Je, Wenye Taabu Watapata Kuwa na Amani?

JE, UNGEPENDA kuona mwisho wa kuteseka, si kuteseka kwako tu bali pia kwa wanadamu wote? Fikiria vielelezo hivi:

Sonia ameteseka sana.a Kwanza aligundua kwamba mumeye alikuwa akifanya uzinzi kwa miaka kumi. Kisha mwana wake mchanga zaidi akaambukizwa HIV, akafa kutokana na UKIMWI. Miaka miwili baadaye yule mwana wake mwingine akawa mgonjwa, naye pia upesi akafa kutokana na UKIMWI. “Sehemu ya mwisho ya ugonjwa wake ilidumu muda mrefu sana,” Sonia akumbuka. “Alipatwa na mshuko-moyo mkubwa, akapoteza nywele zake, na hakuweza kuona vema. Ilikuwa huzuni kubwa.”

Fabiana, mwanafunzi wa chuo kikuu cha Brazili, alihangaishwa na udhalimu mbalimbali wa kijamii wa ulimwengu. Ndipo jambo la huzuni kubwa likakumba maisha yake mwenyewe. Ndugu yake aliyekuwa na mshuko-moyo, alijiua. Fabiana alipopoteza kazi yake, rafiki mmoja alipendekeza kwamba atafute pai-de-santo (mganga wa kienyeji), akisababu kwamba lazima mtu fulani awe alimroga Fabiana ili apate kuteseka hivyo! Lakini yule pai-de-santo hakuleta kitulizo chochote. Badala ya hivyo, Fabiana alihisi akiteswa-teswa, asiweze kulala kwa sababu ya majanga yake.

Taabu ya Ana ilianza mapema zaidi maishani. “Nilipokuwa na umri wa mwaka mmoja,” aeleza, “mama yangu aliniacha, hivyo nilitunzwa na nyanya yangu.” Kisha, Ana alipokuwa na umri wa miaka mitatu tu, nyanya yake akafa. Ana alipelekwa kwenye nyumba ya kulea na kutunza yatima katika Rio de Janeiro, alikokaa hadi alipofikia umri wa miaka 13. “Tulitendewa vibaya sana huko, nami nikawa mwasi,” asema. “Nilipokuwa nikikua, nilishindana na karibu kila kitu.”

Yaonekana taabu huathiri maisha ya kila binadamu katika njia moja au nyingine. Kwa kweli, sisi husikia kila siku hadithi juu ya huzuni kubwa ya kibinadamu—kila tutazamapo, kusoma, au kusikiliza habari. “Ni katika . . . muhula wetu wa uenezaji wa habari ndipo imekuwa haiwezekani kabisa kuponyoka kushambuliwa mfululizo na habari mbaya,” aandika Dakt. Mary Sykes Wylie. “Vita mbalimbali, misiba asilia, misiba mikubwa ya kiviwanda, vifo vya barabarani, uhalifu, uharamia, kutumiwa vibaya kingono, ubakaji, ujeuri wa nyumbani—yote hayo yanafanya vurugu iwe kichwa cha karne ya 20 chenye kuogofya, kinachotokea tena na tena kila siku.” Mtume Mkristo Paulo alitoa muhtasari huu halisi wa mambo wanayojionea wanadamu: “Viumbe vyote vinafuliza kupiga kite pamoja na kuwa katika maumivu pamoja hadi sasa.”—Waroma 8:22.

Namna gani wewe? Je, unapatwa na taabu? Waweza kutarajia kitulizo kipi? Je, utapata kuwa na amani ya kweli? Sonia, Fabiana, na Ana walipata faraja ya kweli na kiasi halisi cha amani! Waweza kusoma juu ya hilo kwenye makala ifuatayo.

[Maelezo ya Chini]