Je, Umeingia Ndani ya Pumziko la Mungu?
“Mtu ambaye ameingia ndani ya pumziko la Mungu amepumzika pia mwenyewe kutokana na kazi zake mwenyewe.”—WAEBRANIA 4:10.
1. Kwa nini pumziko hutamaniwa sana?
PUMZIKO. Ni neno zuri na lenye kupendeza kama nini! Kwa kuwa twaishi katika ulimwengu unaoenda kasi na wenye shughuli nyingi, wengi wetu wangekubali kwamba tungependa sana kupumzika kidogo. Vijana kwa wazee, waseja kwa waliofunga ndoa, huenda tukahisi tumekazwa sana na kuchoshwa na maisha tu ya kila siku. Kwa watu walio na vizuizi vya kimwili au udhaifu mbalimbali, kila siku hutokeza magumu. Kama vile Maandiko yasemavyo, “viumbe vyote vinafuliza kupiga kite pamoja na kuwa katika maumivu pamoja hadi sasa.” (Waroma 8:22) Haimaanishi kwamba mtu anayepumzika lazima awe mvivu. Wanadamu huhitaji kupumzika.
2. Yehova amekuwa akipumzika tangu lini?
2 Yehova Mungu mwenyewe amekuwa akipumzika. Katika kitabu cha Mwanzo, twasoma hivi: “Mbingu na nchi zikamalizika, na jeshi lake lote. Na siku ya saba Mungu alimaliza kazi yake yote aliyoifanya; akastarehe siku ya saba, akaacha kufanya kazi yake yote aliyoifanya.” Yehova aliipa “siku ya saba” umaana wa pekee, kwa kuwa rekodi hiyo iliyopuliziwa yaendelea kusema hivi: “Mungu akaibarikia siku ya saba, akaitakasa.”—Mwanzo 2:1-3.
Mungu Alipumzika, Akaacha Kufanya Kazi Yake
3. Ni sababu gani ambazo hazikumfanya Mungu apumzike?
3 Kwa nini Mungu alipumzika “siku ya saba”? Bila shaka hakupumzika kwa sababu alikuwa amechoka. Yehova ni “hodari kwa nguvu” naye “hazimii, wala hachoki.” (Isaya 40:26, 28) Wala Mungu hakupumzika kwa sababu alihitaji kuahirisha jambo au kubadili mwendo, kwa kuwa Yesu alituambia hivi: “Baba yangu amefuliza kufanya kazi hadi sasa, na mimi nafuliza kufanya kazi.” (Yohana 5:17) Kwa vyovyote, “Mungu ni Roho” naye hazuiwi na duru mbalimbali za kimwili na mahitaji ya viumbe vya kimwili.—Yohana 4:24.
4. “Siku ya saba” ilitofautianaje na zile ‘siku’ sita zilizotangulia?
4 Twaweza kupataje ufahamu wenye kina juu ya sababu iliyomfanya Mungu apumzike “siku ya saba”? Kwa kuona kwamba, ingawa alipendezwa sana na mambo aliyokuwa ametimiza kwa kile kipindi kirefu cha zile “siku” sita za uumbaji zilizotangulia, Mungu aliibariki “siku ya saba” hasa na kuitangaza kuwa ‘takatifu.’ Kamusi Concise Oxford Dictionary yafafanua neno ‘takatifu’ kuwa “-liowekwa wakfu kwa au -a kufaa (mungu au kusudi fulani la kidini).” Hivyo, Yehova alipoibariki “siku ya saba” na kuitangaza kuwa takatifu, alionyesha kwamba siku hiyo na “pumziko” lake lazima zihusiane kwa njia fulani na mapenzi yake na kusudi lake takatifu badala ya mahitaji yoyote yake. Ni uhusiano gani huo?
5. Mungu alianzisha nini katika zile ‘siku’ sita za kwanza za uumbaji?
5 Zile ‘siku’ sita za uumbaji zilizotangulia, Mungu alikuwa ameanzisha duru zote na sheria zote zinazoongoza utendaji wa dunia na kila kitu kinachoizunguka. Sasa wanasayansi wanapata kujua jinsi zote hizo zilivyobuniwa kiajabu. Kuelekea mwishoni mwa “siku ya sita,” Mungu aliwaumba wanadamu wawili wa kwanza na kuwaweka katika “bustani upande wa Mashariki wa Edeni.” Hatimaye Mungu akatangaza kusudi lake kuelekea familia ya kibinadamu duniani katika maneno haya ya kiunabii: “Zaeni, mkaongezeke, mkaijaze nchi, na kuitiisha; mkatawale samaki wa baharini, na ndege wa angani, na kila kiumbe chenye uhai kiendacho juu ya nchi.”—Mwanzo 1:28, 31; 2:8.
6. (a) Mwishoni mwa “siku ya sita,” Mungu alihisije juu ya vyote alivyokuwa ameviumba? (b) “Siku ya saba” ni takatifu katika maana gani?
6 “Siku ya sita” ya uumbaji ilipokaribia kwisha, simulizi hilo latuambia hivi: “Mungu akaona kila kitu alichokifanya, na tazama, ni chema sana.” (Mwanzo 1:31) Mungu aliridhishwa na kila kitu alichokuwa amefanya. Kwa hiyo, alipumzika, au akaacha kabisa, kazi yoyote ya uumbaji zaidi kuhusiana na dunia. Hata hivyo, ingawa bustani hiyo ya paradiso ilikuwa kamilifu na nzuri sana, ilikuwa katika eneo dogo tu, na kulikuwa na viumbe wawili tu wa kibinadamu. Ingechukua muda kabla ya dunia na familia ya kibinadamu kufikia hali ambayo Mungu alikusudia. Kwa sababu hiyo, alichagua “siku ya saba” ambayo ingeruhusu vyote alivyokuwa ameumba ‘siku’ sita zilizotangulia visitawi kupatana na mapenzi yake matakatifu. (Linganisha Waefeso 1:11.) “Siku ya saba” ikaribiapo kwisha, dunia yote itakuwa paradiso inayokaliwa milele na familia ya wanadamu wakamilifu. (Isaya 45:18) “Siku ya saba” imetengwa, au kuwekwa wakfu kwa kutimizwa kwa mapenzi ya Mungu kuhusu dunia na wanadamu. Siku hiyo ni “takatifu” katika maana hiyo.
7. (a) Mungu alipumzikaje “siku ya saba”? (b) Kila kitu kitakuwaje kufikia wakati ambapo “siku ya saba” itamalizika?
7 Kwa hiyo Mungu alipumzika “siku ya saba,” akaacha kazi yake ya uumbaji. Ni kana kwamba aliacha kabisa na kuruhusu mambo aliyoanzisha yaendelee yapaswavyo. Ana uhakika kwamba mwishoni mwa “siku ya saba,” kila kitu kitakuwa kama alivyokusudia. Hata ikiwa kumekuwako vizuizi, vitakuwa vimeshindwa. Wanadamu wote watiifu watanufaika wakati ambapo mapenzi ya Mungu yatatimizwa kihalisi. Hakuna chochote kitakachozuia hilo kwa sababu Mungu ameibariki “siku ya saba,” na kuifanya “takatifu.” Ni tazamio tukufu kama nini kwa wanadamu watiifu!
Israeli Lilishindwa Kuingia Ndani ya Pumziko la Mungu
8. Waisraeli walianza lini na jinsi gani kushika Sabato?
8 Taifa la Israeli lilinufaika kutokana na mpango wa Yehova wa kazi na kupumzika. Hata kabla ya kuwapa Waisraeli Sheria kwenye Mlima Sinai, Mungu aliwaambia kupitia Musa: “Angalieni, kwa kuwa BWANA amewapa ninyi hiyo Sabato, kwa sababu hii huwapa siku ya sita chakula cha siku mbili; kaeni kila mtu mahali pake, mtu awaye yote asiondoke mahali pake kwa siku ya saba.” Tokeo ni kwamba “hao watu wakapumzika kwa siku ya saba.”—Kutoka 16:22-30.
9. Kwa nini bila shaka sheria ya Sabato ilikuwa badiliko lililokubaliwa na Waisraeli?
9 Mpango huo ulikuwa mpya kwa Waisraeli, ambao walikuwa wametoka tu kukombolewa kutoka katika utumwa huko Misri. Ingawa Wamisri na wengine walipima wakati kwa vipindi vya siku tano hadi kumi, haielekei kuwa kwamba Waisraeli watumwa waliruhusiwa kuwa na siku ya kupumzika. (Linganisha Kutoka 5:1-9.) Kwa hiyo ni jambo linalopatana na akili kukata maneno kwamba watu wa Israeli walikubali badiliko hilo. Badala ya kuona takwa la Sabato kuwa mzigo wenye kulemea au kizuizi, walipaswa kufurahia kulitimiza. Kwa hakika, baadaye Mungu aliwaambia kwamba Sabato ingewakumbusha utumwa wao Misri na jinsi alivyowakomboa.—Kumbukumbu la Torati 5:15.
10, 11. (a) Kwa kuwa watiifu, Waisraeli wangetazamia kufurahia nini? (b) Kwa nini Waisraeli walishindwa kuingia katika pumziko la Mungu?
10 Ikiwa Waisraeli waliotoka Misri pamoja na Musa wangalikuwa watiifu, wangalikuwa na pendeleo la kuingia katika ‘nchi iliyoahidiwa izaayo maziwa na asali.’ (Kutoka 3:8) Huko wangepumzika kikweli, si siku ya Sabato tu bali katika maisha yao yote. (Kumbukumbu la Torati 12:9, 10) Lakini, haikuwa hivyo. Mtume Paulo aliandika hivi kuwahusu: “Walikuwa akina nani waliosikia na bado wakachokoza kuwe na hasira yenye uchungu? Kwa kweli, je, hawakufanya hivyo wale wote walioenda kutoka Misri chini ya Musa? Zaidi ya hayo, ni kwa akina nani Mungu alipata kuwa mwenye kuchukizwa sana kwa miaka arobaini? Je, haikuwa kwa wale waliofanya dhambi, ambao mizoga yao ilianguka nyikani? Lakini ni kwa akina nani aliapa kwamba wasiingie katika pumziko lake ila kwa wale waliotenda kwa kutotii? Kwa hiyo twaona kwamba hawakuweza kuingia kwa sababu ya ukosefu wa imani.”—Waebrania 3:16-19.
11 Ni somo lenye nguvu kama nini kwetu! Kwa sababu ya ukosefu wao wa imani katika Yehova, kizazi hicho hakikupumzika kama vile alivyokuwa amewaahidi. Badala yake, waliangamia nyikani. Hawakutambua kwamba wakiwa wazao wa Abrahamu walishirikishwa karibu-karibu na mapenzi ya Mungu ya kubariki mataifa yote ya dunia. (Mwanzo 17:7, 8; 22:18) Badala ya kufanya kazi kwa kupatana na mapenzi ya Mungu, walikengeushwa fikira kabisa na tamaa za kidunia na za kibinafsi. Na tusiangukie mwendo kama huo kamwe!—1 Wakorintho 10:6, 10.
Pumziko Lingalipo
12. Ni tazamio gani ambalo bado lilikuwako kwa Wakristo wa karne ya kwanza, nao wangeweza kulifikiaje?
12 Baada ya kuonyesha kushindwa kwa Israeli kuingia katika pumziko la Mungu kwa sababu ya kukosa imani, Paulo aligeuzia fikira waamini wenzake. Kama ionwavyo kwenye Waebrania 4:1-5, yeye aliwahakikishia kwamba “ahadi imebaki ya kuingia ndani ya pumziko [la Mungu].” Paulo aliwahimiza wadhihirishe imani katika “habari njema . . . kwa maana sisi ambao tumedhihirisha imani twaingia katika pumziko.” Kwa kuwa tayari dhabihu ya fidia ya Yesu ilikuwa imeondoa Sheria, Paulo hakuwa akirejezea pumziko la kimwili siku ya Sabato. (Wakolosai 2:13, 14) Kwa kunukuu Mwanzo 2:2 na Zaburi 95:11, Paulo alikuwa akiwahimiza Wakristo Waebrania waingie ndani ya pumziko la Mungu.
13. Akinukuu Zaburi 95, kwa nini Paulo alivuta fikira kwenye neno “leo”?
13 Uwezekano wa kuingia ndani ya pumziko la Mungu ulipaswa kuwa “habari njema” kwa Wakristo Waebrania, kama vile pumziko la Sabato lilivyopaswa kuwa “habari njema” kwa Waisraeli waliowatangulia. Kwa sababu hiyo, Paulo aliwahimiza waamini wenzake wasirudie kosa ambalo Waisraeli walifanya nyikani. Akitaja andiko ambalo sasa ni Zaburi 95:7, 8, alielekeza fikira kwenye neno “leo,” ingawa muda mrefu ulikuwa umepita tangu Mungu apumzike, aache kuumba. (Waebrania 4:6, 7) Paulo alimaanisha nini? Alimaanisha kwamba “siku ya saba,” ambayo Mungu alikuwa ametenga ili aruhusu kusudi lake kuhusu dunia na wanadamu litimizwe kikamili, bado ilikuwa ikiendelea. Kwa hiyo, ilikuwa muhimu kwa Wakristo wenzake wafanye kazi sambamba na kusudi hilo badala ya kujishughulisha na kufuatia vitu vya kibinafsi. Alitoa onyo tena: “Msifanye mioyo yenu kuwa migumu.”
14. Paulo alionyeshaje kwamba “pumziko” la Mungu lilikuwako bado?
14 Kwa kuongezea, Paulo alionyesha kwamba “pumziko” lililoahidiwa halikuwa tu jambo la kukaa katika Bara Lililoahidiwa chini ya uongozi wa Yoshua. (Yoshua 21:44) “Kwa maana kama Yoshua angalikuwa amewaongoza kuingia katika mahali pa pumziko,” Paulo asema, “Mungu hangalikuwa amesema baadaye juu ya siku nyingine.” Kwa sababu ya hilo, Paulo aliongeza kusema hivi: “Kumebaki pumziko la sabato kwa watu wa Mungu.” (Waebrania 4:8, 9) “Pumziko [hilo] la sabato” ni nini?
Ingia Ndani ya Pumziko la Mungu
15, 16. (a) Maneno “pumziko la sabato” yamaanisha nini? (b) Yamaanisha nini ‘mtu kupumzika kutokana na kazi yake mwenyewe’?
15 Maneno “pumziko la sabato” yametafsiriwa kutoka katika neno la Kigiriki linalomaanisha “kushika sabato.” (Kingdom Interlinear) Profesa William Lane ataarifu hivi: “Maneno hayo yalipata tofauti yake hususa iliyofichika kutokana na agizo la Sabato lililositawi katika dini ya Kiyahudi kwa kutegemea Kutoka 20:8-10, ambapo ilikaziwa kwamba pumziko na sifa huandamana pamoja . . . [Hilo] hukazia ile sehemu ya pekee ya shughuli za sherehe na shangwe, ikionyeshwa katika ibada na sifa kwa Mungu.” Kwa hiyo basi, pumziko lililoahidiwa si kutofanya kazi tu. Ni badiliko la kuacha kazi yenye kuchosha, isiyo na kusudi na kufanya utumishi wenye shangwe unaomheshimu Mungu.
16 Hilo lathibitishwa na maneno ya Paulo yanayofuata: “Kwa maana mtu ambaye ameingia ndani ya pumziko la Mungu amepumzika pia mwenyewe kutokana na kazi zake mwenyewe.” (Waebrania 4:10) Mungu hakupumzika siku ya saba ya uumbaji kwa sababu ya kuchoka. Badala yake, aliacha kabisa kazi ya kuumba vitu vya kidunia ili aruhusu kazi yake isitawi na kufikia utukufu kamili, na kumletea sifa na heshima. Tukiwa sehemu ya uumbaji wa Mungu, sisi pia twapaswa kufaa katika mpango huo. Twapaswa ‘kupumzika kutokana na kazi zetu wenyewe,’ yaani, tungeacha kujaribu kujitetea mbele za Mungu katika jitihada ya kupata wokovu. Badala yake, twapaswa kuwa na imani kwamba wokovu wetu wategemea dhabihu ya fidia ya Yesu Kristo, ambayo kwayo vitu vyote vitapatanishwa tena na kusudi la Mungu.—Waefeso 1:8-14; Wakolosai 1:19, 20.
Neno la Mungu Hukazia Nguvu
17. Twapaswa kuepuka mwendo gani uliofuatiwa na Israeli wa kimwili?
17 Waisraeli walishindwa kuingia katika pumziko la Mungu kwa sababu ya ukosefu wao wa utii na imani. Kwa sababu hiyo, Paulo aliwahimiza Wakristo Waebrania hivi: “Kwa hiyo acheni sisi tufanye yote kabisa tuwezayo ili kuingia ndani ya pumziko hilo, kwa kuhofu yeyote asije akaanguka katika kiolezo kilekile cha kutotii.” (Waebrania 4:11) Wayahudi walio wengi wa karne ya kwanza hawakudhihirisha imani katika Yesu, na wengi wao waliteswa sana wakati mfumo wa mambo wa Kiyahudi ulipofikia mwisho wake katika mwaka wa 70 W.K. Ni jambo la maana sana kama nini kwamba tuwe na imani leo katika neno la Mungu la ahadi!
18. (a) Paulo alitoa sababu gani za kudhihirisha imani katika neno la Mungu? (b) Neno la Mungu likoje “kali kuliko upanga wowote wenye makali kuwili”?
18 Tuna sababu zinazofaa za kudhihirisha imani katika neno la Yehova. Paulo aliandika hivi: “Neno la Mungu liko hai na hukazia nguvu na ni lenye makali zaidi kuliko upanga wowote wenye makali kuwili na hudunga hata kufikia kugawanya nafsi na roho, na viungo na uloto wavyo, na ni lenye kuweza kufahamu fikira na makusudio ya moyo.” (Waebrania 4:12) Naam, neno la Mungu, au ujumbe wake, ni ‘mkali zaidi kuliko upanga wowote wenye makali kuwili.’ Wakristo Waebrania walihitaji kukumbuka mambo yaliyowapata baba zao wa kale. Kwa kupuuza hukumu ya Yehova kwamba wangeangamia nyikani, walijaribu kuingia Bara Lililoahidiwa. Lakini Musa aliwaonya hivi: “Mwamaleki na Mkanaani wako mbele yenu, nanyi mtaanguka kwa upanga.” Waisraeli waliposonga mbele kwa ushupavu, “Mwamaleki, na Mkanaani waliokaa huko mlimani, wakatelemka, wakawapiga na kuwaangusha, hata kufikilia Horma.” (Hesabu 14:39-45) Neno la Yehova lina ukali kuliko upanga wowote wenye makali kuwili, na yeyote apuuzaye kimakusudi neno hilo bila shaka atapatwa na matokeo yake.—Wagalatia 6:7-9.
19. Neno la Mungu ‘hudunga’ kwa nguvu kiasi gani na kwa nini twapaswa kukubali kutoa hesabu kwa Mungu?
19 Neno la Mungu “hudunga hata kufikia kugawanya nafsi na roho, na viungo na uloto wavyo” kwa nguvu kama nini! Hupenya mawazo na nia za watu, likidunga kitamathali kufikia uloto wa sehemu ya ndani kabisa ya mifupa! Ingawa Waisraeli waliowekwa huru kutoka katika utumwa wa Misri walikuwa wamekubali kushika Sheria, Yehova alijua kwamba mioyoni mwao hawakuthamini maandalizi na matakwa yake. (Zaburi 95:7-11) Badala ya kufanya mapenzi yake, walihangaikia kutimiza tamaa zao za kimwili. Kwa hiyo, hawakuingia ndani ya pumziko lililoahidiwa la Mungu bali waliangamia nyikani. Twahitaji kuzingatia hilo, kwa kuwa “hakuna kiumbe kisichokuwa dhahiri machoni [pa Mungu], bali vitu vyote viko uchi na vikiwa vimefunuliwa wazi machoni pake ambaye kwake sisi tuna kutoa hesabu.” (Waebrania 4:13) Kwa hiyo na tutimize wakfu wetu kwa Yehova na “[tusirudi] nyuma kwenye uangamivu.”—Waebrania 10:39.
20. Ni nini kilicho mbele, nasi twapaswa kufanya nini sasa ili kuingia ndani ya pumziko la Mungu?
20 Ingawa “siku ya saba”—siku ya pumziko la Mungu—ingali yaendelea, yu chonjo kuona kutimizwa kwa kusudi lake kuhusu dunia na wanadamu. Karibuni sana, Mfalme wa Kimesiya, Yesu Kristo, atachukua hatua ya kuondoa duniani wapinzani wote wa mapenzi ya Mungu, kutia na Shetani Ibilisi. Wakati wa Utawala wa Miaka Elfu wa Kristo, Yesu na watawala wenzake 144,000 wataifanya dunia na wanadamu wafikie kiwango alichokusudia Mungu. (Ufunuo 14:1; 20:1-6) Sasa ndio wakati wetu wa kuthibitisha kwamba maisha zetu hukazia mapenzi ya Yehova Mungu. Badala ya kutafuta kujitetea mbele za Mungu na kuendeleza mapendezi yetu wenyewe, sasa ndio wakati wetu wa ‘kupumzika kutokana na kazi zetu wenyewe’ na kutumikia masilahi ya Ufalme kwa moyo wote. Kwa kufanya hivyo na kwa kuendelea kuwa waaminifu kwa Baba yetu wa kimbingu, Yehova, tutakuwa na pendeleo la kupata manufaa za pumziko la Mungu sasa na milele.
Je, Waweza Kueleza?
◻ Mungu alipumzika “siku ya saba” kwa kusudi gani?
◻ Ni pumziko gani ambalo Waisraeli wangeweza kupata, lakini kwa nini walishindwa kuingia ndani ya pumziko hilo?
◻ Twapaswa kufanya nini ili kuingia ndani ya pumziko la Mungu?
◻ Neno la Mungu likoje hai, lenye nguvu, na kali kuliko upanga wowote wenye makali kuwili?
[Picha katika ukurasa wa 16, 17]
Waisraeli walishika Sabato, lakini hawakuingia ndani ya pumziko la Mungu. Je, wajua ni kwa nini?