko hupeleka kiasi hicho ama kwenye makao makuu ya ulimwengu katika Brooklyn, New York, ama kwenye ofisi ya tawi ya mahali hapo.
Upaji wa hiari wa fedha waweza kupelekwa pia moja kwa moja kwenye Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, au kwenye ofisi ya tawi ya Sosaiti inayotumikia nchi yako. Vito au mali nyingine zenye thamani zaweza kutolewa pia. Barua fupi yenye kutaarifu kwamba hiyo ni zawadi ya moja kwa moja yapaswa iambatane na michango hiyo.
MPANGO WA UPAJI WENYE MASHARTI
Fedha zaweza kupewa kwa Watch Tower Society kuwa amana hadi kifo cha mpaji, kukiwa na uandalizi wa kwamba kukiwa na uhitaji wa kibinafsi, zitarudishwa kwa mpaji. Kwa habari zaidi, tafadhali wasiliana na Treasurer’s Office kwenye anwani iliyoonyeshwa juu.
UTOAJI ULIOFANYIWA MPANGO
Kuongezea zawadi za fedha za moja kwa moja na upaji wa fedha wenye masharti, kuna njia nyinginezo za kutoa ili kufaidi utumishi wa Ufalme wa ulimwenguni pote. Hizo zatia ndani:
Bima: Watch Tower Society yaweza kutajwa kuwa mfaidikaji wa sera ya bima ya maisha au katika mpango wa kustaafu kazi/malipo ya uzeeni. Sosaiti yapasa kujulishwa juu ya mpango wowote kama huo.
Akiba za Benki: Akiba za benki, hati za amana, au akiba za fedha za kustaafu za mtu mmoja-mmoja zaweza kuwekwa zikiwa amana kwa ajili ya au kuweza kulipwa wakati wa kifo kwa Watch Tower Society, kulingana na matakwa ya benki ya hapo. Sosaiti yapasa kujulishwa juu ya mpango wowote kama huo.
Hisa na Dhamana: Hisa na dhamana zaweza kupewa kwa Watch Tower Society ama zikiwa zawadi ya moja kwa moja ama zikiwa chini ya mpango ambao mapato yaendelea kulipwa kwa mpaji.
Mashamba na Nyumba: Mashamba na nyumba ziwezazo kuuzwa zaweza kupewa kwa Watch Tower Society ama kwa kutoa zawadi ya moja kwa moja ama kwa kuweka shamba au nyumba ya maisha kwa ajili ya mpaji, ambaye aweza kuendelea kuishi humo muda wa maisha yake. Mtu apaswa kuarifu Sosaiti kabla ya kuipa Sosaiti hati yoyote ya mashamba na nyumba.
Wasia na Amana: Watch Tower Society yaweza kurithishwa mali au fedha kwa njia ya wasia wenye kutekelezwa kisheria, au Sosaiti yaweza kutajwa kuwa mfaidikaji wa mkataba wa amana. Amana inayofaidi tengenezo la kidini yaweza kuandaa faida fulani za kodi. Nakala ya wasia au mkataba wa amana yapasa kupelekwa kwa Sosaiti.
Wale wanaopendezwa na wowote wa mipango hii ya utoaji uliofanyiwa mpango wanapaswa kuwasiliana na Planned Giving Desk kwa kutumia anwani ionyeshwayo hapa chini au kwa kuandikia ofisi ya Sosaiti inayotumikia nchi yako. Dawati la Utoaji Uliofanyiwa Mpango lapaswa kupokea nakala ya hati zinazohusu wowote wa mipango hii.
Sosaiti imetayarisha broshua ya lugha ya Kiingereza iitwayo Planned Giving. Wale waliomo Marekani wanaopanga kuipa Sosaiti zawadi ya kipekee sasa au kuacha wasia wafapo huenda wakaipata habari hii kuwa yenye kusaidia. Hiyo ni kweli hasa ikiwa wanataka kutimiza mradi fulani au mpango fulani wa familia wa kupata mali huku wakitumia mapunguzo ya kodi ili kupunguza gharama ya zawadi hiyo au wasia. Broshua hiyo inapatikana kwa kuiomba ama kwa kuandika ama kwa kupiga simu.
PLANNED GIVING DESK
Watch Tower Bible and Tract Society of Pennsylvania
100 Watchtower Drive, Patterson, New York 12563-9204
Telephone: (914) 878-7000