Chombo Kipya cha Kusaidia Watu Wajifunze Matakwa ya Mungu
“MFIKIO wayo sahili, wa moja kwa moja, na wenye fadhili utatokeza matokeo zaidi ya vile itarajiwavyo. Habari zimetolewa katika njia sahili na yenye kupendeza hivi kwamba mtu yeyote mwenye moyo mweupe anayejitahidi kutafuta atasukumwa kusema ‘Mungu kwa kweli yumo miongoni mwenu.’” (1 Wakorintho 14:25) Ndivyo alivyosema mmoja wa Mashahidi wa Yehova kutoka Thailand alipokuwa akifafanua ile broshua mpya, Mungu Anataka Tufanye Nini? Imetolewa na Watch Tower Society kwenye Mikusanyiko ya Wilaya ya 1996/1997 ya “Wajumbe wa Amani ya Kimungu.”
Broshua hiyo ya rangi kamili yenye kurasa 32 imekusudiwa kuwa mtaala wa funzo la Biblia. Inashughulikia mafundisho ya msingi ya Biblia. Maneno yayo ni sahili na mafupi, yanayoeleza waziwazi mambo ambayo Mungu anataka tufanye. Wasomaji wataielewa kwa urahisi. Waweza kuongozaje funzo la Biblia katika broshua hii mpya?
Yatumie maswali. Kuna maswali mwanzoni mwa kila somo. Katika mabano baada ya kila swali, utapata nambari za mafungu ambamo majibu yanapatikana. Maswali haya yaweza kutumiwa yakiwa msaada wa kufundisha wa mtazamokimbele na pia wa pitio. Kwa kielelezo, mwanzoni mwa funzo la Biblia nyumbani, waweza kumwuliza mwanafunzi maswali ili upate maelezo yake. Badala ya kusahihisha mara moja majibu yoyote yenye kosa, ungeweza kuendelea na funzo. Mwishoni mwa hilo somo, ungeweza kurudia maswali ili uone ikiwa mwanafunzi sasa aweza kuyajibu kwa kupatana na Biblia.
Chunguzeni maandiko. Katika kila somo, taarifa fupi za kweli za Biblia zinafuatishwa na maandiko yenye kutegemeza. Kwa kuwa mengi ya maandiko yamerejezewa, bila kunukuliwa, ni jambo la maana kumtia moyo mwanafunzi achunguze maandiko hayo katika Biblia yake mwenyewe. Anahitaji kusoma na kutafakari Neno la Mungu kabla ya kuweza kulitumia maishani.—Yoshua 1:8.
Zikazie picha. Hiyo broshua ina vielezi vingi vya picha na michoro—zaidi ya picha 50 kwa ujumla. Hizo zimeandaliwa si ili kuvutia macho tu bali pia kuwa misaada ya ziada ya kufundisha. Kwa kielelezo, masomo mawili ya mwisho (ukurasa mmoja kila moja, kwenye kurasa zinazoangaliana) yana vichwa “Kusaidia Wengine Wafanye Mapenzi ya Mungu” na “Uamuzi Wako wa Kumtumikia Mungu.” Picha zilizo katika hizo kurasa mbili zaonyesha maendeleo ya kiroho ya mtu yuleyule, zikionyesha akitoa ushahidi wa vivi hivi, akishiriki katika kazi ya nyumba hadi nyumba, akijitoa wakfu, na hatimaye akibatizwa. Kwa kuelekeza uangalifu wa mwanafunzi kwenye picha hizo, unamsaidia kuona hatua zinazotakikana ili kumtumikia Mungu.
Vipi ikiwa mtu anayependezwa hasomi vizuri au hawezi kusoma hata kidogo? Sosaiti inafanya broshua hii mpya ipatikane katika kaseti katika lugha kadhaa. Hiyo kaseti ina maandishi ya hiyo broshua na pia mengi ya maandiko yaliyorejezewa. Imerekodiwa hivi: Swali la kwanza lasomwa, likifuatwa na fungu (au mafungu) linalolijibu, pamoja na baadhi ya maandiko yaliyorejezewa. Kisha swali linalofuata linasomwa, likifuatwa na maandishi na maandiko yanayolijibu, na kuendelea. Mwanafunzi aweza kusikiliza huo mrekodio anapotayarisha funzo. Hiyo kaseti yaweza pia kutumiwa wakati wa kuongoza funzo.
Waliokuwapo kwenye mkusanyiko walikuwa na hamu ya kuitumia broshua hiyo mpya katika huduma yao ya shambani. Kwa kielelezo, siku chache tu baada ya kuipokea hiyo broshua, mapainia wawili (waeneza-evanjeli wa wakati wote) kutoka Marekani waliiangushia wenzi wa ndoa vijana ambao walikuwa wakiwazuru. Hao wenzi walipotazama jedwali ya yaliyomo, somo “Mazoea Ambayo Mungu Huchukia” lilinasa uangalifu wao. “Sikuzote nilikuwa nimefundishwa kwamba Mungu asingeweza kamwe kuchukia—yeye ni upendo kikamili,” akasema huyo mwanamke kijana. “Hili ndilo nitakalosoma kwanza.” Hao mapainia wawili waliporudi juma lililofuata huyo mwanamke kijana alisema hivi: “Nilikuwa nikiisoma ile broshua mpya. Ni vigumu sana kufanya mambo yote tunayopaswa kufanya. Yehova hapendezwi nasi—hatujafunga ndoa. Lakini tumefanya uamuzi. Tumefanya mipango ya kuoana Ijumaa ijayo.” Wakiwakumbatia hao wenzi mapainia, waliongeza kusema: “Twaomba radhi kwa kutokuwa na funzo la ukawaida, hata hivyo, ule uamuzi wa kufunga ndoa umetuletea kitulizo kikubwa.”
Kwa hali na mali, tumia ile broshua mpya ya Anataka. Ni chombo kizuri cha kusaidia wengine wajifunze matakwa ya Mungu.
[Picha katika ukurasa wa 17]
Utaitumiaje ile broshua mpya?