Wenye Furaha ni Wale Wakaao Macho!
“Tazama! Ninakuja kama mwizi. Mwenye furaha ni yeye akaaye macho na hutunza mavazi yake ya nje.”—UFUNUO 16:15.
1. Kwa kuwa siku ya Yehova i karibu, twaweza kutarajia nini?
SIKU kubwa ya Yehova i karibu, nayo yamaanisha vita! Katika ono, mtume Yohana aliona “semi zilizopuliziwa na roho waovu” zikitoka kwenda kwa “wafalme,” au watawala wote, wa dunia. Kufanya nini? “Kuwakusanya pamoja kwa vita ya siku kubwa ya Mungu Mweza-Yote”! Yohana aliongeza hivi: “Nazo zikawakusanya pamoja mahali paitwapo katika Kiebrania Har–Magedoni.”—Ufunuo 16:13-16.
2. Gogu wa Magogu ni nani, na ni nini litakalotokea ashambuliapo watu wa Yehova?
2 Karibuni, Yehova atachochea tengenezo la kisiasa la mfumo huu liharibu Babiloni Mkubwa, milki ya ulimwengu ya dini isiyo ya kweli. (Ufunuo 17:1-5, 15-17) Kisha Gogu wa Magogu, Shetani Ibilisi aliyeshushwa hadi ujirani wa dunia, atapanga magenge yake na kufanya shambulio la kufa na kupona dhidi ya watu wa Yehova wenye amani, waonekanao kuwa wasio na ulinzi. (Ezekieli 38:1-12) Lakini Mungu atatenda ili kuwaokoa watu wake. Hilo litatia alama mwanzo wa “siku ya BWANA iliyo kuu na itishayo.”—Yoeli 2:31; Ezekieli 38:18-20.
3. Ungefafanuaje mambo yaliyotabiriwa kwenye Ezekieli 38:21-23?
3 Ndiyo, Yehova atawaokoa watu wake na kuharibu mabaki yote kabisa ya mfumo wa Shetani tufikiapo hali ya ulimwengu iitwayo Har–Magedoni. Soma maneno ya kiunabii ya Ezekieli 38:21-23, na uwazie hiyo mandhari. Yehova atumia nguvu zake kuleta mafuriko ya mvua nyingi ya ghafula, mvua ya mawe yenye kuharibu, moto wenye kusambaa haraka, magonjwa ya kuambukiza yenye kufisha. Hofu ya ghafula iko kila mahali huku magenge ya Gogu yakiwa yamevurugika, yakipigana. Maadui wowote wa Mungu Mweza Yote wanaosalimika wanafishwa huku Yehova atumiapo njia zipitazo za kawaida kuokoa watumishi wake. “Dhiki kubwa” iliyotabiriwa iishapo, hakuna chochote cha mfumo wa Shetani usiomwogopa Mungu kitakachosalia. (Mathayo 24:21) Hata hivyo, hata katika maumivu makubwa katika kifo chao, waovu watajua ni nani aletaye afa lao. Mungu wetu mshindi asema hivi yeye mwenyewe: “Lazima watajua ya kwamba mimi ni Yehova.” (NW) Matukio hayo yasiyo ya kawaida yatatukia katika siku yetu, wakati wa kuwapo kwa Yesu.
Kuja Kama Mwizi
4. Yesu atakuja katika njia gani ili kuharibu mfumo huu mbovu wa mambo?
4 Bwana Yesu Kristo aliyetukuzwa alisema hivi: “Tazama! Ninakuja kama mwizi.” Kuja kama mwizi kungekuwa kwa ghafula, wakati usiotarajiwa, watu wengi wanapolala. Yesu ajapo kama mwizi ili auharibu mfumo huu mwovu, atawahifadhi wale walio macho kikweli. Alimwambia Yohana hivi: “Mwenye furaha ni yeye akaaye macho na hutunza mavazi yake ya nje, ili asipate kutembea akiwa uchi na watu waitazame hali yake ya aibu.” (Ufunuo 16:15) Maana ya maneno hayo ni nini? Nasi twaweza kukaaje macho kiroho?
5. Ni mpango gani wa utumishi wa hekalu uliokuwapo Yesu alipokuwa duniani?
5 Kwa kawaida, mlinzi asingevuliwa mavazi ikiwa angelala kazini. Lakini hilo lilitukia kwenye hekalu katika Yerusalemu Yesu alipokuwa duniani na migawanyiko ya makuhani na Walawi ilipokuwa ikitumikia kwenye hekalu katika Yerusalemu. Karne ya 11 K.W.K. ndipo Mfalme Daudi alipopanga mamia ya makuhani wa Israeli na maelfu ya wasaidizi wao wa Kilawi wawe tengenezo lenye migawanyiko 24. (1 Mambo ya Nyakati 24:1-18) Kila mgawanyiko wenye wafanyakazi zaidi ya elfu moja waliozoezwa ulikuwa na zamu yao ya kushughulikia sehemu mbalimbali za utumishi wa hekalu angalau mara mbili kila mwaka kwa juma moja kamili kwa wakati mmoja. Lakini, kwenye Sikukuu ya Vibanda migawanyiko yote 24 ilikuwapo kwa ajili ya utumishi. Msaada wa ziada ulihitajiwa pia kwenye sikukuu za Kupitwa.
6. Yesu angaliweza kuwa alirejezea nini katika njia isiyo ya moja kwa moja aliposema, “Mwenye furaha ni yeye akaaye macho na hutunza mavazi yake ya nje”?
6 Yesu aliposema, “Mwenye furaha ni yeye akaaye macho na hutunza mavazi yake ya nje,” huenda akawa alikuwa akirejezea kwa njia isiyo ya moja kwa moja utaratibu uliokuwa ukifuatwa wakati huo uliohusisha kazi ya mlinzi kwenye hekalu. Mishnah ya Kiyahudi yasema hivi: “Makuhani walifuliza kulinda kwenye sehemu tatu Hekaluni: kwenye Ukumbi wa Abtinasi, kwenye Ukumbi wa Mwali wa Moto, na kwenye Ukumbi wa Meko; na walawi kwenye mahali ishirini na moja mbalimbali: watano kwenye yale malango matano ya Hekalu la Mlimani, wanne kwenye pembe nne zalo za ndani, watano kwenye malango matano ya Ua wa Hekalu, wanne kwenye pembe nne zalo za nje, na mmoja kwenye Ukumbi wa Matoleo, na mmoja kwenye Ukumbi wa Pazia, na mmoja nyuma ya mahali pa Kiti cha Rehema [nje ya ukuta wa nyuma wa Patakatifu Zaidi Sana]. Ofisa wa Hekalu la Mlimani alikuwa akitembelea kwa kawaida kila mlinzi akiwa na mienge iliyowashwa mbele yake, na ikiwa mlinzi yeyote hakusimama na kumwambia, ‘Ee ofisa wa Hekalu la Mlimani, amani iwe kwako!’ na ilikuwa dhahiri kwamba alikuwa akilala, angemchapa kwa fimbo yake, naye alikuwa na haki ya kuchoma mavazi yake.”—The Mishnah, Middoth (“Vipimo”), 1, mafungu 1-2, yaliyotafsiriwa na Herbert Danby.
7. Kwa nini makuhani na Walawi waliokuwa katika kazi ya mlinzi kwenye hekalu walihitaji kukaa macho?
7 Wale Walawi na makuhani wengi wa mgawanyiko uliokuwa ukitumikia walikaa macho usiku kucha ili kufuliza kulinda na kuzuia yeyote asiye safi asiingie nyua za hekalu. Kwa kuwa “ofisa wa Hekalu la Mlimani,” au “kapteni wa hekalu,” alitembelea vituo vyote 24 wakati wa malindo ya usiku, kila mlinzi alipaswa kukaa macho kwenye kituo chake ikiwa hakutaka kufumaniwa.—Matendo 4:1.
8. Mavazi ya nje ya kitamathali ya Wakristo ni nini?
8 Wakristo watiwa-mafuta na watumishi wenzao wanahitaji kukaa macho kiroho na kutunza mavazi yao ya nje ya ufananisho. Hayo ndiyo uthibitisho wa nje wa kuwekwa rasmi kwetu hudumani kwenye hekalu la kiroho la Yehova. Katika kutambua hilo, tuna roho takatifu ya Mungu, au kani ya utendaji, kutusaidia kufanya kazi yetu na mapendeleo yetu tukiwa wapiga-mbiu wa Ufalme. Kupuuza migawo yetu tukiwa wahudumu wa Mungu kungetuweka katika hatari ya kufumaniwa na Yesu Kristo, Kapteni wa hekalu kubwa la kiroho. Ikiwa tungekuwa tumelala kiroho wakati huo, tungevuliwa mavazi yetu katika njia ya kitamathali na mavazi yetu ya ufananisho yangechomwa moto. Kwa hiyo twaweza kukaaje macho kiroho?
Jinsi Tuwezavyo Kukaa Macho
9. Kwa nini funzo la Biblia kwa msaada wa vichapo vya Kikristo ni muhimu sana?
9 Funzo la Maandiko lenye bidii ya uendelevu pamoja na msaada wa vichapo vya Kikristo ni kichocheo cha kukaa macho kiroho. Funzo hilo litatuandalia vifaa kwa ajili ya huduma, litatusaidia tukabili matatizo, na litatuonyesha njia ya kupata furaha ya milele. (Mithali 8:34, 35; Yakobo 1:5-8) Funzo letu lapaswa kuwa la kikamili na lenye kuendelea. (Waebrania 5:14–6:3) Chakula kizuri kinacholiwa kwa ukawaida chaweza kutusaidia kuwa macho na chonjo. Chaweza kuzuia kule kusinzia kuwezako kuwa ishara ya ulishaji mbaya. Hatuna sababu yoyote ya kulishwa vibaya na kulemewa na usingizi kiroho, kwa kuwa Mungu anafanya maandalizi mengi kwa ajili ya chakula cha kiroho kupitia “mtumwa mwaminifu na mwenye busara” aliyetiwa mafuta. (Mathayo 24:45-47) Kula chakula cha kiroho kwa ukawaida kupitia funzo la kibinafsi na la familia ni njia moja ya kukaa macho na kuwa na “afya katika imani.”—Tito 1:13.
10. Mikutano, makusanyiko, na mikusanyiko ya Kikristo hutusaidiaje kukaa macho kiroho?
10 Mikutano, makusanyiko, na mikusanyiko ya Kikristo hutusaidia kufuliza kukaa macho kiroho. Huandaa kitia-moyo na fursa nyingi za ‘kuchocheana kwenye upendo na kazi zilizo bora.’ Twapaswa kukutana kwa ukawaida hasa ‘tuonavyo ile siku ikikaribia.’ Sasa siku hiyo kwa kweli iko karibu. Ni katika “siku ya BWANA,” atakapotetea enzi kuu yake. Ikiwa siku hiyo kwa kweli ni ya maana kwetu—nayo yapasa kuwa ya maana—sisi ‘hatutaachilia mbali kukusanyika pamoja sisi wenyewe.’—Waebrania 10:24, 25; 2 Petro 3:10.
11. Kwa nini yaweza kusemwa kwamba huduma ya Kikristo ni muhimu ili kukaa macho kiroho?
11 Kushiriki kwa moyo wote katika huduma ya Kikristo ni muhimu ili kuwa macho kiroho. Kushiriki kwa ukawaida na kwa bidii katika kuhubiri habari njema hutufanya tuwe chonjo. Huduma yetu hututolea fursa nyingi za kuzungumza na watu juu ya Neno la Mungu, Ufalme wake, na makusudi yake. Yaridhisha kutoa ushahidi kutoka nyumba hadi nyumba, kufanya ziara za kurudia, na kuongoza mafunzo ya Biblia nyumbani katika vichapo kama vile Ujuzi Uongozao Kwenye Uhai Udumuo Milele. Wazee katika Efeso la kale wangeweza kushuhudia kwamba Paulo alikuwa amewafundisha “hadharani na kutoka nyumba hadi nyumba.” (Matendo 20:20, 21) Bila shaka, baadhi ya Mashahidi wa Yehova walio waaminifu wana matatizo mabaya ya afya yanayozuia huduma yao kwa njia moja au nyingine, lakini wanapata njia za kuwaambia wengine juu ya Yehova na umaliki wake na wanapata shangwe kubwa kutokana na kufanya hivyo.—Zaburi 145:10-14.
12, 13. Twapaswa kuepuka kujitia kupita kiasi katika chakula na kinywaji kwa sababu zipi?
12 Kuepuka kujitia kupita kiasi katika anasa kutatusaidia kukaa macho kiroho. Alipokuwa akisema juu ya kuwapo kwake, Yesu aliwasihi sana mitume wake hivi: “Lakini kazieni uangalifu kwa nyinyi wenyewe kwamba mioyo yenu isiwe kamwe yenye kulemewa na kula kupita kiasi na kunywa sana na mahangaiko ya maisha, na kwa ghafula siku hiyo iwe juu yenu mara hiyo kama mtego. Kwa maana itakuja juu ya wote wale wanaokaa juu ya uso wa dunia yote.” (Luka 21:7, 34, 35) Ulafi na ulevi hayapatani na kanuni za Biblia. (Kumbukumbu la Torati 21:18-21) Mithali 23:20, 21 husema hivi: “Usiwe miongoni mwao wanywao mvinyo; miongoni mwao walao nyama kwa pupa. Kwa maana mlevi na mlafi huingia umaskini, na utepetevu humvika mtu nguo mbovu.”—Mithali 28:7.
13 Hata ikiwa kula kupita kiasi na kunywa sana hakujafikia kiwango hicho, hata hivyo, kwaweza kumfanya mtu asinzie, hata awe mvivu na mwenye kupuuza kufanya mapenzi ya Mungu. Sikuzote, kutakuwa na mahangaiko yanayohusisha maisha ya familia, afya, na mengineyo. Hata hivyo, tutakuwa wenye furaha tukitanguliza masilahi ya Ufalme maishani na kuwa na uhakika kwamba Baba yetu wa kimbingu atatuandalia mahitaji. (Mathayo 6:25-34) La sivyo, “siku hiyo” itatujia kama “mtego,” labda kama mtego uliofichwa utakaotunasa bila habari au kama mtego wenye chambo, kama ile mitego ivutiayo na kukamata wanyama wasioshuku lolote. Hilo halitatokea tukikaa macho, tukiwa na habari kamili kwamba twaishi katika “wakati wa mwisho.”—Danieli 12:4.
14. Kwa nini twapaswa kutoa sala zenye bidii?
14 Sala yenye bidii ni msaada mwingine wa kuwa macho kiroho. Katika unabii wake mkubwa, Yesu alihimiza zaidi hivi: “Fulizeni kuwa macho wakati wote mkiomba dua ili mpate kufanikiwa kuponyoka mambo yote hayo yaliyokusudiwa kutukia, na kusimama mbele ya Mwana wa binadamu.” (Luka 21:36) Ndiyo, acheni tusali kwamba sikuzote tuwe upande wa Yehova na kuwa na msimamo unaokubalika wakati Yesu, Mwana wa binadamu, ajapo kuharibu mfumo huu mwovu wa mambo. Kwa faida yetu wenyewe na kwa faida ya waamini wenzetu tunaosali kwa ajili yao, twahitaji ‘kubaki macho katika sala.’—Wakolosai 4:2; Waefeso 6:18-20.
Wakati Unaisha
15. Ni nini kinachotimizwa na utumishi wetu tukiwa wahubiri wa uadilifu?
15 Tungojeapo ile siku kubwa ya Yehova, bila shaka twatamani kufanya yote tuwezayo katika utumishi wake. Tukisali kwake kwa bidii juu ya hilo, twaweza kufunguliwa “mlango mkubwa uongozao kwenye utendaji.” (1 Wakorintho 16:8, 9) Katika wakati uliowekwa na Mungu, Yesu atatoa hukumu na kutenganisha “kondoo” waadilifu wastahilio uhai udumuo milele kutoka kwa “mbuzi” wasiomwogopa Mungu wanaostahili uharibifu wa milele. (Yohana 5:22) Si sisi tutenganishao kondoo kutoka kwa mbuzi. Lakini utumishi wetu tukiwa wahubiri wa uadilifu sasa watolea watu fursa ya kuchagua maisha ya kumtumikia Mungu na hivyo kuwa na tumaini la kutenganishwa wapate uhai, Yesu “awasilipo katika utukufu wake.” Ufupi wa wakati unaosalia wa mfumo huu wa mambo huongeza uhitaji wa utendaji wa moyo wote tutafutapo wale wenye “mwelekeo ufaao kwa ajili ya uhai udumuo milele.”—Mathayo 25:31-46; Matendo 13:48.
16. Kwa nini twapaswa kuwa wapiga-mbiu wa Ufalme wenye bidii?
16 Wakati wa ulimwengu wa Noa uliisha, nao wakati wa mfumo huu wa mambo utaisha karibuni. Kwa hiyo acheni tuwe wapiga-mbiu wa Ufalme wenye bidii. Kazi yetu ya kuhubiri inasitawi, kwa kuwa kila mwaka mamia ya maelfu ya watu wanabatizwa katika ufananisho wa wakfu wao kwa Mungu. Wanakuwa sehemu ya tengenezo la Yehova lililobarikiwa—“watu wake, na kondoo wa malisho yake.” (Zaburi 100:3) Ni shangwe kama nini kushiriki katika kazi ya kuhubiri Ufalme ileteayo watu wengi sana tumaini kabla ya “siku ya BWANA iliyo kuu na itishayo”!
17, 18. (a) Tuhubiripo, twapaswa kutarajia itikio gani kutoka kwa watu fulani? (b) Ni nini ambacho bila shaka kitawapata wadhihaki?
17 Sawa na Noa, tuna utegemezo na kinga ya Mungu. Ndiyo, watu, wale malaika waliochukua miili ya kibinadamu, na Wanefili lazima wawe walidhihaki ujumbe wa Noa, lakini hilo halikumzuia. Leo, watu fulani hudhihaki tuonyeshapo uthibitisho mwingi wa kwamba tunaishi katika “siku za mwisho.” (2 Timotheo 3:1-5) Dhihaka hizo hutimiza unabii wa Biblia unaohusu kuwapo kwa Kristo, kwa kuwa Petro aliandika hivi: “Katika siku za mwisho watakuja wadhihaki pamoja na dhihaka zao, wakiendelea kulingana na tamaa zao wenyewe na kusema: ‘Kuko wapi kuwapo kwake huku kulikoahidiwa? Kwani, kutoka siku baba zetu wa zamani walipolala katika kifo, mambo yote yanaendelea sawasawa kabisa kama kutoka mwanzo wa kuumba.’”—2 Petro 1:16; 3:3, 4.
18 Wadhihaki wa siku hizi huenda wakafikiri hivi: ‘Hakuna lolote ambalo limebadilika tangu uumbaji. Maisha yanaendelea, watu wakila, wakinywa, wakioa na wakiolewa, na kulea familia. Hata ikiwa Yesu yupo, hatatekeleza hukumu katika siku yangu.’ Wamekosea kama nini! Ikiwa kwa wakati uliopo hawafi kutokana na sababu nyinginezo, bila shaka ile siku yenye kutia hofu ya Yehova hakika itawaharibu kama tu uharibifu mkubwa katika Furiko ulivyokomesha kizazi kiovu katika siku ya Noa.—Mathayo 24:34.
Kwa Vyovyote Vile, Kaa Macho!
19. Twapaswa kuonaje utendaji wetu mbalimbali wa kufanya wanafunzi?
19 Ikiwa tu wakfu kwa Yehova, tusitiwe usingizi kamwe na kusababu kusikofaa. Huu ni wakati wa kukaa macho, kudhihirisha imani katika unabii wa kimungu, na kutekeleza utume wetu wa ‘kufanya wanafunzi kutoka kwa watu wa mataifa yote.’ (Mathayo 28:19, 20) Mfumo huu ukabilipo mwisho wao, hatungeweza kuwa na pendeleo kubwa zaidi ya lile la kumtumikia Yehova Mungu chini ya uongozi wa Yesu Kristo na kushiriki katika kazi ya ulimwenguni pote ya kuhubiri “habari njema hii ya ufalme” kabla ya mwisho kuja.—Mathayo 24:14; Marko 13:10.
20. Ni kielelezo gani kilichowekwa na Kalebu na Yoshua, na mwendo wao watudokezea nini?
20 Baadhi ya watu wa Yehova wamekuwa wakimtumikia kwa miongo mingi ya miaka, labda maisha yao yote. Na hata ikiwa tumekubali ibada ya kweli majuzi zaidi, na tuwe kama Kalebu Mwisraeli, ambaye ‘alimfuata BWANA kwa kila neno.’ (Kumbukumbu la Torati 1:34-36) Yeye na Yoshua walikuwa tayari kabisa kuingia katika Bara Lililoahidiwa muda mfupi baada ya kukombolewa kwa Israeli toka utumwa wa Misri. Hata hivyo, Waisraeli waliokuwa watu wazima kwa ujumla, walikosa imani na walilazimika kutumia miaka 40 nyikani, walipofia. Kalebu na Yoshua walivumilia magumu pamoja nao wakati wote huo, lakini hatimaye watu hao wawili waliingia bara la ahadi. (Hesabu 14:30-34; Yoshua 14:6-15) ‘Tukimfuata BWANA katika kila neno’ na kukaa macho kiroho, tutakuwa na shangwe ya kuingia ulimwengu mpya wa Mungu ulioahidiwa.
21. Tukikaa macho kiroho tutajionea nini?
21 Uthibitisho wahakikisha waziwazi kwamba twaishi katika wakati wa mwisho na kwamba siku kubwa ya Yehova i karibu. Huu sio wakati wa kulemewa na usingizi na kupuuza kufanya mapenzi ya kimungu. Tutabarikiwa ikiwa tu tutakaa macho kiroho na kutunza mavazi yetu ya utambulisho kuwa wahudumu Wakristo na watumishi wa Yehova. Na liwe azimio letu ‘kukaa macho, kusimama imara katika imani, kuendelea kama wanaume, kukua tuwe wenye uweza.’ (1 Wakorintho 16:13) Tukiwa watumishi wa Yehova, kila mmoja wetu na awe imara na mwenye moyo mkuu. Kisha tutakuwa miongoni mwa wale ambao wako tayari siku kubwa ya Yehova ishambuliapo, tukitumikia kwa uaminifu tukiwa kati ya wale wenye furaha wakaao macho.
Ungejibuje?
◻ Ungefafanuaje mavazi yetu ya nje ya kitamathali, nasi twaweza kuyatunzaje?
◻ Ni zipi baadhi ya njia za kukaa macho kiroho?
◻ Kwa nini twapaswa kutarajia wadhihaki, nasi twapaswa kuwaonaje?
◻ Twapaswa kuionaje kazi yetu ya kufanya wanafunzi katika siku hizi za mwisho?
[Blabu katika ukurasa wa 16]
Wakristo wana roho takatifu ya Mungu kuwasaidia wakae macho na watimize wajibu wao mbalimbali
[Picha katika ukurasa wa 15]
Je, umeazimia kukaa macho kiroho na kutunza mavazi yako ya nje ya kitamathali?